ဆိုးလ်ရှားဝန်ခံ

September 27, 2020

မန်ယူအသင်း အနိုင်ရလဒ်နှင့် မထိုက်တန်ဟု နည်းပြဆိုးလ်ရှားဝန်ခံ (ရုပ်သံဟိုက်လိုက်)

ဘရိုက်တန်နဲ့ပွဲမှာ မန်ယူနိုက်တက်အသင်းဟာ အနိုင်ရလဒ်နဲ့ ထိုက်တန်မှုမရှိခဲ့ဘူးလို့ နည်းပြဆိုးလ်ရှားက ဝန်ခံပြောကြားလိုက်ပါတယ်။  ဘရိုက်တန်ကို ၃ ဂိုး ၂ ဂိုးနဲ့ အနိုင်ရခဲ့ပြီးနောက် ပြုလုပ်ခဲ့တဲ့ သတင်းစာရှင်းလင်းပွဲမှာ နည်းပြ ဆိုးလ်ရှားက ဝန်ခံခဲ့တာပါ။  မန်ယူအသင်းဟာ ပွဲပြီးခါနီးအထိ ၂ ဂိုးစီသရေကျနေခဲ့ပြီး ကွင်းလယ်ဒိုင်က  ပွဲပြီးခရာမူတ်ပြီးချိန်မှ ပင်နယ်တီရဖို့ ဖြစ်လာခဲ့တာပါ။  နောက်ခံလူ မက်ဂွိုင်းယားက ဂိုးထဲကို ခေါင်းတိုက်သွင်းခဲ့ရာမှာ ဘရိုက်တန်တိုက်စစ်မှူး မက်ပေးရဲ့လက်နဲ့ထိခဲ့တာကြောင့် ပင်နယ်တီပေးဖို့  VAR ဒိုင် တွေက ဆုံးဖြတ်ခဲ့ပြီး ဖာနန်ဒက်စ်က အနိုင်ဂိုးသွင်းပေးခဲ့တာပါ။  ယူနိုက်တက်အသင်းအနေနဲ့  ချေပဂိုးပေးလိုက်ရချိန်မှာ သရေ တစ်မှတ်နဲ့သာ ထိုက်တန်ပြီး အဲဒီထက်ပိုတဲ့ အနိုင်ရလဒ်နဲ့ မထိုက်တန်ကြောင်း၊ ဒါပေမဲ့ အသင်းရဲ့အနိုင်မခံအရှုံးမပေးတဲ့ စရိုက်လက္ခဏာကတော့ အနိုင်ရလဒ်ထက် ပိုပြီးထိုက်တန်ခဲ့ တယ်လို့ နည်းပြဆိုးလ်ရှားက ပြောပါတယ်။  မန်ယူအသင်းဟာ အဖွင့်ပွဲမှာ ခရစ္စတယ်ပဲလေ့ကို ရှုံးနိမ့်ခဲ့တာကြောင့် ဘရိုက်တန်ကို အနိုင်ရခဲ့တာက အခုနှစ်ရာသီ ပထမဆုံးနိုင်ပွဲဖြစ်ခဲ့ပါတယ်။ 
8 months Ago
Up