ဆန္ဒပြလူငယ်

May 13, 2021

မူဆယ်တွင် ဆန္ဒပြလူငယ်အချို့ လက်နက်ပစ္စည်းတွေ့ရှိကြောင်း မတရားစွပ်စွဲ ကြေညာခံရ

မူဆယ်မြို့မှာ ဆန္ဒပြလူငယ်အချို့ လက်နက်ပစ္စည်းတွေ့ရှိကြောင်း မတရားစွပ်စွဲ ကြေညာခံ ရတယ်လို့ အမည်မဖော်လိုသူတစ်ဦးက ပြောပါတယ်။

မူဆယ်မြို့မှာ မေ ၁၁ ရက်နေ့ မနက် ၉ နာရီဝန်းကျင်လောက်က ဖမ်းဆီးခံခဲ့ရတဲ့ ၂ ဦးမှာ ဆိုင်ကယ်သာပါပြီး လက်နက်ပစ္စည်းမပါပေမယ့် M - 22 ၅ လက်၊ လက်လုပ်မိုင်း ၁၆ လုံးနဲ့ ဖမ်းဆီးရမိကြောင်း မတရားစွပ်စွဲ ကြေညာခံခဲ့ရတာလို့ ဆိုပါတယ်။

ဖမ်းဆီးခံရသူတွေထဲမှ မောင်ရဲသုဝေလင်းကို မေလ ၁၂ ရက်​နေ့ ည ၈ နာရီ MWD သတင်းမှာ ၁၈ နှစ် မပြည့်သေးပေမယ့် ၁၈ နှစ်လို့ မှားယွင်းကြေညာခဲဲ့တယ်လို့ သူက ရှင်းပြပါတယ်။

မူဆယ်မှာ မေလ ၁၁ ရက်နေ့က မနက်ပိုင်းနဲ့ ညနေပိုင်းမှာ လူငယ် ၅ ဦး ဖမ်းဆီးခံခဲ့ရတယ် လို့ မျက်မြင်ဒေသခံဆီက ​သိရပါတယ်။

မူဆယ်မှာ စစ်အာဏာရှင် အလိုမရှိကြောင်း ဆန့်ကျင် ဆန္ဒပြတဲ့သူတွေ အများအပြား ဖမ်းဆီးခံရပြီး ပြန်လွှတ်ပေးခဲ့သူတွေလည်း ရှိပေမယ့် တရားစွဲဆိုခံထားရသူတွေ အများအပြား ရှိပါတယ်။

ဒါ့အပြင် ဖမ်းဆီးထိန်းသိမ်းထားတဲ့သူတွေထဲမှာ ဉာဏ်ရည် မသန်စွမ်းသူ တစ်ဦး ပါဝင်နေတယ်လို့ ဖမ်းဆီးခံရသူနဲ့နီးစပ်သူက ပြောပါတယ်။

လက်ရှိ မူဆယ်မှာ အကြမ်းဖက်စစ်ကောင်စီရဲ့ စစ်တပ်နဲ့ ရဲတပ်ဖွဲ့က ဆန္ဒပြသူတွေကို ပစ်ခတ် ဖြိုခွင်းတာကြောင့် လူငယ် အမျိုးသား ၂ ဦး သေဆုံးခဲ့ပြီး ပြင်းထန်ဒဏ်ရာရသူတွေ လည်းရှိသလို ပုဒ်မ ၅၀၅ (က) နဲ့ ဖမ်းဝရမ်းထုတ်ထားခံရသူတွေလည်း ရှိနေပါတယ်။

7 months Ago

April 18, 2021

မူဆယ်တွင် ဆန္ဒပြ လူငယ် ၁ ဦး ဖမ်းဆီးခံရ

မူဆယ်မြို့ ဆန္ဒပြပွဲမှာ တက်ကြွစွာပါဝင်တဲ့ အမျိုးသမီး လူငယ် ၁ ဦး ဧပြီလ ၁၇ ရက်နေ့က မတရား ဖမ်းဆီးခံရတယ်လို့ မျက်မြင်တစ်ဦးက ပြောပါတယ်။

အရပ်ဝတ် ဝတ်ဆင်ထားတဲ့ လူတစ်စုက ကား ၅ စီးနဲ့ မူဆယ် မေဦး လက်ဖက်ရည်ဆိုင်မှာ မတရားလာရောက် ဖမ်းခေါ်သွားတာလို့ ဆိုပါတယ်။

ဖမ်းဆီးခံရသူရဲ့ မိခင်က စကားပြောခွင့်ရဖို့ အကြိမ်ကြိမ် တောင်းဆိုခဲ့ပေမယ့် "ခင်များ ဒီလောက် ရစ်ရင် ခင်များကိုပါ ဆွဲစိလို့ရတယ်။ CCTV တပ်ထားတယ်။ CCTV ရှေ့မှာ ခင်များဘာလုပ်ချင်တာလဲ။ ခင်များကို တခါတည်း ဖမ်းချုပ်လိုက်မယ်” လို့ ရဲစခန်း ဂိတ်ပေါက်မှာ တာဝန်ကျ ရဲ ၁ ဦး ​ခြိမ်းခြောက် ငေါက်ငန်း ပြောဆိုခဲ့တယ်လို့ မျက်မြင်က ပြောပါတယ်။

ရဲစခန်းကတော့ ဖမ်းဆီးခံရသူကို သပိတ်ခေါင်းဆောင်လို့ စွပ်စွဲပြောဆိုထားကာ ပုဒ်မ ၅၀၅ (က) နဲ့ ဖမ်းဝရမ်းထုတ်ထားတယ်လို့ သိရပါတယ်။

မူဆယ်မြို့မှာ အာဏာသိမ်းတာကို ဆန့်ကျင်ဆန္ဒပြတဲ့ ပြည်သူ ၃၀ ကျော် ဖမ်းဆီးခံရပြီး ၁၀ ယောက်ကျော် ပြန်လွှတ်ပေးကာ တချို့ကို ပုဒ်မ ၂၅၊ ၅၀၅၊ ၅၀၅ (က)  စတာတွေနဲ့ တရားစွဲဆိုထားတယ်လို့ ဒေသခံ တစ်ဦးက ပြောပါတယ်။

7 months Ago
Up