ရှမ်းပြည်မြောက်ပိုင်း ကျောက်မဲခရိုင် နောင်ချိုမြို့နယ်ထဲမှာ စစ်ကောင်စီတပ်ဖွဲ့နဲ့ PDF ပြည်သူ့ကာကွယ်ရေးတပ်တွေကြား ပြီးခဲ့တဲ့အပတ်ကစတင်ကာ မနေ့ကအထိ တိုက်ပွဲဖြစ်တာကြောင့် ရွာပေါင်း ၈ ရွာလောက်က ပြည်သူ ၈၀၀ ကျော် စစ်ဘေးရှောင်နေကြရပါတယ်။
နောင်ချိုမြို့နယ် ရတနာသိင်္ဂီ၊ သစ်စက်၊ ကုန်းတမော့၊ နားကျိုင်းနဲ့ လုံခန်ကျေးရွာက မိုးကုတ်သွား လမ်းပေါ်မှာ တိုက်ပွဲတွေဖြစ်နေပြီး ဩဂုတ် ၂၄ ရက်နေ့ကလည်း စစ်တပ်က လေယာဉ် ၂ စီးနဲ့ပါ ကူတိုက်တာကြောင့် အနီးတဝိုက် ရွာသားတွေ မနေရဲတော့တာကြောင့် နီးစပ်ရာဘုန်းကြီး ကျောင်းတွေမှာ ဝင်ရောက်ခိုလှုံနေရတာလို့ စစ်ဘေးရှောင်သူတဦးက ဒီဗွီဘီကို ပြောပါတယ်။
“တိုက်ပွဲက ရွာနဲ့တအားနီးပြီး လေယာဉ်ပျံပါရောက်လာတော့ ထွက်ပြေးကြတာပေါ့။ တချို့ဆို ဖိနပ်တောင်မပါဘူး၊ အဝတ်တထည် ကိုယ်တခုနဲ့ ပြေးလာကြတာ၊ ဘုန်းကြီးကျောင်းမှာ ရောက်နေတယ်။ စားစရာကို လောလောဆယ် ဆရာတော်က ကျွေးမွေးထားပေမယ့် ရေရှည်ဆိုရင် အားနာစရာပေါ့နော်၊ လိုအပ်တာက ကလေးအနွေးထည်နဲ့ ဆေးဝါးတွေပေါ့။”
တိုက်ပွဲမဖြစ်ခင် ပြီးခဲ့တဲ့ ဇွန် ၂၈ ရက်မနက်က လုံခန်ရွာထဲကို စစ်ကောင်စီတပ်ဖွဲ့တွေဝင် လာကြောင်း၊ သူတို့သွားလိုရာခရီးအတွက် ရွာထဲကထော်လဂျီကား ၂ စီးကို ချောဆွဲသွားပြီး လမ်းခရီးမှာ တိုက်ပွဲဖြစ်လို့ ချောကားနဲ့လိုက်သွားရတဲ့ လုံခန်ရွာသား အသက် ၅၀ အရွယ် ဦးတေဇော သေနတ်ထိမှန်ပြီး အခုထိ ဆေးကုသနေရတုန်းပဲလို့ ဆိုပါတယ်။
ဒီမတိုင်ခင် ၂၂ ရက်နေ့ကလည်း ကုလားကွဲရွာသား ဦးအောင်ကျော်ဟာ ယာခင်းသွားပြီး ည နေခင်းကျွဲနဲ့ပြန်လာစဉ် နောက်ကျောကို သေနတ်နဲ့အပစ်ခံရပြီး သေဆုံးသွားကြောင်း၊ ယာထဲသွားတဲ့ ဦးအောင်ဝင်းကလည်း သေနတ်သံကြားလို့ ထွက်ပြေးစဉ် စစ်ကောင်စီတပ်ဖွဲ့က သူ့ကို ဖမ်းခေါ်သွားပြီး နောက်တနေ့ ပြန်လွတ်လာကြောင်း၊ ဦးအောင်ဝင်း အပစ်ခံရတာကို သူ ပြန်ပြောမှ ရွာသားတွေသိပြီး သွားကြည့်ကြရာ အလောင်းမှာ မာတောင့်နေပြီလို့ ဆိုပါတယ်။
