စိတ်ကျန်းမာရေး

March 4, 2020

ကိုရိုနာဗိုင်းရပ်စ်ကြောင့် ဟောင်ကောင်ဒေသခံများ စိတ်ကျန်းမာရေးဝေဒနာ ခံစားနေရ

ကိုရိုနာဗိုင်းရပ်စ် ကူးစက်ပျံ့နှံ့နေတဲ့ ဟောင်ကောင် ဒေသခံတွေဟာ အိမ်ထဲအောင်းပြီး သူတို့ရဲ့ နိစ္စဓူဝ ဘဝတွေကို ဖြတ်သန်းကြသလို စိတ်ကျန်းမာရေးပြဿနာကြုံရသူ အရေအတွက် တိုးလာတယ်လို့လည်း ကျွမ်းကျင်သူတွေက ပြောပါတယ်။  ဟောင်ကောင်ဒေသခံတဦးဖြစ်တဲ့ ဒဲရစ်ကိုကို  အလုပ်ရှင်တွေက နေအိမ်ကပဲ အလုပ်လုပ်ဖို့ မှာကြားထားပါတယ်။ ဒါကြောင့် ဒဲရစ်ကိုဟာ အိမ်မှာ ကလေးတွေကို အချိန်ပေးသလို တဖက်ကလည်း ရိက္ခာတွေ စုဆောင်းထားပါတယ်။ ပိတ်ရက်တွေမှာ သူက မိသားစုကို အပြင်ခေါ်သွားလိုပေမယ့် သူ့ကလေးတွေက အိမ်မှာနေပြီး ဂိမ်းကစားရတာကိုပဲ ကြိုက်တယ်လို့ ဆိုပါတယ်။ ဒါကြောင့် သူတို့တွေ အပြင်မထွက်ဖြစ်တာ နှစ်ပတ် ရှိသွားပါပြီ။  “ကျနော်တို့ ရိက္ခာလှောင်ထားတာကို ပြမယ်။ လူတွေက ရိက္ခာတွေ ဝယ်ကြတဲ့အခါမျိုးမှာ  စူပါမားကတ်တွေ ပစ္စည်းပြတ်တဲ့အခါမျိုးမှာ ကျနော်တို့အိမ်မှာ ရိက္ခာရှိတယ်။ ဒါတွေက သီတင်းပတ်ချီပြီး ဖူလုံပါတယ်” လို့ အကျိုးအမြတ်မယူ အဖွဲ့မန်နေဂျာ ဒဲရစ်ကိုက ပြောပါတယ်။  ဟောင်ကောင်အစိုးရက ရုံးတွေကို ပိတ်ထားပြီး ဝန်ထမ်းတွေကို အိမ်ကနေပဲ အလုပ်လုပ်ခိုင်းပါတယ်။ ဒါ့အပြင် ရေကူးကန်တွေ၊ ပြတိုက်တွေနဲ့ စာကြည့်တိုက်တွေကိုလည်း ပိတ်ထားပါတယ်။ ဇန်နဝါရီလတုန်းက အစိုးရ ဖွင့်လှစ်ခဲ့တဲ့ စိတ်ကျန်းမာရေး အရေးပေါ်ဖုန်းလိုင်းမှာ ဖြေကြားမှု ၂၅၀၀ ခန့် ရှိတယ်လို့ တာဝန်ရှိသူတွေက ပြောပါတယ်။ အဲဒီလိုပဲ စေတနာ့ဝန်ထမ်းအဖွဲ့တွေဟာလည်း အိမ်မှာ သီးခြားစောင့်ကြည့်ခံနေရသူတွေကို  ကူညီနှစ်သိမ့် ဆွေးနွေးတာတွေ လုပ်ပေးနေပါတယ်။ စိတ်ရောဂါကုဆရာဝန် အဲလစ်ဇာချောင်က “ကျမတို့ဆီ ဖုန်းဆက်တဲ့လူတွေက သူတို့ဟာ ကိုရိုနာဗိုင်းရပ်စ်ဖြစ်တဲ့ ကိစ္စ၊ နှာခေါင်းစည်း ဝယ်တဲ့ကိစ္စတွေကြောင့် ခုတလော ကောင်းကောင်းအိပ်မပျော်ဘူးဆိုပြီး ပြောကြတယ်” လို့ ပြောခဲ့ပါတယ်။   ဟောင်ကောင်မှာ လပေါင်းများစွာ အစိုးရဆန့်ကျင်ရေး ဆန္ဒပြပွဲတွေ လုပ်ခဲ့ပြီးနောက်မှာ  ကိုရိုနာဗိုင်းရပ်စ် ကူးစက်တာတွေ ဖြစ်လာတာကြောင့် ဒေသခံအတော်များများ စိတ်ကျရောဂါနဲ့ စိတ်ဖိစီးရောဂါ ဖြစ်လာတာတွေ တိုးလာတယ်လို့ ဆေးဘက်ကျွမ်းကျင်သူတွေက ပြောပါတယ်။
1 year Ago

