ဈာပန

September 25, 2022

ဂျပန်ဝန်ကြီးချုပ်ဟောင်းဈာပန စစ်ကောင်စီသံအမတ်အား ဖိတ်ကြားမှုကို ဂျပန်အမတ်ဟောင်း ပြစ်တင်ဝေဖန်

ဂျပန်ဝန်ကြီးချုပ်ဟောင်းရဲ့ နိုင်ငံတော်ဈာပနသို့ ဖိတ်ကြားတာဟာ မြန်မာစစ်တပ်ရဲ့ တရားဝင်မှုကို ဖြစ်စေတဲ့အပြင် လူ့အခွင့်အရေး ချိုးဖောက်မှုတွေကို အားပေးရာရောက်ကာ နိုင်ငံတော်ဈာပနကို ပိုပြီး မထီမဲ့မြင်ပြုတဲ့ လုပ်ရပ်ဖြစ်တယ်လို့ ဂျပန်အောက်လွှတ်တော်အမတ်ဟောင်းမစ္စတာ Naoto Sakaguchi က ပြောဆိုလိုက်ပါတယ်။

စက်တင်ဘာ ၂၇ ရက်နေ့ ကျင်းပမယ့် ဂျပန်ဝန်ကြီးချုပ်ဟောင်း မစ္စတာ ရှင်ဇိုအာဘေးရဲ့ နိုင်ငံတော်ဈာပနအခမ်းအနားမှာ အကြမ်းဖက်စစ်ကောင်စီရဲ့ တိုကျိုသံအမတ်ကို တက်ရောက်ဖို့ ဖိတ်ကြားခဲ့တာဟာ ဂျပန်အစိုးရရဲ့ နိုင်ငံတော်စျာပနကျင်းမယ် ရည်ရွယ်ချက် ဆန့်ကျင်နေတယ်လို့ ဆိုပါတယ်။

နိုင်ငံတော် ဈာပန ကျင်းပရခြင်း အကြောင်းရင်းက ဒီမိုကရေစီစနစ်ကိုကာကွယ်စောင့်ရှောက်ဖို့ သန္နိဋ္ဌာန်ကို ပြသရေးဖြစ်ကြောင်း ၀န်ကြီးချုပ် Kishida က ပြောကြားခဲ့တာနဲ့ဆန့်ကျင်ပြီး  ရွေးကောက်ခံအစိုးရအား အာဏာသိမ်းဖြုတ်ချ၊ ပြည်သူတွေကို အစုလိုက်အပြုံလိုက် သတ်ဖြတ်၊  ဖိနှိပ်ကာ ဒီမိုကရေစီကို ဖျက်ဆီးနေတဲ့ အကြမ်းဖက်စစ်ကောင်စီဝန်ထမ်းကို တက်ရောက်ခွင့်ပြုတာ အံ့ဩမိကြောင်း ဂျပန်လွှတ်တော်အမတ်ဟောင်းမစ္စတာ နအိုတို ဆခခုချိ က ဂျပန်အစိုးရလုပ်ရပ်ကို ဝေဖန်ပြောကြားလိုက်တာပါ။ 

မစ္စတာ Naoto Sakaguchi က “ဂျပန်အစိုးရရဲ့ လုပ်ရပ်က မှားနေပေမယ့် မြန်မာနိုင်ငံက ပြည်သူတွေကို ကျနော်အပါအဝင် ဂျပန်ပြည်သူတွေက မမေ့ကြပါဘူး။ မြန်မာနိုင်ငံ စစ်ကောင်စီအောက်က လွတ်မြောက်ရေးကို မြန်မာပြည်သူတွေနဲ့အတူ အောင်ပွဲရ ဒီမိုကရေစီ ပြန်ရသည်အထိ လက်တွဲအားပေးမယ်” လို့ ဒီဗွီဘီကို ပြောဆိုခဲ့ပါတယ်။

အကြမ်းဖက်စစ်ကောင်စီရဲ့သံအမတ်ကို ဖိတ်ကြားတာက စစ်ကောင်စီကို အသိအမှတ်ပြုရာရောက်နိုင်တာမို့ ဂျပန်ရောက်မြန်မာနိုင်ငံသားတွေသာမက ဂျပန်လွှတ်တော်အမတ်တွေ၊ ဂျပန်လူ့အခွင့်အရေးလှုပ်ရှားနေသူတွေကပါ ဂျပန်အစိုးရကို သွားရောက်တွေ့ဆုံပြီး ကြိုတင်ကန့်ကွက်ပြောဆိုနေတဲ့ကြားက အခုလိုတက်ရောက်ဖို့ ဖိတ်ကြားခဲ့တာဖြစ်ပါတယ်။