ဒေသထဲ အခြေအနေမတည်ငြိမ်တာကြောင့် နောင်ချိုမြို့နယ် သစ်စက်၊ ကုန်းတမော့၊ ရတနာသိင်္ဂီ၊ ကုလားကွဲ၊ လုံခန်၊ ကြံခင်း၊ နားခါး၊ နားကျိုင်း၊ ကုန်းတမော့ စတဲ့ကျေးရွာက ရွာသားတွေဟာ ဒိုးပင်၊ ဟိုခို နဲ ကုလားကွဲကျေးရွာက ဘုန်းကြီးကျောင်းတွေမှာ ခိုလှုံနေကြရပါတယ်။
စစ်ဘေးရှောင်ကူညီသူတွေကောက်ခံရရှိတဲ့စာရင်းအရ ဒိုးပင်ဘုန်းကြီးကျောင်းမှာ အိမ်ထောင်စုဝင် ၁၈၃ စုက လူဦးရေ ၅၆၉ ဦး ၊ ဟိုခိုကျောင်းတိုက်မှာ အိမ်ထောင်စု ၃၀ က ၁၁၀ ဦး၊ ကု လားကွဲဘုန်းကြီးကျောင်းမှာ အိမ်ထောင်စု ၃၉ စုက လူဦးရေ ၁၅၅ ဦး ရောက်ရှိနေတယ်လို့ ဆိုပါတယ် ။
လောလောဆယ် နေဖို့နဲ့ စားနပ်ရိက္ခာကို သံယာတော်နဲ့ နီးစပ်ရာ ကျေးရွာက အလှူရှင်တွေ လာရောက်ကူညီပေးနေကြောင်း၊ ဒါပေမဲ့ စစ်ဘေးရှောင်တွေအတွက် ဆေးဝါး၊ ကလေး အဝတ်အထည်၊ အမျိုးသမီးအသုံးအဆောင်တွေ၊ အနွေးထည်တွေ လိုအပ်လျက်ရှိလို့ စေတနာရှင်တွေအနေနဲ့ ဖုန်းနံပါတ် ၀၉ ၄၄၈၁ ၄၈၇၇၀ ၊ ၀၉ ၄၅၉၆၁၄၈၃၅ နဲ့ ၀၉ ၄၀၂၄၆ ၅၃၃၂ တွေကို ဆက်သွယ်လှူဒါန်းနိုင်တယ်လို့ ဆိုပါတယ်။
ကိုဗစ်-၁၉ ကပ်ရောဂါနဲ့ စစ်တပ်အာဏာသိမ်းမှုကြောင့် ခရီးသွားဧည့်သည် မလာတော့တဲ့အတွက် အင်းဝမြို့ဟောင်းမှာရှိတဲ့ မြင်းလှည်းယာဉ်မောင်းသူတွေ စားဝတ်နေရေး ခက်ခဲလာပြီး မြင်းအကောင်ရေ ၆၀ ရာနှုန်းလောက်အထိ ရောင်းချပစ်နေရတယ်လို့ သိရပါတယ်။
မြင်းလှည်းယာဉ်ဂိတ်ကို ခရီးသည်တင်ဆောင်တဲ့ လှည်းအစီးရေ ၂၀၀ လောက်ရှိပြီး ဂိတ်ကို လာရောက်ဂိတ်ထိုးတဲ့ မြင်းလှည်းက အစီးရေ ၂၀၀ နီးပါးလောက်ရှိတာကြောင့် မြင်းလှည်းအစီးရေ ၄၀၀ နီးပါးအထိ ရှိခဲ့တာလို့ မြင်းလှည်းယာဉ်အသင်းက ပြောပါတယ်။
