ဆက်ကြေးတောင်း

October 24, 2021

မအူပင် EPC နှင့် ကညနရုံးရှေ့ ဗုံးပေါက်ကွဲ၊ ကန်ကြီးထောင့်၌ ရွာ ၁ ရွာကို စစ်တပ်က ငွေ ၃ သိန်း ဆက်ကြေးတောင်း

ဧရာ၀တီတိုင်း၊ မအူပင်မြို့မှာ အောက်တိုဘာလ ၂၃ ရက်နေ့ညပိုင်းက EPC ရုံးနဲ့ ကညန ရုံးရှေ့တွေမှာ ဗုံး ၂ လုံး ပေါက်ကွဲခဲ့တယ်လို့ သိရပါတယ်။ 

မအူပင်မြို့မှာ ဒေသခံပြည်သူ့ကာကွယ်ရေးတပ်ဖွဲ့တွေကို ထိန်းချုပ်ဖို့အတွက် စစ်အုပ်စု ပုဒ်မ ၁၄၄ ထုတ်ထားပေမဲ့ EPC ရုံးနဲ့ ခရိုင်ကညန ရုံးရှေ့တွေမှာ ဗုံးခွဲခဲ့တယ်လို့ မြစ်ဝကျွန်းပေါ် ပြောက်ကျားစစ်ဆင်ရေး တပ်ပေါင်းစုက တာဝန်ရှိသူကပြောပါတယ်။ 

“ဒေသခံတွေကို အတင်းအကျပ် အခွန်ကောက်တာတွေ လုပ်နေလို့ သတိပေးတဲ့အနေနဲ့ ဖောက်ခွဲခဲ့တာပါ။ နောက်ဆိုရင်တော့ အပြင်မှာ မဖောက်တော့ဘူး။ ဒါ နောက်ဆုံးသတိပေးတဲ့အနေနဲ့ ခွဲတာ ဖြစ်တယ်”လို့ ပြောပါတယ်။

လုံခြုံရေးတိုးမြှင့်ထားတဲ့ ကြားထဲက ရုံးရှေ့တွေမှာ ဗုံးခွဲတာကို မအူပင်မြို့ပြပြောက်ကျားတပ်ဖွဲ့နဲ့ မြစ်ဝကျွန်း ပေါ်ပြောက်ကျားစစ်ဆင်ရေးတပ်ပေါင်းစု ပူးပေါင်းပြီး ပြုလုပ်ခဲ့တာလို့ ဆိုပါတယ်။ 

မအူပင်မြို့မှာ စစ်တပ်အာဏာသိမ်းပြီးနောက်ပိုင်း အောက်တိုဘာလထဲမှာ ဗုံးပေါက်ကွဲခဲ့တာ ၁၀ ကြိမ်နီးပါး ရှိလာပြီဖြစ်တယ်လို့ သိရပါတယ်။

ဧရာ၀တီတိုင်း၊ ကန်ကြီးထောင့်မြို့နယ်အတွင်း ကျေးရွာအုပ်စုတိုင်း တရွာကို ငွေ ၃ သိန်း စစ်ကောင်စီက ကောက်ခံဖို့ ကျေးရွာအုပ်စု အုပ်ချုပ်ရေးမှူးတွေကို အောက်တိုဘာလဆန်းပိုင်းက  မှာကြားထားတယ်လို့ ကျေးရွာအုပ်ချုပ်ရေးမှူး တဦးက DVB ကိုပြောပါတယ်။   

“ရွာတိုင်းကို ကောက်ခိုင်းတာ၊ ဘာလုပ်ဖို့ဆိုတာ သေချာမပြောဘူး။ ကျေးရွာအုပ်ချုပ်ရေးမှူးတွေအနေနဲ့ တာဝန်ခံပြီး ကောက်ပေးရမယ် မပေးတဲ့အိမ်ကို စာရင်းပြန်တင်ပြရမယ်ပေါ့။ အဲဒါမျိုးကောက်ခံနေတာ” လို့ ပြောပါတယ်။

ကန်ကြီးထောင့်မြို့နယ်ထဲက ကျေးရွာတွေကို ကိုဗစ်ကာလမှာလည်း အောက်စီဂျင်စက်ရုံဆောက်ဖို့အတွက် တရွာကို ၁ သိန်းနှုန်းကောက်ခံခဲ့ဖူးတယ်လို့ ဆိုပါတယ်။ 

ကန်ကြီးထောင့်မြို့နယ် စစ်ဆေးရေးဂိတ်တွေမှာလည်း ပိတ်ဆို့စစ်ဆေးပြီး ငွေကြေး တောင်းခံနေသလို ကုန်တင်ကားတွေကိုလည်း ဆက်ကြေးပုံစံ ငွေကြေးတောင်းခံနေတယ်လို့ ဒေသခံတွေက ပြောပါတယ်။ 

ဒါ့ပြင် ကျေးရွာတွေကို စစ်ကြောင်းနဲ့ဝင်ပြီး ပြည်သူ့ကာကွယ်ရေးတပ်ဖွဲ့တွေကိုဝ င်ရှာတဲ့အခါမှာလည်း အင်အားအများအပြားနဲ့ဝင်ရောက်ပြီး ဒေသခံပြည်သူတွေရဲ့ အိမ်မွေးတိရစ္ဆာန်တွေကို လုယူသွားလေ့ရှိတယ်လို့ သိရပါတယ်။

