ဆရာ/ဆရာမများ

May 26, 2018

ဝမ်းတွင်းက ဆရာ/ဆရာမများ ၁၀ တန်းဖြေလွှာ စစ်ဆေးခနှင့် စရိတ်များ မရသေး

မန္တလေးတိုင်းဒေသကြီး၊ ဝမ်းတွင်းမြို့နယ်က ဆရာ/ဆရာမတွေဟာ မန္တလေးတက္ကသိုလ်ကိုသွားရောက်ပြီး တက္ကသိုလ်ဝင်တန်း စာမေးပွဲအဖြေလွှာတွေ စစ်ဆေးပြီး ၁ လခွဲကြာသည့်တိုင် ခရီးစရိတ်နဲ့ နေ့တွက်စရိတ် မရကြသေးတာကြောင့် အခက်အခဲဖြစ်နေတယ်လို့ အထက်တန်းပြ ဆရာဆရာမတွေ မေ ၂၅ ရက်နေ့က ပြောပါတယ်။ အထက်တန်းပြဆရာ ဦးအောင်ဇင်က “၁၀ တန်း စာစစ်လိုက်လာတာ ၅ နှစ်လောက်ရှိပြီ။ ဇွန်လလောက်ကမှ ခရီးစရိတ်ရတယ်။ နေ့တွက်စရိတ် တခါမှမရဖူးသေးဘူး။ မန္တလေးသွားတုန်းက ချေးငှားသွားရတယ်။ ချက်ချင်းပြန်မဆပ်နိုင်တော့ မျက်နှာပူ အားနာရတယ်။ မတ်လကုန်တဲ့ရက်မှာပဲ မန္တလေးသွားရတယ်။ ဧပြီလဆန်း ၁ ရက်နေ့မှာ စာစစ်ရတယ်။ တချို့လည်း သင်္ကြန်အကြိုနေ့လောက်မှ ပြီးတယ်။ တချို့လည်း စောစောပြီးတယ်။ တဘာသာနဲ့တဘာသာ မတူဘူးပေါ့။ နေစရာတော့ပေးပါတယ်။ စားတာက ဝယ်စားရတယ်။ ငွေကြေး အခက်အခဲရှိတာပေါ့” လို့ ပြောပါတယ်။ ဒုပညာရေးမှူး ဦးကျော်မြင့်က “၁၀ တန်းစာစစ်တွေကို ထုတ်ပေးရမယ့် ပိုက်ဆံ ဒီနေ့ပဲ ဘဏ်ကို ရောက်တယ်ဆိုတာ မက်ဆေ့နဲ့ သိရတယ်။ ဆရာတွေကိုတော့ ထုတ်မပေးရသေးပါဘူး။ သူတို့အခက်အခဲလည်း ‎ကိုယ်ချင်းစာမိပါတယ်။ ၂၀၁၈-၁၉ ဘတ်ဂျက်ထဲ ခရီးစားရိတ်ခေါင်းစဉ်နဲ့ ထုတ်ယူရတာပါ။ ဒီနှစ် နေ့တွက်စရိတ်နဲ့ ‎ခရီးစရိတ် ၂ ခုလုံးပေးမှာပါ” လို့ ပြောပါတယ်။ “ဝမ်းတွင်းမြို့နယ်မှာ အထက်တန်းပြ ‎ဆရာဆရာမ ၁၆၅ ယောက်ရှိပါတယ်။ ၁၀ တန်းစာစစ်ကို အထက်တန်းပြဆရာ ၁၂၀ လောက် သွားခဲ့တာပါ။ စာစစ်ခအဖြေလွှာတစောင်ကို ၃၀၀ ကျပ်ရပါတယ်။ ဆရာတဦးကို အဖြေလွှာ ၁၀၀ ကနေ ၂၅၀ အတွင်း စစ်နိုင်တယ်” လို့ မြို့နယ်ပညာရေးမှူးရုံးက ‎ပြောပါတယ်။ ‎သတင်း-မောင်မောင်လင်း(ဝမ်းတွင်း)
3 years Ago
Up