ဆိုးလ်ရှား

November 24, 2021

ဗီလာရီးယဲလ်နှင့်ပွဲ အနိုင်ရလဒ်က ဆိုးလ်ရှားအတွက်လို့ ခံစားရဟု နည်းပြကာရစ်ပြော

ဗီလာရီးယဲလ်အသင်းနဲ့ပွဲမှာ အနိုင်ရခဲ့တဲ့ ရလဒ်က အသင်းနဲ့ လမ်းခွဲသွားတဲ့ နည်းပြဆိုးလ်ရှား အတွက်လို့ ခံစားရကြောင်း နည်းပြ မိုက်ကယ်ကာရစ်ကပြောပါတယ်။

ကာရစ်ဟာ ဆိုးလ်ရှားထွက်ခွာသွားပြီးနောက် ယာယီနည်းပြအနေနဲ့ သူ့ရဲ့ပထမဆုံးပွဲစဉ်မှာ ဗီလာရီးယဲလ်ကို ၂ ဂိုး ဂိုးမရှိနဲ့အနိုင်ရခဲ့ တာပါ။

ဒီရလဒ်ကြောင့် မန်ယူအသင်းက ချန်ပီယံလိဂ်ရှုံးထွက်အဆင့်ကို တက်ရောက်နိုင်ခဲ့ပါတယ်။ ကာရစ် ကတော့ ဆိုးလ်ရှား ထုတ်ပယ်ခံခဲ့ရတဲ့အပေါ် အသင်းကလူတိုင်း ထိခိုက်ခံစားခဲ့ကြရတယ်လို့ ပြော ပါတယ်။

“အနိုင်ရခဲ့လို့ အလွန်ကျေနပ်ပျော်ရွှင်ရပေမဲ့ ပွဲရလဒ်က အိုလီအတွက်လို့ ခံစားရပါတယ်။ အိုလေထွက်ခွာခဲ့ရတဲ့အပေါ် မေ့လို့မရသေးပါဘူး။ ကျနော့်အတွက် သိပ်အရေးကြီးတဲ့ရလဒ်မဟုတ် ပေမဲ့အသင်းနဲ့ ကစားသမားတွေအတွက်တော့ အရေးကြီးပါတယ်” လို့ ပွဲအပြီးမှာ ကာရစ်က ပြော ပါတယ်။

ယူနိုက်တက်အတွက် ဆက်ပြီး လုပ်ဆောင်ပေးစရာတွေရှိပြီး အဲဒီအတွက် ဂုဏ်ယူကျေနပ် မိတယ်လို့ လည်း မိုက်ကယ်ကာရစ်က ပြောပါတယ်။

1 year Ago

November 22, 2021

မန်ယူ ကမ်းလှမ်းလျှင် ပိုချက်တီနို ပြောင်းရွှေ့လာနိုင်ကြောင်း ဂယ်ရီနဗီးလ် သုံးသပ်

မန်ယူအသင်းကသာ ကမ်းလှမ်းမယ်ဆိုရင် နည်းပြ ပိုချက်တီနို ပြောင်းရွှေ့လာနိုင်ကြောင်း နောက်ခံလူဟောင်း ဂယ်ရီနဗီးလ်က ပြောပါတယ်။ 

ယူနိုက်တက်အသင်းဟာ နည်းပြဆိုးလ်ရှားကို ထုတ်ပယ်လိုက်ပြီးနောက် လက်ထောက် နည်းပြတစ်ဦးဖြစ်တဲ့ မိုက်ကယ်ကာရစ်ကို ယာယီနည်းပြအဖြစ် တာဝန်ပေးထားပါတယ်။ 

တစ်ဖက်မှာလည်း အမြဲတမ်းနည်းပြခန့်အပ်ဖို့ ရှာဖွေနေပြီး ပီအက်စ်ဂျီနည်းပြ ပိုချက်တီနိုကို ခေါ်ယူနိုင်တယ်လို့ ဂယ်ရီနဗီးလ်က စကိုင်းစပေါ့ရုပ်သံအစီအစဉ်မှာ ပြောပါတယ်။

