စားသုံးရန်မသင့်သည့် စားသောက်ကုန်များ

March 29, 2022

စားသုံးရန်မသင့်သည့် အသားလုံး၊ အသားချောင်း ၂၁ မျိုး FDA ကြေညာ

မြန်မာပြည်တွင်း ဈေးကွက်မှာ ရောင်းချနေတဲ့ အသားလုံး၊ အသားချောင်း ၂၁ မျိုးကို စားဖို့မသင့်ဘူးလို့ စစ်ကောင်စီလက်အောက်ခံ အစားအသောက်နဲ့ ဆေးဝါးကွပ်ကဲရေးဦးစီးဌာန (FDA) က ကြေညာပါတယ်။

တာရှည်ခံဆေးတမျိုးဖြစ်တဲ့ Benzoic Acid ကို သတ်မှတ် ပမာဏထက် ပိုသုံးစွဲထားတဲ့ Thailand၊ PS-Food၊ Thai Star Barbnd၊ K& P PS-Food၊ K & P၊ TSP၊ B4 New၊ ဖွန်းစဝမ်း၊ B.B ကြက်ဘီဘီ၊ JSP Food၊ TRK၊ Top GP အမှတ်တံဆိပ်တွေ၊ တာရှည်ခံဆေးတမျိုးဖြစ်တဲ့ Sorbic Acid ကို သတ်မှတ်ပမာဏထက် ပိုသုံးစွဲထားတဲ့ P&J၊ AI CHENG အမှတ်တံဆိပ်တွေနဲ့ ထုတ်လုပ်ထားတဲ့ မာလာကြက်အူချောင်း အပါအဝင် ကြက်သား ကြက်အူချောင်း အမျိုးမျိုးတို့ကို စားဖို့ မသင့်ဘူးလို့ ကြေညာတာပါ။

အဲဒီဆေးတွေကို လိုအပ်တာထက် ပိုသုံးရင် ကလေးသူငယ်၊ ကိုယ်ဝန်ဆောင်နဲ့ သက်ကြီးရွယ်အိုတွေမှာ လတ်တလော မျက်လုံး၊ အရေပြားယားယံတာ၊ ပျို့အန်တာ၊ ခေါင်းကိုက်တာ၊ ဗိုက်အောင့်ဗိုက်ဗိုက်နာတာတို့ကို ခံစားရနိုင်တဲ့အပြင် ရေရှည်မှာ အစာအိမ်၊ အသည်း၊ ကျောက်ကပ်တို့ ပျက်စီးပြီး ကင်ဆာရောဂါတွေလည်း ဖြစ်စေတယ်လို့ ဆိုပါတယ်။

အဲဒီ အမှတ်တံဆိပ် အစားအသောက်တွေကိုမဖြန့်ဖြူးမရောင်းချဖို့ တားမြစ်လိုက်ပြီး မလိုက်နာရင် အမျိုးသားအစားအသောက်ဥပဒေ ပုဒ်မ ၂၈ (က) အရ တရားစွဲဆိုအရေးယူမယ်လို့ ဆိုပါတယ်။

အဲဒီပုဒ်မအရဆိုရင် ငွေဒဏ် သုံးသိန်းထက် မပိုတဲ့ဒဏ်ငွေပေးဆောင်ဖို့ သတ်မှတ်ထားတာ ဖြစ်ပါတယ်။

10 months Ago

August 11, 2020

အင်းတော်မြို့မစျေးတွင် စားသုံးရန်မသင့်သည့် စားသောက်ကုန်များ စစ်ဆေးတွေ့ရှိ

စစ်ကိုင်းတိုင်းဒေသကြီး၊ အင်းတော်မြို့မစျေးမှာ တိုင်းအစားအသောက်နှင့် ဆေးဝါးကွက်ကဲရေးဦးစီးဌာန(FDA) တာဝန်ရှိသူတွေက   ရွှေ့လျား ဓာတ်ခွဲစမ်းသပ်ကား Mobile Lab နဲ့ ရှောင်တခင်ဝင်ရောက်စစ်ဆေးရာ စားသုံးရန်မသင့်တဲ့ စားသောက်ကုန်တွေ စစ်ဆေးတွေ့ရှိခဲ့ပါတယ်။ အင်းတော်မြို့မစျေးကို FDA ၊ မြို့နယ်ထွေအုပ် ခရိုင်စားသုံးသူရေးရာဦးစီးဌာန (DOCA) မြို့နယ်စားသုံးသူရေးရာဦးစီးဌာန မြို့နယ်စည်ပင်၊ ကျန်းမာရေး၊ ရဲတပ်ဖွဲ့ဝင်တွေပါဝင်တဲ့ ပူးပေါင်းအဖွဲ့မှ သြဂုတ် ၁၁ ရက် မနက်က ရှောင်တခင်ဝင်ရောက်စစ်ဆေးရာ စားသုံးရန်မသင့်တဲ့ စားသောက်ကုန်များတွေ့ရှိခဲ့တာပါ။ အင်းတော်မြို့နယ် စားသုံးသူရေးရာဦးစီးမှူး ဦးကြည်နိုင်ဦးက “စျေးကွက်တွင်း တာရှည်ခံဆေးဆိုးဆေးနဲ့ အချဉ်မှုန့် အသုံးပြုနိုင်တဲ့ လက်လုပ်ချဉ် အမျိုးမျိုး၊ ငါးချဉ်အမျိုးမျိုး မုန့်ညင်းချဉ် (အစို/အခြောက်)၊ မှိုချဉ်၊ နှမ်းဖတ်ချဉ်၊ ပဲတီပင် ပေါက်ချဉ်၊ မျှစ်ချဉ်၊ ဆီတုံဟူး၊ ဆန်တုံဟူး၊ လက်ဖက်နှပ်၊ ငရုပ်ချဉ်၊ ဂျင်းချဉ်၊ ခေါက်ဆွဲ၊ မုန့်တီဖတ် စတဲ့ စားသောက်ကုန်ပစ္စည်း များကို စျေးဆိုင် ၅၅ ဆိုင်မှ နမူနာ ၅၅ မျိုး ကောက်ယူပြီး တိုင်းFDA MOBILE LAB ကားနဲ့ ဓာတ်ခွဲစစ်ဆေးခဲ့ပါတယ်။ စစ်ဆေးရာမှာ မုန့်ညင်းချဉ် ဒေသအခေါ် (တရုတ်မုန့်ညင်းချဉ်) တစ်မျိုးမှာ Salicylic Acid (ဆယ်လီစတစ် အက်ဆစ်)အသုံးပြု ထားသည်ကိုစမ်းသပ်တွေ့ရှိတယ်” လို့ပြောပါတယ်။ ပူးပေါင်းအဖွဲ့မှ အဆိုပါ မုန့်ညင်းချဉ်ကို သိမ်းဆည်းပြီး ထုတ်လုပ်ရောင်းချသူကို နောက်နောင် အဆိုပါ အချဉ်မုန့်ဆေးအသုံးမပြုဖို့ ခံဝန်ရေးထိုးတာတွေ ဆောင်ရွက်ခဲ့တယ်လို့ သိရပါတယ်။ အဆိုပါ ဆေးမှာ အရေပြားလိမ်းဆေးနဲ့ အလှကုန်တွေမှာ အသုံးပြုကြောင်း သိရပြီး စားသောက်ကုန်မှာ ထည့်သုံးပါက ဘေးအန္တရာယ်ရှိတဲ့အတွက် တားမြစ်ထားတာဖြစ်ပါတယ်။ သတင်း - ကိုကိုလင်း(အင်းတော်)
2 years Ago
Up