ဆက်သွယ်ရေးဥပဒေ

August 3, 2017

ဆက်သွယ်ရေးဥပဒေ ပြင်ဆင်သည့် ဥပဒေမူကြမ်းနှင့် ပတ်သက်ပြီး ဆွေးနွေး

ဆက်သွယ်ရေးဥပဒေ ပြင်ဆင်တဲ့ ဥပဒေမူကြမ်းနဲ့ ပတ်သက်ပြီး အရပ်ဘက် ၂၂ ဖွဲ့ ပူးပေါင်းထားတဲ့ ဆက်သွယ်ရေးဥပဒေပြင်ဆင်ရေး ပူးပေါင်းအဖွဲ့က ကိုယ်စားလှယ်တွေနဲ့ ပြည်သူ့လွှတ်တော် ဥပဒေကြမ်းကော်မတီ အဖွဲ့ဝင်တွေ သြဂုတ်လ ၃ ရက်က တွေ့ဆုံဆွေးနွေးခဲ့ ပါတယ်။ နေပြည်တော်က ပြည်သူ့လွှတ်တော် ဥပဒေကြမ်းကော်မတီရုံးမှာ တွေ့ဆုံခဲ့တာပါ။ ဆက်သွယ်ရေးဥပဒေ ပြင်ဆင်တဲ့ ဥပဒေမူကြမ်းနဲ့ပတ်သက်ပြီး ဝေဖန်အကြံပြုချက်တွေပေးတာ၊ အများပြည်သူ အသံပါဝင်တဲ့ ဥပဒေပြုရေး လုပ်ငန်းစဉ်ပေါ်ပေါက်ဖို့ ဥပဒေပြုတာ၊ လက်တွေ့အသုံးပြုတာနဲ့ တရားစီရင်တာတို့ အပြန်အလှန် ချိတ်ဆက်ထိန်းကျောင်းရမယ့် အချက်တွေကို ဆွေးနွေးခဲ့တယ်လို့ သိရပါတယ်။ ဆက်သွယ်ရေးဥပဒေပြင်ဆင်ရေး ပူးပေါင်းအဖွဲ့မှာ ပါဝင်တဲ့ Free Expression Myanamr ရဲ့အကြံပေး ဒေါ်ဇာခြည်ဦးက “ကျမတို့ အဓိကတောင်းဆိုခဲ့တာက ၆၆ ဃမှာ အဓိက ပြဿနာ တက်နေတဲ့ အသရေ ဖျက်မှုပါ။ ဒီပုဒ်မမှာ သီးသန့် ရှင်းချင်တဲ့ အဓိပ္ပာယ် ဖွင့်ဆိုချက် မရှိဘူး။ ရာဇသတ်ကြီးမှာ အဓိပ္ပာယ် ဖွင့်ဆိုချက်တွေ ရှိတယ်။ ကင်းလွတ်ချက်တွေ ရှိတယ်။ ၆၆ နဲ့ ပတ်သက်ပြီး ဒီနေ့ အထိ အမှု ၈၁ မှုရှိတယ်။ ဒီအမှုတွေမှာ အသရေ ဖျက်မှုကို တိကျရှင်းလင်းတဲ့ အဓိပ္ပာယ် ဖွင့်ဆိုချက်နဲ့ ရှင်းမထားဘူးဆိုတာတွေ့ရတယ်။ အသရေ ဖျက်မှုမြောက်မမြောက်ကို ဥပဒေကြောင်းအရ စဉ်းစားဆင်ခြင်ခဲ့ခြင်း မရှိတာကို တွေ့ရတယ်။ အဲဒါတွေအပေါ်မှာ ထည့်သွင်းစဉ်းစားပေးပါလို့ ကျမတို့ ပြောခဲ့တယ်။ အသရေ ဖျက်မှုက ရာဇဝတ်မှုဖြစ်နေတဲ့အပေါ် နိုင်ငံတကာ စံနှုန်း ဒီမိုကရေစီနဲ့မညီ ဘူးဆိုတာကိုလည်း စဉ်းစားပေးပါလို့ တင်ပြခဲ့တယ်” လို့ ပြောပါတယ်။ ကြဂုတ်လ ၃ ရက်နေ့ က အမျိုးသားလွှတ်တော်မှာ ဆက်သွယ်ရေးဥပဒေ ပုဒ်မ ၆၆ ဃ ဖျက်သိမ်းရေးအဆို ရှုံးနိမ့်သွားတဲ့အတွက် ပြည်သူ့လွှတ်တော်ရဲ့ ဆုံးဖြတ်ချက်ကိုပဲ စောင့်ကြည့်ရတော့မယ်လို့ ဆိုပါတယ်။ “ဆက်သွယ်ရေးဥပဒေနဲ့ ပတ်သက်လို့ ပြင်ဆင်ဖို့ ကျမတို့ တင်ပြခဲ့တာ အချက် ၃ ချက်လောက် ရှိတယ်။ တကယ် လွှတ်တော်မှာ ဆွေးနွေးတော့ ပုဒ်မ ၆၆ နဲ့ ၈၀ ကိုပဲ ထိလိုက်တယ်။ အဲဒီတော့ နောက်ပိုင်းမှာ ဥပဒေတခုလုံး အစအဆုံး ပြန်သုံးသပ်ရမယ့် အခြေနေ ဖြစ်သွားတယ်” လို့ Free Expression Myanamr ရဲ့ အကြံပေး ဒေါ်ဇာခြည်ဦးက ပြောပါတယ်။
4 years Ago

