ဆရာမ

January 8, 2023

အမေရိကန်မူလတန်းကျောင်းတွင် ကျောင်းသားက ဆရာမကို သေနတ်ဖြင့်ပစ်

အမေရိကန်နိုင်ငံ၊ ဗာဂျီးနီးယားပြည်နယ်၊ နျူးပေါ့ထ်နျူးစ်မြို့ရှိ ရစ်ချ်နက်ခ် မူလတန်းကျောင်းမှာ ဇန်နဝါရီ ၆ ရက်က အသက် ၆ နှစ်အရွယ် ပထမတန်း ကျောင်းသားကလေးငယ်တစ်ဦးက သေနတ်နဲ့ ပစ်လိုက်တာကြောင့် ဆရာမတစ်ဦးကို ထိမှန်ဒဏ်ရာရသွားခဲ့ပြီး ဒါဟာ မတော်တဆ ဖြစ်ရပ် မဟုတ်ဘူးလို့ ရဲတပ်ဖွဲ့က ပြောကြားခဲ့ပါတယ်။ 

တာဝန်ရှိသူတွေက ဒီကိစ္စအတွက် အဖြေရှာဖို့နဲ့ ဒါမျိုးနောက်ထပ် မဖြစ်ရအောင် ကာကွယ်ရမယ် လို့ ပြောဆိုရင်း စိုးရိမ်ပူပန်နေကြပါတယ်။ 

အသက် ၃၀ အရွယ် ဆရာမရဲ့ဒဏ်ရာဟာ အသက်အန္တရာယ်ရှိတယ်လို့ ယူဆထားပေမယ့် ဆေးရုံမှာ ဒဏ်ရာအခြေအနေတိုးတက်မှုအနည်ငယ် ရှိတယ်လို့ သတင်းစာရှင်းလင်းပွဲမှာ ရဲချုပ် စတိဗ် ဒရူးက သတင်းထောက်တွေကို ပြောကြားခဲ့ပါတယ်။ 

အသက် ၆ နှစ်အရွယ်ကလေးက အဲဒီသေနတ်ကို ဘယ်လိုရခဲ့တယ် ဆိုတာကိုတော့ ထပ်မရှင်းပြသွားပါဘူး။ 

ပထမတန်း စာသင်ခန်းအတွင်း ငြင်းခုံမှုတခု ဖြစ်ပြီးတော့ ပစ်ခတ်မှုတစ်ခု ရှိခဲ့ကြောင်း ရဲတပ်ဖွဲ့က ဖော်ပြပါတယ်။ 

ဒါဟာ မတော်တဆ ပစ်ခတ်မှု မဟုတ်ကြောင်း ရဲချုပ်က ပြောကြားပြီး ကလေးကို ထိန်းသိမ်း ထားတယ်လို့ ဆိုပါတယ်။ ကျောင်းသားတွေ ထိခိုက်ဒဏ်ရာရတာ မရှိပါဘူး။

ကျောင်းသားတွေ ဘေးကင်းစေဖို့ အားကစားရုံကို ရွှေ့ပြောင်းပေးခဲ့ပြီး နှစ်သိမ့်ဆွေးနွေးမှုတွေ လုပ်ပေးခဲ့ကြောင်း ရဲချုပ် ဒရူးက ပြောပါတယ်။ 

3 weeks Ago

February 20, 2021

ရိုက်နှက်ဖမ်းဆီးခံရသည့် မြစ်ကြီးနားမြို့က ဆရာမ ၂ ဦးအပါအဝင် ၁၄ ဦး ပြန်လွှတ်

မြစ်ကြီးနားပညာရေးဒီဂရီကောလိပ်အနီး ဖေဖော်ဝါရီ ၁၉ ရက် မနက်က CDM လှုပ်ရှားမှုမှာ ပါဝင်ဖို့ ဖိတ်ခေါ်သူ ဖမ်းဆီးခံဆရာမ ၂ ယောက်အပါအဝင် ၁၄ ဦးကို အဲဒီနေ့ ညနေမှာပဲ ခံဝန်လက်မှတ်ထိုးစေပြီး မြို့နယ်ရဲတပ်ဖွဲ့မှူးရုံးက ပြန်လွှတ်ပေးခဲ့ပါတယ်။

