ညွှန်ကြားချက် မလိုက်နာသူ

April 4, 2020

စစ်ကိုင်းတိုင်း၌ Covid-19 ညွှန်ကြားချက် မလိုက်နာသဖြင့် အမှုဖွင့်ခံထားရသူ ၁၀ ဦးကျော်ရှိ

စစ်ကိုင်းတိုင်းမှာ တပတ်တာကာလအတွင်း ကိုရိုနာဗိုင်းရပ်စ်နဲ့ ပတ်သက်ပြီး သက်ဆိုင်ရာက ချမှတ်ထားတဲ့ စည်းမျဉ်းစည်းကမ်း ညွှန်ကြားချက် မလိုက်နာတာကြောင့် အမှုဖွင့်ထားသူ ၁၀ ဦးကျော်ပြီလို့ သိရပါတယ်။ တမူး၊ ရေဦး၊ အရာတော်၊ ဝက်လက်၊ ပုလဲ၊ ယင်းမာပင်၊ ကျွန်းလှ စတဲ့ မြို့နယ် ၇ မြို့နယ်က လူ ၁၀ ဦးကျော်ကို အမှုဖွင့်ထားတာဖြစ်ပြီး အဲဒီထဲက တချို့ကို ငွေဒဏ်၊ ထောင်ဒဏ်တွေ ချမှတ်နေတာပါ။ စစ်ကိုင်းတိုင်းဒေသကြီးအတွင်း လတ်တလော ဖြစ်ပွားနေတဲ့ ကိုရိုနာဗိုင်းရပ်စ်ရောဂါနဲ့ ပတ်သက်လို့ ထုတ်ပြန်ထားတဲ့ အမိန့်၊ ညွှန်ကြားချက်တွေကို လိုက်နာမှုမရှိတဲ့ နေရပ်ပြန်လာသူတွေ၊ ကိုရိုနာဗိုင်းရပ်စ်ရောဂါ ကာကွယ်ထိန်းချုပ်ရေးအတွက် ဆောင်ရွက်နေတဲ့ကြ ဝန်ထမ်းတွေ၊ လူမှုရေးအသင်းအဖွဲ့တွေကို တာဝန်ဝတ္တရားနှောင့်ယှက်ကြတဲ့ ဒေသခံအချို့ကို တာဝန်ရှိသူတွေကနေ အမှုဖွင့်ပြီး ငွေဒဏ်၊ ထောင်ဒဏ်တွေနဲ့ ရက်တိုအတွင်း အမိန့်ချအပြစ်ပေးတာတွေ ခပ်စိပ်စိပ် ပြုလုပ်နေပါတယ်။ ဧပြီလ ၂ ရက်နေ့က ပုလဲမြို့နယ်ကို နေရပ်ပြန်လာလို့ သီးသန့်စောင့်ကြည့်ခံနေရသူ မင်းနိုင် ဆိုသူကို ထောင်ဒဏ် ၆ လချမှတ်ခဲ့ပါတယ်။ ဧပြီလ ၃ ရက်နေ့ကလည်း တမူးမြို့နယ်တရားရုံးကနေ တားမြစ်မိန့်မလိုက်နာဘဲ မင်္ဂလာဆောင်ခဲ့တဲ့ သတို့သား ထန်လင်းရှိန်(ခ)လင်းရှိန်ကို ထောင်ဒဏ် ၆ လ ချမှတ်ထားပါတယ်။ ဒါ့အပြင် ဖခင်ဖြစ်သူ ဦးထန်ခိုလွန်ကိုလည်း နိုင်ငံခြားသားများ မှတ်ပုံတင်ရေး နည်းဥပဒေ အက်ဥပဒေပုဒ်မ ၅(၁) အရ ငွေဒဏ် ၁၀ သိန်း၊ သို့မဟုတ် ထောင်ဒဏ် ၆ လ ကျခံစေဖို့ အမိန့်ချခဲ့ပါတယ်။  ဒါ့အပြင် ဧပြီလ ၃ ရက်နေ့ကလည်း ယင်းမာပင်မြို့နယ်မှာ ၁၄ ရက် စောင့်ကြည့်ခံနေရတဲ့ နေရပ်ပြန် ဇင်မောင်မောင် ဆိုသူက အရက်သေစာသောက်စားပြီး လျှောက်သွားနေတဲ့အတွက် ဘေး/စီ ဥပဒေပုဒ်မ ၂၆ အရ ထောင်ဒဏ်တနှစ်ကျခံစေဖို့ မြို့နယ်တရားရုံးကနေ အပြီးသတ် အမိန့်ချမှတ်ထားပါတယ်။  ကျွန်းလှမြို့နယ်မှာလည်း မတ်လ ၂၇ ရက်နေ့က မင်္ဂလာပွဲ ကျင်းပခဲ့လို့ သတို့သား၊ သတို့သမီးနဲ့ ဖခင်ဖြစ်သူကို ဘေး/စီဥပဒေပုဒ်မ ၃၀(က)နဲ့ အမှုဖွင့်ထားပါတယ်။ ပုလဲမြို့နယ် ၂ ဦး၊ ယင်းမာပင်မြို့နယ်၊ ရေဦးမြို့နယ်နဲ့ ဝက်လက်မြို့နယ်တို့က ၁ ဦးစီ ကိုလည်း အမှုဖွင့်အရေးယူတာတွေ လုပ်ဆောင်ထားပါတယ်။ အမိန့်ညွှန်ကြားချက် မလိုက်နာရင် အခုလို သဘာဝဘေးအန္တရာယ်ဆိုင်ရာဥပဒေ၊ ကူးစက်ရောဂါ ကာကွယ်နှိမ်နင်းရေးဥပဒေတွေနဲ့ အရေးယူမယ့်အကြောင်းကိုလည်း မြို့နယ်အလိုက် အစိုးရအဖွဲ့ကနေ ကြေညာချက်တွေ ထုတ်ပြန်ထားပါတယ်။  အထူးသဖြင့် နေရပ်ပြန်လာသူတွေ၊ ရောဂါရှိသူနဲ့ ထိတွေ့ဆက်ဆံခဲ့သူတွေကို အဓိက စောင့်ကြပ်နေပြီး လက်ဖက်ရည်ဆိုင်၊ စားသောက်ဆိုင်၊ အရက် ဘီယာဆိုင်၊ ထမင်းဆိုင်တွေကိုလည်း ပါဆယ်စနစ်နဲ့သာ ရောင်းချဖို့ ညွှန်ကြားထားပါတယ်။  ဒါ့အပြင် ကာရာအိုကေ၊ အနှိပ်ခန်းတွေကိုလည်း ပိတ်ထားဖို့ ညွှန်ကြားထားပြီး မလိုက်နာရင် အရေးယူမယ်လို့လည်း အမိန့်စာ ထုတ်ပြန်ထားတာပါ။ တိုင်းအတွင်း ရောဂါကူးစက်သူ မရှိသေးပေမယ့် ရောဂါရှိသူ လာရောက်ခဲ့တာကြောင့် တချို့နေရာတွေကို Lock Down ချထားပြီး အဝင်အထွက်ပိတ်ထားပါတယ်။
2 years Ago

