စိန်၊ မြနဲ့ ရွှေတုံးတွေအပေါ် အခွန်ကင်းလွတ်ခွင့်ပြုရန် လွှတ်တော်အတည်ပြု

August 9, 2017

စိန်၊ မြနဲ့ ရွှေတုံးတွေအပေါ် အခွန်ကင်းလွတ်ခွင့်ပြုရန် လွှတ်တော်အတည်ပြု

  စိန်၊ မြနဲ့ ရွှေတုံးတွေအပေါ် အထူးကုန်စည်ခွန်နဲ့ ကုန်သွယ်လုပ်ငန်းခွန်တွေ ကင်းလွတ်ခွင့်ပြုဖို့ ပြည်ထောင်စုလွှတ်တော်က အတည်ပြုလိုက်ပါတယ်။ နိုင်ငံတော်သမ္မတက ၂၀၁၇ ခုနှစ် ပြည်ထောင်စုရဲ့ အခွန်အကောက်ဥပဒေပါ ကုန်စည်တချို့အပေါ် အထူးကုန်စည်ခွန်နဲ့ ကုန်သွယ်လုပ်ငန်းခွန်တွေ ကင်းလွတ်ခွင့်ပြုဖို့ ပေးပို့ထားတာ ဖြစ်ပြီး သြဂုတ် ၈ ရက်နေ့ ပြည်ထောင်စုလွှတ်တော် အစည်းအဝေးမှာမဲခွဲ ဆုံးဖြတ်တာမှာ ထောက်ခံမဲ များတဲ့အတွက် အခုလို အတည်ပြုလိုက်တာပါ။ စီမံဘဏ္ဍာ ဒုဝန်ကြီး ဦးမောင်မောင်ဝင်းက “၂၀၁၇ အခွန်အကောက်ဥပဒေအရ ရွှေစင်ရွှေတုံးကို ကုန်သွယ်လုပ်ငန်း ၅ ရာခိုင်နှုန်း၊ စိန်နဲ့မြကို အချောထည် ဖြစ်ရင် အထူးကုန်စည်ခွန် ၁၅ ရာခိုင်နှုန်း၊ အရိုင်းထည်ဖြစ်ရင် ၁၀ ရာခိုင်နှုန်း သတ်မှတ်ထားတာ ဖြစ်ပါတယ်။ စိန်နဲ့ မြက မြန်မာနိုင်ငံထဲက ထုတ်လုပ်နိုင်တာ မဟုတ်တဲ့အတွက် အထူးကုန်စည်ခွန် မရတာကြောင့် ကင်းလွတ်ခွင့်ပြုလိုက်တာနဲ့ အခွန်အကောက်ရငွေအပေါ်မှာ ဘာမှ ထူးထူးခြားခြား နစ်နာတာမရှိဘူး”လို့ ပြောပါတယ်။ ဒါပေမယ့် အကျိုးကျေးဇူးရတာကတော့ စိန်နဲ့မြကို နိုင်ငံခြားကနေ တင်သွင်းပြီး ဒီမှာ အချောထည်လုပ်တဲ့ လုပ်ငန်းတွေ၊ ကျောက်သွေးကျောက်ဖြတ် လုပ်ငန်းတွေ ဆက်စပ်ဖွံ့ဖြိုးတိုးတက်လာပြီးတော့ အလုပ်အကိုင် အခွင့်အလမ်းတွေ ရလာနိုင်တယ်လို့ သူက သုံးသပ်ပါတယ်။ ရွှေစင် ရွှေတုံးကို ကင်းလွတ်ခွင့်ပြုတာဟာလည်း နိုင်ငံတကာမှာလည်း မကောက်သလို ရွှေဈေးနှုန်း တည်ငြိမ်အောင်နဲ့ ငွေကြေးဖောင်းပွမှုနှုန်း တည်ငြိမ်အောင် ထိန်းတာလည်း ပါတယ်လို့ ဆိုထားပါတယ်။ ၂၀၁၇-၁၈ ဘဏ္ဍာနှစ် လျာထားချက်အရ အထူးကုန်စည်ခွန်ဟာ အခွန်အကောက်ရငွေ စုစုပေါင်းရဲ့ ၁၀ ရာခိုင်နှုန်းရှိတယ်လို့ သိရပါတယ်။
4 years Ago
Up