စုပေါင်းအမှိုက်ကောက်

January 31, 2021

အစိုးရသစ်ကို ကြိုဆိုသည့်အနေဖြင့် တောင်ကြီးတွင် အဖွဲ့စုံ စုပေါင်းအမှိုက်ကောက်

အစိုးရသစ်ကို ကြိုဆိုတဲ့အနေနဲ့ တောင်ကြီးမြို့ ပရဟိတအဖွဲ့စုံနဲ့ ဌာနဆိုင်ရာ အင်အား ၇၀၀ ကျော်ဟာ ဇန်နဝါရီ ၃၁ ရက်နေ့က အဝေရာမီးပုံးပျံကွင်းမှာ စုပေါင်းအမှိုက်ကောက်ကမ်ပိန်း ပြုလုပ်ခဲ့ပါတယ်။

ကိုဗစ်-၁၉ ကာလ အဝေရာမီးပုံးပျံကွင်းမှာ ပြည်သူတွေ အားကစား လာလုပ်ကြပြီး နေ့စဉ်စည်ကားကာ အမှိုက်တွေလည်း ရှုပ်ပွနေတာကြောင့် လုပ်ဖြစ်တာလို့ ရှမ်းပြည်နယ် စားနပ်ရိက္ခာ ထောက်ပံ့ရေးအဖွဲ့ဝင် ကိုသူရစောသိန်းက ပြောပါတယ်။

တောင်ကြီးမြို့မှာ စည်ကမ်းမဲ့ အမှိုက်ပစ်သူတွေနဲ့ အမှိုက်သိမ်းစနစ် အားနည်းနေလို့ အခုလို အမှိုက်တွေ ရှုပ်ပွရတာလို့ ဒေသခံ ဦးသောင်းလှိုင်က ပြောပါတယ်။

ဒါ့အပြင် အမှိုက်ကောက်ကမ်ပိန်းကို လူအရမ်းများပြီး လူစုလူဝေးတွေ ဖြစ်မှာစိုးရတဲ့အတွက် အစိုးရအဖွဲ့ ဝန်ကြီးတွေ လာရောက်ပါဝင်ခဲ့တယ်လို့ ရှမ်းပြည်နယ် လျှပ်စစ် စွမ်းအင်ဝန်ကြီး ဦးစိုင်းရှန်တစ်လုံက ပြောပါတယ်။

အမှိုက်ကောက် ကမ်ပိန်းကို ရှမ်းပြည်နယ် စီမံစီးပွားနဲ့ ဘဏ္ဍာရေး ဝန်ကြီး၊ လျှပ်စစ်စွမ်းအင်ဝန်ကြီးနဲ တောင်ကြီးမြို့နယ်က ပရဟိတအဖွဲ့၊ စားနပ်ရိက္ခာ ထောက်ပံ့ရေးအဖွဲ့၊ ကိုဗစ်ကော်မတီ စတဲ့အဖွဲ့ပေါင်း ၃၀ ကျော် အင်အား ၇၀၀ ကျော်က စုပေါင်းပြုလုပ်တာပါ။

တောင်ကြီးမြို့မှာ ဒီလို စုပေါင်းအမှိုက်ကောက် ကမ်ပိန်းအား ပြီးခဲ့တဲ့ ၂၀၁၅ အစိုးရသစ်ကို ကြိုဆိုတဲ့အနေနဲ့လည်း ပြုလုပ်ခဲ့ပါတယ်။

သတင်း - ခွန်ရာဇာ

4 months Ago

July 30, 2020

စစ်တွေမြို့ ကုလားတန်မြစ်ကမ်းဘေးတွင်  လူငယ်များစုပေါင်းအမှိုက်ကောက် (ဓာတ်ပုံ) 

ရခိုင်ပြည်နယ်၊ စစ်တွေမြို့ ကုလားတန်မြစ်ကမ်းဘေးရှိ အမှိုက်တွေကို ဒေသခံ လူငယ်တွေက  ကောက်ယူသန့်ရှင်းရေးလုပ်နေကြပါတယ်။ အဲဒီလူငယ်တွေဟာ အင်္ဂါ၊ ကြာသပတေး၊  တနင်္ဂနွေ စတဲ့ရက်တွေမှာ ညနေ ၅ နာရီနောက်ပိုင်း အမှိုက်ကောက်ကြတာဖြစ်ပြီး အမှိုက်တွေများလွန်းအားကြီးလို့ အကုန်လုံးကို မကောက်ယူနိုင်တာကြောင့် ပလတ်စတိတ်ပစ္စည်းတွေကို အဓိကထားကောက်ယူကြတယ်လို့ သိရပါတယ်။ ပတ်ဝန်းကျင်သန့်ရှင်းရေးအတွက် အမှိုက်ကောက်ရာမှာ လူငယ်တွေ ပူးပေါင်းပါဝင်ဖို့လိုအပ်နေတယ်လို့ အမှိုက်ကောက်အဖွဲ့ဝင် ကိုအောင်ဝင်းဆွေက ပြောပါတယ်။ "ခုပါဝင်လုပ်နေကြတဲ့လူငယ်တွေကတော့ နည်းတာပေါ့။ ဒါပေမဲ့ အမှိုက်ကို စနစ်တကျပစ်ရမယ်ဆိုတဲ့ အသိကို သူတို့ရသွားရင် အမြတ်ပဲ။ လူငယ်တွေ စိတ်ပါဝင်စားသူတွေ အများကြီး ပူးပေါင်းပါဝင်လာရင်တော့ ပိုပြီးလုပ်နိုင်မှာပါ။'' လို့ ပြောပါတယ်။ အမှိုက်လာကောက်တဲ့ လူငယ်အမျိုးသမီးတစ်ဦးတစ်ဦးကလည်း "စစ်တွေမှာက တနင်္ဂနွေဆိုရင်  ကမ်းနားလမ်းတစ်လျှောက်နဲ့ ပွိုင့်ကမ်းခြေမှာ လူကြီးလူငယ်အကုန်လုံး လူထောင်ချီရောက်ပါတယ်။ ဒါပေမဲ့ အမှိုက်ကောက်ဖို့ စိတ်ဝင်စားသူတွေကတော့ တအားနည်းပါတယ်။ လူငယ်တွေက ပိုပြီးစိတ်ဝင်စား ပူးပေါင်းလာစေချင်ပါတယ်။''လို့ ဆိုပါတယ်။ အဲဒီလူငယ်တွေဟာ ကောက်ယူထားတဲ့ ပလတ်စတစ်ပစ္စည်းတွေကို အိတ်တွေမှာ ထည့်ထားကြပြီးနောက် စည်ပင်သာယာရေးအဖွဲ့က အမှိုက်ကားတွေနဲ့ လာရောက်သိမ်းဆည်းပေးတယ်လို့ သိရပါတယ်။ Photo - Kaung Mrat Naing / MPA
11 months Ago
Up