April 3, 2020

ပုလဲမြို့နယ်တွင် COVID-19 ညွှန်ကြားချက် မလိုက်နာသူကို ထောင်ဒဏ် ၆ လ ချမှတ်

ပုလဲမြို့နယ်မှာ ကိုဗစ်ကာကွယ်ထိန်းချုပ်ရေး လုပ်ဆောင်နေတာကို ဝတ္တရားနှောင့်ယှက်တဲ့ လူနှစ်ဦးကို ဖမ်းဆီးထားပြီး အမိန့်ညွှန်ကြားချက်မလိုက်နာတဲ့ နေရပ်ပြန် ၁ ဦးကို ထောင်ဒဏ် ၆ လ ချမှတ်ခဲ့တယ်လို့ သိရပါတယ်။ စစ်ကိုင်းတိုင်း၊ ပုလဲမြို့၊ အထက်တန်းကျောင်းမှာ နေရပ်ပြန်လာသူတွေကို သီးသန့်စောင့်ကြည့်စခန်း ဖွင့်လှစ်ထားပါတယ်။  မတ်လ ၃၁ ရက်နေ့က သီးသန့်စောင့်ကြည့်စခန်းကို ရောက်ရှိလာတဲ့ အသက် ၂၈ နှစ်အရွယ် မင်းနိုင်ဆိုသူက ထိုင်းနိုင်ငံကနေ ပြန်လည်ရောက်ရှိလာခဲ့ပြီး သီးသန့်စခန်းမှာ နေစဉ် ကိုဗစ်ကာကွယ်ရေး လုပ်ဆောင်နေသူတွေကို ရန်ရှာတာ၊ အမိန့်ညွှန်ကြားချက်တွေ မလိုက်နာတာတွေ ပြုလုပ်ခဲ့တဲ့အတွက် မြို့နယ်ထွေအုပ်က တရားလိုပြုလုပ်ကာ ဧပြီလ ၁ ရက်နေ့က မြို့မရဲစခန်းမှာ ဘေးအန္တရာယ်ဆိုင်ရာ စီမံခန့်ခွဲမှုဥပဒေနဲ့ အမှုဖွင့်ခဲ့ပါတယ်။  ဒီအမှုကိုတော့ မြို့နယ်တရားရုံးက အပြစ်ရှိကြောင်းထင်ရှားလို့ဆိုပြီး ဧပြီလ ၂ ရက်နေ့မှာ ထောင်ဒဏ် ၆ လ ချမှတ်ခဲ့ပါတယ်။  ဒါ့အပြင် ပုလဲမြို့နယ်အတွင်းက နှောရိုးကျေးရွာမှာ စေတနာ့ဝန်ထမ်းတွေ၊ တာဝန်ရှိသူတွေက ကာကွယ်ဆေးဖျန်းလုပ်ငန်းတွေ လုပ်ကိုင်နေချိန်မှာ အမျိုးသားတဦးက ဝတ္တရားနှောင့်ယှက်မှု ပြုလုပ်ခဲ့ပြီး ကြာစည်ကျေးရွာမှာလည်း မူးယစ်ရမ်းကားသူတဦးက ကိုဗစ်ကာကွယ်ရေး လုပ်နေသူတွေကို ဝတ္တရားနှောင့်ယှက်ခဲ့တာကြောင့် ၂ ဦးစလုံးကို ဖမ်းဆီးထားတယ်လို့ သိရပါတယ်။ ပုလဲမြို့နယ် တိုင်းဒေသကြီးကိုယ်စားလှယ် ဦးဇော်ထက်က “ထိုင်းက ပြန်လာတဲ့သူက စာသင်ကျောင်း Quarantine မှာထားပြီး ကျန်တဲ့ လူ ၅၀ လောက်နဲ့အတူ စောင့်ကြည့်တာပေါ့။ အဲဒါမှာ စည်းကမ်းမလိုက်နာဘဲ ရန်ပြုတာတွေလုပ်လို့ မြို့နယ်အုပ်ချုပ်ရေးမှုးက အမှုဖွင့်ပြီး အပြစ်ပေးတာပေါ့။ နောက်ထပ် ၂ ယောက်ကလည်း ဝတ္တရားနှောင့်ယှက်လို့ အချုပ်ထဲ ထည့်ထားတာ။ သူတို့ကိုတော့ တောင်းပန်ပြီး ခံဝန်လက်မှတ်ထိုးပေါ့။ မတောင်းပန်ဘူး။ ခံဝန်မထိုးနိုင်ဘူးဆိုရင် အမှုဖွင့်မှာပေါ့။ သူတို့ကတော့ Quarantine လုပ်တဲ့ထဲ မပါတဲ့သူတွေ ဖြစ်နေတယ်။ လောလောဆယ်တော့ ရမန်ယူထားတယ်” လို့ ပြောပါတယ်။ ပုလဲမြို့နယ်မှာ တရုတ်၊ ထိုင်းတို့ကနေ နေရပ်ပြန်လာသူ အနည်းဆုံး ၇၀၀ ဝန်းကျင်ရှိပြီး ရွာအလိုက်၊ ဒေသအလိုက် သီးသန့်ခွဲထားကာ စောင့်ကြည့်တာတွေ ပြုလုပ်နေကြပါတယ်။  ဒါပေမဲ့ ကျေးရွာတွေအတွက်၊ ကျေးလက်ကျန်းမာရေးဝန်ထမ်းတွေအတွက် သာမိုမီတာ အခက်အခဲလည်း ရှိနေတယ်လို့ ဆိုပါတယ်။ သာမိုမီတာက ငွေရှိပေမယ့် ဝယ်ယူဖို့ ခက်ခဲတာ၊ ရှိတဲ့ တချို့ကလည်း အရည်အသွေးမကောင်းတာတွေ ဖြစ်နေတယ်လို့ ဆိုပါတယ်။ လက်ရှိအချိန်ထိတော့ ပုလဲမြို့နယ်မှာ သံသယလူနာ မရှိသေးပါဘူး။ စစ်ကိုင်းတိုင်းမှာ ကိုရိုနာဗိုင်းရပ်စ်နဲ့ပတ်သက်တဲ့ ကျန်းမာရေးနှင့် အားကစားဝန်ကြီးဌာန၊ တိုင်းအစိုးရ၊ ဒေသအာဏာပိုင်တွေရဲ့ အမိန့်ညွှန်ကြားချက်တွေကို မလိုက်နာလို့ အရေးယူတာတွေ အနည်းဆုံး ၆ ဦးထက်မနည်း ရှိနေပြီ ဖြစ်ပါတယ်။  Quarantine စခန်းကနေ ထွက်ပြေးတဲ့ ရေဦးက စောင့်ကြည့်သူ ၁ ဦး၊ ရပ်ကျေးအုပ်ချုပ်ရေးမှုးကို ကိုယ်ထိလက်ရောက်ပြုမူတဲ့ အရာတော်မြို့နယ်က အမျိုးသား ၁ ဦး၊ ဝက်လက်မြို့နယ်က စောင့်ကြည့်သူ ၁ ဦးတို့ကို သက်ဆိုင်ရာက အမှုဖွင့် အရေးယူထားပါတယ်။ ဒါ့အပြင် ယင်းမာပင်မြို့နယ်မှာလည်း ဧပြီ ၂ ရက်နေ့က အမိန့်ညွှန်ကြားချက် rလိုက်နာတဲ့ အသက် ၃၄ နှစ်အရွယ် ကိုဇော်ဝင်းနဲ့ အသက် ၃၃ နှစ်အရွယ် ကိုဇင်မောင်မောင်တို့ကို ဒုမြို့နယ်အုပ်ချုပ်ရေးမှုးက အမှုဖွင့်ထားပါတယ်။  ဒါ့အပြင် တမူးမြို့နယ်မှာ တားမြစ်ချက်ကို မလိုက်နာဘဲ မင်္ဂလာဆောင်ခဲ့တဲ့ သတို့သားကိုလည်း အမှုဖွင့် အရေးယူတာတွေ ရှိခဲ့ပါတယ်။
2 years Ago
Up