ဘာစီလိုနာကွင်းလယ်ကြယ်ပွင့် ဂါဘီဟာ အီတလီနဲ့ပွဲစဉ်မှာ ပွဲထွက်ကစားခွင့်ရပြီးနောက် စပိန်း လက်ရွေးစင်သမိုင်းတစ်လျှောက် အသက်အငယ်ဆုံးကစားသမားအဖြစ် မှတ်တမ်းဝင်ခဲ့ပါတယ်။
အခုနှစ်ရာသီ ဘာစီလိုနာအသင်းမှာ ပွဲထွက်ခွင့်ရလာတဲ့ ဂါဘီဟာ အသက် ၁ရ နှစ် နဲ့ ၆၂ ရက်သာရှိ သေးပြီး စပိန်လက်ရွေးစင်သမိုင်းတစ်လျှောက် အသက်အငယ်ဆုံး ပွဲထွက်ခွင့်ရတဲ့က စားသမားဖြစ်လာခဲ့တာပါ။
၁၉၃၆ ခုနှစ်က ၁၇ နှစ်၊ ၂၈၄ ရက်နဲ့ ပွဲထွက်ခွင့်ရခဲ့တဲ့ အိန်ဂျယ်ဇူဘီတာကို ကျော်ဖြတ်ပြီး ဂါဘီက စံချိန်သစ်တင်ခဲ့တာဖြစ်ပါတယ်။
ဒါ့အပြင် ဘာစီလိုနာအသင်းဖော်တွေဖြစ်တဲ့ ပက်ဒရီနဲ့ အန်းဆုဖာတီတို့ကိုလည်း ကျော်ဖြတ်နိုင်ခဲ့တာပါ။
ဂါဘီဟာ ပြီးခဲ့တဲ့ယူရိုပြိုင်ပွဲမှာ ပရိသတ်တစ်ဦးအနေနဲ့သာ ကြည့်ရူခဲ့ရပြီး အခုနှစ်ရာသီမှာ လာလီဂါပွဲစဉ် ၂၇၅ မိနစ်သာ ကစားခဲ့ပြီးနောက် စပိန်လက်ရွေးစင်ကစားသမား ဖြစ်လာခဲ့တာပါ။
အသက် ၁၇ နှစ်နဲ့ ၂ လခန့်သာ ရှိသေးတဲ့ ဂါဘီဟာ ယူရိုချန်ပီယံအီတလီနဲ့ ပွဲဦးထွက်ပွဲစဉ်မှာ ခြေစွမ်းပြသနိုင်ခဲ့ပြီး ပွဲချိန် ၈၄ မိနစ်ရောက်မှ လူစားလဲခံခဲ့ရတာဖြစ်ပါတယ်။
ဒီနေ့ညမှာကစားမယ့် ယူအီးအက်ဖ်အေနေးရှင်းလိဂ် ဆီမီးဖိုင်နယ်ပွဲစဉ်မှာ စပိန်အသင်းရဲ့ ကစားပုံကို လိုက်မီနိုင်ဖို့ လိုအပ်ချက်တွေရှိသေးကြောင်း အီတလီနည်းပြ မန်ချီနီကပြောပါတယ်။
မန်ချီနီဟာ အီတလီအသင်းနဲ့အတူ ယူရိုပြိုင်ပွဲမှာ ချန်ပီယံဖြစ်အောင်စွမ်းဆောင်နိုင်ခဲ့ပေမယ့် စပိန်နဲ့ပွဲအတွက်တော့ ကိုယ့်အသင်းကို နှိမ့်ချပြီး ပြိုင်ဘက်ကို ချီးကျူးသွားခဲ့တာပါ။
စပိန်အသင်းဟာ ယူရိုပြိုင်ပွဲမှာ ရုန်းကန်ခဲ့ရတဲ့အသင်းဆိုတာ မှန်ပေမယ့် ဘောလုံးပိုင်ဆိုင်မှုအသာနဲ့ ကစားတတ်တာက နှစ်ပေါင်း ၂၀ လောက်ကြာပြီဖြစ်ကြောင်း၊ အီတလီအသင်းအနေနဲ့ စပိန်လိုကစားနိုင်ဖို့ တိုးတက်မှုတွေရှိဖို့လိုပြီး ပိုပြီး မြန်နှုန်းမြင့် ကစားနိုင်ဖို့လိုသေးကြောင်း နည်းပြ မန်ချီနီက သုံးသပ်ခဲ့တာပါ။
ဒါပေမယ့်လည်း ယူရိုချန်ပီယံ ရယူခဲ့အပြီးမှာ နေးရှင်းလိဂ်ချန်ပီယံဖြစ်ခဲ့မယ်ဆိုရင် ခမ်းနားစရာဖြစ်ပြီး ကမ္ဘာ့ဖလားကို စောစီးစွာ ဝင်ခွင့်ရရှိမှာကလည်း အခွင့်အရေးတစ်ခုဖြစ်ကြောင်း နည်းပြ မန်ချီနီက ပြောပါတယ်။
တခြား ဆီးမီးဖိုင်နယ်မှာတော့ ဘယ်လ်ဂျီယံနဲ့ ပြင်သစ်တို့ ယှဉ်ပြိုင်ကစားကြမှာဖြစ်ပြီး အနိုင်ရတဲ့ ၂ သင်းက အောက်တိုဘာ ၁၁ ရက်နေ့ ဗိုလ်လုပွဲယှဉ်ပြိုင်သွားရမှာဖြစ်ပါတယ်။
