ဆော်ဒီအာရေဗျ

November 22, 2022

နာမည်ကြီး အာဂျင်တီးနား ဆော်ဒီအာရေဗျကို ၂ ဂိုး ၁ ဂိုးဖြင့် ရှုံး

ကမ္ဘာ့ဖလား အုပ်စု စီ အဖွင့်ပွဲစဉ်အဖြစ် နာမည်ကြီး အာဂျင်တီးနားနဲ့ ဆော်ဒီအာရေဗျတို့ ဒီနေ့ညနေက ယှဉ်ပြိုင်ရာ ဆော်ဒီအာရေဗျက ၂ ဂိုး ၁ ဂိုးနဲ့ အနိုင်ရသွားပါတယ်။

အာဂျင်တီးနားအသင်းဟာ တိုက်စစ်မှူး မက်ဆီ ဦးဆောင်ပြီး ဒီမာရီယာ၊ လော်တာရိုမာတီနက်ဇ်၊ ဂိုမက်ဇ်၊ ဒီပေါလ်၊ အော်တာမန်ဒီ၊ ရိုမဲရိုး စတဲ့ အဓိက ကစားသမားတွေနဲ့ ပွဲထွက်ခဲ့ပေမဲ့လည်း ဆော်ဒီအာရေဗျအသင်းရဲ့ မာမာထန်ထန် တုံ့ပြန်ကစားပုံကြောင့် အခက်တွေ့ခဲ့ရတာပါ။

အဖွင့်ဂိုးကိုတော့ အာဂျင်တီးနားရခဲ့တာဖြစ်ပြီး ပွဲချိန် ၁၀ မိနစ်မှာပဲ မက်ဆီက ပယ်နယ်တီကတဆင့် သွင်းယူပေးခဲ့ပါတယ်။ အဲ့ဒီနောက်ပိုင်း အာဂျင်တီးနားတို့ ဂိုးတွေထပ်ရခဲ့ပေမဲ့ လူကျွံဘောအဖြစ် သတ်မှတ်ခဲ့တာကြောင့် ဂိုးအဖြစ်ကနေ ပယ်ဖျက်ခံခဲ့ရတာပါ။

ဆော်ဒီအာရေဗျအတွက် ချေပဂိုးနဲ့ အနိုင်ဂိုးကိုတော့ ပွဲချိန် ၄၉ မိနစ်နဲ့ ၅၃ မိနစ်တွေမှာ သွင်းယူခဲ့ပါတယ်။

ဒီ့နောက် အာဂျင်တီးနားတို့ ချေပဂိုးရဖို့ မာတီနက်ဇ်၊ ဖာနန်ဒက်ဇ်၊ အယ်ဗာရက်ဇ်၊ အကူညာတို့ကို လူစားထည့်သွင်းခဲ့ပေမဲ့ ဆော်ဒီဂိုးသမား လက်စွမ်းပြ ကာကွယ်နိုင်ခဲ့တာကြောင့် ပွဲအဖြေကို မပြောင်းလဲနိုင်ဘဲ ရှုံးနိမ့်ခဲ့တာ ဖြစ်ပါတယ်။

အဖွင့်ပွဲမှာ ရှုံးနိမ့်ခဲ့တဲ့အတွက် အာဂျင်တီးနားတို့ နောက်တဆင့်တက်ဖို့ ရုန်းကန်ရဖွယ်ရှိပြီး ပိုလန်၊ မက္ကဆီကိုတို့နဲ့ပွဲတွေမှာ မဖြစ်မနေ အနိုင်ကစားဖို့ လိုအပ်နေပါတယ်။

အုပ်စု စီ ဒုတိယပွဲစဉ်အဖြစ် ပိုလန်နဲ့ မက္ကဆီကိုတို့ မြန်မာစံတော်ချိန် ည ၁၀ နာရီခွဲမှာ ယှဉ်ပြိုင်ရမှာ ဖြစ်ပါတယ်။

1 week Ago

November 17, 2022

ကမ္ဘာ့ဖလားပြိုင်ပွဲ အုပ်စုများ လေ့လာသုံးသပ်ချက် (အုပ်စု C)

ချန်ပီယံဖြစ်ဖို့ ရေပန်းစားတဲ့ အာဂျင်တီးနားအသင်း ပါဝင်နေတဲ့ အုပ်စု C မှာ မက္ကဆီကို၊ ပိုလန်နဲ့ ဆော်ဒီအာရေဗျအသင်းတို့ တွေ့ဆုံနေပါတယ်။

အာဂျင်တီးနား

ကလပ်အသင်းနဲ့ ဆုဖလားမျိုးစုံရယူပြီး နိုင်ငံအသင်းရောက်ချိန်မှာ ခြေစွမ်းမပြနိုင်တဲ့ လီယွန်နယ် မက်ဆီရဲ့ တချိန်တုန်းက အခြေအနေတွေက ခုတော့ ပြောင်းလဲသွားပါပြီ။

