ဆေးကုသမှု

May 25, 2020

မိုင်းထိခဲ့သည့် ဘူးသီးတောင်က မိန်းကလေးငယ် ဆေးကုသမှုခံယူရန် အကူညီလိုအပ်နေ

ရခိုင်ပြည်နယ်၊ ဘူးသီးတောင်မြို့နယ်၊ သရက်ပြင်ကျေးရွာသို့ သရက်သီးသွားခူးစဉ် မိုင်းပေါက်ကွဲပြီး ဒဏ်ရာရရှိခဲ့တဲ့ မိန်းကလေးငယ်တဦး ဆေးကုသမှုခံယူဖို့ အကူအညီ လိုအပ်နေတယ်လို့ မိသားစုက ပြောပါတယ်။ မိန်းကလေးငယ်ရဲ့ဖခင်ဖြစ်သူ ဘော်ရှီးရာမောက်က “ဒဏ်ရာရလို့ အစိုးရက ငွေကျပ် ငါးသောင်း ထောက်ပံ့တယ်။ ICRC နဲ့ တခြား NGO အဖွဲ့တွေက ဘာထောက်ပံ့မှုမှမရှိပါဘူး။ မောင်တောမှာ ဆေးရုံလာတက်တော့ ဓာတ်မှန်ရိုက်ခ ငွေနှစ်သောင်းနဲ့ ဆေးဖိုးငွေ သုံးသောင်းကျော် ပေးလိုက်ရတယ်။ လိုက်ပါလာတဲ့ မိသားစုဝင်တွေ ထမင်းစားစရိတ် မပါသေးဘူး။ အခု ဆေးရုံကဆင်းပြီး ဘူးသီးတောင်ဆေးရုံမှာ တစ်ပတ် တစ်ကြိမ် ဆေးလာထည့်နေရတယ်။ သောက်ဆေးတွေကလည်း အပြင်ကနေ ဝယ်ရတယ်။ အလုပ်လည်း မလုပ်နိုင်တော့ သူများတွေဆီက ငွေချေးပြီး သမီးကို ဆေးကုနေရတယ်” လို့ ပြောပါတယ်။ ဒဏ်ရာရရှိခဲ့တဲ့ အသက် ၁၂ နှစ်အရွယ် ရှာကေခါဘေဘီဟာ  မေလ ၁၂ ရက် မနက် ၁၁ နာရီလောက်က တခြား ကလေးငယ် ၂ ဦးနဲ့အတူ သရက်ပြင်ရွာမှာ သရက်သီးသွားခူးစဉ် မိုင်းနင်းမိပြီး ပေါက်ကွဲခဲ့လို့ သူ့ရဲ့ အဖော် ကလေးငယ် ၂ ဦး သေဆုံးသွားကာ သူကတော့ ညာဘက်လက်မောင်းနဲ့ ဦးခေါင်းမှာ ဒဏ်ရာပြင်းထန်စွာရရှိခဲ့လို့  မောင်တောဆေးရုံမှာ ဆေးကုသမှု ခံယူနေရတာပါ။ အခုအခါ မောင်တောဆေးရုံကနေ ဆင်းခွင့်ရပြီး  ဘူးသီးတောင်မြို့နယ် ဖုံညိုလိပ်ကျေးရွာမှာ နေထိုင်နေကာ တစ်ပတ်တစ်ကြိမ် ဘူးသီးတောင်ဆေးရုံသို့ လာရောက်ဆေးကုသမှု ခံယူနေရတာ ဖြစ်ပါတယ်။ ဘူးသီးတောင်မြို့နယ်အုပ်ချုပ်ရေးမှူး ဦးရွှေလှအောင်ကတော့ အခု မိုင်းနင်းလို့ သေတဲ့သူ ၂ ဦးကို တစ်ဦး ကျပ် ၃ သိန်းစီ ပေးထားပြီး ဒဏ်ရာရသူကို ကျပ် ၅ သောင်းပေးထားတယ်လို့  ပြောပါတယ်။ လင်းလက်
1 year Ago

