ဆန္ဒပြသူ

May 20, 2022

ဆူဒန်တွင် စစ်အုပ်ချုပ်ရေးဆန္ဒပြသူများကို မျက်ရည်ယိုဗုံးဖြင့် လူစုခွဲ

ဆူဒန်နိုင်ငံမြို့တော် ခါတွန်းမြို့မှာ စစ်အုပ်ချုပ်ရေးကို ဆန့်ကျင်တဲ့ ဆန္ဒပြသမားတွေကို လုံခြုံရေး တပ်ဖွဲ့တွေက မျက်ရည်ယိုဗုံးတွေ သုံးပြီး လူစုခွဲခဲ့ပါတယ်။ 

စစ်တပ်အာဏာသိမ်းတာကို ဆန့်ကျင်တဲ့ ပြည်သူတွေဟာ လုံခြုံရေးတပ်ဖွဲ့တွေကို အာခံပြီး ၇ လကြာအောင် ဆက်တိုက် ဆန္ဒပြနေကြတာပါ။ 

တချို့ ဆန္ဒပြသမားတွေက လုံခြုံရေးတပ်ဖွဲ့တွေဘက်ကို မျက်ရည်ယိုဗုံးတွေနဲ့ ပြန်ပစ်နေတာကို လည်း တွေ့ရပါတယ်။ 

“နောက်ဆုံးကျတော့ သမ္မတ အယ် ဘာရှီးယား လက်ထက်တုန်းက နည်းကို ပြန်သုံးတာပါပဲ၊ ဆန္ဒပြသမားတွေကို ဘယ်မှ ဆက်သွားလို့ မရအောင် လူစုနေတဲ့အချိန်မှာ လူစုခွဲမယ်။ ဒါပါပဲ။ ဒါပေမယ့် ဒီလို လုပ်လိုက်လို့ ကျနော်တို့ ရပ်တန်သွားမှာ မဟုတ်ပါဘူး” လို့ သပိတ်ကော်မတီ ပြောခွင့်ရသူ Ahmed Esmat အာမက် အက်စ်မတ်က ပြောပါတယ်။ 

“ဖိနှိပ်တာဟာ တာဝန်မဲ့တဲ့ လုပ်ရပ်ဖြစ်တယ်။ ဘယ်လိုကြောင့်ပဲ ဖြစ်ဖြစ် မှန်ကန်တဲ့ လုပ်ရပ်မဟုတ်ဘူး”လို့ ဖက်တီဆိုတဲ့ ဆန္ဒပြသမား နောက်တယောက် ပြောတာပါ။ 

မနှစ် အောက်တိုဘာလတုန်းက စစ်တပ် အာဏာသိမ်းမှုကြောင့် ၂၀၁၉ ခုနှစ်က စစ်ဗိုလ်ချုပ်တွေနဲ့ အတိုက်အခံ ပါတီတွေကြားထဲက အာဏာခွဲဝေရေး သဘောတူညီချက်လည်း ပျက်စီးသွားခဲ့ ရပါတယ်။ 

ဆူဒန်မှာ ဇန်နဝါရီလကတည်းက ဝန်ကြီးချုပ် မရှိတော့ဘဲ တိုင်းပြည်စီးပွားရေးဟာလည်း တရှိန်ထိုး ကျဆင်းနေပါတယ်။ 

စီးပွားရေး လုပ်ငန်းတွေ ရပ်တန့်နေသလို၊ ပြည်သူတွေဟာလည်း ကုန်ဈေးနှုန်း ကြီးမြင့်လာတာ၊ လျှပ်စစ်နဲ့ လောင်စာဆီ ဈေးနှုန်းတွေ မြင့်တက်လာတဲ့ ဒဏ်တွေကို အလူးအလဲ ခံနေရပါတယ်။ 

2 months Ago

March 18, 2022

ကျူးဘားတွင် ဆန္ဒပြသူ အယောက် ၁၀၀ ကို ထောင်ဒဏ်များချမှတ်

ကျူးဘားနိုင်ငံ ဟာဗားနားမြို့က ဆန္ဒပြသူ အယောက် ၁၀၀ ကို မနှစ်က ဆန္ဒပြပွဲတွေအတွင်း အကြမ်းဖက်မှုအတွက် ထောင်ဒဏ် ၄ နှစ်ကနေ နှစ် ၃၀ ထိ ချမှတ်လိုက်ပါတယ်။

ဒီဆန္ဒပြပွဲဟာ ၁၉၅၉ ကျူးဘားတော်လှန်ရေး နောက်ပိုင်းမှာ အကြီးမားဆုံး ဖြစ်ပါတယ်။ ဆန္ဒပြသူတွေဟာ ဖွဲ့စည်းပုံအခြေခံဥပဒေကို ဖျက်ဆီးဖို့ အပြင်းအထန် ကြိုးစားခဲ့တယ်လို့ တရားရုံးချုပ်က ကြေညာချက် ထုတ်ပြန်ပါတယ်။

ပြစ်ဒဏ်စီရင်ခံ အများစုက မြို့တော် ဟာဗားနားရဲ့ ဆင်းရဲတဲ့ အပယ်ခံ ရပ်ကွက်သားတွေပါ။ သူတို့ဟာ ကျူးဘားနဲ့ နိုင်ငံခြားကလူတွေဆီက ချီတက်ဖို့ အမိန့်အရ လုပ်ခဲ့သူတွေလို့ တရားရုံးက ပြောပါတယ်။

ဆန္ဒပြပွဲတွေအတွက် အမေရိကန်က ငွေကြေးထောက်ပံ့ လှုံ့ဆော်ခဲ့တယ်လို့လည်း ကျူးဘားအစိုးရက အရင်က စွပ်စွဲဖူးပါတယ်။

မနှစ် ဇူလိုင် ၁၁ ရက်နဲ့ ၁၂ ရက်တွေက ကျူးဘား ပြည်လုံးကျွတ် ဆန္ဒပြပွဲအတွင်း လူအများအပြားက စားနပ်ရိက္ခာ၊ ဆေးဝါးနဲ့ လျှပ်စစ်မီး ပြတ်လပ်မှုအတွက် ဒေါသထွက်ပြီး ချီတက်ရင်း လွတ်လပ်ရေးကို ကြွေးကြော်ခဲ့ကြပါတယ်။

ဒါကြောင့် နိုင်ငံတဝန်းက လူ အယောက် ၇၀၀ ကျော်ဟာ ဆန္ဒပြပွဲအတွင်း ဖျက်ဆီးတာ၊ လူတွေနဲ့ ပိုင်ဆိုင်မှုတွေကို တိုက်ခိုက်တာနဲ့ အများပြည်သူ ကမောက်ကမဖြစ်အောင် အကြီးအကျယ်လုပ်တာ စတဲ့ ရာဇဝတ်မှုတွေကို ကျူးလွန်ခဲ့တယ်လို့ အစိုးရရှေ့နေတွေက ပြောခဲ့ကြပါတယ်။

4 months Ago
More News
Up