အသင်းဟောင်း လီဗာပူးတိုက်စစ်မှူးဆာလာနဲ့ ရန်တိုက်ပေးနေသူတွေရှိပေမယ့် ပြဿနာ တစ်စုံတစ်ရာမရှိကြောင်း ဘိုင်ယန်တိုက်စစ်မှူးမာနေးက ပြောပါတယ်။

မာနေးဟာ ၂၀၂၂ ခုနှစ်အတွက် အာဖရိကအကောင်းဆုံးကစားသမားဆုကို ဆာလာကို ကျော်ဖြတ်ပြီးရယူနိုင်ခဲ့ပါတယ်။

အဲဒီဆုကို လက်ခံရယူအပြီးမှာ ဆာလာနဲ့ ရန်တိုက်ပေးနေသူတွေရှိကြောင်း မာနေးက ပြောကြားခဲ့ပြီး ဆာလာနဲ့ ဆက်ဆံရေးအခြေအနေ ကောင်းမွန်ကြောင်း မာနေးက ပြန်လည်ဖြေရှင်းခဲ့တာပါ။

မာနေးက “တခါတလေမှာ လူတွေက ကျနော်နဲ့ မိုဆာလာကို ပြိုင်ဆိုင်မှုရှိတဲ့ ရန်ဘက်တွေဖြစ်လာအောင် ပြောကြတယ်။ ဒါပေမဲ့ အရှင်းဆုံးပြောရရင် ကျနော့်အနေနဲ့ ဘယ်ကစားသမားကိုမှ ပြိုင်ဘက်အနေနဲ့ သဘောမထားပါဘူး။ ကျနော်တို့ကြားမှာလည်း ဆက်ဆံရေးကောင်းရှိပြီး စာတိုတွေ အမြဲပို့နေကျပါ။ မီဒီယာတွေကပဲ ရန်လိုအောင် အမြဲတမ်းကြိုးစားနေကြတာဖြစ်တယ်” လို့ ပြောပါတယ်။ 

လီဗာပူးမှာ တွဲဖက်ကစားစဉ်က ဆာလာဟာ ဂိုးပိုရဖို့အတွက်သာ အာရုံစိုက်ပြီး မာနေးကို ဘောလုံးပေးပို့မှုမရှိခဲ့ကြောင်း မီဒီယာတွေက ရေးသားခဲ့ကြတာဖြစ်ပါတယ်။ 

လီဗာပူးတိုက်စစ်မှူး မိုဆာလာဟာ အသင်းနဲ့ ၃ နှစ်စာချုပ်သက်တမ်းတိုးပြီးနောက်မှာ ပရီးမီးယား လိဂ်ရဲ့လုပ်ခအများဆုံးကစားသမားဖြစ်လာပါတယ်။

ဆာလာဟာ အသင်းနဲ့  ၂၀၂၅ ခုနှစ်အထိ စာချုပ်သက်တမ်းတိုးခဲ့ပြီး တစ်ပတ်လုပ်ခပေါင် ၄ သိန်းအထိတိုးမြှင့်ရရှိတော့မှာပါ။

အဆိုပါပမာဏဟာ တစ်ပတ်လုပ်ခ ပေါင် ၃၈၅၀၀၀ ရရှိနေတဲ့ စီရော်နယ်ဒိုကို ကျော်ဖြတ်ပြီး ဆာလာက လုပ်ခအများဆုံးကစား သမားဖြစ်လာခဲ့တာပါ။

ပရီးမီးယားလိဂ်မှာ ဆာလာနဲ့ စီရော်နယ်ဒိုတို့ပြီးရင် ကီဗင်ဒီဘရိုင်း၊ ဟာလန်းနဲ့ ဒီဂီယာတို့က လုပ်ခအများဆုံးကစားသမားတွေအဖြစ် အစဉ်လိုက်ရပ်တည် နေပါတယ်။

တစ်ကမ္ဘာလုံးအတိုင်းအတာနဲ့ဆိုရင်တော့  တစ်ပတ်လုပ်ခပေါင် ၁ သန်း အထိရရှိနေတဲ့  ပီအက်စ်ဂျီတိုက်စစ်မှူး အမ်ဘာပေက လုပ်ခအများဆုံးဖြစ်ပါတယ်။

ဒုတိယနေရာမှာ ပီအက်စ်ဂျီတိုက်စစ်မှူး မက်ဆီက တစ်ပတ်လုပ်ခပေါင် ၉၆၀,၀၀၀ နဲ့ ရပ်တည်နေပြီး နောက်ထပ်ပီအက်စ်ဂျီ တိုက်စစ်မှူး နေမာကပေါင် ၆၀၆,၀၀၀ တတိယနေရာမှာရပ်တည်နေပါတယ်။

လုပ်ခအများဆုံး ထိပ်ဆုံး ၁ဝ ဦးစာရင်းထဲမှာ တစ်ပတ်လုပ်ခ ပေါင် ၃ သိန်းခွဲကျော် ရရှိနေကြတဲ့ ဂရစ်မန်းနဲ့ လီဝန်ဒေါစကီးတို့လည်း ပါဝင်ခဲ့ပါတယ်။