စီးတီးမတ်

August 12, 2021

ကိုဗစ်ဆေး ရမ်ဒက်ဆီဗီးယား တစုံလျှင် ကျပ် ၃၆၀,၀၀၀ ဖြင့် စီးတီးမတ်ရောင်းချမည်

       ကိုဗစ်ဆေး ရမ်ဒက်ဆီဗီးယား တစုံကို ငွေကျပ် ၃၆၀,၀၀၀ နဲ့ စီးတီးမတ်ဆေးဆိုင် တွေဖြစ်တဲ့ City Care ဆိုင်ခွဲ ၂ ခုမှာ လာမယ့် ဩဂုတ် ၁၃ ရက်နေ့ စတင် ရောင်းချသွားမယ်လို့ သိရပါတယ်။

Covifor (Remdesivir Injection 100mg/20ml) ဆေးကို ဝယ်ယူလိုသူတွေအနေနဲ့ ဆရာဝန်ညွှန်ကြားစာအပြည့်အစုံ (လူနာအမည်၊ ကုသရမည့်ရောဂါ၊ ညွှန်းဆိုထားသော ဆေး၊ ဆရာဝန်အမည်နှင့် ဆမနံပါတ်) နဲ့အတူ City Care ဆေးကောင်တာမှာ ပြသပြီး တယောက်ကို ၆ လုံးပါ တစ်စုံနှုန်း (ရေခဲပုံးနှင့်ရေခဲပါဝင်ပြီး) ရောင်းချပေးသွားမယ်လို့ ဆိုပါတယ်။

ရောင်းချပေးမယ့် ဆိုင်ခွဲ ၂ ဆိုင်ကတော့ ၁၅၃ လမ်းဆိုင်ခွဲနဲ့ လမ်း ၄၀ ဆိုင်ခွဲတွေ ဖြစ်တယ်လို့ ကြေညာထားပါတယ်။

လတ်တလောမှာတော့ မြန်မာနိုင်ငံဟာ စစ်အာဏာသိမ်းမှုကြောင့် နိုင်ငံရေးမတည် ငြိမ်မှုတွေအပြင် ကိုဗစ်-၁၉ ကပ်ဘေးကြောင့်လည်း နိုင်ငံတဝန်း စစ်ဘေး၊ ကပ်ဘေးတွေကြား ပြည်သူတွေဟာ ရုန်းကန်နေကြရတာ ဖြစ်ပါတယ်။

ပြည်သူတွေအတွက် ကာကွယ်ဆေးထိုးနှံနိုင်မှု အခြေအနေဟာလည်း ထိန်းချုပ် နိုင်မှုအားနည်းနေပြီး အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က မြန်မာပြည်သူလူထု သန်း ၅၀ ကျော်အတွက် ကိုဗစ်-၁၉ ကာကွယ်ဆေး နိုင်ငံခြားကနေ တချိန်လုံးဝယ်နေပါက တိုင်းပြည်မွဲသွားလိမ့်မယ်လို့လည်း ပြောထားပါတယ်။

မြန်မာနိုင်ငံမှာ လက်ရှိအချိန်ထိ ကိုဗစ်-၁၉ ကြောင့် သေဆုံးသူစုစုပေါင်း ၁၂,၄၅၂ ယောက်နဲ့ ရောဂါကူးစက်ခံရသူ စုစုပေါင်း ၃၄၁,၃၀၀ ယောက် ရှိခဲ့ပြီလို့ စစ်ကောင်စီ ကျန်းမာရေးဝန်ကြီးဌာနက ဩဂုတ် ၁၁ ရက်ညမှာ ထုတ်ပြန်ထားပါတယ်။

ဒီစစ်ဆေးမှုမှာတော့ အာဏာဖီဆန်ရေးလှုပ်ရှားမှု (CDM) မှာ ပါဝင်နေကြတဲ့ ဆေးရုံတွေ၊ ဓာတ်ခွဲစမ်းသပ်ခန်းတွေ မပါဝင်ဘဲ စစ်အုပ်စုလက်အောက်ခံ တပ်မတော်ဆေးရုံတွေ အများစုမှာ စမ်းသပ်စစ်ဆေးခဲ့တာမို့ ရောဂါကူးစက်မှုတိကျတဲ့ ပမာဏအတိုင်းအဆကိုတော့ မသိနိုင်သေးပါဘူး။