October 27, 2019

စိတ်ကျန်းမာရေးမူဝါဒသစ် အစိုးရအဖွဲ့ အတည်ပြုချက်ယူရန်သာ လိုတော့ဟုဆို

စိတ်ကျန်းမာရေးမူဝါဒသစ်ကို အစိုးရအဖွဲ့ရဲ့ အတည်ပြုချက်ယူဖို့ပဲ လိုတော့တယ်လို့ ရန်ကုန်ဆေးတက္ကသိုလ် စိတ်ကျန်းမာရေးဌာနက ကထိကဆရာက ပြောပါတယ်။ မြန်မာနိုင်ငံမှာ စိတ်ကျန်းမာရေးနဲ့ပတ်သက်လို့ ၁၉၁၂ ခုနှစ်က ရေးဆွဲထားတဲ့ သူရူးဥပဒေသာ ရှိသေးပြီး ဥပဒေအသစ်ရေးဆွဲဖို့ လွန်ခဲ့တဲ့ ၆ နှစ်လောက်က စတင်လုပ်ဆောင်နေပေမယ့် လက်ရှိအချိန်အထိ အတည်မပြုနိုင်သေးဘဲ ပြည်သူ့လွှတ်တော် ဥပဒေကြမ်းကော်မတီကိုသာ တင်ပြထားဆဲလို့ ဆိုပါတယ်။  စိတ်ကျန်းမာရေးပညာရှင်တွေ၊ စိတ်ကျန်းမာရေး ဆရာဝန်တွေ အားလုံးပါဝင်နိုင်မယ့် ၂၀၂၀-၂၀၃၀ အတွက် စိတ်ကျန်းမာရေးမူဝါဒသစ်ကို ဝန်ကြီးဌာနကိုတင်ပြထားပြီး အစိုးရကို တင်ပြဖို့ပဲ ကျန်တော့တယ်လို့ ရန်ကုန်ဆေးတက္ကသိုလ် စိတ်ကျန်းမာရေးဌာနက ကထိကဆရာ ဒေါက်တာသက်ဇော်က ပြောပါတယ်။ မြန်မာနိုင်ငံမှာ ကုလသမဂ္ဂလူဦးရေ ရန်ပုံငွေအဖွဲ့ (UNFPA) အနေနဲ့ စိတ်ကျန်းမာရေး မူဝါဒပေါ်ထွက်လာဖို့ ဌာနဆိုင်ရာတွေနဲ့ လက်ရှိမှာ ဆောင်ရွက်နေတာပါ။  စိတ်ကျန်းမာရေးနဲ့ပတ်သက်လို့ လူထုကြားမှာ ကျယ်ကျယ်ပြန့်ပြန့် သိအောင် ပညာပေးဖို့ လိုသလို၊ လူငယ်တွေကြားမှာ စိတ်ပိုင်းဆိုင်ရာပြဿနာတွေ များစွာကြုံတွေ့နေရတယ်လို့ အောက်တိုဘာ ၂၇ ရက်နေ့က Rose Garden ဟိုတယ်မှာ ကျင်းပတဲ့ World Mental Health Day 2019 မှာ UNFPA အဖွဲ့က Mental Health Specialist Mr.Adib Asrori က ပြောပါတယ်။ “တကမ္ဘာလုံးအတိုင်းအတာနဲ့ နှိုင်းယှဉ်မယ်ဆိုရင် ဖွံ့ဖြိုးဆဲနိုင်ငံတွေမှာ ဒီလိုပြဿနာမျိုး ပိုပြီးအဖြစ်များတယ်။ Mental Health နဲ့ပတ်သက်ပြီး အဖြစ်များဆုံး အခြေအနေမျိုးတွေ ကြုံတွေ့ရတယ်။ ဖွံ့ဖြိုးဆဲနိုင်ငံတွေမှာ ကြုံရတဲ့ ပြဿနာမျိုးပေါ့။ အဓိက အရေးကြီးဆုံးက Mental Health နဲ့ပတ်သက်တဲ့ awareness လုပ်ဖို့ လိုပါတယ်။ ဒါနဲ့ပတ်သက်ပြီး ပိုပြီးသိရှိလာမှ လူတွေက ဖြစ်တဲ့အခြေအနေတွေကို ပိုပြီးနားလည်လာမှာ ဖြစ်ပါတယ်။” မြန်မာနိုင်ငံမှာ စိတ်ကျန်းမာရေး ချို့တဲ့သူတွေကို ဆေးဝါးနဲ့သာ ကုသနဆဲဖြစ်ပြီး  ခေတ်နဲ့လျော်ညီတဲ့ ကုထုံးတွေ အစားထိုးကုသဖို့ လိုတယ်လို့ စိတ်ကျန်းမာရေး ဆရာဝန် စိတ်ကျန်းမာရေးအထူးကုဆရာဝန် ခင်ရတနာစိုးက ပြောပါတယ်။ မြန်မာနိုင်ငံရဲ့ စိတ်ကျန်းမာရေးကုထုံးတွေဟာ  နိုင်ငံတကာမှာ ကျင့်သုံးနေတဲ့ နည်းစနစ်ထက် များစွာနိမ့်ကျနေသလို ပညာရှင်တွေအားလုံး ပါဝင်ခွင့်ရမယ့် စိတ်ကျန်းမာရေး မူဝါဒတခု အမြန်ဆုံးထွက်ဖို့ လိုအပ်တယ်လို့ Counselling Corner တည်ထောင်သူ စိတ်ပညာရှင် ဦးအောင်မင်းသိန်းက ပြောပါတယ်။ မြန်မာနိုင်ငံမှာ စိတ်ရောဂါအထူးပြုကုသပေးနေတဲ့ အစိုးရဆရာဝန် အယောက် ၁၃၀ လောက်ပဲရှိပြီး တနိုင်ငံလုံး အတိုင်းအတာနဲ့ စိတ်ရောဂါကုဆရာဝန် ၂၅၀ ၀န်းကျင်လောက်ပဲ ရှိတယ်လို့ သိရပါတယ်။
2 years Ago
Up