ဆန္ဒပြပွဲ

November 29, 2022

တရုတ်တွင် ဆန္ဒပြပွဲများကြောင့် ရင်းနှီးမြုပ်နှံသူများ ထွက်ခွာ

တရုတ်အစိုးရရဲ့ တင်းကျပ်တဲ့ ကိုဗစ်-၁၉ ကန့်သတ်ထိန်းချုပ်မှုကို ဆန့်ကျင်တဲ့ ရှားရှားပါးပါး ဆန္ဒပြပွဲတွေကြောင့် စျေးကွက်မတည်ငြိမ်မှာ စိုးရိမ်တဲ့ ရင်းနှီးမြှုပ်နှံသူတွေဟာ သူတို့ရဲ့ ရန်ပုံငွေ တွေကို တရုတ်နိုင်ငံထဲကနေ ရွှေ့ပြောင်းနေကြပြီလို့ စီးပွားရေးပညာရှင်တွေက ပြောပါတယ်။

တရုတ်မြို့ကြီးတွေမှာ နိုဝင်ဘာ ၂၈ ရက်က စတော့ရှယ်ယာတွေနဲ့ ကုန်စည် ဈေးနှုန်းတွေ ကျယ်ကျယ်ပြန့်ပြန့် အရောင်းအ၀ယ်ဖြစ်ခဲ့ပါတယ်။

သီတင်းပတ် ကုန်ရက်က တရုတ်မြို့ကြီးအတော်များများမှာ ရဲတွေနဲ့ ဆန္ဒပြသူတွေကြား ရုန်းရင်း ဆန်ခတ်ဖြစ်ခဲ့လို့ ပြီးခဲ့တဲ့အပတ်က စျေးကွက်တွေမှာ စတော့ရှယ်ယာ တန်ဖိုးတက်နေရာက ရပ် သွားခဲ့ပါတယ်။

ဆန္ဒပြမှုတွေကြောင့် တရုတ်စီးပွားရေးတိုးတက်မှုအပေါ် ကြောက်စိတ်ဝင်နေကြလို့ ကြေးနီနဲ့ တခြားသတ္တုတွေ စတော့စျေးနှုန်းကျဆင်းခဲ့သလို တခြားကုန်စည်ဈေးကွက်တွေကိုလည်း ထိခိုက်ခဲ့ပါတယ်။

“သီတင်းပတ်ကုန်ရက်က ဖြစ်ခဲ့တဲ့ ဆန္ဒပြပွဲတွေကို ကြည့်ရင် အာရှဈေးကွက်မှာ အခုမြင်နေရတာ က အပျက်သဘောဆောင်တဲ့ တုံ့ပြန်မှုပဲ” လို့ NATIXIS က အကြီးတန်း စီးပွားရေးပညာရှင် ဂါရီနောင်က ပြောပါတယ်။

အကြီးတန်းစီးပွားရေးပညာရှင် ဂါရီနောင်က "ပွင့်လင်းမြင်သာမှု သိပ်မရှိတာကြောင့် ဘာတွေဖြစ်နေလဲဆိုတာကို သိဖို့ခက်တဲ့အတွက် အန္တရာယ် အဆိုးဆုံး အခြေအနေ တစ်ခုအောက်မှာ လုပ်ရမှာက တကယ်ကို ရောင်းထုတ်ပြီး ပိုင်ဆိုင်မှုကို ဘေးကင်းလုံခြုံတဲ့ တခြားနေရာတွေကို ခဏရွှေ့လိုက်တာပါ”လို့ ပြောပါတယ်။

တရုတ်နိုင်ငံရဲ့ ကိုဗစ်မူဝါဒတွေနဲ့ ပတ်သက်ပြီး စိုးရိမ်စိတ်ကြီးနေလို့  ရင်းနှီးမြှုပ်နှံသူတွေရဲ့ ခံစားချက်ကို နည်းပါးသွားစေပြီး နှေးကွေးနေသည့် စီးပွားရေးကို တွန်းအားပေးဖို့ ဒေါ်လာ ၇၀ ဘီလီယံလောက် ငွေဖြစ်လွယ်မှုကို လျှော့ချပေးနိုင်မယ့် အရန်ငွေ လိုအပ်ချက် အချိုးကို ဗဟိုဘဏ်က နိုဝင်ဘာ ၂၅ ရက်မှာ ကြေညာခဲ့ပါတယ်။

တရုတ်နိုင်ငံမှာ နိုဝင်ဘာ ၂၈ ရက်က ကိုဗစ်-၁၉ အသစ်ကူးစက်ခံရသူ ၄၀,၀၅၂ ဦးရှိပြီး စံချိန်တင် ကူးစက်မှုအသစ် ငါးရက်ဆက်တိုက် ဖြစ်ခဲ့ပါတယ်။

ရှန်ဟိုင်း၊ ဝူဟန်၊ ချန်ဒူးနဲ့ ဘေဂျင်းမြို့တော်ရဲ့ အစိတ်အပိုင်းတွေမှာလည်း ကိုဗစ် ကန့်သတ်ချက်တွေ ချမှတ်ထားတာကြောင့် ဆန္ဒပြမှုတွေလည်း ဖြစ်ပွားခဲ့ပါတယ်။ 

ကိုဗစ်စည်းမျဥ်းစည်းကမ်းတွေနဲ့ ဆန္ဒပြမှုတွေကြောင့် တရုတ်နိုင်ငံအတွက် စီးပွားရေးထိခိုက်မှုဟာ ပထမမျှော်လင့်ထားတာထက် ပိုများလာမှာကိုလည်း စိုးရိမ်နေကြပါတယ်။