မြန်မာနိုင်ငံမှာ ပထမဆုံးသော ကိုဗစ်-၁၉ အတည်ပြုလူနာကိုတော့ ပြီးခဲ့တဲ့ ၂၀၂၀ ပြည့်နှစ်၊ မတ် ၂၃ ရက်က စတင်တွေ့ရှိခဲ့တာဖြစ်ပြီး ပြီးခဲ့တဲ့ ဇန်နဝါရီ ၂၇ ရက်မှာတော့ အာ ဆီယံနိုင်ငံတွေထဲ အစောဆုံး ကာကွယ်ဆေးထိုးနှံတဲ့နိုင်ငံ ဖြစ်လာခဲ့ပါတယ်။

လတ်တလောမှာတော့ တတိယလှိုင်းရောဂါကူးစက်မှုတွေ မြင့်တက်နေတာကြောင့် နိုင်ငံတဝန်း စာသင်ကျောင်းတွေ ပိတ်ထားသလို ရောဂါကိုထိန်းချုပ်နိုင်ဖို့ အများပြည်သူ ရုံးပိတ်ရက်အဖြစ် ဩဂုတ် ၁၅ ရက်အထိကိုလည်း တိုးမြှင့်သတ်မှတ်ကြောင်း စစ်ကောင်စီက ကြေညာထားပါတယ်။

4 months Ago

March 24, 2021

Silence Strike (တိတ်ဆိတ်ခြင်းသပိတ်) တွင် စီးတီးမတ်၊ မက်ခရိုမြန်မာနှင့် နာမည်ကြီးလုပ်ငန်းများပါဝင်

မတ် ၂၄ ရက်မှာ လူထုတော်လှန်ရေး လှုပ်ရှားမှုအနေနဲ့ ကျင်းပမယ့် Silence Strike(တိတ် ဆိတ်ခြင်းသပိတ်) မှာ စီးတီးမတ်အရောင်းဆိုင်တွေအပါအဝင် မက်ခရိုမြန်မာနဲ့ တခြားနာမည်ကြီး လုပ်ငန်းတွေ၊ အရောင်းဆိုင်တွေ ပါဝင်သွားကြမယ်လို့ သိရပါတယ်။

Silence Strike (တိတ်ဆိတ်ခြင်းသပိတ်) ဆိုတာကတော့ လမ်းမပေါ် မလိုအပ်ဘဲ ဘယ်သူတ ဦးတယောက်မှ မထွက်ကြဘဲ ဈေးတွေ၊ ဆိုင်တွေ၊ ယာဉ်တွေ၊ လူတွေ တစုံတယောက်မှ ရှိမနေပဲ လူသူမရှိတဲ့ မြို့တမြို့၊ အရပ်ဒေသတခုလို တိတ်ဆိတ်ငြိမ်သက်ပြီး အိမ်တွေထဲမှာ နေထိုင်ဆန္ဒပြရတဲ့ လှုပ်ရှားမှုပဲ ဖြစ်ပါတယ်။

ဒီသပိတ်ရဲ့ ရည်ရွယ်ချက်ထဲမှာတော့ နွေဦးတော်လှန်ရေးအတွင်း ကျဆုံးသွားတဲ့ သူရဲ ကောင်းတွေအတွက် ငြိမ်သက်တိတ်ဆိတ်ပေးတာ၊ နေ့စဉ်ရက်ဆက် လမ်းမပေါ်စုဝေး ဆန္ဒထွက်ပြရတဲ့အတွက် ကုန်ခမ်းသွားတဲ့ အားအင်တွေကို ပြန်လည်ဖြည့်တင်းတာ၊ စစ် သွေးကြွအကြမ်းဖက်အုပ်စုရဲ့ ပုံမှန်အတိုင်းပြန်ဖြစ်သွားပြီဆိုတဲ့ စကားအပေါ် ချေဖျက် ဆန့်ကျင်တာတွေလည်း ပါဝင်နေတာ ဖြစ်ပါတယ်။

စီးတီးမတ်အနေနဲ့ ဆိုင်တွေနဲ့ ရုံးတွေကို မတ် ၂၅ ရက်မှာတ လတ်တလော ဆိုင် ဖွင့်ချိန်တွေအတိုင်း ပြန်လည်ဖွင့်လှစ်သွားမှာ ဖြစ်ကြောင်းနဲ့  အခုကာလအတွင်း  မိဘ ပြည်သူတဦးတယောက်ချင်း ဘေးကင်းလုံခြုံစေဖို့ နိုးကြားတက်ကြွစွာ နေထိုင်ကြဖို့လည်း အားပေးတိုက်တွန်းထားပါတယ်။

