စံပြကျေးရွာ

April 3, 2022

ရေးမြို့နယ် စံပြကျေးရွာအတွင်း စစ်ကောင်စီတပ်ဖွဲ့ဝင်အချို့ တိုက်ခိုက်ခံရ

မွန်ပြည်နယ် ရေးမြို့နယ် စံပြကျေးရွာအတွင်း ဈေးဝယ်ဖို့လာတဲ့ စစ်ကောင်စီတပ်ဖွဲ့ဝင်အချို့ တိုက်ခိုက်ခံရတာကြောင့် ၂ ဦး သေဆုံးခဲ့တယ်လို့ သိရပါတယ်။

ဧပြီ ၂ ရက်နေ့ မနက် ၇ နာရီခွဲလောက်  အရပ်ဝတ်နဲ့ စံပြရွာအတွင်း ဈေးဝယ်ဖို့လာတဲ့ စစ်ကောင်စီတပ်သား ၄  ဦးကို ကေအန်ယူ တပ်မဟာ (၆) တပ်ရင်း (၁၆) ဌာနချုပ်တပ်ခွဲမှ ကွန်မန်ဒို တပ်သား ၂ ဦးက ပြောက်ကျားနည်းနဲ့ ပစ်ခတ်ခဲ့တာလို့ ရေးပြောက်ကျားအဖွဲ့ YGF က ထုတ်ပြန်ထားပါတယ်။

ဖြစ်စဉ်အတွင်း စစ်ကောင်စီတပ်က ၂ ဦး အခင်းဖြစ်နေရာမှာ သေဆုံးသွားပြီး ကျန်နှစ်ဦးကတော့ ဒဏ်ရာတွေနဲ့ ထွက်ပြေးသွားကြတယ်လို့ ဆိုပါတယ်။

စံပြဘုရားကုန်းပေါ်မှာ နေရာယူထားတဲ့ စစ်ကောင်စီတပ်က ၄၀ မမ နဲ့ ပစ်ခတ်ခဲ့ပေမယ့် ကွန်မန်ဒို တပ်သားတွေ လုံခြုံစွာဆုတ်ခွာနိုင်ခဲ့တယ်လို့ ဆိုပါတယ်။

စစ်ကောင်စီတပ်ဟာ ရေးမြို့နယ် နှင်းစုံကျေးရွာနဲ့ စံပြကျေးရွာတွေက နေအိမ်တွေကို မီးရှို့ဖျက်ဆီးမယ်ဆိုပြီး ခြိမ်းခြောက်တာတွေအပြင် သံသယရှိတဲ့ လူငယ်တွေကိုလည်း ဖမ်းဆီးနေတာကြောင့် ညအချိန်တွေမှာ ရွာသားအတော်များများ နေအိမ်တွေမှာ မနေရဲကြဘဲ ပုန်းရှောင်နေကြရတယ်လို့ ဒေသခံတွေက ပြောပါတယ်။

10 months Ago

September 19, 2021

စံပြကျေးရွာတွင် မိုင်းပေါက်ကွဲမှုကြောင့် ၇ နှစ်ရွယ် ကလေးငယ် ၁ ဦး ဒဏ်ရာရ

ပုလဲမြို့နယ်နဲ့ မြိုင်မြို့နယ်စပ်က စံပြကျေးရွာမှာ စက်တင်ဘာ ၁၈ ရက်နေ့ ညနေ ၅ နာရီလောက်က စစ်ကောင်စီတပ် ထောင်ထားတဲ့ မိုင်းပေါက်ကွဲမှုကြောင့် ၇ နှစ်ရွယ်က ကလေးငယ်တစ်ဦး ဒဏ်ရာရခဲ့တယ်လို့ ကျေးရွာသားတွေဆီက သိရပါတယ်။

“ညနေ ၅ နာရီလောက်က ပေါက်ကွဲတာဗျ။ ကလေးက ခရမ်းစိုက်ခင်းထဲ ပြေးလွှား ဆော့နေတာကနေ ခရမ်းပင်ကို အပ်ချည်ကြိုးချည်ထားပြီး တစ်ဖက်က လက်ပစ်ဗုန်းစနက်တံကို ချည်ပြီး တိုက်မိုင်းပုံစံ လုပ်ခဲ့ဟန်တူပါတယ်။ အဲဒီကြိုးကို ကလေးက ကစားရင်းတိုက်ပြီး ပေါက်ကွဲသွားတယ်။ ကလေး ကံကောင်းသွားတယ်လို့ ပြောရမှာပေါ့ဗျာ။ ဝမ်းဗိုက် ရှပ်ထိသွားတာ။ အသက်အန္တရာယ်တော့ မစိုးရိမ်ရပါဘူး” လို့ စံပြရွာသားတဦးက ပြောပါတယ်။

စံပြကျေးရွာအတွင်းမှာ အကြမ်းဖက်စစ်ကောင်စီတပ်တွေက ပြီးခဲ့တဲ့ရက်ပိုင်းက ဝင်ရောက်တပ်စွဲပြီး အပြစ်မဲ့ ရွာသားနှစ်ဦးကို မီးရှို့သတ်ဖြတ်ခဲ့ကာ နောက်ထပ်ရွာသား ၁ ဦးကိုလည်း ညှဉ်းပန်းနှိပ်စက်သတ်ဖြတ်ခဲ့ကြပါတယ်။

ဒါ့အပြင် ကျေးရွာအတွင်းက ကားတစ်စီးနဲ့ ဆိုင်ကယ်အများအပြားကိုလည်း မီးရှို့ခဲ့ကြတယ်လို့ ဒေသခံတွေဆီက သိရပါတယ်။

1 year Ago
Up