2 days Ago

September 14, 2022

ကြည့်မြင်တိုင် ပန်းပင်ကြီးလမ်း ဆန္ဒပြပွဲမှ လူငယ် ၂၀ ကျော်ကို စစ်တပ်က ပစ်ခတ်ဖမ်းဆီး

ရန်ကုန်မြို့၊ ကြည့်မြင်တိုင်မြို့နယ်၊ မကျည်းတန်းမြောက်/အရှေ့ရပ်ကွက် ပန်းပင်ကြီးလမ်းမှာ စက်တင်ဘာ ၁၃ ရက် ညနေပိုင်းက ဆန္ဒပြလူငယ် ၂၀ ကျော်ကို စစ်ကောင်စီတပ်က ဖမ်းဆီးခဲ့တယ်လို့ မြို့ခံတွေဆီက သိရပါတယ်။

မနေ့ညနေပိုင်းက ဆန္ဒပြလူငယ်တွေဟာ ပြည်သူ့သံအမတ်ကြီး ဦးကျော်မိုးထွန်းကို အားပေးရပ်တည်ဖို့ ဆန္ဒထုတ်ဖော်နေချိန်မှာ စစ်ကောင်စီတပ်က အိမ်စီးကားတွေနဲ့ လာရောက်ဖမ်းဆီးခဲ့တာလို့ ရပ်ကွက်နေသူတယောက်က ဒီဗွီဘီကို ပြောပါတယ်။

“ဆန္ဒပြဖို့လုပ်နေတုန်းပဲ ရှိသေးတယ်၊ ဝင်ဖမ်းတာ။ ပစ်ခတ်မှုတွေလည်းရှိတယ်။ မိန်းကလေးတွေရော ယောကျ်ားလေးတွေပါ အဖမ်းခံရတာ။ ဖုန်းနဲ့ ဓာတ်ပုံရိုက်တဲ့ ကောင်လေးတွေလည်း ပါတယ်။ သတင်းထောက်တွေနဲ့တူတယ်။”

မနေ့ညနေပိုင်းက ဖမ်းဆီးခံရသူတွေထဲမှာ ရေဘဝဲ (ပြည်သူ့အကျိုးပြု လူငယ်အဖွဲ့အစည်း)၊ အခြေခံပညာကျောင်းသားလူငယ်များ အစည်းအရုံး (အကလ-ဗဟို)၊ Myanmar Labour Alliance၊ ဗမာ့လူငယ်ကွန်ရက်၊ ပညာနန်းတော် ကိုယ်ပိုင်ကျောင်း ကျောင်းသားများသမဂ္ဂ အဖွဲ့ဝင်တွေနဲ့ သတင်းထောက်တချို့ ပါဝင်တယ်လို့ ကျောင်းသားသမဂ္ဂအဖွဲ့ဝင်တယောက်က ဒီဗွီဘီကို ပြောပါတယ်။

“အရှေ့ပိုင်းသမဂ္ဂရဲ့ ဗဟိုအလုပ်အမှုဆောင်အဖွဲ့ဝင် ကိုမင်းသူရိန်လည်း အဖမ်းခံရတယ်။ ၁၅ ယောက်လည်း အဆက်အသွယ်မရဘဲ ဖြစ်နေတယ်။”

ဆန္ဒပြလူငယ်တွေဟာ စာတန်းပါပိတ်စတွေ၊ ရောင်စုံမီးခိုးဗုံးတွေ ကိုင်ဆောင်ဆန္ဒပြနေတုန်း ဖမ်းဆီးခံခဲ့ရတာဖြစ်ပြီး ဖမ်းဆီးခံရသူဦးရေ အတည်ပြုနိုင်ခြင်း မရှိသေးဘူးလို့ ရဲတပ်ဖွဲ့နဲ့ နီးစပ်သူတယောက်က ပြောပါတယ်။

“ညနေကမိတာနဲ့ ညပိုင်း ထပ်ဖမ်းရင်တော့ နှစ်ဆယ်ကျော်မယ်၊ စာရင်းကိုတော့ ဘယ်သူမှ ပြောမှာမဟုတ်ဘူး။ ဖမ်းမိတဲ့ကလေးတွေကို စခန်းမှာမထားဘူး၊ စစ်ကြောရေးပို့မှာ။ အဲ့မှာ စစ်ပြီးမှ ဖမ်းမိတဲ့မြို့နယ်မှာ အမှုဖွင့်ပြီး တရားရုံးတင်မှာ။”

လတ်တလောမှာ စစ်ကောင်စီက ဆန္ဒပြလူငယ်တွေကို ဖမ်းဆီးတာနဲ့ပတ်သက်ပြီး ဖမ်းဆီးခံရသူဦးရေကို ဒီဗွီဘီ သတင်းဌာနအနေနဲ့ သီခြားအတည်ပြုနိုင်ခြင်း မရှိသေးပါဘူး။

ပြီးခဲ့တဲ့ ၂၀၂၁ ခုနှစ်၊ ဒီဇင်ဘာ ၅ ရက်ကလည်း ကြည့်မြင်တိုင်၊ ပန်းပင်ကြီးလမ်းမှာ ရန်ကုန်လူထုသပိတ်ကို စစ်ကောင်စီတပ်က ကားနဲ့ဝင်တိုက်ကာ သေနတ်နဲ့ ပစ်ခတ်ဖမ်းဆီးခဲ့လို့ ဆန္ဒပြလူငယ်တချို့ သေဆုံးပြီး ၁၂ ယောက် ထိခိုက်ဒဏ်ရာရကာ ၁၅ ယောက်အထိ ဖမ်းဆီးခံရပါတယ်။

3 months Ago
More News
Up