“ယူနိုက်တက်ရဲ့ လူစာရင်းနဲ့ အသင်းရဲ့အခြေအနေက သူ့အတွက် အောင်မြင်မှုရှာဖွေဖို့ ယုံကြည်မှုရှိမှာဖြစ်လို့ အသင်းဘက်ကသာ ကမ်းလှမ်းရင် ၅ နှစ်စာချုပ်နဲ့ မနက်ဖြန်မှာတောင် ဖြစ်လာနိုင်တယ်။ ပီအက်စ်ဂျီမှာဆိုရင် တစ်ရာသီပြီး တစ်ရာသီ စောင့်ကြည့်ခံရပြီး ချန်ပီယံလိဂ်ဖလား မရခဲ့ရင် ထုတ်ပယ်ခံရမှာပါ” လို့ နဗီးလ်က ပြောပါ တယ်။ 

အာဂျင်တီးနားနည်းပြ ပိုချက်တီနိုဟာ စပါးအသင်းကို ၂၀၁၉ ချန်ပီယံလိဂ်ဗိုလ်လုပွဲ ရောက်အောင် စွမ်းဆောင်နိုင်ခဲ့ပြီး မန်ယူအသင်းက ခေါ်ယူမယ်လို့ မကြာခဏ သတင်းထွက်ခဲ့ဖူးပါတယ်။

1 year Ago

ဆိုးလ်ရှား ထုတ်ပယ်ခံမှု ကစားသမားများ အပြစ်မကင်းကြောင်း ဝိန်းရွန်းနီ သုံးသပ်

ယူနိုက်တက်နည်းပြ ဆိုးလ်ရှား ထုတ်ပယ်ခံခဲ့ရတာဟာ ကစားသမားတွေရဲ့ အပြစ်မကင်းကြောင်း ဒါဘီ နည်းပြ ဝိန်းရွန်းနီက ပြောပါတယ်။ 

ဝက်ဖို့ဒ်အသင်းနဲ့ ပွဲစဉ်ကို ကြည့်ရှုခဲ့ပြီး အလွန်စိတ်ပျက်စရာကောင်းကြောင်း၊ ကစားသမားတွေအနေနဲ့ အခုထက်ပိုပြီး လုပ်ပြဖို့ လိုအပ်ပြီး တချို့ကစားသမားတွေရဲ့ ခြေစွမ်းက လက်ခံနိုင်လောက်တဲ့ စွမ်းဆောင်ရည်မရှိကြောင်း ဝိန်းရွန်းနီက ဝေဖန်ပါတယ်။ 

“အဲဒီလို ကစားသမားတွေ ကျနော့်အသင်းမှာရှိနေရင် အတော်လေးစိတ်ပျက်မိမှာပါ။ ကစားသမားတွေအနေနဲ့ ပိုပြီးလုပ်ပြနိုင်ခဲ့သင့်ပါတယ်” လို့ ဝိန်းရွန်းနီက ပြောပါတယ်။ 

အသင်းဖော်ဟောင်း အိုလီ ထုတ်ပယ်ခံခဲ့ရတဲ့အပေါ်လည်း စိတ်မကောင်းကြောင်း ရွန်းနီက ပြောပါတယ်။ 

“နည်းပြတစ်ယောက် အလုပ်ထုတ်ပယ်ခံရတိုင်း ကျနော် စိတ်မကောင်းပါဘူး။ အထူးသဖြင့် ကျနော့်အသင်းဖော်ဟောင်း အိုလီ ဖြစ်နေတော့ ပိုလို့စိတ်မကောင်းတာပေါ့။ အိုလီအတွက် ကိုယ်ချင်းစာမိပါတယ်။ ကျနော့်အနေနဲ့ကတော့ ဒါဘီအတွက် ဆက်ပြီးကြိုးစားလုပ်ဆောင်သွားဖို့ပဲ ရှိပါတယ်” လို့ ရွန်းနီက ပြောပါတယ်။ 

ဝိန်းရွန်းနီရဲ့ ဒါဘီအသင်းဟာ မနေ့ညက အဆင့် ၂ နေရာက ဘုန်းမောက်ကို အနိုင်ယူခဲ့ပေမယ့် ၂၁ မှတ် အမှတ်လျှော့ခံထားရလို့ ရမှတ်ဗလာနဲ့ ချန်ပီယံရှစ်အောက်ဆုံးမှာ ရပ်တည်နေပါတယ်။

1 year Ago
More News
Up