ဈာပနအခမ်းအနား

July 5, 2022

အိန္ဒိယတွင် မြေပြိုမှုကြောင့် သေဆုံးခဲ့သည့် စစ်သားများအတွက် ဈာပနအခမ်းအနား ကျင်းပ

အိန္ဒိယနိုင်ငံမှာ အကြီးအကျယ် မြေပြိုမှုကြောင့် သေဆုံးခဲ့တဲ့ စစ်သားတွေအတွက် ဈာပန အခမ်းအနားကို ကျင်းပပေးခဲ့ပါတယ်။

မြေပြိုမှုကြောင့် ဇူလိုင် ၄ ရက်အထိ သေဆုံးသူ ၄၂ ဦးထက်မနည်းရှိခဲ့ပြီး အယောက် ၂၀ ပျောက်ဆုံးနေဆဲ ဖြစ်ပါတယ်။  

မဏိပူရပြည်နယ် အရှေ့မြောက်ဘက် ဝေးလံခေါင်သီတဲ့ဒေသမှာ ဇွန် ၂၉ ရက် ညအစောပိုင်းက မြေပြိုခဲ့ပါတယ်။ တပ်မတော်နဲ့ ကယ်ဆယ်ရေးတပ်ဖွဲ့ဝင်တွေက အသက်ရှင် ကျန်ရစ်သူတွေကို ရှာတဲ့နေရာမှာ ပူးပေါင်းပါဝင်ခဲ့ပါတယ်။

အိန္ဒိယစစ်တပ်က အခမ်းအနားတွေမှာ လွမ်းသူ့ပန်းခွေချပြီး မြေပြိုမှုမှာ သေဆုံးသွားတဲ့ စစ်သည်တွေကို နှုတ်ဆက်တဲ့ ဗွီဒီယိုဖိုင်ကို ရုပ်သံကပြသထားပါတယ်။ အခုလအတွင်း မကြုံစဖူး မိုးရွာလို့ အိန္ဒိယနိုင်ငံ အရှေ့မြောက်ပိုင်း ပြည်နယ်တွေနဲ့ အိမ်နီးချင်း ဘင်္ဂလားဒေ့ရှ်နိုင်ငံတို့မှာ လူပေါင်း ၁၅၀ ကျော် သေဆုံးခဲ့ပါတယ်။

မကြာသေးမီ သီတင်းပတ်တွေအတွင်း ရေကြီးရေလျှံမှုတွေကြောင့် သန်းနှင့်ချီတဲ့လူတွေ ဘေးကင်းရာ ရွှေ့ပြောင်းနေထိုင်ခဲ့ရပြီး အချို့နေရာတွေမှာ အိမ်တွေ ရေဘေးမှာ နစ်မြုပ်သွားခဲ့ပါတယ်။

1 month Ago

July 24, 2021

ဟေတီသမ္မတ ဈာပနအခမ်းအနား ကျင်းပ

ဟေတီနိုင်ငံရဲ့ ကွယ်လွန်သူသမ္မတ ဂျိုဇစ်နယ်လ်မိုအိဇ်ရဲ့ဈာပန အခမ်းနားကို လုပ်ကြံ သတ်ဖြတ်ခံရပြီး ၂ ပတ်အကြာ ဇူလိုင် ၂၃ ရက်မှာ ကျင်းပခဲ့ပါတယ်။

ဟေတီနိုင်ငံအလံလွှမ်းခြုံထားတဲ့ သမ္မတရဲ့ခေါင်းတလားကို ခန်းမတခုထဲမှာ ပြင်ဆင်ထားပြီး စစ်ဝတ်စုံ ဝတ်ဆင်ထားသူတွေက ဝန်းရံစောင့်ကြပ်ပါတယ်။ 

အမေရိကန်သမ္မတ ဂျိုးဘိုင်ဒန်ရဲ့ အနောက်ကမ္ဘာခြမ်းအတွက် ထိပ်တန်းအကြံပေးပုဂ္ဂိုလ် အပါအဝင် နိုင်ငံရပ်ခြားမှ ဂုဏ်သရေရှိ ဧည့်သည်တွေဟာ ကွယ်လွန်သူသမ္မတကို လေးစားဂါရဝပြုဖို့ ဟေတီနိုင်ငံမြောက်ပိုင်းက ကပ်ဟေတီရန်ကို လာရောက်ခဲ့ကြပြီး သမ္မတဆီကို လွမ်းဆွတ်ငိုကြွေး ဂါရဝလာပြုကြတဲ့ ဟေတီပြည်သူတွေနဲ့အတူ ဈာပနကို ပူးပေါင်းတက်ရောက်ခဲ့ကြပါတယ်။

 ဇူလိုင် ၇ ရက် မနက်စောစောက သမ္မတ မိုအီဇ်ဟာ မြို့တော် ပို့တ်အောပရင့်စ်ရှိ သူ့နေအိမ်မှာ သေနတ်နဲ့ပစ်သတ်ခံခဲ့ရတာပါ။ လုပ်ကြံမှုကို ကိုလံဘီယာစစ်သားဟောင်း ၂၆ ယောက် ပါဝင်တဲ့အဖွဲ့က ပြုလုပ်ခဲ့တာဖြစ်ပြီး သူတို့ထဲက ၆ ယောက်ဟာ အမေရိကန် စစ်သင်တန်းဆင်းတွေဖြစ်ပါတယ်။

 ဟေတီ-အမေရိကန်တွေလည်း စွပ်စွဲခံရသူတွေထဲမှာ ပါဝင်နေပါတယ်။ ဒီတိုက်ခိုက်မှုကို ကြံစည်သူတွေဟာ သူတို့ကိုယ်သူတို့ အမေရိကန်ပြည်ထောင်စုရဲ့ မူးယစ်ဆေးဝါးထိန်းချုပ်ရေး အဖွဲ့ဝင်တွေအဖြစ် ဟန်ဆောင် လှည့်ဖြားပြီး သမ္မတအိမ်ကို ဝင်ရောက်ခဲ့တာကြောင့် သမ္မတအိမ်က လုံခြုံရေးအစောင့်တွေ ခုခံနိုင်စွမ်းမရှိခဲ့ဘူးလို့ ဟေတီအာဏာပိုင်တွေက ပြောပါတယ်။

သမ္မတလုပ်ကြံခံရပြီး နိုင်ငံမငြိမ်သက်မှုတွေကြောင့် ဟေတီနိုင်ငံဟာ အမေရိကန်သမ္မတ ဂျိုးဘိုင်ဒန်ရဲ့ နိုင်ငံခြားရေးမူဝါဒကို ဦးစားပေးပြီး ဇူလိုင် ၂၂ ရက်မှာ အမေရိကန် နိုင်ငံခြားရေး ဝန်ကြီးဌာနက ဟေတီအတွက် အထူးသံတမန်တယောက် ခန့်အပ်ဖို့ အမည်တင်သွင်းခဲ့ပါတယ်။ 

ဟေတီနိုင်ငံရဲ့ ကြားဖြတ်အစိုးရအဖွဲ့ ခေါင်းဆောင်တွေက နိုင်ငံကိုကာကွယ်ပေးဖို့အတွက် တပ်ဖွဲ့များစေလွှတ်ပေးဖို့ တောင်းဆိုချက်ကိုတော့ သမ္မတ ဘိုင်ဒန်က ငြင်းဆန်ခဲ့ပါတယ်။ 

1 year Ago
Up