July 13, 2017

ဆက်သွယ်ရေးဥပဒေကို ပြင်ဆင်သည့် ဥပဒေမူကြမ်း အမျိုးသားလွှတ်တော်တွင်တင်သွင်း

  ဝေဖန်မှုတွေများနေတဲ့ ဆက်သွယ်ရေးဥပဒေကို ပြင်ဆင်တဲ့ ဥပဒေမူကြမ်းကို ဇူလိုင် ၁၃ ရက်နေ့ အမျိုးသားလွှတ်တော်အစည်းအဝေးမှာ ပို့ဆောင်ရေးနှင့် ဆက်သွယ်ရေး ၀န်ကြီးဌာနက တင်သွင်းလိုက်ပါတယ်။ ပြည်သူတွေအနေနဲ့ အရည်အသွေးမြင့်မားတဲ့ ဆက်သွယ်ရေး ၀န်ဆောင်မှုတွေ ရရှိနိုင်ဖို့နဲ့ ဆက်သွယ်ရေးဝန်ဆောင်မှုလုပ်ငန်း လုပ်ကိုင်သူတွေနဲ့ အသုံးပြု သူတွေကို ဥပဒေနဲ့အညီ ကြီးကြပ်အကာအကွယ် ပေးနိုင်ဖို့ရည်ရွယ်ပြီး ဆက်သွယ်ရေး ဥပဒေကိုရေးဆွဲပြဌာန်းခဲ့တာ ဖြစ်ပေမယ့် ဥပဒေပါ  ပုဒ်မ ၆၆(ဃ)ကိုသုံးပြီး ပုဂ္ဂိုလ်တွေကြား တရားစွဲတာတွေ တနေ့တခြား များလာတယ်လို့ ဒုဝန်ကြီး ဦးကျော်မျိုးက ပြောပါတယ်။ “အခုအဆိုတင်တာသည် ၆၆(ဃ) ကို ဖျက်တာမဟုတ်ဘူး။ ဒါပေမယ့် တရားစွဲ၊ အာမခံ ပေးနိုင်အောင်အတွက် တရားစွဲဆိုခံရတဲ့သူက မတရားစွဲဆိုခံရတာဖြစ်တဲ့အခါကျ သူ့မှာ ထုချေပိုင်ခွင့် လွတ်လွတ်လပ်လပ်အာမခံလုပ် နိုင်ဖို့အတွက်ရည်ရွယ်တာပေါ့။ နဂိုမူလ ရည်ရွယ်ချက်က အကာအကွယ်ပေးဖို့ပဲ၊ မတရားအသေရေဖျက်မှု ဥပဒေတွေ ဘာတွေကို အကာအကွယ်ပေးဖို့ လုပ်တာ၊ ဒါပေမယ့် ဒီဘက်ပိုင်းမှာ တဖြည်းဖြည်းတော်တော်လေး များလာပြီးတော့ အများပြည်သူတွေကလည်း ဒီဟာအပေါ် အာရုံစိုက်ပြီး ပြောဆိုလာတဲ့ အခြား လအဖွဲ့အစည်းတွေ၊ နိုင်ငံတကာအဖွဲ့အစည်းတွေက အစပြောဆိုလာတဲ့အတွက် ဒီလို အဆိုတင်သွင်းရတာ” ပြင်ဆင်ချက် ဥပဒေမူကြမ်းအရ တရားစွဲခံရသူအနေနဲ့ အာမခံရရှိမှာဖြစ်သလို တဖက်တိုင်ကြားတဲ့ သူဟာ နစ်နာသူကိုယ်တိုင် သို့မဟုတ် ကိုယ်စားလှယ်လွှဲအပ်ခံရသူကသာ တရားစွဲဆိုရတော့မှာဖြစ်ပါတယ်။ အာမခံပေးနိုင်သည့် ပြစ်မှုအဖြစ် သတ်မှတ်သည်ဆိုတဲ့ အဓိပ္ပာယ်ဖွင့်ဆိုချက်နဲ့ ပတ်သက်ပြီးတော့ ဒုဝန်ကြီး ဦးကျော်မျိုးက အခုလို