စျေးဆိုင်

December 11, 2021

စျေးဆိုင်များ ပြန်မဖွင့်ရန် စစ်ကောင်စီတပ်က အဓမ္မ ခြိမ်းခြောက်

ရန်ကုန်တိုင်းဒေသကြီး၊ ကမာရွတ်မြို့နယ်မှာ ဒီဇင်ဘာ ၁၀ ရက်နေ့ Silent Strike သပိတ်နေ့က ပိတ်ထားတဲ့စျေးဆိုင်တွေ ပြန်လည်ဖွင့်လှစ်ခြင်းမပြုဖို့ စစ်ကောင်စီက ဒီဇင်ဘာ ၁၁ ရက် ဒီနေ့ မနက် ၉ နာရီလောက်က မြို့ထဲလှည့်လည်ပြီး ဆိုင်တွေကို အဓမ္မခြိမ်းခြောက် ပိတ်ခိုင်းနေတယ်လို့  ဒေသခံတွေက ပြောပါတယ်။

မနက်အစောကတည်းက လှည်းတန်းစျေးမှာ စစ်သားနဲ့ ရဲတပ်ဖွဲ့ဝင်တွေ လက်နက် အပြည့်အစုံနဲ့ စည်ပင်ဝန်ထမ်းတွေလိုက်ပါပြီး မနေ့က ပိတ်ထားတဲ့ ဆိုင်တွေကို ဒီနေ့ ဆိုင်ဖွင့်မခံဘဲ ပြန်ပိတ်ခိုင်းတာ၊ ၇ လမ်းထဲက ဈေးသည်တွေလည်း  စျေးသိမ်းနေကြရတယ်လို့ ဒေသခံ တစ်ဦးကပြောပါတယ်။

လှည်းတန်းဈေးရုံဘေးလမ်း၊ လှည်းတန်းလမ်းမ KFC ဆိုင်ရှေ့၊ ကိန္နရီရှေ့၊၆လမ်းထိပ် ၊ထန်းတစ်ပင်လမ်းထိပ် စတဲ့နေရာတွေမှာ စစ်သား ၊ ရဲနဲ့ စည်ပင်ဝန်ထမ်းတွေက ကားနဲ့ လှည့်လည်ကြည့်ရှုနေကြပါတယ်။

အလားတူ တွံတေးမြို့မှာလည်း ဒီနေ့ မနက်ဖွင့်တဲ့ စျေးတန်းကို စစ်ကောင်စီက လာရောက် ခြိမ်းခြောက် ပိတ်သိမ်းသွားတယ်လို့ ဒေသခံတွေကပြောပါတယ်။

စစ်ကိုင်းတိုင်း ပုလဲမြို့နဲ့ မုံရွာမြို့တို့က ငြိမ်သက်ခြင်းသပိတ် (Silent Strike) မှာ ပူးပေါင်းပါဝင်ခဲ့ကြတဲ့ ဈေးဆိုင်ခန်းတွေ၊ စတိုးဆိုင်တွေလည်း ဖျက်ဆီးခံရသလို ညနေပိုင်း ဈေးဆိုင်လာဖွင့်သူတွေကိုလည်း စစ်ကောင်စီတပ်က ရိုက်နှက်ပြန်လွှတ်ခဲ့တယ်လို့ သိရပါတယ်။

ပဲခူးတိုင်း ဒိုက်ဦးမြို့မှာတော့ အိုမီခရွန်း ကိုဗစ်ရောဂါမျိုးကွဲသစ်ကို အကြောင်းပြပြီး စစ်ကောင်စီက ဒီကနေ့ ဒီဇင်ဘာ ၁၁ ရက်ကနေ  ၁၅ ရက်အထိ ဒိုက်ဦးမြို့မဈေးကို ၅ ရက်ကြာ ယာယီပိတ်ထားဖို့ မြို့နယ် စစ်ကောင်စီက ညွှန်ကြားထားပါတယ်။

1 year Ago

August 30, 2020

ကိုဗစ်-၁၉ ပိုးတွေ့သူများလာ၍ မောင်တောခရိုင် စျေးဆိုင်အားလုံး နေ့ဝက်သာ ဖွင့်ခွင့်ပြု