“နောက်ရက်တွေမှာလည်း ဥပဒေနဲ့အညီ ဆောင်ရွက်မှာပါ။ နောက်နေ့တွေမှာတော့ ဒီလို ပြန်လွှတ်ပေးမလားဆိုတာ ကျနော်တို့လည်း အာမ မခံနိုင်ပါဘူး ”လို့ ခရိုင်ရဲတပ်ဖွဲ့မှူး တင်ဖေဝင်းက  ပြောပါတယ်။

မြစ်ကြီးနားပညာရေးဒီဂရီကောလိပ်အနီး CDM လှုပ်ရှားမှုမှာ ပါဝင်ဖို့ ပညာရေး ဝန်ထမ်းတွေကို လူစုနေချိန် ကျောင်းဆရာမ ၂ ယောက်နဲ့ မြစ်ကြီးနားမြို့ရဲ့ စည်ပင်သာယာဈေးနား ဈေးကြီးလမ်းပေါ်မှာ ဆန္ဒပြဖို့  လူစုနေတယ်ဆိုသူ လူ ၁၂ယောက်ကို ဖေဖော်ဝါရီ ၁၉ ရက် မနက်က  ရဲဝတ်စုံတွေ ဝတ်ထားသူတွေက နံပါတ်တုတ်နဲ့ရိုက်၊ လေးခွနဲ့ပစ်ကာ ဖမ်းဆီးသွားတာ ဖြစ်ပါတယ်။

“ကျမတို့ ဖုန်းတွေကို သိမ်းတယ်။ အချုပ်ကားနဲ့ မြောက်ပိုင်းတိုင်းစစ်ဌာနချုပ်က မြို့တော်ခန်းမနားက အချုပ်ကားထဲမှာပဲ  ထမင်းလည်း မကျွေး၊ ရေမတိုက်ဘဲ တနေကုန် ထားထားပြီး ညနေ ၃ နာရီကျော်မှ မြစ်ကြီးနားမြို့နယ်ရဲတပ်ဖွဲ့ရုံးကို ခေါ်လာခဲ့တယ်။ ဆရာမတစ်ယောက်က လက်လည်း ထိမိတယ်။ ခြေသလုံးနဲ့ တံတောင်ဆစ်မှာတွေလည်း ဒဏ်ရာရထားတယ်”လို့ ဖမ်းဆီးခံရသူ တစ်ဦးက ပြောပါတယ်။

ဖေဖော်ဝါရီ ၁၈ ရက်ကလည်း ဆန္ဒပြသူများထဲက ဦးပဉ္ဇင်း ဦးပညာ ဝံသနဲ့ သပိတ်စစ်ကြောင်း အရှေ့က ထော်လာဂျီမောင်းတဲ့ ကားဆရာအပါ လမ်းဘေး ကွမ်းယာ ရောင်းနေတဲ့ အမျိုးသားတစ်ယောက်နဲ့ ဆန္ဒပြပြည်သူတစ်ယောက်၊ စုစုပေါင်း ၄ ယောက်ကို တပ်မတော်က ဖမ်းဆီးသွားပြီး ၁၈ ရက်နေ့ညမှာ ပြန်လွှတ်ပေးခဲ့တာပါ။ 

မြစ်ကြီးနားမှာ အရင်နေ့များက ဆန္ဒပြ စုရပ်နေရာတွေကို တပ်မတော်သားတွေနဲ့ ရဲတွေက ပိတ်ဆို့ခြင်း မြို့တွင်းလမ်းတွေပေါ်မှာ လိုက်ဖမ်းခြင်း၊ ဓာတ်ပုံရိုက်တဲ့သူတွေကို လေးခွနဲ့ ပစ်တာတွေ ပြုလုပ်ခဲ့တဲ့အတွက် ဆန္ဒပြပြည်သူတွေဟာ ဖေဖော်ဝါရီ ၁၉ ရက်က လမ်းလျှောက် ဆန္ဒမပြတော့ဘဲ မြို့တွင်းလမ်းတွေပေါ်မှာ ဆိုင်ကယ်နဲ့ လှည့်လည်ပြီး ကြွေးကြော်သံတွေနဲ့ မွန်းတည့် ၁၂ နာရီကျော်အထိ ဆက်လက်ဆန္ဒပြခဲ့ကြပါတယ်။

မီးမီး

2 years Ago
More News
Up