စိုက်ပျိုးရေး

July 5, 2020

ကန္တာရကျိုင်းကောင်အန္တရာယ် မြို့နယ် ၁၃ ခုကို စိုက်ပျိုးရေးဦးစီးဌာန သတိပေး

ကန္တာရကျိုင်းကောင်အန္တရာယ်ဟာ လက်တကမ်းအကွာမှာ ရောက်နေတာကြောင့် ရခိုင်၊ ချင်းနဲ့ ကချင်ပြည်နယ်၊ စစ်ကိုင်းတိုင်းတို့က မြို့နယ် ၁၃ ခုမှာ သတိထားစောင့်ကြည့်ဖို့အတွက် စိုက်ပျိုးရေးဦးစီးဌာနက နှိုးဆော်ထားပါတယ်။ ရခိုင်ပြည်နယ်က မောင်တော၊ ဘူးသီးတောင်၊ ရသေ့တောင်၊ စစ်တွေနဲ့ ကျောက်ဖြူမြို့နယ်၊ ချင်းပြည်နယ်က တွန်းဇံ၊ ထန်တလန်နဲ့ ပလက်ဝမြို့နယ်၊ စစ်ကိုင်းတိုင်းက လေရှီး၊ ဟုမ္မလင်းနဲ့ တမူးမြို့နယ်၊ ကချင်ပြည်နယ်က ပူတာအိုနဲ့ မချမ်းဘောမြို့နယ်တို့မှာ သတိထားစောင့်ကြည့်ဖို့ သတ်မှတ်လိုက်တာပါ။ လတ်တလော ပြည်တွင်းမှာ မကျရောက်သေးပေမဲ့ အန္တရာယ်ဟာ လက်တကမ်းအကွာမှာ ရောက်နေတာကြောင့် သတိရှိရှိ စောင့်ကြည့်ဖို့ နှိုးဆော်သတိပေးထားပါတယ်။ မကွေးတိုင်း၊ မကွေးမြို့နယ်၊ ကြူချောင်းရွာက မိုးနှမ်းစိုက်ခင်းတွေထဲမှာ ကျိုင်းကောင်တွေ ကျတယ်လို့ သတင်းထွက်တာကြောင့် တာဝန်ရှိသူတွေ မနေ့က သွားရောက်စစ်ဆေးခဲ့ကြပြီး ကန္တာရကျိုင်းကောင် မဟုတ်တာကို တွေ့ခဲ့ရပါတယ်။ မကွေးတိုင်း စိုက်ပျိုးရေးဦးစီးဌာနမှူး ဦးလင်းမြတ်က “မကွေးတိုင်းရဲ့ သဘောသဘာဝအရ စိုက်ခင်းတွေဟာ ခင်တန်း၊ လျှိုထဲမှာ ရှိတတ်တယ်။ အခု ကျိုင်းကောင်တွေက အဲဒီမှာ ပေါက်ဖွားပြီး ပတ်ဝန်းကျင် ၁၀ ပေ၊ ၁၅ ပေလောက်မှာပဲ ရှိတာပါ။ ကန္တာရကျိုင်းကောင် မဟုတ်ပါဘူး။ ဒေသအခေါ် ဓားခုတ်ကောင်ပေါ့။ ဖျက်ဆီးတာကလည်း မပြင်းထန်ပါဘူး” လို့ ပြောပါတယ်။ ဒီမတိုင်ခင်ကလည်း ရခိုင်ပြည်နယ်၊ သံတွဲနဲ့ စစ်ကိုင်းတိုင်း ဝန်းသိုမြို့နယ်တို့က အုန်းပင်တွေကို ဖျက်ဆီးတဲ့ ကျိုင်းကောင်တွေ၊ စစ်ကိုင်းတိုင်း ခန္တီးနဲ့ ကောလင်းတို့မှာကျခဲ့တဲ့ ကျိုင်းကောင်တွေဟာလည်း ရှိပြီးသား ဒေသမျိုးအုပ်စုတွေဖြစ်တယ်လို့ စိုက်ပျိုးရေး ပြန်ကြားရေး ဌာနစိတ်က ဆိုပါတယ်။ နှံကောင်မျိုးနွယ်ဝင် ကန္တာရကျိုင်းကောင် (Desert Locust) တွေဟာ သဲကန္တာရဆန်တဲ့မြေတွေမှာ ဥချလေ့ရှိပြီး ပျံနိုင်တဲ့အရွယ်ရောက်လို့ အုပ်စုတခုနဲ့ တခုပေါင်းမိတဲ့အခါ မိုင်ထောင်ပေါင်းများစွာ ပျံသန်းနိုင်တဲ့ အုပ်စုကြီးဖြစ်သွားပြီး စိမ်းစိမ်းမြင်ရာ စားသောက်ဖျက်ဆီးတတ်တယ်လို့ စိုက်ပျိုးရေးဌာနက ဆိုပါတယ်။ အခုတော့ သူတို့ပေါက်ဖွားရာဒေသ အာဖရိကတိုက်အလယ်ပိုင်းကတဆင့် ပါကစ္စတန်၊ အိန္ဒိယတို့က ကန္တာရလွင်ပြင်တွေကိုရောက်လာပြီး လေကြောင်းလမ်းအတိုင်း နီးစပ်ရာနိုင်ငံတွေအများကြီးဆီကို ဝင်ရောက်နိုင်တယ်လို့ သတိပေးထားပါတယ်။ နှံကောင်အုပ်စုတွေဟာ လေစုန်မှာ တနေ့ကို ကီလိုမီတာ ၁၀၀ (မိုင် ၆၀ ကျော်) အထိ ပျံသန်းနိုင်တာဖြစ်ပြီး ကျိုင်းကောင်အန္တရာယ်နဲ့ပတ်သက်လို့ ၁၉၈၂ ခုနှစ်မှာလည်း အခုလို နှိုးဆော်ခဲ့ဖူးပါတယ်။
12 months Ago

