ဆုချီးမြှင့်

August 16, 2020

Mask ချုပ်ပြိုင်ပွဲ ပထမဆုရသူကို တိုကျို မြန်မာသံရုံးတွင် ဆုချီးမြှင့်

ကိုဗစ်-၁၉ ကာကွယ်၊ ထိန်းချုပ်မှုအတွက်ရည်ရွယ်ပြီး နိုင်ငံတော်အတိုင်ပင်ခံပုဂ္ဂိုလ် ဖိတ်ခေါ် ကျင်းပခဲ့တဲ့ နှာခေါင်းစည်း Mask ချုပ် ပြိုင်ပွဲမှာ တီထွင်ဖန်တီးမှုအကောင်းဆုံး ပထမဆု ရရှိခဲ့တဲ့ ဦးမျိုးစန်းဦး (myo gyi)ကို တိုကျိုမြို့ရှိ  မြန်မာသံရုံးမှာ ဩဂုတ် ၁၅ ရက်က ဆုတံဆိပ်နဲ့ ဂုဏ်ပြုမှတ်တမ်းလွှာပေးအပ် ချီးမြှင့်လိုက်ပါတယ်။  ကိုဗစ်-၁၉  ကာကွယ်၊ ထိန်းချုပ်၊ ကုသရေးအမျိုးသားအဆင့်ဗဟိုကော်မတီ ဥက္ကဋ္ဌ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကိုယ်စား ဂျပန်နိုင်ငံဆိုင်ရာ မြန်မာသံအမတ်ကြီး ဦးမြင့်သူက ဆုပေးအပ်ခဲ့တာဖြစ်ပါတယ်။  အဆိုပါ ဂုဏ်ပြုမှတ်တမ်းလွှာ ပေးအပ်တဲ့ အခမ်းအနားကို တိုကျိုမြို့မြန်မာသံရုံးမှ သံမှူးကြီး ဒေါ်စန္ဒာတင်၊ ပထမအတွင်းဝန် ဦးအောင်စိုးမိုးနဲ့  မြန်မာသံရုံးမှ ဝန်ထမ်းတွေနဲ့ ဂျပန်နိုင်ငံရောက် မြန်မာနိုင်ငံသားတချို့လည်း  တက်ရောက်ခဲ့ပါပါတယ်။ ဆုရရှိသူ ကိုမျိုးစန်းဦးက အခုလို ကိုဗစ်ကာလမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကိုယ်စား သံအမတ်ကြီး ဦးမြင့်သူကိုယ်တိုင် ဆုချီးမြှင့်ပေးလို့ အထူး၀မ်းမြောက်ကျေးဇူးတင်ကြောင်း ပြောပါတယ်။ ဒါ့အပြင် သူ massage ပေးလိုတဲ့ သံမဏိလိပ်ပြာ စိတ်ဓာတ်နဲ့ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ဦးဆောင်မှုအောက်မှာ ကိုဗစ်-၁၉ ရောဂါကို အောင်မြင်စွာ ကြံ့ကြံ့ခံနေနိုင်တာ တွေ့ရလို့ ပီတိဖြစ်ရပါတယ်လို့လည်း ကိုမျိုးစန်းဦးက ဒီဗွီဘီကို ပြောပါတယ်။ ပြီးခဲ့တဲ့ မေလက နိုင်ငံတော်အတိုင်ပင်ခံပုဂ္ဂိုလ် အွန်လိုင်းကနေ ဖိတ်ခေါ် ကျင်းပတဲ့ Mask ချုပ်ပြိုင်ပွဲမှာ တီထွင်ဖန်တီးမှုအကောင်းဆုံးဆုအဖြစ် သံမဏိလိပ်ပြာအမည်နဲ့ တင်စားပြီး ထူးထူးခြားခြား Mask ချုပ်လုပ်ပြိုင်ပွဲဝင်ခဲ့တဲ့ ပြိုင်ပွဲဝင်  မျိုးကြီးအကောင့်က ပထမ၊ ငြိမ်းချမ်းရေးသင်္ကေတ သံလွင်ခက် ကိုက်ချီထားတဲ့ ချိုးငှက်ပုံ Mask နဲ့ ပြိုင်ပွဲဝင်ခဲ့တဲ့ ချမ်းမြေ့ကိုအကောင့်က ဒုတိယနဲ့ ချောစုအကောင့်က တတိယဆုတွေ အသီးသီး ရရှိသွားကြတာပါ။
1 year Ago

June 5, 2020

စစ်ကိုင်းတိုင်းအတွင်း ပတ်ဝန်းကျင် စိမ်းလန်းစိုပြေသည့် ကျောင်း ၆ ကျောင်းကို ဆုချီးမြှင့်