ကိုဗစ်-၁၉ ရောဂါပိုးတွေ့ရှိသူ လူနာ ၂၅ ဦးအထိ ရှိလာတာကြောင့် ရခိုင်ပြည်နယ် မောင်တောခရိုင်ရှိ ဘူးသီးတောင်မြို့နဲ့ မောင်တောမြို့တွေက စျေးတွေနဲ့ စျေးဆိုင်တွေအားလုံးအား သြဂုတ် ၂၈ ရက်နေ့မှစပြီး နေ့တဝက်သာ ဖွင့်လှစ်ဖို့ အကန့်အသတ်မရှိ အမိန့်ထုတ်ပြန်ထားတယ်လို့ သိရှိရပါတယ်။ မောင်တောမြို့နယ် စည်ပင်သာယာရေး အလုပ်အမှုဆောင်အရာရှိ ဦးအေးသိန်းက “ကိုရိုနာဗိုင်းရပ်စ်အမျိုးသားဗဟိုကော်မတီနဲ့ ပြည်နယ်အစိုးရအဖွဲ့ရဲ့လမ်းညွှန်ချက်နဲ့ စည်းကမ်းသတ်မှတ် အမိန့်ထုတ်ပြန်တာ ဖြစ်တယ်။ မနက် ၆ နာရီကနေ နေ့လယ် ၁ နာရီအထိသာ ဖွင့်လှစ်ဖို့ ညွှန်ကြားထားတယ်။ အချိန်ကာလက ဘယ်လောက်ထိကြာမလဲဆိုတာကတော့ မပြောတတ်ဘူး။ အခု ကူးစက်မြန် ကိုရိုနာဗိုင်းရပ်စ် ပြန့်ပွားမှုကို ထိန်းချုပ်နေတဲ့ကာလဆိုတော့ ကြာမြင့်နိုင်ပါတယ်။ ရခိုင်တပြည်နယ်လုံး Home Stay နေထိုင်ကြဖို့ပါ သတ်မှတ်ထားတဲ့ကာလလည်း ဖြစ်နေတယ်။ စည်းကမ်းချက်ကို လိုက်နာမှုမရှိရင်တော့ ကူးစက်ရောဂါ ကာကွယ်ရေးဥပဒေအရ အရေးယူသွားဖို့ စီစဉ်ထားတယ်”လို့ ပြောပါတယ်။ မနက် ၆ နာရီကနေ နေ့လယ် ၁ နာရီအထိသာ စျေးရောင်းချခွင့်အမိန့်ကို မောင်တောမြို့မှာ စည်းကမ်းလိုက်နာပြီး စျေးတွေအပါအဝင် စျေးဆိုင်တွေအားလုံး ပိတ်ထားကြပေမဲ့ ဘူးသီးတောင်မြို့က စျေးဆိုင်တချို့ကတော့ တနေကုန် ဖွင့်လှစ်ရောင်းချနေတာ တွေ့နေရပါတယ်။ ဘူးသီးတောင်မြို့က စျေးသည် ကိုအေးထွန်းက “ဘူးတောင်မှာကတော့ စားသောက်ဆိုင်တို့၊ လက်ဖက်ရည်ဆိုင်၊ ထမင်းဆိုင်တွေက နေ့တဝက်ပဲ ရောင်းချကြတယ်။ နောက် ပါဆယ်စနစ်နဲ့ပေါ့။ ဆေးဆိုင်နဲ့ တခြားကုန်ပစ္စည်း လက်လီဆိုင်တွေကျတော့ အထွေထွေအုပ်ချုပ်ရေးဦးစီးဌာနက ခွင့်ပြုမိန့်နဲ့ရောင်းချကြရပါတယ်” လို့ ပြောပါတယ်။ မောင်တောခရိုင်မှာ ကိုဗစ်-၁၉ ရောဂါပိုး တွေ့ရှိသူ လက်ရှိ ၂၅ ဦးအထိ ရှိနေပြီး ဘူးသီးတောင်မြို့မှာ ၆ ဦး၊ မောင်တောမြို့မှာ ၁၉ ဦးတို့ကို သက်ဆိုင်ရာပြည်သူဆေးရုံတွေမှာ အထူးကြပ်မတ် ဆေးကုသပေးနေပါတယ်။ လင်းလက်
2 years Ago
More News
Up