ညမထွက်ရအမိန့်

September 25, 2022

စစ်တွေတွင် ညမထွက်ရအမိန့်ထုတ်ပြန်

ရခိုင်ပြည်နယ်၊ စစ်တွေမြို့နယ်ကို စက်တင်ဘာ ၂၄ ရက်ကစလို့ ည ၁၀ နာရီကနေ မနက် ၅ နာရီအထိ ညမထွက်ရ အမိန့်ထုတ်ပြန်ထားပါတယ်။

စစ်တွေမြို့မှာညမထွက်ကြဖို့ ရပ်ကွက်အုပ်ချုပ်ရေးမှူးတွေက လိုက်လံကြေညာနေတယ်လို့ စစ်တွေမြို့ ဓညဝတီရပ်ကွက်က ဒေသခံပြည်သူ တစ်ယောက်က ပြောပါတယ်။

ရပ်ကွက် အုပ်ချုပ်ရေးမှူးတစ်ယောက်က “စက်တင်ဘာလ ၂၄ ရက်နေ့ ညနေပိုင်းမှာ ထွေအုပ်ရုံးက ညွှန်ကြားစာတစောင်ရောက်လာပြီး စက်တင်ဘာလ ၂၅ ရက်နေ့ မနက် ၁၀ နာရီမှာလည်း ရပ်ကျေးအုပ်ချုပ်ရေးမှူး အားလုံးကို အစည်းဝေးခေါ်ထားတယ်”လို့ ပြောပါတယ်။

အဲဒီညွှန်ကြားစာထဲမှာတော့ စစ်တွေမြို့ပေါ်ရပ်ကွက်တွေအပါအဝင် ကျေးရွာအုပ်စုတွေ အားလုံးမှာရှိတဲ့ စားသောက်ဆိုင်၊ KTV၊ အရက်ဆိုင်၊ စျေးဆိုင်၊ လက်ဖက်ရည်ကော်ဖီဆိုင်၊ ထမင်းဆိုင်၊ စတိုးဆိုင်၊ အအေးဆိုင်နဲ့ လမ်းဘေးဆိုင်တွေကို နေစဥ် ည ၁၀ နာရီမထိုးခင်ပိတ်သိမ်းဖို့ အမိန့်ထုတ်ထားတယ်လို့ သိရပါတယ်။

အဲဒီစျေးဆိုင်တွေအားလုံးကို သက်ဆိုင်ရာ ရပ်/ ကျေးအုပ်ချုပ်ရေးမှူးတွေက ကြိုတင်အသိပေးဖို့နဲ့ လိုက်နာမှုမရှိရင် တည်ဆဲဥပဒေအရ အရေးယူမယ်လို့ မြို့နယ်ထွေအုပ်အစည်းဝေးက ဆုံးဖြတ်ထားတာလို့ ဆိုပါတယ်။

ရခိုင်ပြည်နယ်အတွင်းမှာ စစ်ကောင်စီတပ်တွေနဲ့ ရက္ခိုင့်တပ်တော် (အေအေ)တို့ တကျော့ပြန်တိုက်ပွဲတွေ ပြန်ဖြစ်ပြီးနောက်ပိုင်းမှာ မြို့အများအပြားမှာ စစ်ကောင်စီက ဧည့်စာရင်းစစ်ဆေးတာ၊ အပြစ်မဲ့ ပြည်သူတွေကို မတရားဖမ်းဆီးတာတွေ၊ ခရီးသည်တင်ယာဥ်တွေနဲ့ ကုန်တင်ယာဥ်တွေ ကုန်းလမ်း၊ ရေလမ်းတွေအားလုံးကို ပိတ်ဆို့တာတွေ ဆက်တိုက်ပြုလုပ်နေပါတယ်။

20 hours Ago

September 14, 2022

ဘုတလင်တွင် စစ်ကောင်စီက ညမထွက်ရအမိန့် ထုတ်ပြန်

စစ်ကိုင်းတိုင်း၊ ဘုတလင်မြို့ပေါ်မှာ စစ်ကောင်စီက ဒီနေ့ စက်တင်ဘာ ၁‌၄ ရက် ညနေပိုင်းမှာ ညမထွက်ရအမိန့် ထုတ်ပြန်တာကို မြို့အတွင်း လိုက်ကြေညာနေတယ်လို့ ဒေသခံတွေက ပြောပါတယ်။

အခုလို စစ်ကောင်စီက ညမထွက်ရအမိန့်ကို ည ၈ နာရီကနေ မနက် ၃ နာရီ သတ်မှတ်ကြေညာတယ်လို့ ဆိုပါတယ်။