စစ်ကိုင်းတိုင်းအတွင်း ပတ်ဝန်းကျင်ဆိုင်ရာ စိမ်းလန်းစိုပြေတဲ့ စာသင်ကျောင်း ၆ ကျောင်းကို ပထမဆုံးအကြိမ်အဖြစ် ဆုချီးမြှင့်လိုက်ပါတယ်။ စစ်ကိုင်းတိုင်းဒေသကြီး ပတ်ဝန်းကျင်ထိန်းသိမ်းရေးဦးစီးဌာနကနေ ဦးဆောင်ကာ ဇွန်လ ၅ ရက်နေ့မှာကျရောက်တဲ့ ကမ္ဘာ့ပတ်ဝန်းကျင်ထိန်းသိမ်းရေးနေ့ အခမ်းအနားကို ကိုဗစ်-၁၉ ကပ်ရောဂါကြောင့် စစ်ကိုင်းတိုင်းအစိုးရရုံး ဘက်စုံသုံးခန်းမမှာ အကျဉ်းချုံး ပြုလုပ်ခဲ့ပါတယ်။ စစ်ကိုင်းတိုင်းပတ်ဝန်းကျင်ထိန်းသိမ်းရေး ဦးစီးဌာနက ညွှန်ကြားရေးမှူး ဦးကျော်အောင်မိုးက "ကိုဗစ်ကပ်ရောဂါဖြစ်ပွားနေတော့ အရင်နှစ်တွေလို စည်စည်ကားကား အခမ်းအနားကြီးနဲ့ မလုပ်နိုင်ဘူး။ သို့သော် ကမ္ဘာလုံးအတိုင်းအတာအရ ဒီဂျစ်တယ်ကမ်ပိန်းတွေ ဆောင်ရွက်နေပါတယ်။ ကျနော်တို့ဌာန လူမှုကွန်ရက်စာမျက်နှာမှာလည်း ၁ ပင်စိုက် ၁ ပင်ရှင်ရမယ်ဆိုတဲ့ ကမ်ပိန်းကို ဆောင်ရွက်နေပါတယ်။ ပြည်သူအားလုံးကို ပန်ကြားလိုတာကတော့ သစ်ပင်စိုက်ပျိုးမှုကို အလေးထားပြီးတော့ ၁ ယောက်ကို ၁ ပင်နှုန်းနဲ့ ရှင်သန်အောင် ပြုစုပျိုးထောင်ပေးပါလို့ တိုက်တွန်းအပ်ပါတယ်။" လို့ ပြောပါတယ်။ ဒီနေ့ပြုလုပ်တဲ့ အခမ်းအနားမှာ စစ်ကိုင်းတိုင်းဝန်ကြီးချုပ် ဒေါက်တာမြင့်နိုင်နဲ့ အစိုးရအဖွဲ့ဝင် ဝန်ကြီးတွေလည်း တက်ရောက်ခဲ့ပြီး ပတ်ဝန်းကျင်ထိန်းသိမ်းရေးလုပ်ငန်းတွေကို အလေးထား ဆောင်ရွက်နေကြောင်း ပြောဆိုခဲ့ပါသေးတယ်။ ဒါ့အပြင် တိုင်းအတွင်းက စိမ်းလန်းစိုပြေတဲ့ ကျောင်း ၆ ကျောင်းကို ရွေးချယ်ပြီး ပထမဆုံးအကြိမ်အဖြစ် ဆုပေးခဲ့ပါသေးတယ်။ အခြေခံစံနှုန်း ၄ ချက်၊ အညွှန်းကိန်း ၁၇ ချက်နဲ့ စိစစ်ရွေးချယ်ခဲ့တာမှာ ပင်လည်ဘူး၊ ရွှေဘို၊ ယင်းမာပင်၊ မုံရွာ၊ အင်းတော်၊ စစ်ကိုင်း စတဲ့မြို့နယ်တွေက စာသင်ကျောင်းတွေ ရရှိခဲ့ပါတယ်။ ညွှန်ကြားရေးမှူး ဦးကျော်အောင်မိုးက "ပတ်ဝန်းကျင်ထိန်းသိမ်းရေး လုပ်ငန်းတွေကို ဆောင်ရွက်တဲ့အခါ ပြည်သူလူထုပူးပေါင်း ပါဝင်လာဖို့က အရေးကြီးတယ်။ ဒီအတွက် နည်းလမ်းတွေ စဉ်းစားတဲ့အခါ စာသင်ကျောင်းတွေကို အခြေပြုပြီး လုပ်ဆောင်တာက ထိရောက်နိုင်တာကို တွေ့တယ်။ စာသင်ကျောင်းတွေကနေ ကျောင်းသားကျောင်းသူတွေကို ပတ်ဝန်းကျင်ဆိုင်ရာ အလေ့အကျင့်ကောင်းတွေ သင်ပြပြီး သူတို့ကတဆင့် သူတို့ရဲ့ မိဘဆွေမျိုး ပတ်ဝန်းကျင် ရပ်ရွာတွေကို ပြန်ပြီး ပျံ့နှံ့စေမယ်။ ဒီအတွက် စံသတ်မှတ်ချက်တွေနဲ့ ပထမဆုံးအကြိမ်အဖြစ် ကိုက်ညီတဲ့ ကျောင်းတွေကို စိစစ်ရွေးချယ်ပြီး ဆောင်ရွက်တာဖြစ်ပါတယ်" လို့ ပြောပါတယ်။ စစ်ကိုင်းတိုင်းအတွင်း မတ်လကုန်ပိုင်းမှာ တောမီးတွေကြောင့် တချို့နေရာတွေမှာ လေထု အရည်အသွေး ဆိုးဆိုးရွားရွားဖြစ်ပေါ်ခဲ့ပါတယ်။ ကိုဗစ်-၁၉ ကပ်ဘေးကာလအတွင်း စက်ရုံအလုပ်ရုံတွေရပ်နားတာ၊ လူတွေရဲ့ ယန္တရားအသုံးပြုမှု လျော့နည်းတာတွေကြောင့် မေလအတွင်း လေထုအရည်အသွေး သိသိသာသာ ကောင်းမွန်လာပါတယ်။  ပတ်ဝန်းကျင်ထိန်းသိမ်းရေးအနေနဲ့ သစ်တောဦးစီးဌာနကလည်း သစ်ပင်ပြန်မပေါက်နိုင်တဲ့ နေရာတွေမှာ သစ်စေ့မြေလုံးတွေ ကြဲချတာတွေ ပြုလုပ်နေပါတယ်။
1 year Ago
Up