စိုက်ပျိုး

August 18, 2018

ပဲ၊ ပြောင်း၊ နှမ်း စိုက်ပျိုးထုတ်လုပ် တင်ပို့ရောင်းချမှု ဖွံ့ဖြိုးတိုးတက်ရေး ဆွေးနွေး

အိန္ဒိယကို မြန်မာနိုင်ငံက တင်သွင်းတဲ့ ပဲတန်ချိန်ကန့်သတ်ပြီးတဲ့နောက်ပိုင်းမှာ ပဲဈေးကွက်ထပ်မပျက်ဖို့ ဒုတိယသမ္မတ ဦးဟင်နရီ ဗန်ထီးယူ ဦးဆောင်တဲ့အစိုးရအဖွဲ့တွေ၊ တောင်သူတွေနဲ့ ပဲကုန်သည်တွေ ပါဝင်တဲ့ ပဲပြောင်းအလုပ်ရုံဆွေးနွေးပွဲကို ကျင်းပနေပါတယ်။ မြန်မာ့ပဲမျိုးစုံ၊ ပြောင်း၊ နှမ်း စိုက်ပျိုးထုတ်လုပ် တင်ပို့ရောင်းချမှု ဖွံ့ဖြိုးတိုးတက်ရေးဆွေးနွေးပွဲကို ရန်ကုန်မြို့က ကုန်သည်စက်မှု အသင်းချုပ်မှာ ဒီကနေ့ ကျင်းပနေတာပါ။ မြန်မာနိုင်ငံရဲ့ ပဲတင်ပို့မှုပမာဏက အာရှမှာဦးဆောင်နေပြီး ကမ္ဘာမှာ ကနေဒါနိုင်ငံပြီးရင် ဒုတိယနေရာမှာ ရှိပါတယ်။ ပဲမျိုးစုံစိုက်ဧကက စုစုပေါင်းစိုက်ဧကရဲ့ ၂၃ ရာခိုင်နှုန်းရှိပါတယ်။ ပဲတင်ပို့မှုကနေ အမေရိကန်ဒေါ်လာ ၁ ဘီလီယံအထိ ရခဲ့ပေမယ် မနှစ်က ဒေါ်လာ သန်း ၈၀၀ အထိ ကျဆင်းခဲ့ပါတယ်။ ပဲဈေးကျပေမယ် အခြားသီးနှံပြောင်းစိုက်ဖို့က ဈေးကွက်သတင်းအချက်အလက်အပြင် မျိုးစေ့ရဖို့နဲ့ စိုက်နည်းစနစ် ပညာပေးနိုင်ဖို့ကလည်း လိုအပ်နေပါတယ်။ ဒီအတွက် အမျိုးသားအဆင့် ဆွေးနွေးအဖြေရှာဖို့ အလုပ်ရုံဆွေးနွေးတာဖြစ်ပါတယ်။
3 years Ago

January 14, 2018

နေပြည်တော်တွင် ချယ်ရီပန်းပင်များ ဒုတိယအကြိမ် စိုက်ပျိုး

နေပြည်တော်မှာ ၂၀၂၀ ခုနှစ်မှာ ဖူးပွင့်မယ်လို့ ခန့်မှန်းထားတဲ့ ချယ်ရီပန်းပင်တွေကို ဒုတိယအကြိမ်မြောက် စိုက်ပျိုးခဲ့ကြပါတယ်။ ဒီကနေ့ ဇန်န၀ါရီလ ၁၄ ရက်နေ့က နေပြည်တော် အပြည်ပြည်ဆိုင်ရာ ကွန်ဗင်းရှင်းဗဟိုဌာန ၁ နဲ့ Royal Myanmar Golf Club နေရာတွေမှာ ချယ်ရီပန်းပင် ၂၀၀ ကို စိုက်ပျိုးသွားကြမှာဖြစ်ပါတယ်။ “မြန်မာနိုင်ငံကို ကမ္ဘာလှည့် ခရီးသည်တွေအတွက် ပေါ်ထွန်းစ ခရီးစဉ်ဒေသတခု ဖြစ်လာဖို့ အဖက်ဖက်က ကြိုးပမ်းနေချိန်မှ အခုလို ဒုတိယအကြိမ် မြန်မာ-ဂျပန် ချစ်ကြည်ရေး ချယ်ရီပန်း စိုက်ပျိုးပွဲတော်ကို ကျင်းပခြင်းဖြင့် မြန်မာနိုင်ငံဟာ အေးချမ်းတည်ငြိမ်မှုရှိပါတယ်။ ချယ်ရီပန်းပင်လေးတွေလိုပဲ ဆွဲဆောင်မှုရှိပါတယ်လို့ ကမ္ဘာအရပ်ရပ်မှာရှိတဲ့ ခရီးသွားဧည့်သည်တွေကို ကြိုဆိုလိုက်ပါတယ်” လို့ ပြည်ထောင်စုလွှတ်တော် နာယက ဦးမန်းဝင်းခိုင်သန်းက ပြောပါတယ်။ အဲဒီ စိုက်ပျိုးတဲ့ပွဲကို လွှတ်တော် ဥက္ကဋ္ဌတွေ၊ ပြည်ထောင်စုဝန်ကြီးတွေ၊ ဒုဝန်ကြီးတွေနဲ့ ဂျပန်-မြန်မာ သံရုံးတွေက သံအမတ်တွေ၊ အခြားတာဝန်ရှိသူတွေ တက်ရောက်စိုက်ပျိုးခဲ့ကြတာပါ။ နေပြည်တော်မှာပဲ ချယ်ရီပန်းပင် ၁၀၀၀ ကို စိုက်ပျိုးသွားမှာဖြစ်ပြီး ပထအကြိမ် ချယ်ရီပန်းပင်စိုက်ပျိုးမှုကို ၂၀၁၇ ခုနှစ် ဇန်န၀ါရီလ ၂၉ ရက်နေ့က ဇ၀နလမ်း၊ ဗိုလ်ရှုသဘင် အဆောက်အဦအနီးမှာ အပင် ၁၀၀ ကို စိုက်ပျိုးထားခဲ့တာ ဖြစ်ပါတယ်။
3 years Ago
Up