စိတ်ကြွဆေးပြား

February 2, 2023

ချင်းရိုင်းတွင် စိတ်ကြွဆေးပြား ၃ သန်းကျော် ဖမ်းမိ

ထိုင်း-မြန်မာနယ်စပ်၊ ချင်းရိုင်းခရိုင်၊ ဝိန်းပါပေါက်မြို့နယ်ထဲမှာ ဖေဖော်ဝါရီ ၁ ရက်က စိတ်ကြွဆေးပြား ၃ သန်းကျော် ဖမ်းဆီးရမိတယ်လို့ မယ်ဆိုင်ပရက်စ်သတင်းမှာ ဖော်ပြပါတယ်။

ဒီမတိုင်ခင် ချင်းရိုင်းမြို့ရှိ မော်တော်ကားအငှားကုမ္ပဏီတခုဟာ အမျိုးသား တယောက် သူတို့ဆီက ဖော်ကျူနာအဖြူရောင်ကား တစီးကို တရက် ဘတ် ၂,၀၀၀ နှုန်းနဲ့ ငှားသွားကြောင်း၊ သူဟာ ကားရတာနဲ့ အဆောတလျင် မောင်းထွက်သွားလို့ သင်္ကာမကင်း ဖြစ်တာကြောင့် အဆိုပါကားကို လိုက်ကြည့်ပေးဖို့ ရဲစခန်းကို တိုင်ကြားထားတယ်လို့ ဆိုပါတယ်။

တာဝန်ရှိသူတွေက အဆိုပါကားကို လိုက်လံရှာဖွေရာမှာ ဝိန်းပါပေါက်မြို့နယ် ချင်းရိုင်း-ချင်းမိုင်သွား လမ်းမကြီးပေါ်က ဓာတ်ဆီဆိုင်တဆိုင်မှာ ရပ်နားထားတာ တွေ့ရတယ်လို့ တာဝန်ရှိသူတွေက ပြောပါတယ်။

ကားငှားလာသူမှာ အသက် ၂၉ နှစ်အရွယ် ထိုင်းမှတ်ပုံတင် ကိုင်ဆောင်ထားတဲ့ မုန့်တိုင်းရင်းသားတဦးဖြစ်ပြီး ဝိန်းပါပေါက်မှာ နေထိုင်ကြောင်း၊ ကားကိုစစ်ဆေးရာမှာတော့ နောက်ခန်းမှာ မြွေရေခွံအိတ်တွေထဲ ထည့်ထားတဲ့ စိတ်ကြွဆေးပြား စုစုပေါင်း ၃,၂၀၀,၀၀၀ ကို တွေ့ရတာလို့ ဆိုပါတယ်။

သူ့ကို လိုအပ်သလို အရေးယူဖို့နဲ့ ကွင်းဆက်တွေ စုံစမ်းဖော်ထုတ်ဖို့ ချင်းရိုင်းခရိုင်ရဲစခန်းမှာ ခေါ်ယူစစ်ဆေးနေပြီး အမှတ် ၅ ခရိုင်ရဲဌာနချုပ် ရဲမှူးချုပ်ကိုယ်တိုင် သတင်းစာရှင်းပွဲ လုပ်သွားမယ်လို့ မယ်ဆိုင်ပရက်စ် သတင်းမှာ ဖော်ပြထားပါတယ်။

2 days Ago

January 26, 2023

ထိုင်းနိုင်ငံ ချင်းရိုင်းခရိုင်တွင် မြန်မာနယ်စပ်ဘက်မှသယ်လာသည့် စိတ်ကြွဆေး ၆ သန်းဖမ်းမိ

ထိုင်း-မြန်မာနယ်စပ်၊ ချင်းရိုင်းခရိုင်၊ ဝိန်းပါပေါက်မြို့နယ်ထဲမှာ ပြီးခဲ့တဲ့ ဇန်နဝါရီ ၂၄ ရက်က စိတ်ကြွဆေးပြားပေါင်း ၆ သန်းဖမ်းဆီးရမိတာနဲ့ဆက်နွှယ်ပြီး ပါဝင်ပတ်သက်သူတွေရဲ့ မြေကွက်၊ နေအိမ်၊ မော်တော်ကား၊ ဘဏ်စာအုပ် စတဲ့ ပိုင်ဆိုင်မှုပေါင်း ထိုင်းဘတ် ၁၁ သန်းကျော်ကို သက်ဆိုင်ရာက သိမ်းဆည်းလိုက်ကြောင်း မယ်ဆိုင်ဒေသသတင်းမှာ ဖော်ပြပါတယ်။ 