အခုလို ညမထွက်ရအမိန့် ထုတ်လိုက်တာကြောင့် ကုန်စိမ်းရောင်းဝယ်သူတွေအနေနဲ့ လုပ်ငန်းထိခိုက်မှုတွေ ဖြစ်နိုင်တယ်လို့ ကုန်စိမ်းရောင်းသူ ဈေးသည်တယောက်က ပြောပါတယ်။

“ကျမတို့က ကုန်စိမ်း၊ ဟင်းသီးဟင်းရွက်တွေကို မုံရွာသံလမ်းဈေးကို သွားဝယ်ရတယ်။ ရွာကနေ ည ၁၂ နာရီလောက် ရွာကနေ မုံရွာသံလမ်းဈေးကို စောစောသွားဝယ်ရတယ်။ အဲဒီကနေ မနက်အလင်းရောက် ရွာကိုပြန်လာ ဈေးရောင်းရတယ်။ အခုလို သူတို့က ညမထွက်ရအမိန့် ထုတ်လိုက်တော့ ကျမတို့ ကျမတို့ ကုန်ဈေးရောင်းတဲ့ မိသားစုတွေအတွက် စားဝတ်နေရေး ဘယ်လိုဖြေရှင်းရတော့မှာလဲ။ သူတို့က ညမထွက်ရအမိန့်ကို ဘယ်နေ့၊ ဘယ်ရက်ထိလို့လည်း ကန့်သတ်ထုတ်ပြန်တာလဲ မဟုတ်တော့ မိသားစု စားဝတ်နေရေးအတွက် အလွန်ပဲစိုးရိမ်နေရတယ်။”

ဘုတလင်မြို့နယ်မှာ ကုန်စိမ်းရောင်းသူတွေ များပြားသလို တခြား စိုင်ပြင်မြို့ကလာပြီး ဘုတလင်ကို ဖြတ်သန်းကာ မုံရွာမြို့ကို ကုန်စိမ်းဝယ်သူတွေလည်းရှိနေသလို ကနီမြို့နယ် ကနဲကနေ မုံရွာဘက်ကို လာရောက် ကုန်စိမ်းလာရောက်ဝယ်သူတွေလည်း ရှိတာကြောင့် အခက်အခဲရှိတဲ့ ကုန်စိမ်း‌ေရာင်းသူဦးရေ များနိုင်တယ်လို့ ဒေသခံတွေဆီကနေ သိရပါတယ်။

ကားသမားတယောက်က “စစ်ကောင်စီအနေနဲ့ အခုလိုလုပ်လိုက်တော့ ကျနော်တို့ လိုင်းကားသမားတွေအနေနဲ့ အခက်အခဲ ဖြစ်သွားရတယ်။ ဘယ်လိုအခက်အခဲ ဖြစ်ရတာလဲဆိုတော့ ကျနော်တို့ဒေသတွေက ည ၁၂ နာရီကနေထွက်မှ မုံရွာကို မနက်ခင်း ၄ နာရီရောက်တယ်။ ကားပေါ်မှာပါလာတဲ့ ခရီးသည်တွေ ဈေးဝယ်ခြမ်းပြီး နေ့ခင်း ၁ နာရီ မုံရွာက ပြန်ထွက်ရတယ်။ အဲလိုထွက်လာမှ ရွာကို ညမှပြန်ရောက်တယ်ဗျ။ အခုလို စစ်ကောင်စီရဲ့ ညမထွက်ရအမိန့်အရ အတော်လေး အခက်အခဲ ဖြစ်သွားရတယ်။ အခုတောင် ကျနော် ကားပေါ်မှာ ငှက်ပျောသီးကုန်တွေ တင်ထားပြီး ဒီနေ့ညကိုထွက်မလို့ စီစဉ်နေတုန်း ဘုတလင်မြို့က သူငယ်ချင်းက ဖုန်းနဲ့ပြောတော့ ဒီအတိုင်းပဲ နေရတော့တယ်” လို့ ပြောပါတယ်။

စစ်ကောင်စီအနေနဲ့ အခုလို ဘုတလင်မြို့နယ်တခုတည်းကို ညမထွက်ရအမိန့် ဘာကြောင့်ထုတ်ရတယ် ဆိုတာမျိုး ပြည်သူကို အသိပေးရှင်းပြတာမျိုး မပြုလုပ်ဘဲ ည ၈ နာရီကနေ မနက် ၃ နာရီအတွင်း အပြင်မထွက်ရ၊ ထွက်လာသူများရှိလာပါက ပစ်ခတ်ဖမ်းဆီးမယ် ဆိုတာမျိုးကိုပဲ မြို့ထဲလှည့်လယ် ကြေညာသွားတယ်လို့ ဒေသခံပြည်သူတွေက ပြောပါတယ်။

2 weeks Ago
More News
Up