1 month Ago

September 1, 2021

ချင်းတွင်းမြစ်တွင်း သွားလာနေသည့် ရေယာဉ်များကို ပျူစောထီးအဖွဲ့က ဆက်ကြေးတောင်း

စစ်ကိုင်းတိုင်း၊ မင်းကင်းမြို့နယ်၊ ချင်းတွင်းမြစ်အတွင်း သွားလာနေတဲ့ မော်တော်ရေယာဉ်မှန်သမျှကို ပန်းဆက်ကျေးရွာအခြေစိုက် ပျူစောထီးအဖွဲ့က နေ့စဉ် ဆက်ကြေးတောင်းခံနေတယ်လို့  မော်တော်သမားတွေထံကနေ သိရပါတယ်။

ကလေးမြို့ကနေ မုံရွာကို စုန်လာတဲ့ မော်တော်ပိုင်တစ်ဦးက "လာသမျှ မော်တော် အကုန်ကောက်တာ။ အလှူခံတာလည်း မဟုတ်ဘူး။ တောင်းကတည်းက မာမာပဲ။ ဖြတ်သန်းသွားလာခွင့်လို့ပြောပြီး ကောက်တာ။ မပေးလို့မရဘူးလေ။ သူတို့က ပန်းဆက်ရွာနဲ့ မောက္ကရွာကြားကကျွန်းပေါ်က ရေလယ်ကောင်မှာ မြန်မာနိုင်ငံအလံကြီး ထောင်ပြီးစခန်းချတာ။ လာသမျှ သေနတ်ဖောက် လှမ်းခေါ်တယ်။ သူတို့ခေါ်တာမလာရင် နောက်ကနေလိုက်ပြီး သေနတ်တွေနဲ့ ပစ်တာတွေလည်းရှိတယ်။ ကျနော်တို့ မော်တော်ကို ပထမ ကျပ် ၃ သိန်း ပထမတောင်းတယ်။ ကျနော်တို့က တောင်းတောင်းပန်ပန်နဲ့ တစ်သိန်းခွဲနဲ့ ပြတ်သွားတယ်ပေါ့ဗျာ”လို့  ပြောပါတယ်။

မင်းကင်းမြို့နယ်အတွင်း ရာသီပေါ်တုပ်ကွေးတွေ ဖြစ်ပွားနေကာ ဖြတ်သန်းသွားလာသူတိုင်းကို ပျူစောထီးတွေက ခေါ်ယူစစ်ဆေး ဆက်ကြေးတောင်းနေတဲ့အတွက် ဒေသခံပြည်သူလူထုတွေ ဆေးရုံဆေးခန်းသွားရာမှာလည်း အဆင်မပြေမှုတွေ ရှိနေတယ်လို့ သိရပါတယ်။

တောင်ဖြူကျေးရွာခံ အမျိုးသမီးတစ်ဦးက “ကျမတို့ ကျန်းမာရေးအတွက် သွားရာမှာလည်း  ဒီပျူစောထီးဂိတ်က  ခေါ်ယူဖမ်းဆီး စစ်ဆေးတာတွေ လုပ်တယ်။ မွေးလူနာတို့၊ ပိုးထိလူနာတို့ဆိုရင် အချိန်မီဆေးရုံကို သွားရမှာလေ။ အခုတော့ သူတို့ဂိတ်ကို ဝင်အစစ်ခံရတာဆိုတော့ အချိန်တွေ မတရားနောက်ကျတယ်။ နောက်ပြီး ဘယ်လောက်အရေးကြီးကြီး မကြီးကြီး ငွေမပေးရင် ရစ်နေတာ မပြီးတော့ဘူး။ ကျမတို့အရေးကြီးလူနာတွေဆိုရင် မင်းကင်းဆေးရုံက အနီးဆုံးဆိုတော့ မင်းကင်းကို စက်လှေအမြန်ယာဉ်လေးတွေနဲ့ ပြေးရတာ။ အဲဒီကမနိုင်ဘူးဆိုရင်  မုံရွာဆေးရုံပေါ့။ အချိန်မီ မပို့နိုင်လို့ မွေးလူနာ သေဆုံးတာလည်းရှိတယ်”လို့  ပြောပါတယ်။

စစ်အာဏာသိမ်းပြီးကတည်းက ကြံ့ခိုင်ရေးအမာခံရှိတဲ့ ပန်းဆက်ကျေးရွာနဲ့ တောင်ဖြူကျေးရွာမှာ စစ်ကောင်စီတပ်က တပ်စွဲကာ အခြေခံသေနတ်ပစ်သင်တန်းပေးပြီး ပျူစောထီးအဖွဲ့လို့ဆိုကာ အနီးနားကျေးရွာကျေးရွာ အန်အယ်လ်ဒီ ထောက်ခံတဲ့ အပြစ်မဲ့ ပြည်သူတွေ ဖမ်းဆီးရိုက်နှက်၊ ပစ္စည်းတွေကို ဖျက်ဆီးတာတွေ နေ့စဉ် ပြုလုပ်နေတယ်လို့လည်း ဒေသခံတွေရဲ့ ပြောပြချက်အရ သိရပါတယ်။

ပျူစောထီးနဲ့  စစ်ကောင်စီတပ်တွေရဲ့ ရန်ကြောင့် ရွာသားတွေဟာ ဘေးလွတ်ရာတောထဲနဲ့ တချို့ဆိုရင် ရွှေမျော၊ ကျောက်တွင်း စတဲ့ နေရာတွေကို မိသားစုလို ပြောင်းရွှေ့တာတွေလည်းရှိနေတယ်လို့  ဒေသခံတွေရဲ့ ပြောပြချက်အရ သိရတာပါ။

3 months Ago
Up