ဇန်နဝါရီလ ၂၄ ရက် မနက်ပိုင်းက မြန်မာနယ်စပ်၊ မယ်ဖာ့လုံမြို့နယ် ထိုတ်ထိုင်းရွာဘက်ကနေ မောင်းနှင်လာတဲ့ မသင်္ကာဖွယ်ကား ၂ စီးနောက်ကို တာဝန်ရှိသူတွေက နောက် ယောင်ခံလိုက်လာခဲ့ကြောင်း၊ ကား ၂ စီးအနက် ၁ စီးမှာ ပျဉ်ပြားချပ်တွေ သယ်ဆောင်လာပြီး ဝိန်းပါပေါက်မြို့နယ် မဲ့ထိုစစ်ဆေးရေးဂိတ်မှာ စစ်ဆေးရှာဖွေရာမှာတော့ ပျဉ်ပြားချပ်တွေထဲက အံဝှက်ထဲမှာ စိတ်ကြွဆေးပြားတွေထည့်ထားတဲ့ အိတ်တွေကိုတွေ့ရှိရတာလို့ တာဝန်ရှိသူတွေက ပြောပါတယ်။

အဆိုပါအိတ်ထဲမှာ ၉၉၉ တံဆိပ်ပါ  စိတ်ကြွဆေးပြား စုစုပေါင်း ၆၀၀၀၀၀၀ ( ၆ သန်း ) ရှိခဲ့လို့ လူ ၅ ဦးကိုဖမ်းဆီးထားကာ သူတို့နေထိုင်တဲ့ ချင်းရိုင်း၊ ဖရဲ့နဲ့ နခွန်းနားယုဒ်ခရိုင်ရှိ နေအိမ်တွေကို မူးယစ်ရဲ နယ်မြေခံရဲနဲ့ အုပ်ချုပ်ရေးဘက်က တာဝန်ရှိသူတွေ သွားရောက်စစ်ဆေးခဲ့ကြပါတယ်။ 

စစ်ဆေးချက်အရ မယ်ဆိုင်မြို့၊ ပုန်ငမ်းရပ်ကွက် ဆန်ကလစ်ထောင်းန်အိမ်ရာရှိ ထိုင်းနိုင်ငံသား အသက် ၃၇ နှစ်ရွယ်အမျိုးသမီး ၁ ဦးရဲ့အမည်ပေါက် ၃ ဧကအကျယ်ရှိ ခြံဝင်း၊ အဆင့်မြင့်တိုက်အိမ် ၊ မော်တော်ကား၊ ဘဏ်ငွေစုစာအုပ်၊ ရွှေငွေ လက်ဝတ်ရတနာ စသဖြင့် စုစုပေါင်း တန်ဖိုး ဘတ် ၁၁,၀၄၀,၀၀၀ ကို သိမ်းဆည်းခဲ့ကြောင်း၊ အဲဒီအိမ်ကနေ နိုင်ငံခြားသားအမျိုးသား ၁ ဦးရဲ့ နိုင်ငံကူးလက်မှတ်ကိုပါတွေ့ရှိပြီး စီစီတီဗွီကင်မရာတွေပါ စစ်ဆေးဖို့ သိမ်းဆည်းခဲ့တယ်လို့ ဆိုပါတယ်။ 

ဒါ့အပြင် နောက်ထပ်ခရိုင် ၂ ခုရှိ မူးယစ်ဆေးပတ်သက်သူတို့ ပိုင်ဆိုင်မှုတွေ သိမ်းဆည်းခဲ့ကြောင်း၊ ခရိုင် ၃ ခုလုံးကနေ ဘတ် ၃၂ သန်းကျော်တန်ဖိုးရှိ မြေကွက်၊ နေအိမ်၊ ကား ၉ စီး၊ ရွှေငွေရတနာ၊ ငွေစုစာအုပ် ၅ အုပ်၊ ငွေသား ၅၉၈,၀၀၀ ဘတ်စသဖြင့် အမျိုးအစား ၂၆ မျိုးကို သိမ်းဆည်းခဲ့တယ်လို့ ဆိုပါတယ်။

တရားခံတွေက သူတို့ဟာ အဆိုပါစိတ်ကြွဆေးတွေကို နယ်စပ်ဘက်က သယ်ဆောင်ခဲ့ကြောင်း၊ မနှစ် ၂၀၂၂ နှစ်ကုန်ပိုင်းကတည်းက မယ့်ကျန်းမြို့ကို စိတ်ကြွဆေး ၆ သန်း ၈ သိန်းနဲ့ ၂၀၂၃ နှစ်ဆန်းပိုင်းမှာ နောက်ထပ် ၃,၂၀၀,၀၀၀ သယ်ခဲ့တာကြောင့် စုစုပေါင်း ၁၀ သန်းကျော် သယ်ဆောင်ခဲ့တယ်လို့ ဝန်ခံပြောသွားပါတယ်။ 

ကိုးကား - maesaipress

1 week Ago
More News
Up