စိုက်စရိတ်ချေးငွေ

April 22, 2021

စိုက်စရိတ်ချေးငွေ ပြန်ဆပ်ကြရန် စိုက်ဘဏ်က တောင်သူတွေကို ဖိအားပေးတောင်းခံနေ

အကြမ်းဖက်စစ်အာဏာရှင်လက်အောက် မြန်မာ့လယ်ယာဖွံဖြိုးရေးဘဏ်က ပြည်သူ့အစိုးရချေးထားတဲ့ ပိုက်ဆံတွေ ပြန်ဆပ်ဖို့ တောင်သူတွေကို ဖိအားပေးတောင်းခံနေတယ်လို့ လယ်သမားအရေးလှုပ်ရှားတွေထံက သိရပါတယ်။

ပုံမှန်စိုက်ပျိုးစရိတ်ချေးငွေ၊ ကိုဗစ် အထူးချေးငွေနဲ့ နှစ်ရှည်နှစ်ဆင့်ခံချေးငွေတွေ အားလုံးကို ပြန်ဆပ်ဖို့ မြို့နယ်မြန်မာ့လယ်ယာဖွံဖြိုးရေးဘဏ်ခွဲတွေမှာ အသိပေးကြေညာထားပြီး တောင်သူတွေဆီ ဖိအားပေးတောင်းခံဖို့ ဘဏ်ရုံးချုပ်ကနေ ညွှန်ကြားထားတယ်လို့ သိရပါတယ်။

ဧရာဝတီတိုင်းက လယ်သမားအရေးလှုပ်ရှားသူ တစ်ဦးက “သူတို့လက်ထဲမှာ ပိုက်ဆံမရှိတော့တာ သေချာတယ်။ တောင်သူတွေ ကြောက်ပြီး ရှိသမျှ ပေါင်နှံပြီး အကြွေးသွားမဆပ်ဖို့ တိုက်တွန်းပါတယ်။ တောင်သူလယ်သမား အကျိုးစီးပွား ကာကွယ်ရေး ဥပဒေဟာ အခုထိကို အသက်ဝင်နေတာမို့ တောင်သူတွေ မကြောက်ကြဖို့ လိုတယ်။ အကြွေးသစ်ထပ်ချေးလို့ မရရင်တောင် အကြွေးဟောင်းကို မဆပ်ဘဲ တောင့်ခံထားဖို့ လိုပါတယ်” လို့ ပြောပါတယ်။

စိုက်ပျိုးစရိတ်ချေးငွေမှာ အချိန်စေ့ကြွေးကျန်၊ အချိန်စေ့လွန်ကြွေးကျန်ဆိုပြီး ရှိရာမှာ အချိန်စေ့လွန်ကြွေးကျန်ကို တောင်သူတွေဆီ အကြောင်းကြားကောက်ခံတာကို  အရင်က ပြုလုပ်ခဲ့ပေမဲ့ အချိန်စေ့ကြွေးကျန်ကိုတော့ အတင်းအဓမ္မကောက်ခံတာ မရှိဘူးလို့ ဆိုပါတယ်။

 ဒါ့အပြင် ကိုဗစ်အထူးချေးငွေနဲ့ နှစ်ရှည်နှစ်ဆင့်ခံ ချေးငွေတွေကို ပြည်သူ့အစိုးရက ထုတ်ချေးခဲ့စဉ်မှာ သတ်မှတ်အချိန်ထားရှိပေမဲ့ အခုလို အတင်းအဓမ္မတောင်းခံဖို့ ညွှန်ကြားခဲ့ခြင်း မရှိခဲ့ပါဘူး။

2 months Ago

May 24, 2020

မကွေးတိုင်းတွင် မိုးရာသီစိုက်စရိတ်ချေးငွေ ကျပ် ၁၄၃ ဘီလီယံ ကျော် ထုတ်ချေးမည်

မကွေးတိုင်းအတွင်း မိုးရာသီ သီနှံစိုက်ပျိုးစရိတ်ချေးငွေ ကျပ် ၁၄၃ ဘီလီယံကျော် ထုတ်ချေးပေးနေတယ်လို့ မြန်မာ့လယ်ယာဖွံ့ဖြိုးရေးဘဏ် တိုင်းမန်နေဂျာ ဦးကျော်တင်ဦးက ပြောပါတယ်။ “တိုင်းအတွင်းက တောင်သူတွေအတွက် မိုးစပါး ၁ ဧကကို ၁ သိန်းခွဲကျပ်နှုန်း၊ အခြားသီးနှံ ၁ ဧကကို ၁ သိန်းကျပ်နှုန်းနဲ့ စိုက်ပျိုးစရိတ်ချေးငွေ ကျပ်သန်းပေါင်း ၁ သိန်း ၄ သောင်း ၃ ထောင်ကျော် ထုတ်ချေးပေးနေပါတယ်။” မကွေးတိုင်းအတွင်း ၂၀၂၀ ခုနှစ်အတွက် မိုးစပါးစိုက်ဧက ၄ သိန်းကျော်၊ အခြားသီးနှံစိုက်ဧက ၈ သိန်း ၂ သောင်းကျော် စုစုပေါင်း ၁၂ သိန်းကျော်စိုက်ပျိုးမယ်လို့ ဆိုပါတယ်။ “ပြီးခဲ့တဲ့လပိုင်းက ဗဟိုဘဏ် အတိုးနှုန်းလျှော့ချလိုက်လို့ ယခင်အတိုးနှုန်း ၈ ရာခိုင်နှုန်းကနေ ယခု ၅ ရာခိုင်နှုန်းနဲ့ ထုတ်ချေးပေးနေတာပါ။ ချေးငွေပြန်သွင်းရမယ့် သတ်မှတ်ရက်ထက် နောက်ကျခဲ့ရင် ငွေ ၁၀၀ ကို ၁ လ ပြားငါးဆယ်နှုန်းနဲ့ ဒဏ်ကြေးပေးဆောင်ရမှာဖြစ်တယ်" လို့ ဦးကျော်တင်ဦးက ပြောပါတယ်။ အခုနှစ်နွေရာသီမှာ မြို့နယ် ၄ မြို့နယ်က နွေစပါးစိုက်ဧက ၃၈၀ ကျော်နဲ့ အခြားသီးနှံစိုက်ဧက ၁၀၀၀ ကျော်အတွက် ကျပ်ငွေ သန်းပေါင်း ၁၁၀၀၀ ကျော် ထုတ်ချေးခဲ့တယ်လို့ မြန်မာ့လယ်ယာဖွံ့ဖြိုးရေးဘဏ်ကနေ သိရပါတယ်။ မင်းထီး
1 year Ago
Up