ဆေးနှင့်ဆေးနှီးနွှယ်

September 14, 2021

သမဂ္ဂ ၁၇ ဖွဲ့ပါဝင်သည့် ဆေးနှင့် ​ဆေးနှီးနွှယ် ​ကျောင်းသားသမဂ္ဂများအဖွဲ့ စတင်ဖွဲ့စည်း

သမဂ္ဂ ၁၇ ဖွဲ့ပါဝင်တဲ့ ဆေးနှင့် ​ဆေးနှီးနွှယ် ​ကျောင်းသားသမဂ္ဂများအဖွဲ့ စတင်ဖွဲ့စည်းလိုက်ကြောင်း စက်တင်ဘာ ၁၃ ရက်စွဲနဲ့ ထုတ်ပြန်ထားပါတယ်။

ဆေးနှင့် ​ဆေးနှီးနွှယ် ​ကျောင်းသားသမဂ္ဂများအဖွဲ့အနေနဲ့ နွေဦးတော်လှန်ရေးမှ အစပြုကာ အာဏာရှင်ဆန့်ကျင်ရေး လူထုတော်လှန်ရေးမှာ ပြည်သူတွေနဲ့အတူ တပ်ဦးကနေ အစဉ်အမြဲပါဝင်သွားဖို့၊ အနာဂတ်ဖက်ဒရယ်ဒီမိုကရေစီနိုင်ငံတော်သစ်ရဲ့ ပညာရေး၊ ကျန်းမာရေးကဏ္ဍတွေမှာ နိုင်ငံတကာနဲ့ ရင်ဘောင်တန်းနိုင်တဲ့အထိ တိုးတက်မြင့်မားနိုင် ရေးအတွက် ကူညီပါဝင်ဆောင်ရွက်နိုင်ဖို့ ရည်ရွယ်တယ်လို့ ဆိုပါတယ်။

ခုလိုဖွဲ့စည်းမှုမှာတော့ ဆေးတက္ကသိုလ် ၅ ခု၊ သွားဘက်ဆိုင်ရာဆေးတက္ကသိုလ် ၂ ခု၊ ဆေးဘက်ဆိုင်ရာနည်းပညာတက္ကသိုလ် ၂ ခု၊ ဆေးဝါးတက္ကသိုလ် ၂ ခု၊ တိုင်းရင်းဆေး တက္ကသိုလ်၊ မွေးမြူရေးဆိုင်ရာ ဆေးတက္ကသိုလ်၊ အခြေခံကျန်းမာရေးတက္ကသိုလ်၊ သူနာ ပြုတက္ကသိုလ် ၂ ခုတို့က ကျောင်းသားသမဂ္ဂတွေ၊ မြန်မာနိုင်ငံသူနာပြု-သားဖွား သင်တန်းကျောင်းများ ကျောင်းသား သမဂ္ဂအဖွဲ့ချုပ်၊ စုစုပေါင်း ၁၇ ဖွဲ့ပူးပေါင်းဖွဲ့စည်းလိုက်တာ ဖြစ်ပါတယ်။

မြန်မာနိုင်ငံမှာ ပြီးခဲ့တဲ့ ဖေဖော်ဝါရီ ၁ ရက်နေ့က စတင်ကာ အကြမ်းဖက်စစ်အုပ်စုက မတရားအာဏာသိမ်းယူခဲ့တာကို ဆန့်ကျင်ဆန္ဒပြခဲ့ကြတဲ့ နွေဦးတော်လှန်ရေး ကာလဟာ ၇ လကျော် ကြာမြင့်ခဲ့ပြီ ဖြစ်ပါတယ်။

ဒီကာလတွေအတွင်း အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီးထောင်ချခံရသူတွေနဲ့အတူ နိုင်ငံအဝန်း တောရောမြို့ပါမကျန် ဒေသခံပြည်သူ့ကာ ကွယ်ရေးတပ်တွေနဲ့ စစ်ကောင်စီတပ်တွေကြားတိုက်ပွဲတွေလည်း ပြင်းထန်နေတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ ထုတ် ပြန်ချက်အရ လတ်တလောအချိန်ထိ အာဏာသိမ်းစစ်ကောင်စီတပ်ရဲ့ ပစ်ခတ်သတ်ဖြတ် မှုကြောင့် အပြစ်မဲ့ကျဆုံးပြည်သူ ၁၀၈၀ ကျော်၊ ဖမ်းဆီးထိန်းသိမ်းခံခဲ့ရသူပေါင်း ၈,၀၀၀ ကျော် ရှိခဲ့တယ်လို့ ဆိုပါတယ်။

လတ်တလောမှာတော့ အမျိုးသားညီညွတ်ရေးအစိုးရ(NUG)က စစ်အာဏာရှင် ဆန့်ကျင်ရေး ခုခံတွန်းလှန်စစ်စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ စက်တင်ဘာ ၇ ရက်က ကြေညာထားပါတယ်။

1 month Ago

April 23, 2021

NUG အစိုးရကိုသာ အသိမှတ်ပြုကြောင်း ဆေးနှင့်ဆေးနှီးနွှယ်မှ ပညာရှင်များ ကျောင်းသားများ ဆန္ဒပြ

ပြည်တောင်စုလွှတ်တော်ကိုယ်စားပြုကော်မတီ (CRPH) ကဖွဲ့ စည်းထားတဲ့ အမျိုးသားညီညွတ်ရေးအစိုးရ (NUG) ကိုသာ အသိမှတ်ပြုကြောင်း ဆေးနှင့်ဆေးနှီးနွှယ်မှ ပညာရှင်များ ကျောင်းသားများ (White Coat Society) က ဧပြီလ ၂၃ ရက်နေ့က ဆန္ဒပြခဲ့ကြပါတယ်။

NLD ရုံးချုပ်ရှေ့နဲ့ ရန်ကုန်မြို့ကလူ စည်းကားရာနေရာတွေမှာ လိုက်လံဆန္ဒပြခဲ့ကြတာဖြစ်ပြီး အာဆီယံမှာလည်း လူထုရဲ့အသံ လူထုရဲ့အစိုးရ NUG ကိုသာ အသိမှတ်ပြုဖိတ်ကြားဖို့လည်း ဆန္ဒပြခဲ့ကြတယ်လို့ ပါဝင်သူ ၁ ဦးကပြောပါတယ်။

အမျိုးသားညီညွတ်ရေးအစိုးရကိုသာ အသိမှတ်ပြုကြောင်း ဆန္ဒပြတာတွေပြုလုပ်နေချိန်မှာ လမ်းမှာသွားနေတဲ့ ပြည်သူတွေကလည်း ကားဟွန်းရှည်များတီးကာ ဝိုင်းဝန်းထောက်ခံအားပေးခဲ့ကြတယ်လို့ ဆိုပါတယ်။

6 months Ago
Up