အီတလီနိုင်ငံမှာ ဒေါသထွက်နေတဲ့ ဆရာဝန်တွေက လူမဆန်တဲ့ ကြိုးနီစနစ်ကို ဆန့်ကျင် ဆန္ဒပြနေပါတယ်။
ကိုရိုနာဗိုင်းရပ်စ် ကူးစက်ကပ်ဘေး ဆိုက်နေတာ ၂ နှစ်ကြာပြီ ဖြစ်ပေမယ့် သူတို့ကို စိတ်ပျက် အားငယ်စရာ အခြေအနေမှာ အလုပ် အလွန်အကျွံ လုပ်ခိုင်းထားပြီး အစိုးရက အလေးမထားဘူး၊ ကြိုးနီစနစ်အောက်မှာ နစ်မြုပ်နေတယ်လို့ ဆရာဝန်တွေက ပြောပါတယ်။
အထွေထွေရောဂါကု ဆရာဝန်ကတော့ ဆေးရုံတွေက ဆရာဝန်တွေ၊ သူနာပြုတွေထက် ပိုဆိုးဆိုးရွားရွား ဆက်ဆံခံနေရပြီး ရုံးလုပ်ငန်းတွေထဲမှာ နစ်နေလို့ လူနာတွေကို သေချာမစောင့်ရှောက်နိုင်ဘူးလို့ ပြောပါတယ်။
အထွေထွေရောဂါကု ဆရာဝန်တွေဟာ ဘာအကာအကွယ်ပစ္စည်း လမ်းညွှန်ချက်မှ မရဘဲ ဆေးရုံတွေမှာ လူနာတွေများနေလို့ အသက်နဲ့ ဘေးကင်းရေးကို ရင်းပြီး လူနာတွေအိမ်ကို သွားနေရတယ်လို့ ရုမ်းမြို့တော် တောင်ပိုင်းက ဆရာဝန်လုပ်သက် နှစ် ၂၀ ရှိတဲ့ အန်တွိုင်းနက် ဒေလူကာက ပြောပါတယ်။
လူနာတွေက ဆရာဝန်ကို လက်တွေအများကြီးပါတဲ့ ဟိန္ဒူနတ်ဘုရား ကာလီမယ်တော်နဲ့ တူတယ်လို့ နက်နက်နဲနဲ အသိအမှတ် ပြုကြပေမယ့် အစိုးရဆီက ကျေးဇူးတင်တယ်လို့ အသိအမှတ်ပြုတာ ရချင်တယ်လို့လည်း သူက ဆက်ပြောပါတယ်။ သူဟာ ဆန္ဒပြနေတဲ့ ဆရာဝန်တွေ အများအပြားထဲက တယောက်ပါ။
အစိုးရက ကူညီဖို့ ဆော်ဩနေသလို ကိုဗစ်ကပ်ဘေးကြောင့် သေဆုံးခဲ့တဲ့ လုပ်ဖော်ကိုင်ဘက်တွေရဲ့ မိသားစုတွေအတွက် လျော်ကြေးပေးဖို့ကိုလည်း တောင်းဆိုနေပါတယ်။
မတ်လ ၂ ရက်မှာတော့ ဒေါသထွက်နေတဲ့ ဆရာဝန် အယောက် ၂၀၀ လောက်ဟာ ကျန်းမာရေး ဝန်ကြီးဌာန ရှေ့မှာ ဒုတိယမြောက်နေ့အဖြစ် ဆန္ဒပြခဲ့ကြပါတယ်။
အိန္ဒိယ နယူးဒေလီမြို့မှာ ကိုဗစ်ကူးစက်မှု နေ့စဉ်မြင့်မားလာနေပေမဲ့ ဆရာဝန်လုံလောက်မှုမရှိတာ ကျန်းမာရေးကုသမှု မနိုင်မနင်းဖြစ်နေတာတွေကြောင့် ဝန်ထမ်းအရေအတွက် ပိုတိုးပေးဖို့ ဆရာဝန်တွေက ဆန္ဒပြတောင်းဆိုခဲ့ပါတယ်။
နယူးဒေလီမြို့ ဆေးရုံကြီးနှစ်ရုံရှေ့မှာ ဆရာဝန်တွေ ဦးဆောင်ပြီး ဆန္ဒပြခဲ့ကြသလို ရွှေ့ပြောင်း အလုပ်သမားတွေကလည်း ထိခိုက်လာမယ့် သူတို့လုပ်အားခတွေကို တောင်းဆိုပါတယ်။
အစိုးရက ဒီဇင်ဘာ ၂၈ ရက်မှာ ကန့်သတ်မှုအသစ်တွေနဲ့ ညမထွက်ရ အမိန့်ထုတ်ပါတယ်။
ဆန္ဒပြဆရာဝန်တဦးက “ကိုဗစ်ကူးစက်မှုက ပြန်မြင့်လာပြီး နောက်နှစ်လဆိုရင် တတိယလှိုင်း ဝင်တော့မယ်။ လက်ရှိဆရာဝန်အရေအတွက်နဲ့ မနိုင်ဘူး။ အရည်ချင်းရှိတဲ့ ဆရာဝန်အသစ်တွေ အများကြီး လိုနေတယ်။ ရှေ့တန်းကနေ ထိထိရောက်ရောက် ကာကွယ်ကုသပေးဖို့ဆိုလျှင် ကျန်းမာရေး ဝန်ထမ်း ၄၅,၀၀၀ လောက် အသစ်ခန့်ပေးရပါမယ်” လို့ ပြောပါတယ်။
ဒေလီမြို့တော်ဝန်ကက သတင်းစာရှင်းလင်းပွဲလုပ်ရာမှာ နယူးဒေလီရဲ့ ကူးစက်မှုနှုန်းက အဝါရောင်အဆင့် ဖြစ်လာတာကြောင့် ရုပ်ရှင်ရုံ၊ အားကစားရုံ၊ စားသောက်ဆိုင်တွေ၊ ဘားတွေနဲ့ spas ဆိုင်တွေ ပိတ်ရမှာဖြစ်ပြီး မြို့ထဲသွားလာရေး metro စနစ်ကို ၅၀ ရာခိုင်နှုန်း လျော့ချပစ်မယ်လို့ ပြောပါတယ်။
ရွှေ့ပြောင်းအလုပ်သမားတွေကတော့ အဲဒီကန့်သတ်မှုတွေနဲ့ ညမထွက်ရအမိန့်တွေ ထုတ်လိုက်ပါက ပုံမှန်ဝင်ငွေ မရှိတာကြောင့် သူတို့အခက်အခဲတွေကို ဖြေရှင်းပေးပါလို့ ပြောပါတယ်။
နယူးဒေလီမှာ ပြီးခဲ့တဲ့ရက်ပိုင်းအတွင်း ကိုဗစ်-၁၉ ကူးစက်နှုန်း စိုးရိမ်စရာကောင်းအောင် ပြန်မြင့်တက် လာနေသလို အိုမီခရွန် ကူးစက်ခံရသူ ၁၉ ဦးရှိပြီး လောလောဆယ် သေဆုံးမှုတော့ မရှိသေးပါ။