ထိုင်းအခြေစိုက် နာမည်ကျော် အရောင်းဆိုင် မက်ခရိုမြန်မာကတော့ ၀န်ထမ်းတွေရဲ့ အလုပ်အသွားအပြန်လုံခြုံရေးအတွက် မက်ခရို စက်ဆန်းဆိုင်ကို မတ်လ ၂၄  ရက် နေ့တရက် ပိတ်ထားမှာဖြစ်ကြောင်းနဲ့ ၂၅ ရက် ​နေ့မှာ လတ်တ​လောဆိုင်ဖွင့်ချိန်အတိုင်း ပြန်လည်ဖွင့်လှစ်​ပေး သွားမယ်လို့ ဆိုပါတယ်။

ဒီလှုပ်ရှားမှုသပိတ်မှာတော့ တခြားလုပ်ငန်းတွေ၊ ကုမ္ပဏီရုံးခန်းတွေလည်း ပါဝင်လာကြ တာကို တွေ့ရပြီး အဲဒီထဲမှာတော့ နာမည်ကျော် သယ်ယူပို့ဆောင်ရေးနဲ့ အစားအသောက် ဝန်ဆောင်မှုလုပ်ငန်း Grab ၊ City Express စတိုးဆိုင်၊ ရွှေအိုးဆေးဆိုင်၊ အင်းဝစာ အုပ် ဆိုင်၊ Level Up Marketing Group စတဲ့ လုပ်ငန်းတွေ ပါဝင်နေတာကို တွေ့ရပါတယ်။

မြန်မာနိုင်ငံမှာ ဖေဖော်ဝါရီ ၁ ရက်နေ့  မနက်အစောပိုင်းက နိုင်ငံတော် သမ္မတ ဦးဝင်းမြင့်၊  နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ အစိုးရခေါင်းဆောင် ပိုင်းတချို့ကို စစ်တပ်ကဖမ်းဆီးလိုက်ကာ နိုင်ငံတော်အာဏာသိမ်းယူလိုက်ပြီးနောက် တနေ့မှာပဲ ပြည်သူတွေဟာ ညစဉ်သံပုံးတီးဆန့်ကျင်တာတွေ၊ ဖယောင်းတိုင်မီးထွန်းဆု တောင်းပွဲတွေနဲ့အတူ အကြမ်းမဖက်တဲ့နည်းနဲ့ ဆန္ဒပြနေကြတာပါ။

တဆက်တည်းမှာပဲ စစ်တပ်ရဲ့ အာဏာသိမ်းလုပ်ရပ်ကို ကန့်ကွက်ရှုတ်ချတဲ့အနေ နဲ့ ဆေးလောကသားတွေက စတင်ကာ  အာဏာဖီဆန်ရေးလှုပ်ရှားမှု(Civil Disobedience Movement)ကို လုပ်ဆောင်နေကြတာ ဖြစ်ပြီး လက်ရှိမှာတော့ တခြား ကဏ္ဍအသီးသီးက ပြည်သူ့ဝန်ထမ်းတွေ၊ အနုပညာရှင်တွေ၊ ပြည်သူတွေကပါ ပူးပေါင်း ပါဝင်လှုပ်ရှားနေကြတာပါ။

နောက်ပိုင်းမှာတော့ နိုင်ငံတဝန်း စစ်အာဏာရှင်ဆန့်ကျင်ရေး ဆန္ဒပြပွဲတွေမှာ ပြည်သူတွေ မြို့ရွာအနှံ့ ပါဝင်နေခဲ့ကြပြီး စစ်တပ်နဲ့ ရဲတပ်ဖွဲ့ဝင်တွေက အကြမ်းဖက် ပစ်ခတ်နှိမ်နင်းမှုတွေနဲ့ ကျဆုံးမှုတွေ၊ ဖမ်းဆီးထိန်းသိမ်း တရားစွဲဆိုခံရတာတွေနဲ့အတူ အခြေအနေတွေ ပိုမိုတင်းမာလာနေခဲ့တာ ဖြစ်ပါတယ်။

9 months Ago
More News
Up