စီစီတီဗွီကင်မရာ

November 13, 2016

သုဝဏ္ဏကွင်းတွင် စီစီတီဗွီကင်မရာ အလုံး ၅၀ တပ်ဆင်ထားမှုမြင်ကွင်း (ဓာတ်ပုံ)

မြန်မာဘောလုံးပရိသတ်တွေ စိတ်အေးချမ်းသာစွာ ကြည့်ရှုနိုင်ဖို့နဲ့ မလိုလားအပ်တဲ့ ပြဿနာတွေ မဖြစ်ပွားဖို့အတွက် သုဝဏ္ဏဘောလုံးကွင်းမှာ စီစီတီဗွီ အလုံး ၅၀ တပ်ဆင်ထားပြီးဖြစ်ကြောင်း မြန်မာဘောလုံးအဖွဲ့ချုပ်က သတင်းထုတ်ပြန်ပါတယ်။ အာဆီယံဒေသတွင်း အဆင့်မြင့်ဆုံးပြိုင်ပွဲကြီးဖြစ်တဲ့ AFF ဆူဇူကီးဖလား ဘောလုံးပြိုင်ပွဲကို မြန်မာနိုင်ငံက အိမ်ရှင်အဖြစ် ပထမဆုံးအကြိမ် လက်ခံကျင်းပဖို့ မြန်မာနိုင်ငံ ဘောလုံးအဖွဲ့ချုပ်အနေနဲ့ ပြင်ဆင်ဆောင်ရွက်မှုများ ပြုလုပ်နေကြောင်း၊ လုံခြုံရေး၊ ကစားကွင်းအတွင်း ဝန်ဆောင်မှုတွေနဲ့ ပရိသတ်တွေ စနစ်တကျ အားပေးနိုင်ဖို့လည်း အားစိုက်လုပ်ဆောင်နေတယ်လို့ ဆိုပါတယ်။ စီစီတီဗွီ ကင်မရာ အလုံး ၅၀ ကို ကွင်းပတ်ပတ်လည်နဲ့ ပွဲကြည့်စင်တွေပေါ်မှာ တပ်ဆင်ထားပြီး ကင်မရာများမှတဆင့် ပရိသတ်တွေရဲ့ လုံခြုံရေးကို သက်ဆိုင်ရာလုံခြုံရေး အဖွဲ့အစည်းတွေ အကူညီနဲ့ စောင့်ကြည့်ကူညီပေးသွားမယ်လို့ ဖော်ပြထားပါတယ်။ နိုဝင်ဘာ ၁၄ ရက်နေ့ ညနေ ၅ နာရီမှာတော့ မြန်မာအသင်းနဲ့အိုမန်အသင်းတွေ ချစ်ကြည်ရေးခြေစမ်းပွဲကို ယှဉ်ပြိုင်ကစားကြမှာဖြစ်ပါတယ်။ သတင်းဓာတ်ပုံ - မြန်မာဘောလုံးအဖွဲ့ချုပ်
5 years Ago

