နေပြည်တော်ကောင်စီနယ်မြေ ပုပ္ပသီရိမြို့နယ် အမှတ် ၃ စစ်ကြောရေးနဲ့ တည်းခိုရေးတပ်မှာ ဇန်နဝါရီ ၁၁ ရက် မနက်ပိုင်းက ရွေးကောက်ပွဲနဲ့ပတ်သက်ပြီး ဌာနဆိုင်ရာဝန်ထမ်းတွေကို စစ်တပ်က သင်တန်းပေးနေတယ်လို့ မြို့ခံတွေဆီက သိရပါတယ်။
စစ်ကောင်စီတပ်ထဲမှာလုပ်တဲ့ ရွေးကောက်ပွဲနဲ့ပတ်သက်တဲ့ သင်တန်းကို လာတက်ကြသူတွေဟာ လက်ထောက်ညွှန်ကြားရေးမှူးနဲ့ ဦးစီးအရာရှိအဆင့်တွေ ဖြစ်တယ်လို့ မြို့ခံတဦးက ဒီဗွီဘီကို ပြောပါတယ်။
“ရွေးကောက်ပွဲကော်မရှင်က လူတွေရော သင်တန်းလာတက်တာတော့ လူစုံတယ်။ လဝကရော ထွေအုပ်ရော၊ အပြင်မှာ မလုပ်ရဲဘူး၊ စစ်တပ်ထဲမှာလုပ်တာ။”
ရွေးကောက်ပွဲကော်မရှင်ဥက္ကဋ္ဌ ဦးသိန်းစိုး ဦးဆောင်ပြီး ရွေးကောက်ပွဲနဲ့ပတ်သက်လို့ လဝက၊ ထွေအုပ်နဲ့ ရပ်ကျေးအုပ်ချုပ်ရေးကို သင်တန်းစပေးနေတာဖြစ်တယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။
“သင်တန်းက လေးရက်၊ စစ်တပ်က ဘာတွေသင်ပေးမလဲတော့ မသိဘူး။ တက်တဲ့သူတွေကလည်း လူဦးရေနဲ့ မဲစာရင်းပဲပြောတယ်။ ကျနော်တို့ကြားတာက လူဦးရေစာရင်းကောက်ရင်း UG လှုပ်ရှားမှုတွေပါ ထောက်လှမ်းလို့ရအောင် သင်တန်းပေးနေတယ်လို့ ကြားတယ်။”
အဆိုပါသင်တန်းကို ရွေးကောက်ပွဲကော်မရှင်ဝန်ထမ်း၊ လဝကဦးစီးဌာနနဲ့ ထွေအုပ်မှ လက်ထောက်ညွှန်ကြားရေးမှူး၊ ဦးစီးအရာရှိ ၁၀၀ ကျော် တက်ခဲ့တယ်လို့ လဝကဦးစီးဌာနမှ အမည်မဖော်လိုသူတဦးက ဒီဗွီဘီကို ပြောပါတယ်။
“လူရွေးခေါ်တာဖြစ်မယ်၊ ကျမတို့ဌာနမှာ ဦးစီးအရာရှိတွေ အများကြီးပဲ၊ မပါဘူး။ လဝကဆိုပေမဲ့ စစ်တပ်ကအရာရှိလည်း ဖြစ်ချင်ဖြစ်နေမှာ။”
လတ်တလောမှာ နေပြည်တော် အပါအဝင် ပြည်နယ်နဲ့ တိုင်းအသီးသီးမှာ ဇန်နဝါရီ ၉ ရက်ကစပြီး စစ်တပ်အစောင့်အရှောက်နဲ့ လူဦးရေစာရင်း ကောက်နေပေမဲ့ မြို့နယ်တချို့မှာ ပစ်ခတ်မှုနဲ့ ဗုံးပေါက်ကွဲမှုတွေဖြစ်လို့ ဒုရဲအုပ်တဦးသေဆုံးပြီး စစ်ကောင်စီတပ်သားတချို့ သေဆုံးခဲ့တာလည်း ရှိပါတယ်။
မွန်ပြည်နယ်၊ ရေးမြို့နယ်က စစ်ကောင်စီလက်အောက်ခံ လက်နက်ကိုင်တွေဖြစ်တဲ့ စစ်တပ်နဲ့ ရဲတပ်ဖွဲ့ဝင်တွေအပြင် ဌာနဆိုင်ရာ အရပ်ဘက်ဝန်ထမ်းတွေပါ မေ ၁၈ ရက်နေ့ကစတင်ပြီး လက်ရှိတာဝန်ကနေ ရပ်စဲကာ CDM ပြုလုပ်သွားကြဖို့ ရေးဘီးလူးအဖွဲ့သားတွေက လူမှုကွန်ရက်စာမျက်ကတဆင့် သတိပေးလိုက်ပါတယ်။
"စစ်ကောင်စီရဲ့ လက်ပါးစေ ဝန်ထမ်းတွေ CDM ပြုလုပ်ထားကြပါ။ နောက်ဆုံးသတိပေးခြင်းဖြစ်ပြီး Non CDM ပဲ ဆက်လုပ်နေပါက နောက်ဖြစ်လာမယ့် အကျိုးဆက်တွေ တာဝန်ယူသွားမှာ မဟုတ်ဘူး" လို့ ရေးဘီလူးအဖွဲ့ တာဝန်ရှိသူတဦးက ပြောပါတယ်။
တချို့ ဌာနဆိုင်ရာ ဝန်ထမ်းတွေကတော့ အခုလို စစ်တပ်ကို အာဏာဖီဆန်ဖို့ CDM လုပ်ဖို့ ဆန္ဒရှိနေပေမဲ့ မိသားစုရဲ့ အခက်အခဲ အခြေနေတွေကြောင့် Non CDM အနေနဲ့သာ ရှိနေတာလို့ အမည်မဖော်လိုတဲ့ ဝန်ထမ်းတဦးက ပြောပါတယ်။
ရေးဘီလူး အဖွဲ့သားတွေဟာ စစ်ကောင်စီ လက်အောက်ခံ အဖွဲ့အစည်းတွေကို အကြိမ်ကြိမ် သတိပေးထားပြီးမှ စစ်တပ်၊ ရဲသတင်းပေးတွေနဲ့ အုပ်ချုပ်ရေးမှူး၊ လဝက၊ ကျောင်းဆရာမ အပါအဝင် ၁ ဒါဇင်နီးပါးလောက်ကို သုတ်သင်ထားခဲ့တာပါ။
စစ်ကောင်စီတပ်ဘက်ကတော့ ရေးဘီလူးအဖွဲ့သားတွေရဲ့ လုပ်ရပ်ဟာ အကြမ်းဖက်လုပ်ရပ်လို့ သတ်မှတ်ထားပြီး အဲဒီအဖွဲ့ကို သတင်းပေးနိုင်တဲ့သူကို ဆုကြေးငွေပေးမယ်လို့ တရားဝင် ထုတ်ပြန်ထားပေမယ့်လည်း ဒီနေ့အထိ ရေးဘီလူး အဖွဲ့သားတွေက စစ်ကောင်စီရဲ့ ဒေါက်တိုင်မှန်သမျှ တိုက်ခိုက်နေဆဲ ဖြစ်ပါတယ်။
