စီးပွားရေးအကျပ်အတည်း

August 18, 2022

စီးပွားရေးအကျပ်အတည်း ဖြေရှင်းပေးရန် အာဂျင်တီးနားပြည်သူများ ဆန္ဒပြ

နှစ်ပေါင်းများစွာ စီးပွားရေး အကျပ်အတည်းကို ခံစားနေကြရတဲ့ အာဂျင်တီးနားနိုင်ငံက သမဂ္ဂတွေ၊ အလုပ်သမားတွေနဲ့ တက်ကြွလှုပ်ရှားသူတွေဟာ ဆင်းရဲမွဲတေမှုနဲ့ အလုပ်လက်မဲ့ ပြဿနာတွေ၊ မကျေနပ်ချက်တွေကို သြဂုတ် ၁၇ ရက်က ဗျူနိုအေးရိစ်မြို့တော်မှာ သမ္မတ အယ်လ်ဘာတို ဖာနန်ဒက်ဇ်ကို ဆန္ဒထုတ်ဖော်ခဲ့ကြပါတယ်။

ဆန္ဒပြသူတွေဟာ ဗျူးနိုအေးရိစ်ရဲ့ အဓိကလမ်းမတွေထဲက တခုဖြစ်တဲ့ နိုင်းဒေမာယို ရိပ်သာလမ်းအတိုင်း ချီတက်ခဲ့ကြပြီး အောက်လွှတ်တော် အပြင်ဘက်မှာ စုရုံး ဆန္ဒပြခဲ့ကြပါတယ်။

ဆန္ဒပြသူတွေဟာ စီးပွားရေးအကျပ်အတည်းကို ရှုတ်ချတဲ့ ဆိုင်းဘုတ်တွေကို ကိုင်ဆောင်ရင်း လူမှုဖူလုံရေး ပိုမိုမြင့်မားလာစေဖို့ တောင်းဆိုခဲ့ကြပါတယ်။

ဆန္ဒပြသူတွေဟာ ပြင်ပကြွေးမြီတွေအတွက်ပေးတဲ့ ငွေကြေးတွေကို အာဂျင်တီးနားရဲ့ အဆင်းရဲဆုံး လူတန်းစားအတွက် သုံးစွဲချင်နေကြတာပါ။

တောင်အမေရိကနိုင်ငံရဲ့ ၁၂ လကြာ ငွေကြေးဖောင်းပွမှုနှုန်းဟာ ၆၀ ရာခိုင်နှုန်းကျော်မှာ လည်ပတ်နေလို့ ဗဟိုဘဏ်က ပြီးခဲ့တဲ့လမှာ အခြေခံအမှတ် ၃၀၀ ကနေ ၅၂ ရာခိုင်နှုန်းအထိ အတိုးနှုန်းကို တက်အောင် လုပ်ခဲ့ပါတယ်။

ငွေကြေးဖောင်းပွမှုဟာ အခုနှစ်မှာ ၈၀ ရာခိုင်နှုန်းနီးပါး ရှိနိုင်တယ်လို့ ခန့်မှန်းထားပါတယ်။ အာဂျင်တီးနားအစိုးရက ငွေကြေးဖောင်းပွမှု လျှော့ချခြင်း အပါအဝင် စီးပွားရေး ပစ်မှတ်တွေနဲ့အတူ အကြွေးဒေါ်လာ ၄၄ ဘီလီယံကို ပြန်သတ်မှတ်ဖို့ မတ်လမှာ အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) နဲ့ သဘောတူညီချက်ကို လက်မှတ်ရေးထိုးခဲ့ပါတယ်။

4 months Ago

June 20, 2022

သီရိလင်္ကာ စီးပွားရေးအကျပ်အတည်းဖြေရှင်းရေး IMF ပါဝင်ကူညီမည်

သီရိလင်္ကာနိုင်ငံမှာ စီးပွားရေးအကျပ်အတည်း ပိုဆိုးလာနေလို့ အပြည်ပြည်ဆိုင်ရာ ငွေကြေးရန်ပုံငွေအဖွဲ့(IMF) နဲ့ စတင်ဆွေးနွေးဖို့ စီစဉ်နေပါပြီ။

