ဆိပ်ကြီးခနောင်တို မဲဆွယ်ပွဲ

October 28, 2020

သမ္ဗန်ရေယာဉ်များဖြင့် အင်အားပြခဲ့ကြသည့် ဆိပ်ကြီးခနောင်တို မဲဆွယ်ပွဲ

ရန်ကုန်မြို့တစ်ဖက်ကမ်းမှာ တည်ရှိတဲ့ ဆိပ်ကြီးခနောင်တိုမြို့နယ်က အမျိုးသားဒီမိုကရေစီ အဖွဲ့ချုပ်ကို ဝန်းရံသူတွေဟာ အောက်တိုဘာ ၂၈ ရက်နေ့က  သမ္ဗန်ရေယာဉ်တွေနဲ့  မြစ်ချောင်းတွေထဲ လည့်လည်အင်အားပြခဲ့ကြပါတယ်။ သမ္ဗန် အစီးရေ ၅၀ ကျော်မှာ လူအင်အား ရာကျော်နဲ့ ခနောင်တိုချောင်းအတွင်းကနေပြီး ဆိပ်ကြီးကျွန်းကို ပတ်ပြီး အင်အားပြ မဲဆွယ်ခဲ့ကြတာပါ။ ဆိပ်ကြီးခနောင်တိုမြို့ဟာ ရန်ကုန်တောင်ပိုင်းခရိုင်အတွင်းမှာပါဝင်ပြီး နိုဝင်ဘာ ၈ ရက်နေ့မှာ ကျင်းပမဲ့ ရွေးကောက်ပွဲမှာ ယှဉ်ပြိုင်မှု ပြင်းထန်မယ့် မဲဆန္ဒနယ်တွေထဲမှာ ပါဝင်ပါတယ်။ ဒီမဲဆန္ဒနယ်မှာ ပြည်ထောင်စုကြံခိုင်ရေးနဲ့ ဖွံဖြိုးရေးပါတီ ဒုဥက္ကဋ္ဌဖြစ်သူ ဦးခင်ရီ ဝင်ရောက်ယှဉ်ပြိုင်မှာဖြစ်ပြီး လက်ရှိ အနိုင်ရပါတီ အန်အယ်လ်ဒီ ကတော့ ကိုယ်စားလှယ်လောင်း အသစ်တွေနဲ့ ဝင်ရောက်ယှဉ်ပြိုင်မှာပါ။ ဆိပ်ကြီးခနောင်တိုမြို့နယ်မှာ ဆန္ဒမဲပေး ပိုင်ခွင့်ရှိသူ ၂၀၀၀၀ ကျော်ရှိတယ်လို့ မြို့နယ် ရွေးကောက်ပွဲကော်မရှင်ထံက သိရပါတယ်။  
1 year Ago
Up