ပြီးခဲ့တဲ့နှစ်က ကိုပါအမေရိက ချန်ပီယံဖြစ်ခဲ့ပြီး ၂၈ နှစ်ကြာ ဆုဖလားလက်မဲ့နေမှုကို အဆုံးသတ်ခဲ့ပြီးနောက်မှာ မက်ဆီနဲ့အတူ အသင်းဖော်တွေကပါ နိုင်ငံတကာအဆင့်မှာ ပိုပြီး တောက်ပလာကြတယ်။

အာဂျင်တီးနားအသင်းဟာ ရှုံးပွဲမရှိရလဒ်နဲ့ ခြေစွမ်းပြနေတာ ၃၅ ပွဲဆက်တိုက်ရှိပါပြီ။ အုပ်စုသုံးပွဲစလုံးမှာ အမှားအယွင်းမရှိ ကျော်ဖြတ်နိုင်ခဲ့ရင် အီတလီအသင်း စံချိန်တင်ထားတဲ့ နိုင်ငံတကာပွဲ ၃၇ ပွဲဆက်တိုက် ရှုံးပွဲမရှိစံချိန်ကို ကျော်ဖြတ်နိုင်မှာဖြစ်တယ်။

အုပ်စုအခြေအနေအရ နောက်တဆင့်တက်ဖို့ ၉၀ ရာခိုင်နှုန်းအထိ သတ်မှတ်ခံထားရပြီး ပြိုင်ပွဲဝင်အသင်းတွေထဲမှာ နောက်တဆင့်တက်ဖို့ ရာခိုင်နှုန်းအများဆုံးအသင်း ဖြစ်နေတယ်။ တိုက်စစ်ပိုင်းမှာ အင်တာမီလန်က မာတီနက်ဇ် ခြေစွမ်းပြနေပေမဲ့ တွဲဖက်တိုက်စစ်မှူး ဒီဘားလားကတော့ ကြံ့ခိုင်မှုပြည့်ဝဖို့ ရုန်းကန်နေရတယ်။ ဒါပေမဲ့ မန်စီးတီးတိုက်စစ်မှူး အယ်ဗာရက်ဇ်ကလည်း စောင့်ကြည့်ရမယ့် ကစားသမားတဦး ဖြစ်လာနိုင်တယ်။

အုပ်စုပထမ မရခဲ့ရင် တဖက်အုပ်စုက ပြင်သစ်နဲ့ တွေ့ဆုံနိုင်လို့ အာဂျင်တီးနားအတွက် အမှားခံလို့မရတဲ့ ပွဲစဉ်တွေလို့ ဆိုနိုင်တယ်။ မက်ဆီဦးဆောင်မယ့် တိုက်စစ်အခင်းအကျင်းက စိတ်လှုပ်ရှားစရာကောင်းနေပြီး ဗိုလ်လုပွဲအထိ သွားဖို့ဆိုရင်တော့ ခံစစ်နဲ့ ကွင်းလယ်နေရာတွေမှာ ဟန်ချက်ညီညီ ကစားပြနိုင်ဖို့တော့ လိုအပ်နေပါသေးတယ်။

မက္ကဆီကို

ဒီအုပ်စုမှာ အာဂျင်တီးနားကို အုပ်စုပထမနေရာ ပေးထားမယ်ဆိုရင် ဒုတိယနေရာအတွက် ခန့်မှန်းရခက်တဲ့ အခြေအနေပါ။ အစဉ်အလာအရကတော့ ကွန်ကာကပ်ဖ်ဇုန်ထိပ်သီး မက္ကဆီကိုဟာ နောက်ဆုံး ကမ္ဘာ့ဖလားပြိုင်ပွဲ ၇ ကြိမ်မှာ ၇ ကြိမ်စလုံး ရှုံးထွက်အဆင့်အထိ တက်ရောက်နိုင်ခဲ့ပါတယ်။ ဒါပေမဲ့ မက္ကဆီကိုဟာ ၁၉၉၄ ကနေ ၂၀၁၈ ပြိုင်ပွဲအထိ ၁၆ သင်းအဆင့်လည်းတက်သလို ၁၆ သင်းအဆင့်မှာပဲ အိမ်ပြန်စောခဲ့ရတာချည်းပါပဲ။