ပြောပါတယ်။ “မျှမျှတတ ဥပဒေနဲ့ ချင့်ချိန်သုံးသပ်နိုင်အောင်အတွက် နိုင်သည်လို့ ပြောထားတာ။ တချို့အမှုတွေ မှာကျ serious ဖြစ်တဲ့အမှုမျိုး၊ အဲဒါမျိုးဆိုရင်တော့ တရားသူကြီးရဲ့ သူ့ရဲ့ ဥပဒေနဲ့အညီ သုံးသပ်ပြီးဆောင်ရွက်နိုင်ဖို့ အတွက်ကို နိုင်သည်လို့ ထည့်ထားတာဖြစ်တယ်။ ရသည်ဆိုရင်တော့ တချို့အမှုတွေကျတော့ တကယ်ကို ထင်ထင်ရှားရှားကြီးကို ဖြစ်နေတဲ့ဟာမျိုးဆို အာမခံပေး ရမယ်ဆို သူ့အနေနဲ့ ချင့်ချိန်လို့မရဘူးဖြစ်နေမှာစိုးလို့၊ တရားသူကြီးရဲ့ တရားဥပဒေဘောင် အတွင်းက လုပ်ပိုင်ခွင့်အတွင်းမှာ ဆုံးဖြတ်နိုင်ဖို့အတွက် လုပ်ပေးထားတာပါ” လွှတ်တော်ကိုယ်စားလှယ်တွေရဲ့ ဆွေးနွေးချက်တွေအပေါ်မူတည်ပြီး ဘယ်လို အပြောင်း အလဲဖြစ်လာမလဲ တော့ မသိသေးဘူးလို့ ဦးကျော်မျိုးက ပြောပါတယ်။ ဒီဆက်သွယ်ရေးဥပဒေကို ပြင်ဆင်တဲ့ ဥပဒေမူကြမ်းနဲ့ပတ်သက်ပြီး ဖိတ်သင့်တဲ့သူတွေဖိတ်ကြားပြီး တပတ်အတွင်း ကြားနာပွဲလုပ်သွားမယ်လို့လည်း အမျိုးသားလွှတ်တော် ဥပဒေကြမ်းကော်မတီဥက္ကဋ္ဌကလည်း ပြောကြားထားပါတယ်။ ဆက်သွယ်ရေးဥပဒေကို ၂၀၁၃ အောက်တိုဘာ ၁၃ ရက်က အတည်ပြု ပြဌာန်းခဲ့တာဖြစ်ပြီး ဥပဒေ ပြဋ္ဌာန်းပြီးချိန်က စလို့ခုချိန်ထိ  ဆက်သွယ်ရေး ဥပဒေ ပုဒ်မ ၆၆ (ဃ)နဲ့ တရားစွဲဆိုခံရမှုပေါင်း ၆၀ ကျော်ရှိခဲ့ပါတယ်။ ဒီဥပဒေကို ပြင်ဆင်ဖို့ အစိုးရနဲ့ လွှတ်တော်က ကြိုးပမ်းလာတာ ကို အသိအမှတ်ပြုပေးမယ့် ပြင်ဆင်တဲ့ အချက်တွေဟာ ပြည့်စုံလုံလောက် ကောင်းမွန်ခြင်းမရှိ လွတ်လပ်စွာ ထုတ်ဖော် ပြောဆိုခွင့်နဲ့လူ့အခွင့်ရေးထိခိုက်တဲ့ ပြဿနာအရင်းအမြစ်ကို ဖြေရှင်းနိုင်ခြင်းမရှိသေးဘူးလို့  အရပ်ဘက်အဖွဲ့အစည်းပေါင်း ၂၂ ဖွဲ့ပါဝင်တဲ့  “ဆက်သွယ်ရေးဥပဒေပြင်ဆင်ရေးနှင့် ပုဒ်မ ၆၆ (ဃ) ဖျက်သိမ်းရေးနှင့် လှုပ်ရှားမှု ပူးပေါင်းအဖွဲ့က ဒီကနေ့ ထုတ်ပြန်ကြေညာထားပါတယ်။
4 years Ago
More News
Up