ဆော်ဒီ

June 23, 2021

သတင်းထောက် ခက်ရှားဂျီကို သတ်ခဲ့သည့် ဆော်ဒီ ၄ ဦး အမေရိကန်တွင် စစ်သင်တန်းတက်ခဲ့

ဝါရှင်တန်ပို့စ် သတင်းဌာနရဲ့ သတင်းထောက် ဂျမဲလ်ခက်ရှားဂျီကို ၂၀၁၈ မှာ သတ်ဖြတ်မှုမှာ ပါဝင်တဲ့ ဆော်ဒီနိုင်ငံသား လေးယောက်ဟာ အမေရိကန်နိုင်ငံထဲမှာ အစိုးရဌာန အတည်ပြု ကန်ထရိုက်အရ မနှစ်က ပြည်သူ့စစ်သင်တန်းတက်ခဲ့တယ်လို့ နယူးယောက်တိုင်းမ်စ် သတင်းဌာနက ဇွန်လ ၂၂ရက်မှာ သတင်းထုတ်ပါတယ်။

 ပုဂ္ဂလိက လုပ်ငန်းဖြစ်တဲ့ ဆာဘေရပ်စ် ပိုင်ဆိုင်မှု စီမံခန့်ခွဲရေးလုပ်ငန်းက ပိုင်ဆိုင်တဲ့ တိုင်ယာဝမ်း အုပ်စုက သင်တန်းပေးခဲ့တာပါ။ 

အမေရိကန်အစိုးရ ပြောခွင့်ရ နဒ်ပရိုက်စ်ကတော့ မီဒီယာတွေမှာ စွပ်စွဲထားတဲ့ လုံခြုံရေး တင်ပို့မှု လိုင်စင်ရလှုပ်ရှားမှုတွေ ဘယ်ဟာကိုမဆို အစိုးရဌာနက ဥပဒေအရ မှတ်ချက်ပေးလို့ မရဘူးလို့ ပြောပါတယ်။

ဒါပေမဲ့ အမေရိကန်အစိုးရရဲ့ ဆော်ဒီအာရေဗျအပေါ် ချမှတ်ထားတဲ့ မူဝါဒဟာ တရားဥပဒေ စိုးမိုးရေးနဲ့ လူ့အခွင့်အရေးကို လေးစားလိုက်နာဖို့ ထိပ်တန်းဦးစားပေးအဖြစ် သတ်မှတ် ထားတယ်လို့ သူက ဆက်ပြောပါတယ်။

ဒါပေမဲ့ ခက်ရှားဂျီကို သတ်တဲ့ အဖွဲ့ဝင် လေးယောက်ကို စစ်သင်တန်းပေးတာနဲ့ ပတ်သက်ပြီး ဆာဘေးရပ်စ်ရဲ့ အခန်းကဏ္ဍကို အမေရိကန် အောက်လွှတ်တော် အမတ်တွေက မေးခွန်းထုတ်ရာမှာ ဆာဘေးရပ်စ် အကြီးတန်း အမှုဆောင်က စာရေးပြန်ကြား အတည်ပြုခဲ့ပါတယ်။

အမေရိကန်မှာ နေထိုင်ခွင့်ရထားပြီး ဝါရှင်တန်ပို့စ် သတင်းဌာနရဲ့ ကော်လံစား ပင်တိုင် ဆောင်းပါးရှင် ခက်ရှားဂျီဟာ ဆော်ဒီ အိမ်ရှေ့စံမင်းသား မိုဟမ်မဒ် ဘင်ဆယ်လ်မန် ကို ဝေဖန်ခဲ့သူဖြစ်ပါတယ်။

၂၀၁၈ မှာ တူရကီနိုင်ငံ အစ္စတန်ဘူလ်မြို့က ဆော်ဒီကောင်စစ်ဝန်ရုံးထဲမှာ အိမ်ရှေ့စံရဲ့ စစ်ဆင်ရေးအဖွဲ့က အသတ်ခံရပြီး တကိုယ်လုံး တစစီဖြတ်တောက်ခံခဲ့ရပါတယ်။

4 months Ago

January 6, 2021

ဆော်ဒီ အပါအဝင် မဟာမိတ်နိုင်ငံများက ကာတာနိုင်ငံနှင့် ဆက်ဆံရေး ပြန်စမည်

ဆော်ဒီအာရေဗျနိုင်ငံနဲ့ မဟာမိတ်နိုင်ငံတွေဟာ ကာတာနိုင်ငံနဲ့ ဆက်ဆံရေးကို အပြည့်အဝ ပြန်စတော့မယ်လို့ ဆော်ဒီ နိုင်ငံခြားရေးဝန်ကြီးက ပြောလိုက်ပါတယ်။ ကာတာအစိုးရနဲ့ ဆက်ဆံရေး ခါးသီးနေတာကို အဆုံးသတ်ဖို့ သဘောတူညီချက် ချမှတ်ရေး ကာတာ အုပ်ချုပ်သူတွေကို ဆော်ဒီ အိမ်ရှေ့စံက အာရပ်ပင်လယ်ကွေ့ ထိပ်သီးညီလာခံအတွင်း တွန်းအားပေးခဲ့တာပါ။ နောက်ဆုံးကြေညာချက်ထဲမှာ သွေးစည်းညီညွတ်ရေး ယေဘုယျကတိ ပါဝင်ပေမယ့် အီရန် ဆန့်ကျင်ရေး အပြင်ပိုင်းဟန်ပန်ကို ခြေကန်ထားဖို့ ကြိုးစားနေတာပါ။ ပူးတွဲကြေညာချက်ထဲမှာ သဘောတူညီချက်ကို အသေးစိတ် အတည်ပြုတဲ့ အချက်တွေ မပါသေးပါဘူး။  အမေရိကန်ရွေးကောက်ခံသမ္မတ ဂျိုးဘိုင်ဒန် ကျမ်းသစ္စာ ကျိန်ဆိုတာ မလုပ်ခင် နှစ်ပတ်အလိုမှာ အမေရိကန်ရဲ့ အကြီးစားမဟာမိတ် နှစ်နိုင်ငံကြား အကွဲအပြဲကို ပြန်ပြင်ဖို့ မျှော်လင့်ချက်ကိုတော့ အချက်ပြနေပါတယ်။ ဆော်ဒီ နိုင်ငံခြားရေးဝန်ကြီး ဖိုင်ဆယ်ဘင်ဖှာဟန်အယ်လ်ဆွတ်ဒ်က “အာရပ်စော်ဘွားများ ပြည်ထောင်စု၊ ဘာရိန်းနဲ့ အီဂျစ်တို့အားလုံးကတော့ ကာတာနဲ့ ဆက်ဆံရေးပြန်စဖို့ သဘောတူခဲ့ပြီးပြီ။ အင်မတန်အရေးကြီးတဲ့ အခက်အခဲ ထိုးဖောက် ကျော်လွှားမှုကို ဆောင်ကြဉ်းနိုင်ခဲ့လို့ ကျနော်တို့ အလွန်အမင်း စိတ်ချမ်းမြေ့ရတယ်” လို့  သတင်းစာရှင်းလင်းပွဲမှာ ပြောပါတယ်။
10 months Ago
More News
Up