June 16, 2020

ဝမ်းတွင်းမြို့နယ်တွင် ကန်ရေမရသဖြင့် တောင်သူများ စိုက်ပျိုးရေးအခက်တွေ့နေ 

မန္တလေးတိုင်း၊ ဝမ်းတွင်းမြို့နယ်၊ ခင်ကြီးရွာမှာ ဇွန်လ ၁၅ ရက်က မင်းဉာဏ်ရေကန်ကြီးကို ပြင်ဆင်တူးဖော်ထားပေမဲ့ ရေဝင်ခက်ပြီး ရေကန်ထဲ ရေမရောက်လို့ တောင်သူတွေ စိုက်ပျိုးရေ အခက်အခဲ ဖြစ်နေပါတယ်။ မင်းဉာဏ်ကန်ကော်မတီဥက္ကဋ္ဌ ဦးမြဌေးက "မင်းဉာဏ်ကန်ကြီး ပြင်ထားပေမဲ့ ရေမဝင်ပါဘူး။ ရေဝင်လမ်း လုပ်ပေးထားပေမဲ့ ရေဝင်လာအောင် လုပ်မပေးပါဘူး။ ကန်ကြီးပြင်ထားလည်း ရေမရှိတော့ တောင်သူတွေ ဘာမှလုပ်မရပါဘူး။ ရေရှိမှ စိုက်ပျိုးလို့ရမှာပါ ရေမရှိတော့ အကျိုး မရှိပါဘူး။ စိုက်ပျိုးလို့ မရပါဘူး။ အဲဒီတော့ စားဝတ်နေရေး မပြေလည်ပါဘူး"လို့ ပြောပါတယ်။ မင်ဉာဏ်ကန်ဘောင်အရှည် ပေ ၃၀၀၀ ကျော်ရှိနေပါတယ်။ မင်ဉာဏ်ကန်ကို အမှီပြုပြီး စိုက်ပျိုးရေးလုပ်မယ့် လယ်ယာမြေဧက ၃၀၀ ကျော်ရှိပါတယ်။ ၉လက်မ ရေထုတ်ပေါက် ၄ ပေါက်ပါ ရှိပြီး အဲဒီရေထုတ်ပေါက်ရေကို လယ်ယာမြေအတွက် ရေရအောင် တောင်သူတွေကပဲ ရေမြောင်းတူးဖော် အသုံးပြုရမှာပါ။ ဒေသခံတောင်သူကိုမျိုးညွန့်က "ကန်ထဲကို ရေလုံးဝမဝင်ပါဘူး။ ဘာကြောင့်ရေမဝင်တာလဲ ဆိုတော့ ရေဝင်မယ့်နေရာမှာ ကန်တွင်းမြေတွေမတူးပဲ ပုဂ္ဂိုလ်ရေးအရ ချန်ထားပေးပြီး ကန်ဘောင်လုပ်ထားတယ်။ ဘယ်တော့မှ ရေဝင်မှာမဟုတ်ပါဘူး"လို့ ပြောပါတယ်။ ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာန ဒုဦးစီးမှူး ဦးမြတ်စိုးကျော်က "ဟုတ်ပါတယ် ရေဝင်ဖို့ အခက်အခဲရှိနေတယ်။ အုတ်ဖိုကန်က ရေပိုရေလျှံတွေ မင်းဉာဏ်ကန်ထဲကို ရေဝင်ရမှာပါ။ အဲကန် ၂ ကန်ကို ဆက်သွယ်တဲ့ ရေမြောင်းဖောက်တော့ သီးနှံစိုက်ထားတဲ့ ယာမြေတွေ ရှိနေတယ်။ လွတ်အောင်ရှောင်ပြီး လုပ်တာမို့ ရေဝင်မြောင်းအကျယ် ၄ ပေလောက်ပဲ ရတယ်။ ကန်ဘောင်ကျောက်သားက အခြောက်စီတာပါ ဘိလပ်မြေမပါပါဖူး"လို့ ပြောပါတယ်။ မင်းဉာဏ်ကန်ကြီးကို အိမ်ထောင်စု ၈၀၀ကျော် ရှိတဲ့ ခင်ကြီးရွာနဲ့ အိမ်ထောင်စု ၂၀၀ရှိတဲ့ ခင်ပန်းရွ်တို့က တောင်သူတွေ ကန်ရေ အသုံးပြုပြီး စိုက်ပျိုးရေး လုပ်ကြပါတယ်။ ကန်ရှိပြီး ရေမရှိလို့ စိုက်ပျိုးရေးအခက်အခဲဖြစ်နေပါတယ်။ သတင်း-မောင်မောင်လင်း
1 year Ago
More News
Up