IMF ကိုယ်စားလှယ်အဖွဲ့ဟာ သီရိလင်္ကာနိုင်ငံဆီကို ဇွန် ၂၀ မှာ ရောက်လာတော့မှာဖြစ်ပြီး အကျပ်အတည်းကို ဖြေရှင်းဖို့ ငွေရှင်တွေဆီကနေ ငွေချေးရေး အစီအစဉ်အတွက် သီရိလင်္ကာ အစိုးရက ကြိုးစားနေပါတယ်။

IMF ကိုယ်စားလှယ်တွေရဲ့ ဆယ်ရက်ကြာ ခရီးစဉ်အတွင်း ကယ်ဆယ်ရေး သဘောတူညီချက်ကို အပြီးသတ်ဖို့ အစိုးရတာဝန်ရှိသူတွေနဲ့ တွေ့ဆုံဆွေးနွေး ကြမှာပါ။

“IMF ပရိုဂရမ်ဟာ တခြားဘဏ္ဍာငွေဆိုင်ရာ ရွေးချယ်ခွင့်တွေကို ပံ့ပိုးပေးပေမယ့် အကူအညီပေးဖို့ IMFက ကြွေးမြီပြန်လည်တည်ဆောက်ရေး လုပ်ငန်းစဉ်ကို အဓိကထား စဉ်းစားနေတယ်လို့ ပြောထားပြီးသားပါ။ဒါကြောင့် ဆွေးနွေးပွဲကို နောက်တစ်ပတ်မှာ စတင်မယ်။ ဒါပေမဲ့ ကျနော့်အမြင်အရတော့ IMFဆီက ငွေရဖို့က နည်းနည်းနှေးသွားလိမ့်မယ်” လို့ အဗိုကာတာ တက္ကသိုလ်က တတ်သိပညာရှင် ဒါနနာ့သ် ဖှာနန်ဒိုက ပြောပါတယ်။

သီရိလင်္ကာနိုင်ငံဟာ အလွန်အမင်းလိုအပ်နေတဲ့ စက်သုံးဆီတင်သွင်းရာမှာ ပေးချေစရာ နိုင်ငံခြားငွေကို ရှာနေပြီး လက်ရှိ သိုလှောင်ထားတဲ့ ဓာတ်ဆီနဲ့ ဒီဇယ်တွေ ရက်ပိုင်းအတွင်း ကုန်သွားတော့ မယ်လို့ ခန့်မှန်းထားပါတယ်။ 

ဇွန် ၁၇ ရက်မှာတော့ လောင်စာဆီပြတ်လပ်နေလို့ ပြည်သူ့ ဝန်ထမ်းတွေ အိမ်ကနေ နှစ်ပတ်ကြာ အလုပ်လုပ်ဖို့ အမိန့်ထုတ်ခဲ့ ရပါတယ်။

လာမယ့်လတွေအတွင်း စားနပ်ရိက္ခာပြတ်လပ်လို့ သီရိလင်္ကာနိုင်ငံသား ၅ သန်းအထိ တိုက်ရိုက်သက်ရောက်နိုင်တယ်လို့ ဝန်ကြီးချုပ် ရာနီးလ် ဝစ်ခရီမန်ဆင်းဂ်ရဲ့ ရုံးက ဇွန် ၁၇ ရက်မှာ သတင်းထုတ်ပြန်ခဲ့ပါတယ်။

လာမယ့် လေးလတာကာလအတွင်း အကျပ်အတည်းကို အဆိုးရွားဆုံး ခံစားရတဲ့ သီရိလင်္ကာနိုင်ငံသား ၁ ဒသမ ၇ သန်းကို ကူညီရေး အမေရိကန်ဒေါ်လာ ၄၇ သန်း ကောက်ခံမယ့် အစီအစဉ်ကို ကုလသမဂ္ဂက ဖော်ပြခဲ့ပါတယ်။

6 months Ago
More News
Up