ဆွမ်းကျွေးအလှူ

December 28, 2019

ဒေါ်ခင်ကြည် ကွယ်လွန်ခြင်း ၃၁ နှစ်ပြည့် ဆွမ်းကျွေးအလှူနှင့် ဘာသာပေါင်းစုံ ဆုတောင်းပွဲ ကျင်းပ

အမျိုးသားခေါင်းဆောင်ကြီး ဗိုလ်ချုပ်အောင်ဆန်းရဲ့ဇနီး ဒေါ်ခင်ကြည် ကွယ်လွန်ခြင်း ၃၁ နှစ်ပြည့် နှစ်ပတ်လည် ဆွမ်းကျွေးအလှူနဲ့ ဘာသာပေါင်းစုံ ဆုတောင်းပွဲကို မနေ့က ကျင်းပခဲ့ပါတယ်။ ၃၁ နှစ်ပြည့် နှစ်ပတ်လည် ဆွမ်းကျွေးအလှူကို ဒီဇင်ဘာ ၂၇ ရက်နေ့ မနက် ၁၀ နာရီက ရန်ကုန်မြို့ တက္ကသိုလ်ရိပ်သာလမ်း အမှတ် (၅၄) ရှိ သမီးဖြစ်သူ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ နေအိမ်မှာ ပြုလုပ်ခဲ့တာလို့ အတိုင်ပင်ခံရုံးက ထုတ်ပြန်ပါတယ်။ နှစ်ပတ်လည် ဆွမ်းကျွေးအလှူမှာ နိုင်ငံတော်၏အတိုင်ပင်ခံပုဂ္ဂိုလ်က မိခင်ကြီး ဒေါ်ခင်ကြည်အား ရည်စူးပြီး ဆရာတော်ဓမ္မဘေရီအရှင်ဝီရိယ (တောင်စွန်း) အမှူးပြုတဲ့ သံဃာတော် ၁၆ ပါးတို့အား ပင့်ဖိတ်ကာ ဆွမ်းနဲ့သင်္ကန်းတွေ ဆပ်ကပ်လှူဒါန်းပြီး အနုမောဒနာတရားနာယူကာ ရေစက်သွန်းလောင်း အမျှပေးဝေခဲ့ပါတယ်။ မွန်းလွဲပိုင်းမှာ ဘာသာပေါင်းစုံက ဘာသာရေးခေါင်းဆောင်တွေက ဒေါ်ခင်ကြည်အတွက် ဘာသာအလိုက် အောက်မေ့ဖွယ်ရာ ဆုတောင်းမေတ္တာများ ပို့သခဲ့ကြပါတယ်။ အခမ်းအနားမှာ ဟိန္ဒူ၊ ခရစ်ယာန်၊ အစ္စလာမ်၊ ဂျူး၊ ဘဟာအီဘာသာ တို့မှ ဘာသာရေး ခေါင်းဆောင်တွေက မေတ္တာစကား ပြောကြားတာနဲ့ ဆုတောင်းမေတ္တာပို့သတာတွေ ပြုလုပ်ခဲ့ကြပါတယ်။ Photo : Myanmar State Counsellor Office
2 years Ago
Up