စက်တင်ဘာ ၁၉ ရက်နေ့က ကျင်းပခဲ့တဲ့ အင်္ဂလန် ဘုရင်မကြီး အဲလိဇဘက် ၂ ရဲ့ နိုင်ငံတော်ဈာပနအခမ်းအနားကို မြန်မာကိုယ်စားလှယ်တွေ တက်ရောက်ခွင့်မပြုခဲ့တဲ့ ဗြိတိန် အစိုးရလို ဂျပန်အစိုးရအနေနဲ့ ပြတ်သားမှုမရှိဘဲ ကိုယ့်ပြည်သူတွေကို ရက်ရက်စက်စက် သတ်ဖြတ်ဖြိုခွင်းနေတဲ့ အကြမ်းဖက်စစ်ကောင်စီရဲ့ ကိုယ်စားလှယ်တဦးကို ဘာကြောင့် ဖိတ်ကြားခဲ့တယ်ဆိုတာ မိမိအပါအဝင် ဒီမိုကရေစီဘက်တော်သားတွေအနေနဲ့ နားမလည်အောင် ဖြစ်ရကြောင်း CDM သံတမန်အရာရှိ ဦးအောင်စိုးမိုးက ဂျပန်သတင်းဌာနတွေကို ဒီနေ့ ပြောကြားခဲ့ပါတယ်။

စက်တင်ဘာ ၂၇ ရက်နေ့ ကျင်းပမယ့် ဂျပန်ဝန်ကြီးချုပ်ဟောင်းရှင်ဇိုအာဘေးရဲ့ စျာပနကို အမေရိကန် ဒုသမ္မတ ကမာလာ ဟဲရစ်စ်၊ အိန္ဒိယဝန်ကြီးချုပ် မိုဒီ၊ သြစတြေးလျ ဝန်ကြီးချုပ် အန်တိုနီ အယ်လ်ဘနိစ် တို့အပါအဝင် နိုင်ငံပေါင်း ၂၁၇ နိုင်ငံက ဧည့်သည်တော်ပေါင်း ၇၀ဝ လောက်ကို ဖိတ်ကြားထားပြီး ဂျပန်ပြည်သူ ၆၀ ရာခိုင်နှုန်းကျော်က မပြုလုပ်ဖို့ ကန့်ကွက်နေကြသလို အတိုက်အခံပါတီခေါင်းဆောင်အားလုံးက တက်ရောက်မှာမဟုတ်ဘူးလို့ ကြေညာထားပါတယ်။

မစ္စတာ Naoto Sakaguchi  ဟာ မြန်မာနိုင်ငံ ဒီမိုကရေစီထွန်းကားရေး အားပေးဆောင်ရွတ်နေတဲ့ နိုင်ငံရေးသမားတဦးဖြစ်ပြီး မြန်မာနိုင်ငံ ရွေးကောက်ပွဲကာလတွေမှာ သွားရောက်လေ့လာစောင့်ကြည့်ခဲ့သူတဦးဖြစ်ပြီး နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့လည်း အကြိမ်များစွာ တွေ့ဆုံဆွေးနွေးခဲ့သူတဦးလည်းဖြစ်ပါတယ်။

15 hours Ago

September 13, 2022

ရုရှား၊ ဘယ်လာရုစ်နှင့် မြန်မာတို့ကို ဘုရင်မကြီး အဲလိဇဘက်၏ဈာပန ဖိတ်ကြားခြင်းမရှိ

လာမယ့် စက်တင်ဘာ ၁၉ ရက် မနက် ၁၁ နာရီ ကျင်းပမယ့် အင်္ဂလန်ဘုရင်မကြီး အဲလိဇဘက် ၂ ရဲ့ ဈာပနအခမ်းအနားကို တက်ရောက်ဖို့ ရုရှား၊ ဘယ်လာရုစ်နဲ့ မြန်မာနိုင်ငံက ကိုယ်စားလှယ်တွေနဲ့ ခေါင်းဆောင်တွေကို ဖိတ်ကြားမှာမဟုတ်ဘူးလို့ သိရပါတယ်။ 

အီရန်နိုင်ငံကတော့ ကိုယ်စားပြု သံအမတ်သာ တက်ရောက်ခွင့်ရှိမယ်လို့ ဆိုပါတယ်။ 

တော်ဝင်ခရစ်ယာန် ဘုရားရှိခိုကျောင်း ဝက်စ်မင်စတာအက်ဘေမှာ ကျင်းပမယ့် ဈာပန အခမ်းအနားကို အမေရိကန်သမ္မတ ဂျိုးဘိုင်ဒန် အပါအဝင် တကမ္ဘာလုံးက ခေါင်းဆောင်ပေါင်း ၅၀၀ လောက် တက်ရောက်ကာ အရိုအသေပေးကြလိမ့်မယ်လို့ ခန့်မှန်းထားပါတယ်။

ဒီလောက်ကြီးတဲ့ နိုင်ငံတကာအခမ်းအနားမျိုး ဝက်စ်မင်စတာမှာ မကျင်းပဖြစ်တာ ဆယ်စုနှစ်တွေနဲ့ ချီကြာနေပြီလို့ ဒေသခံသတင်းရင်းမြစ်တွေက ပြောပါတယ်။ 

