စီးပွားရေး

December 4, 2022

တရုတ်-မြန်မာ စီးပွားရေးပူးပေါင်းဆောင်ရွက်မှုဖိုရမ် ရန်ကုန်တွင်ကျင်းပ၊ တရုတ်ကုမ္ပဏီများကို ဖိတ်ခေါ်

မြန်မာ-တရုတ် စီးပွားရေးနဲ့ ရင်းနှီးမြုပ်နှံမှုဆိုင်ရာ ပိုမိုပူးပေါင်းဆောင်ရွက်ရေး ဖိုရမ်တစ်ခုကို ပြီးခဲ့တဲ့ ဒီဇင်ဘာလ ၂ ရက်က ရန်ကုန်မှာ ကျင်းပခဲ့ပြီး တရုတ်ကုမ္ပဏီတွေ မြန်မာနိုင်ငံမှာ လာရောက် ရင်းနှီးမြှုပ်နှံကြဖို့    မြန်မာနိုင်ငံဆိုင်ရာ တရုတ်သံရုံးက သတင်းထုတ်ပါတယ်။

“တရုတ်နိုင်ငံ၏ ဖွံ့ဖြိုးတိုးတက်မှုအသစ်များနှင့် တရုတ်-မြန်မာပူးပေါင်းဆောင်ရွက်ရေး” ဆိုတဲ့ ခေါင်းစဉ်နဲ့ ဖိုရမ်ကို မြန်မာနိုင်ငံစက်မှုလက်မှုလုပ်ငန်းရှင်နဲ့ ကုန်သည်ကြီးများအသင်း (UMFCCI) က ကြီးမှူးပြုလုပ်ခဲ့တာလို့ ဆိုပါတယ်။ 

အဲဒီဖိုရမ်မှာ စစ်ကောင်စီခန့် ရန်ကုန်တိုင်းဝန်ကြီးချုပ်ဦးစိုးသိန်းက တရုတ်နိုင်ငံက ရင်းနှီးမြုပ်နှံမှုတွေ ပိုမိုဝင်ရောက်လာဖို့ မျှော်လင့်တယ်ကြောင်းနဲ့ တရုတ်နိုင်ငံဟာ မြန်မာနိုင်ငံရဲ့ အကြီးဆုံးကုန်သွယ်ဖက်နိုင်ငံဖြစ်ပြီး မြန်မာ့ကုန်သွယ်ရေးကကဏ္ဍအတွက် အရေးပါကြောင်း၊ နှစ်နိုင်ငံကြား စီးပွားရေးပူးပေါင်းဆောင်ရွက်မှုတွေ ပိုမိုကောင်းမွန်အောင် ဆောင်ရွက်ဖို့လိုကြောင်း ပြောခဲ့ပါတယ်။ 

အဲဒီဖိုရမ်မှာ မြန်မာနိုင်ငံဆိုင်ရာ တရုတ်သံအမတ်ကြီး ချန်ဟိုင်းလည်းတက်ရောက်ခဲ့ပြီး တရုတ်ရဲ့ခေတ်သစ်တည်ဆောက်ရေးဆောင်ရွက်ချက်တွေက နှစ်နိုင်ငံကြား ပူးပေါင်းဆောင် ရွက်မှုတွေကို အရှိန်အဟုန်နဲ့ တွန်းအားပေးသွားလို့ ပြောပါတယ်။ 

လက်ရှိ မြန်မာနိုင်ငံဟာ ရှုပ်ထွေးတဲ့စိန်ခေါ်မှုတွေကို ရင်ဆိုင်နေရပေမဲ့ မိမိတို့ဟာ မြန်မာနိုင်ငံရဲ့ အနာဂတ်အပေါ် ယုံကြည်ချက်ရှိကြောင်း၊ တရုတ်နိုင်ငံက မြန်မာပြည်သူတွေ မိမိနိုင်ငံအခြေအနေနဲ့ ကိုက်ညီတဲ့ ဖွံ့ဖြိုးတိုးတက်ရေး လမ်းကြောင်း စူးစမ်းရှာဖွေမှုကိုထောက်ခံအားပေးပါကြောင်း၊ မြန်မာနိုင်ငံနဲ့အတူ ကူးလူးဖလှယ် အပြန်အလှန်အတုယူမှုကိုတိုးမြှင့်လိုပြီး ချစ်ကြည်ရင်းနှီးစွာ ပူးပေါင်းဆောင်ရွက်မှုကို မြှင့်တင်ကာ ပံ့ပိုးကူညီပေးကာ မြန်မာနိုင်ငံငြိမ်းချမ်းရေး၊ တည်ငြိမ်ရေးနဲ့ ဖွံဖြိုးတိုးတက်မှုအတွက် တရုတ်ဉာဏ်ပညာနဲ့ အင်အားနဲ့ အကျိုးထမ်းဆောင်ပေးလိုတယ်လို့ တရုတ်သံအမတ်က ပြောပါတယ်။ 

UMFCCI အသင်းရဲ့ ဥက္ကဋ္ဌ  ဦးဇော်မင်းဝင်းကလည်း မြန်မာနဲ့ တရုတ်တို့ကြားမှာ ရှည်လျားလှတဲ့ ဆက်ဆံရေးရာဇဝင်ရှိကြောင်း၊ နောက်ထပ်လည်း ဆက်ဆံရေးပိုမိုကောင်းလာစေဖို့ မျှော်လင့်ကြောင်း ပြောကြားခဲ့ပါတယ်။