April 21, 2020

မြောက်ကိုရီးယားခေါင်းဆောင် ကင်ဂျုံအန်း ဆေးကုသမှု ခံယူနေရ

မြောက်ကိုရီးယားခေါင်းဆောင် ကင်ဂျုံအန်းဟာ နှလုံးသွေးကြောဆိုင်ရာ ကုသမှုကို ဒီလ အစောပိုင်းမှာ ခံယူအပြီး ခုတော့ ဆက်ပြီး ကုသမှုခံယူနေတယ်လို့ တောင်ကိုရီးယား မီဒီယာက သတင်းထုတ်ပြန်ပါတယ်။ ကင်မ်ဟာ အဓိက နှစ်ပတ်လည်အခမ်းအနားကို မတက်ခဲ့တဲ့ နောက်ပိုင်းမှာ သူ့ကျန်းမာရေးအပေါ် မှန်းဆချက်အမျိုးမျိုး ထွက်ပေါ်နေတာပါ။ ကင်ဂျုံအန်းရဲ့ အဘိုး မြောက်ကိုရီးယားကို တည်ထောင်သူ ကင်မ်အီဆွန်းရဲ့ မွေးနေ့ ဧပြီ ၁၅ ရက်ကို အမျိုးသားနေ့အဖြစ် သတ်မှတ်ထားပြီး နှစ်ပတ်လည် အခမ်းအနား ကျင်းပလေ့ ရှိပေမယ့် ကင်ကတော့ အဲဒီပွဲကို မတက်ခဲ့ပါဘူး။ ဧပြီ ၁၂ ရက်မှာ ဆေးရုံတက် ကုသခံခဲ့တဲ့ ကင်ဟာ အရှေ့ဘက်ကမ်းရိုးတန်း ကမ်ဂံတောင် အပန်းဖြေစခန်းထဲက ကျေးလက်အိမ်မှာ အနားယူ နာလန်ထလာခဲ့တယ်လို့ Daily NK အင်တာနက် စာမျက်နှာက မြောက်ကိုရီးယား နိုင်ငံတွင်းက အမည်မဖော်တဲ့ သတင်းရင်းမြစ်ကို ကိုးကား ဖော်ပြပါတယ်။ Daily NK အင်တာနက်စာမျက်နှာကို မြောက်ကိုရီးယားကနေ ထွက်ပြေး ဘက်ပြောင်းလာသူ အများစုက လုပ်ငန်းလည်ပတ်နေတာပါ။  ကင်ဟာ ဆေးလိပ်အလွန်သောက်ပြီး အဝလွန်တာနဲ့ အလုပ်အလွန်အကျွံ လုပ်တာတွေကြောင့် လတ်တလောလတွေအတွင်း ကျန်းမာရေး ယိုယွင်းလာခဲ့တယ်လို့ Daily NK က အစီရင်ခံခဲ့ပါတယ်။ ကင်မ်ဟာ ဧပြီ ၁၁ ရက်က လက်ရှိအာဏာရ လုပ်သားပါတီရဲ့ ပေါ်လစ်ဗျူရို အစည်းအဝေးကို သဘာပတိအဖြစ် ဆောင်ရွက်ခဲ့ပြီးနောက်ပိုင်း ဆေးရုံတက်ခဲ့တာလို့လည်း ဆိုပါတယ်။ မြောက်ကိုရီးယားဟာ အရင်အပတ်က တာတိုပစ် ဒုံးကျည်တွေ အတော်များများ ပစ်လွှတ်ခဲ့ပြီး ဒါဟာ ကင်မ်အီဆွန်း မွေးနေ့ပွဲ အစိတ်အပိုင်းလို့ တောင်ကိုရီးယား အရာရှိတွေက ပြောပါတယ်။ ဒါမျိုး စစ်ရေးပွဲစဉ်တွေကို ကင်က များသောအားဖြင့် ကြီးကြပ်လေ့ရှိပေမယ့် ဒီသတင်းကို မြောက်ကိုရီးယား အစိုးရ မီဒီယာ KCNA က လုံးဝ မကြေညာခဲ့ပါဘူး။
1 year Ago
Up