အခုအချိန်မှာတော့ အင်းဝကို ဧည့်သည်မလာတော့တဲ့အတွက် မြင်းလှည်းငှားရမ်းသူ မရှိတာကြောင့် အင်းဝမြို့ဟောင်းထဲက မြင်းအကောင်ရေ ၆၀ ရာခိုင်နှုန်းလောက်ကို ရာင်းချပစ်ထားရတယ်လို့ မြင်းလှည်းယာဉ်မောင်းသူတစ်ဦးက ပြောပါတယ်။
“အခုကတော့ မြင်းလှည်းလုပ်စားခွင့် မကောာင်းတဲ့ကာလဖြစ်တဲ့အတွက် မြင်းတွေလည်းရောင်းစားထားတယ်။ ရောင်းစားထားတယ်ဆိုတာက မြင်းတွေ ကျွေးဖို့ အင်အားနည်းသွားတော့ မြင်းတွေကို ပြန်ပြီးတော့ ရောင်းထားကြတယ်ပေါ့လေ။ ရာသီ ကောင်းရင်တော့ မြင်းတွေပြန်ဝယ်ကြမှာပေါ့။ အခုလောလောဆယ် ရောင်းထားတဲ့မြင်းက အားလုံးပေါင်း ၆၀ ရာခိုင်နှုန်းလောက်တော့ရောင်းထားတယ်။ အခုလက်ရှိမှာတော့ ၄၀ ရာခိုင်နှုန်း လောက်တော့ ကျန်ပါသေးတယ်ခင်ဗျ။”
မြင်းရောင်းချရာမှာ ပေါက်ဈေး ၈ သိန်း နဲ့ ၉ သိန်းကြား ရှိပေမယ့် ပေါက်ဈေးထက် လျော့ပြီး ၄ သိန်းနဲ့ ၅ သိန်းကြားသာ ရောင်းချနေရတယ်လို့ မြင်းရောင်းလိုက်ရသူတစ်ဦးက ပြောပါတယ်။
စားဝတ်နေရေးနဲ့ မြင်းကျွေးမွေးစရိတ်တွေ မတတ်နိုင်တော့တာကြောင့် ရောင်းချရတာဖြစ်ပြီး တချို့ မြင်းရောင်းသူတွေအနေနဲ့ မြင်းသတ်တဲ့နေရာတွေမှာပါ ရောင်းချလာရတယ်လို့ ဆိုပါတယ်။
“အမတို့ဆိုရင် မြင်းတွေရောင်းလိုက်ရလို့ မြင်းတွေ အကြွေးဖိုးတွေတောင်မရဘူး၊ မြင်းသမားတွေက လိမ်သွားတာ။ မြင်းလှည်းတွေရောင်းတဲ့သူ အလွန်ဆုံး အမတို့က အစီး ၂၀၀ ရှိတာလေ အစီး ၂၀၀ မှာ အကောင်ရေ ၅၀ လောက်ပဲရှိတော့တာ အကုန်ရောင်းပစ်ရတယ်။ ဘယ်လိုနေရာတွေမှာရောင်းလဲဆိုတော့ တောင်မြို့တို့ မန္တလေးတို့ အများဆုံး လာဝယ်တယ်။ နောက်ဆုံးအဆင့်ထိပြောရရင်တော့ သတ်တဲ့ လက်ထဲအထိ ရောင်းရတဲ့အဆင့်ထိ အမတို့မှာရှိတယ်။”
အင်းဝကို မြင်းနဲ့လှည့်ပတ်မယ်ဆိုရင် မြင်းလှည်းဂိတ်က သတ်မှတ်ပေးထားတဲ့ ဘားဂရာကျောင်း၊ ရတနာဆီမီးဘုရား၊ မျှော်စင်၊ မယ်နုအုတ်ကျောင်း စတဲ့ ၄ နေရာကို လိုက်ပို့ပေးပြီး ငွေကျပ်တစ်သောင်းခွဲ ယူတယ်လို့ သိရပါတယ်။
