စံပြမုန့်တိုက်ပိုင်ရှင်

January 16, 2021

TNLA တပ်ဖွဲ့က ၁ လကျော်ကြာ ဖမ်းထားသည့် စံပြမုန့်တိုက်ပိုင်ရှင် ပြန်လွတ်

တအာင်းအမျိုးသား လွတ်မြောက်ရေးတပ်မတော် (TNLA) က ၁ လကျော်ကြာ ဖမ်းဆီးထားတဲ့ မန္တလေးတိုင်း မိုးကုတ်မြို့နယ်က စံပြမုန့်တိုက်ပိုင်ရှင်ဦးကျော်ဝင်းဟာ မနေ့ညက ပြန်လွတ်လာပြီလို့ သိရပါတယ်။ ဇန်နဝါရီလ ၁၅ ရက်နေ့ ည ၇ နာရီက နေအိမ်ကို ပြန်လည်ရောက်ရှိလာတာဖြစ်ပြီး တွေ့ခွင့်မရသေးတာကြောင့် ထိခိုက်ဒဏ်ရာရှိတာမျိုး မသိရသေးပေမယ့် ကျန်းမာတယ်လို့ သိရကြောင်း လူ့အခွင့်အရေးနဲ့တရားမျှတရေး တနိုင်ငံလုံးတာဝန်ခံ ကိုဂျင်မီက ပြောပါတယ်။ စံပြမုန့်တိုက်ပိုင်ရှင် ဦးကျော်ဝင်းကို ဒီဇင်ဘာ ၄ ရက်နေ့က အောင်ချမ်းသာစျေးအနီးက ဗိုလ်အောင်ကျော်လမ်းမှာ လက်နက်ကိုင်တစုက ဖမ်းဆီးသွားခဲ့တာပါ။ ဦးကျော်ဝင်းကို အခွန်ကိစ္စနဲ့ပတ်သက်ပြီး ဖမ်းဆီးထားတာလို့ TNLA တပ်ဖွဲ့က မီဒီယာတွေကို ပြောကြားထားပါတယ်။ ဒီကိစ္စတွေနဲ့ပတ်သက်ပြီး လက်နက်ကိုင် ဆက်ကြေးတောင်းတာတွေ ရပ်တန့်ပေးဖို့ မြို့မိမြို့ဖတွေက စာထုတ်တောင်းဆိုတာမျိုးတွေရှိခဲ့သလို ​မိုးကုတ်မြို့ လုံခြုံရေးအထောက်အကူပြုအဖွဲ့ကနေလည်း ကန့်ကွက်ခဲ့ပါတယ်။ စံပြမုန့်တိုက်ပိုင်ရှင် ဦးကျော်ဝင်းအား ဖမ်းဆီးထားသူတွေကို ရာဇသတ်ကြီးဥပဒေ ပုဒ်မ ၃၆၄ နဲ့ အမှုဖွင့်ထားတယ်လို့ မိုးကုတ်မြို့မရဲစခန်းကနေ သိရပါတယ်။ သတင်း - ဟန်နာထက်အောင်
3 months Ago

January 8, 2021

စံပြမုန့်တိုက်ပိုင်ရှင် ဦးကျော်ဝင်းကို TNLA က တစ်လကျော်ကြာ ဆက်လက်ဖမ်းဆီးထား

မန္တလေးတိုင်း၊ မိုးကုတ်မြို့က  စီးပွားရေးလုပ်ငန်းရှင်တစ်ဦးဖြစ်တဲ့  စံပြမုန့်တိုက်ပိုင်ရှင် ဦးကျော်ဝင်းကို ဒီဇင်ဘာ ၄ ရက်နေ့ကတည်းက  TNLA တပ်ဖွဲ့က  ဖမ်းဆီးခေါ်ဆောင်သွားပြီး  ဒီကနေ့အထိ ပြန်လည် လွတ်မြောက်လာခြင်းမရှိသေးပါဘူး။  ဖမ်းဆီးခံရတာ တစ်လကျော်ပြီဖြစ်ပြီး TNLA ဘက်ကတော့ ဦးကျော်ဝင်းအတွက် စိတ်ပူစရာ မလိုဘူးလို့ ထုတ်ပြန်ထားတယ်လို့  ဒုတိုင်းမှူး ဦးဝင်းမြတ်က ပြောပါတယ်။ “သက်ဆိုင်ရာ တာဝန်ရှိသူတွေကိုတော့ အကြောင်းကြား ဆက်သွယ်လာခြင်း မရှိသေးပေမယ့် ဦးကျော်ဝင်းအတွက် စိတ်ပူစရာမရှိဘူးလို့ပဲ TNLAဘက်က ပြောဆိုထားတာရှိပါတယ်”။ မိုးကုတ်မြို့မှာ တိုင်းရင်းသားလက်နက်ကိုင်အဖွဲ့တွေက ဆက်ကြေးတောင်းတာတွေ၊ ဖမ်းဆီးပြီး ရိုက်နှက်တာတွေ အပြင် ပြန်ပေးဆွဲတာတွေနဲ့ ဒေသခံတွေအနေနဲ့ ကြုံတွေ့ခဲ့ရတာဖြစ်ပါတယ်။   စံပြမုန့်တိုက်ပိုင်ရှင် ဦးကျော်ဝင်းကိုတော့  ဒီဇင်ဘာ ၄ ရက်နေ့က အောင်ချမ်းသာစျေးအနီးက ဗိုလ်အောင်ကျော်လမ်းမှာ ဖမ်းဆီးသွားခဲ့တာ ဖြစ်ပါတယ်။ ဒီကိစ္စတွေနဲ့ပတ်သက်ပြီး လက်နက်ကိုင်ဆက်ကြေးတောင်းတာတွေ ရပ်တန့်ပေးဖို့ မြို့မိမြို့ဖတွေက စာထုတ်တောင်းဆိုတာ မျိုးတွေရှိခဲ့သလို ​မိုးကုတ်မြို့ လုံခြုံရေးအထောက်အကူပြုအဖွဲ့ကနေ လည်း ကန့်ကွက်ခဲ့ပါတယ်။ အခုလက်ရှိ အချိန်မှာတော့ မိုးကုတ်ဒေသမှာ နယ်မြေလုံခြုံရေးအတွက် တပ်မတော်က စစ်ဆင်ရေး​ ဆောင်ရွက်နေကြတဲ့အတွက် ​လက်နက်ကိုင်ဆက်ကြေးတောင်းတာ၊ ပြန်ပေးဆွဲတာတွေမရှိတော့ဘဲ ဒေသခံတွေ  ပုံမှန်အတိုင်း လှုပ်ရှားသွားလာနေကြပါတယ်။ သတင်း - ဟန်နာထက်အောင်
3 months Ago
Up