၁၆ သင်းအဆင့်ကို ကျော်လွန်ပြီး ကွာတားဖိုင်နယ်တက်ခဲ့တာက ၁၉၈၆ အိမ်ရှင်လုပ်တဲ့ပွဲမှာပဲ ရှိခဲ့တယ်။ သူတို့ဖြတ်သန်းလာတဲ့ ခြေစစ်ပွဲခရီးကို ပြန်ကြည့်မယ်ဆိုရင်တော့ စုစုပေါင်း ၁၄ ပွဲမှာ ပင်နယ်တီမပါတဲ့သွင်းဂိုး ၁၃ ဂိုးပဲရခဲ့ပြီး ခြေစစ်ပွဲမအောင်ခဲ့တဲ့ ပနားမားထက်တောင် ၄ ဂိုး ကွာဟနေတာပါ။ ဒါဟာ ဟီမင်နက်ဇ်ဦးဆောင်တဲ့ တိုက်စစ်ပိုင်း အားနည်းမှုကို ပြသနေတယ်။ ဒါပေမဲ့ ၂၀၁၈ ကမ္ဘာ့ဖလားအုပ်စုအဆင့်မှာ ဂျာမနီကို ၁ ဂိုး ဂိုးမရှိနဲ့ အနိုင်ရခဲ့တာ၊ ၂၀၁၄ မှာ ဘရာဇီးကို သရေကစားပြခဲ့တာ၊ ၂၀၁၀ မှာ ပြင်သစ်ကို ၂ ဂိုး ဂိုးမရှိနဲ့ အနိုင်ယူပြခဲ့တာတွေက မက္ကဆီကိုဆိုတာ လျှော့တွက်လို့မရတဲ့အသင်းဆိုတာ သက်သေပြနေတယ်။

ပိုလန်

မက္ကဆီကိုနဲ့ အပြိုင်လုရမှာက ပိုလန်အသင်းဖြစ်တယ်။ အုပ်စုအဖွင့်ပွဲစဉ်မှာပဲ သူတို့နှစ်သင်း ထိပ်တိုက်ဆုံနေတာက အရှုံးအနိုင် အဖြေထွက်ရင်တော့ စောစောစီးစီး အဖြေပေါ်သွားနိုင်ခြေ ရှိတယ်။ ပိုလန်ဟာ မက္ကဆီကိုနဲ့အပြီးမှာ ဆော်ဒီ၊ ပြီးမှ အာဂျင်တီးနားနဲ့ ဆုံမှာဖြစ်တယ်။ အာဂျင်တီးနားနဲ့မတွေ့ခင် ၂ ပွဲမှာ ၄ မှတ် ဒါမှမဟုတ် ၆ မှတ်ရထားခဲ့ရင် လီဝန်ဒေါစကီး ဦးဆောင်တဲ့ ပိုလန်သားတွေအတွက် ရှုံးထွက်အဆင့်တက်ဖို့ လမ်းကြောင်းရှင်းသွားမှာ ဖြစ်တယ်။ ၁၉၇၄ နဲ့ ၁၉၈၂ ခုနှစ်ပြိုင်ပွဲတွေမှာ တတိယနှစ်ကြိမ်ရဖူးတဲ့ ပိုလန်သားတွေဟာ နောက်ဆုံးဝင်ပြိုင်ခွင့်ရတဲ့ ကမ္ဘာ့ဖလား ၃ ကြိမ် (၂၀၀၂၊ ၂၀၀၆၊ ၂၀၁၈) မှာတော့ ၃ ကြိမ်စလုံး အုပ်စုအဆင့်နဲ့သာ ကျေနပ်ခဲ့ရတယ်။

ဆော်ဒီအာရေဗျ

အာရှတိုက်ကိုယ်စားပြု ဆော်ဒီဟာ အခုနှစ်ပြိုင်ပွဲမှာ နောက်တဆင့်တက်ဖို့ ရာခိုင်နှုန်း ဒုတိယအနည်းဆုံး အသင်းအဖြစ် သတ်မှတ်ခံထားရတယ်။ နောက်ဆုံးခြေစမ်းပွဲ ၅ ပွဲမှာ အိုက်စလန်ကို အနိုင်ရခဲ့ပေမဲ့ ကျန် ၄ ပွဲမှာ ၂ ပွဲရှုံး၊ ၂ ပွဲသရေကျခဲ့တယ်။

ထင်ရှားတဲ့ စွမ်းဆောင်ရည်က တိုက်စစ်ပိုင်းအားနည်းမှုဖြစ်ပြီး နောက်ဆုံး ၁၅ ပွဲမှာ တဂိုးထက်ပိုပြီး သွင်းယူနိုင်တဲ့ပွဲ မရှိခဲ့တာပါပဲ။ ဒါဟာ စုစုပေါင်း ၃၆၄ ရက် ကြာမြင့်နေပြီဖြစ်တယ်။ အုပ်စုပြိုင်ဘက်တွေထဲမှာ အာဂျင်တီးနား ပါနေသလို မက္ကဆီကိုနဲ့ ပိုလန်အသင်းတွေလည်း ဖြစ်နေတော့ အာရှမြေမှာဆိုပေမဲ့ ဆော်ဒီအတွက် နောက်တဆင့် တက်ဖို့က အခွင့်အရေး နည်းပါးလွန်းလှပါတယ်။

ဝဏ္ဏကို

2 weeks Ago
More News
Up