November 2, 2016

မန္တလေးတွင် ဒုစရိုက်မှုလျော့နည်းရန် စီစီတီဗွီ ကင်မရာများ တပ်ဆင်မည်

မန္တလေးခရိုင်အတွင်းမှာ ၂၀၁၇ နှစ်ဆန်းကစပြီး လမ်းတိုင်းရဲ့ နေရာစုံမှာ ဒုစရိုက်မှု လျော့နည်းအောင် စီစီတီဗွီ ကင်မရာတွေကို တပ်ဆင်သွားမယ်လို့ မန္တလေးတိုင်းဒေသကြီး အစိုးရအဖွဲ့ ၀န်ကြီးတဦးက ပြောပါတယ်။ ဒုစရိုက်မှုတွေ လျော့နည်းလာအောင် ဆိပ်ကမ်း၊ ကမ်းနားလမ်း၊ ဘုရားကြီး၊ အဝေးပြေးကားကွင်းတွေကအစ လမ်းဆုံလမ်းခွ နေရာပေါင်းစုံမှာ စီစီတီဗွီ ကင်မရာတွေ၊ Police Box တွေ အလုံးပေါင်း ၁၆၀ ကို မန္တလေးခရိုင်အတွင်း တပ်ဆင်သွားမယ်လို့ စီမံကိန်းများကို တွဲဖက်တာဝန်ယူထားတဲ့ မန္တလေးတိုင်းအစိုးရအဖွဲ့ ရှမ်းတိုင်းရင်းသားရေးရာဝန်ကြီး ဦးစိုင်းကျော်ဇောက ပြောလိုက်တာပါ။ “ကျနော်တို့မှာ ဘာအားနည်းနေလဲဆိုတော့ Down Town ဧရိယာပဲ ကျနော်တို့ တပ်နိုင်သေးတယ်။ ချမ်းမြသာစည်တို့၊ ပြည်ကြီးတံခွန်တို့၊ နောက် ကန်တော်ကြီးတို့၊ ကမ်းနားလမ်းတို့ မတပ်နိုင်သေးဘူး။ အဲဒီအတွက်လည်း ကျနော်တို့ တပ်ဖို့ ကြိုးစားနေတယ်။ ဒီ Plan ထဲမှာတော့ ပါတယ်။ ဒါလည်း ကျနော်က e-Government ရဲ့ ပရောဂျက်ထဲမှာ ထည့်သွင်းစဉ်းစားထားတာပေါ့။ Police Station တွေမှာ Control Room ထားမှာပေါ့။ ထားပြီးတော့မှ ဘယ်နေရာမှာ  ဘာဖြစ်တယ်ဆိုရင် ချက်ချင်းကြည့်လိုက်ရင် မြင်နိုင်တာပေါ့။” ၂၀၁၃ ခုနှစ်က မန္တလေးတမြို့လုံးကို စီစီတီဗွီ ကင်မရာတွေ တပ်ဆင်ဖို့ တရုတ်နိုင်ငံက ကမ်းလှမ်းမှုတွေ ရှိခဲ့ပေမယ့် မအောင်မြင်ခဲ့ပါဘူး။ အခုတပ်ဆင်မယ့် စီစီတီဗွီ ကင်မရာတွေကို တိုင်းအစိုးရနဲ့ ရဲတပ်ဖွဲ့တွေက ပူးပေါင်းပြီး လုပ်ဆောင်မှာ ဖြစ်ပါတယ်။ လမ်းတိုင်းမှာမကဘဲ နေအိမ်တချို့မှာလည်း တပ်ဆင်ချင်သလို ဖြစ်ပေါ်တဲ့ ဒုစရိုက်မှုတွေကိုလည်း အထိရောက်ဆုံး ဖြေရှင်းသင့်တယ်လို့ ဒေသခံတချို့က သုံးသပ် ပြောဆိုပါတယ်။ မန္တလေးဒေသခံတဦးဖြစ်တဲ့ မယဉ်ယဉ်ခန့်က “တပ်မယ်လို့တော့ ပြောတယ်။ နေရာတချို့မှာပဲ တပ်တာ တွေ့ရတယ်။ နေရာတော်တော်များများမှာ တပ်ရင်တော့ ပိုပြီးတော့ အဆင်ပြေမယ်။ လမ်းမှာ စီစီတီဗွီတပ်တယ်။ ဒုစရိုက်မှုတွေ ဖြစ်တဲ့အခါမှာ ပြန်ကြည့်လို့ ရတယ်။ တရားခံကိုလည်း သိတယ်။ သိတယ်ဆိုပေမယ့် ဒါကို ထိထိရောက်ရောက် အရေးယူဖို့တော့ လိုတယ်။ သိပြီးတော့ ထိထိရောက်ရောက် အရေးမယူလည်း အလကားပဲနော်” လို့ သုံးသပ် ပြောဆိုပါတယ်။ မန္တလေးခရိုင်အတွင်းမှာ ညပိုင်း ဆိုင်ကယ်နဲ့ လုယက်မှုတွေ များလာတာ၊ လူငယ်တွေ မူးယစ်ဆေးသုံးစွဲတာ များလာတာကြောင့် အုပ်စုဖွဲ့ ရမ်းကားတာတွေ ရှိလာလို့ အရေးယူ ဖြေရှင်းပေးဖို့ တိုင်းလွှတ်တော်မှာ အဆိုပြု တောင်းဆိုမှုတွေ ရှိခဲ့ပါတယ်။ တိုင်းအစိုးရအဖွဲ့က မှုခင်းကျဆင်းအောင် လုပ်ဆောင်မှုတွေ ရှိခဲ့ပေမယ့် ထိထိရောက်ရောက် အရေးယူပေးဖို့ လိုအပ်နေသေးတယ်လို့ ဒေသခံတွေက မှတ်ချက်ပြု ပြောဆိုပါတယ်။
5 years Ago
Up