ရက်ပိုင်းအတွင်း ရာနဲ့ချီတဲ့နိုင်ငံတွေက ရောက်လာကြမယ့် ခေါင်းဆောင်တွေအတွက် ပို့ဆောင်ရေးနဲ့ လုံခြုံရေးအတွက်လည်း အကြီးအကျယ်စီစဉ်နေရတယ်လို့ ဆိုပါတယ်။

ပြီးခဲ့တဲ့ ပိတ်ရက် (စနေတနင်္ဂနွေ) အတွင်းမှာ ယူကေနဲ့ နိုင်ငံရေးအဆက်အသွယ်ရှိနေတဲ့ နိုင်ငံတွေအားလုံးကို ဈာပနအခမ်းအနားအတွက် ဖိတ်ကြားစာတွေ ပို့ဆောင်ခဲ့ပြီး နိုင်ငံအတော်များများက ခေါင်းဆောင်တွေအနေနဲ့ ပွဲတက်ဧည့်သည်တယောက်ကို အတူခေါ်ဆောင်လာခွင့်ရခဲ့တယ်လို့ ဆိုပါတယ်။

ထူးခြားချက်အနေနဲ့ ရုရှားက ဗလာဒီမယာပူတင်၊ သူ့ရဲ့ မဟာမိတ် ဘယ်လာရုစ်က အလက်ဇန္ဒားလူကာရှန်ကိုနဲ့ မြန်မာနိုင်ငံက စစ်ခေါင်းဆောင်တွေကိုတော့ ဈာပနပွဲတက်ရောက်ဖို့ ဖိတ်ကြားခြင်းမရှိခဲ့ဘူးလို့ သတင်းရင်းမြစ်က ပြောပါတယ်။

နယူးဇီလန်ဝန်ကြီးချုပ် ဂျဆင်ဒါအာဒန်းက ၂၄ နာရီကြာအောင် ခရီးဝေးက လာရမှာဖြစ်ပေမယ့် အခမ်းအနားတက်ရောက်ဖို့ အတည်ပြုထားသလို ဓနသဟာယနိုင်ငံတွေက ခေါင်းဆောင်အတော်များများ လာရောက်ကြလိမ့်မယ်လို့ မျှော်လင့်ထားပါတယ်။

ပြင်သစ်၊ ဂျာမဏီ၊ အီတလီ၊ တူရကီနဲ့ ဘရာဇီး သမ္မတတို့က အခမ်းအနားတက်ရောက်ဖို့ အတည်ပြုထားပြီးဖြစ်သလို ကနေဒါနဲ့ ဩစတြေးလျဝန်ကြီးချုပ်တို့ကလည်း အခမ်းအနားတက်ရောက်ဖို့ အတည်ပြုထားခဲ့ပြီးဖြစ်ပါတယ်။ 

ဥရောကကော်မရှင် ဥက္ကဋ္ဌ၊ စပိန်ဘုရင်နဲ့ ဘုရင်မတို့လည်း အခမ်းအနား တက်ရောက်ကြမှာဖြစ်ပါတယ်။

ရုရှားရဲ့ ကျူးကျော်စစ်ကို တွန်းလှန်တိုက်ထုတ်နေရတဲ့ ယူကရိန်းသမ္မတ ဗလာဒီမယာဇလန်းစကီးကတော့ အခမ်းအနားတက်ရောက်နိုင်မယ်မထင်ဘူးလို့ ဆိုပါတယ်။ 

ဒါ့ပေမယ့် ဇလန်းစကီးဟာ ဘုရင်မကြီးအတွက် ဝမ်းနည်းကြောင်း အမှတ်တရစာအုပ်မှာတော့ အချိန်ပေးပြီး လက်မှတ်ရေးထိုးခဲ့တယ်လို့ သိရပါတယ်။

ဘုရင်မကြီးရဲ့ ဈာပနတက်ရောက်ဖို့လာကြမယ့် ကမ္ဘာ့နိုင်ငံတွေက ခေါင်းဆောင်တွေကို ပုဂ္ဂလိကလေယာဉ်တွေနဲ့သာ လန်ဒန်ကိုလာကြဖို့နဲ့ လေဆိပ်ကနေ အခမ်းအနားကျင်းပမယ့် ဝက်စ်မင်စတာအက်ဘေ ဘုရားကျောင်းကို ဘတ်စ်ကားတွေနဲ့ သွားကြိုပေးမယ်လို့ သတင်းထွက်နေတဲ့အပေါ် အတည်ပြုဖို့ မေးမြန်းရာမှာတော့ ဗြိတိန်ဝန်ကြီးချုပ်ရုံးက ပြန်လည်ဖြေကြားဖို့ ငြင်းဆန်ခဲ့တယ်လို့ သိရပါတယ်။

2 weeks Ago
More News
Up