မြန်မာ့စိုက်ပျိုးရေးထွက်ကုန်ပစ္စည်းတွေ တင်ပို့ရာမှာ တရုတ်နိုင်ငံဈေးကွက်ကို အင်မတန်အ ားကိုးကြောင်း၊ မြန်မာနိုင်ငံဟာ တရုတ်နိုင်ငံရဲ့ စီးပွားရေးနဲ့ ကုန်သွယ်ရေးဆက်ဆံမှုကို အလွန်အလေးထားပြီး တရုတ်ကုမ္ပဏီတွေ မြန်မာနိုင်ငံမှာ လာရောက် ရင်းနှီးမြှုပ်နှံကြဖို့လည်း မြန်မာဘက်က ဖိတ်ခေါ်ခဲ့တယ်လို့ဆိုပါတယ်။

စစ်ကောင်စီလက်အောက်ခံ မြန်မာ့ကုန်သွယ်ရေးဝန်ကြီးဌာနရဲ့ အချက်အလက်တွေအရ ၂၀၂၂-၂၃ ဘဏ္ဍာနှစ်ရဲ့ ပထမနှစ်ဝက်အတွက် တရုတ်နိုင်ငံဟာ မြန်မာနိုင်ငံရဲ့ အကြီးဆုံး ကုန်သွယ်ဖက်နိုင်ငံဖြစ်တယ်လို့ တရုတ်နိုင်ငံအခြေစိုက် China.org.သတင်းမှာ ဖော်ပြထားပါတယ်။

Photo Credit- Chinese Embassy 

3 days Ago

November 30, 2022

ကော့ကရိတ်တွင် စစ်တပ်က လမ်းပိတ်ထားသဖြင့် ထိုင်းကုန်စည်တင်သွင်းသူများ အခက်တွေ့

ကရင်ပြည်နယ်၊ ကော့ကရိတ်မြို့နယ် (တောင်ပိုင်း)၊ မြောက်ကြာအင်းနဲ့ တောင်ကြာအင်းကြား ဆက်သွယ်ထားတဲ့ တံတားကို ကျုံဒိုးမြို့ ခလရ ၅၄၅၊ ၅၄၆ တပ်နဲ့ ကော့ကရိတ် စကခ ၁၂ တပ်တို့ ပူးပေါင်းပြီး ပိတ်ထားတယ်လို့ ​ဒေသခံတွေက ပြောပါတယ်။

အဲဒီတံတားကို ပြည်သူတွေနဲ့ ကုန်တင်ကားတွေ လုံးဝ ဖြတ်သန်းခွင့်မပေးဘဲ လုံခြုံရေး အကြောင်းပြပြီး ဒီနေ့ကစပြီး ရက်အကန့်အသက်မရှိ ပိတ်ထားတာလို့ ဆိုပါတယ်။

အဆိုပါ တံတားဟာ မြောက်ကြာအင်းကနေ တောင်ကြာအင်းအထိ သွားလို့ရပြီး စစ်ကောင်စီတပ် ပစ်မိန့်ထုတ်ထားတာကြောင့် လက်ရှိအခြေနေမှာ ဘယ်သူကမှ မသွားလာရဲကြဘူးလို့လည်း ဆိုပါတယ်။

ထိုင်းပစ္စည်း တင်သွင်းနေသူတယောက်က “ထိုင်းကတင်သွင်းလာတဲ့ ကုန်စည်တွေထဲက စားသောက်ကုန်၊ လူသုံးကုန်၊ ဆေးဝါး၊ ကုန်စည်တွေ အများအပြားပါတဲ့ ကုန်ကားတွေ ဖြစ်တယ်။ မွန်၊ ကရင်ပြည်နယ်ဘက်ကို တင်သွင်းမယ့်ကုန်တွေ ဖြစ်ပါတယ်။ အခုလို စစ်တပ်က လမ်းပိတ်တာဆိုတော့ ကုန်ပစ္စည်းပြတ်လပ်၊ ဈေးကလည်းတက်၊ လူတွေ ဒုက္ခရောက်အောင် တွန်းပို့ပေးသလို ဖြစ်နေတယ်” လို့ ပြောပါတယ်။

ထိုင်းကနေတင်သွင်းလာတဲ့ တရားမဝင်ကုန်တွေဆိုပြီး စစ်ကောင်စီတပ်ဘက်က  အကြောင်းပြချက် အမျိုးမျိုးပေးကာ ကုန်စည်တွေကို ဖမ်းဆီးသိမ်းယူတာတွေ လုပ်လာတာကြောင့် ထိုင်း-မြန်မာကုန်သွယ်ရေး ကုန်စည်စီးဆင်းမှုပါ ထိခိုက်နေပါတယ်။

တောင်ကြာအင်းရဲစခန်းဂိတ်မှာ လွန်ခဲ့တဲ့တပတ်က ၄ ရက်ဆက်တိုက် စစ်ကောင်စီတပ်နဲ့ KNLA ပူးပေါင်းအဖွဲ့တွေ တိုက်ပွဲဖြစ်ခဲ့ပြီး စစ်တပ်က အထိအခိုက် အကျအဆုံးတွေ များပြားခဲ့ပြီး စစ်အင်အားတွေ ပိုမိုတိုးချလာတာကြောင့် တိုက်ပွဲပိုပြင်းထန်လာမှာကို ဒေသခံတွေ စိုးရိမ်နေကြပါတယ်။

1 week Ago
More News
Up