စပါးအသင်း

September 27, 2021

အာဆင်နယ်နှင့်ပွဲ၌ ဆုံးဖြတ်ချက်များ မှားယွင်းခဲ့ဟု စပါးနည်းပြဆန်းတို့စ် ဝန်ခံ

အာဆင်နယ်အသင်းနဲ့ မြောက်လန်ဒန်ဒါဘီပွဲစဉ်မှာ ဆုံးဖြတ်ချက်တွေ မှားယွင်းသွားခဲ့တယ်လို့ စပါး နည်းပြ နူနိုဆန်းတို့စ်က ပွဲအပြီးမှာ ဝန်ခံစကားပြောခဲ့ပါတယ်။

စပါးအသင်းဟာ အာဆင်နယ်ကို ပထမပိုင်းမှာပဲ ၃ ဂိုး ပြတ် ရှုံးနိမ့်နေခဲ့ပြီး ဒုတိယပိုင်းမှာ ဆွမ်ဟောင်မင်က ချေပဂိုး ၁ ဂိုးသွင်းခဲ့လို့ ၃ ဂိုး ၁ ဂိုးနဲ့ ရှုံးနိမ့်ခဲ့တာပါ။ 

ကစားသမားတွေ ခြေစွမ်းပြနိုင်ခြင်း မရှိခဲ့သလို ပွဲထွက်လူစာရင်းနဲ့ ကစားမယ့် အစီအစဉ်တွေ အားလုံးကလည်း မှားယွင်းစွာ ဆုံးဖြတ်ခဲ့မိတယ်လို့ ဆန်းတို့စ်က ပွဲအပြီးမှာ ပြောပါတယ်။ 

“ဆိုးရွားစွာပဲ ဆုံးဖြတ်ခဲ့မိတယ်။ မှန်ကန်တဲ့ဆုံးဖြတ်ချက်တွေ မလုပ်နိုင်ခဲ့ဘူးဆိုတာပဲ ပြောချင်တယ်။ ကျန်တာတွေကိုတော့ ကျနော့်ကစားသမားတွေကိုပဲ တိုက်ရိုက်ပြောချင်ပါတယ်။”

ဆန်းတို့စ်ဟာ ပထမပိုင်းမှာ ၃ ဂိုး ပြတ်ရူံးနိမ့်ခဲ့ပြီးနောက် ဒုတိယပိုင်းမှာတော့ ကွင်းလယ်လူ အယ်လီနဲ့ နောက်ခံလူ တန်ဂမ်ဂါ တို့ကို လူစားလဲခဲ့ပြီး အိုလီဗာစကစ်နဲ့ အီမာဆင်တို့ကို ထည့်သွင်းကစားစေခဲ့တာ ဖြစ်ပါတယ်။

22 hours Ago

August 30, 2021

တောင်အမေရိက ကစားသမားများအတွက် အဖြေရှာရန် စပါးနည်းပြ ဆန်းတို့စ် တိုက်တွန်း

နိုင်ငံတကာပွဲစဉ်တွေအပြီးမှာ အင်္ဂလန်ကို ပြန်ရောက်လာမယ့် တောင်အမေရိက ကစားသမားတွေအတွက် အဖြေတစ်ခု ရှာပေးဖို့ စပါးနည်းပြ နူနိုဆန်းတို့စ်က တောင်းဆိုလိုက်ပါတယ်။

ပရီးမီးယားလိဂ် ကစားသမားတွေဟာ ဒီနေ့ကစတင်ပြီး နိုင်ငံတကာပွဲစဉ်တွေ ကစားဖို့ မိခင်နိုင်ငံ့လက်ရွေးစင်အသင်းတွေနဲ့ ပူးပေါင်းသွားရမှာဖြစ်ပါတယ်။

ယူကေရဲ့ ကိုဗစ် စည်းမျဉ်းတွေအရ အနီရောင်ဆင့်သတ်မှတ်ထားတဲ့ နိုင်ငံတွေက လူတွေအနေနဲ့ ယူကေကို ဝင်ရောက်လာမယ်ဆိုရင် ၁ဝ ရက် သီးသန့်နေထိုင်ဖို့ စည်းကမ်းထုတ်ပြန်ထားတာ ဖြစ်ပါတယ်။

စပါးအသင်းက ကွင်းလယ်လူ လိုဆယ်ဆိုနဲ့ နောက်ခံလူ ရိုမဲရိုးတို့ဟာ အာဂျင်တီးနားအတွက် ကစားပေးရမှာဖြစ်ပြီး နိုင်ငံတကာပွဲတွေကအပြန်မှာ ၁ဝ ရက်  သီးသန့်နေထိုင်ရမယ်ဆိုရင် စပါးအသင်းရဲ့ ပွဲစဉ်တွေကို လွဲချော်မှာဖြစ်ပါတယ်။

ဒါကြောင့် နိုင်ငံပွဲစဉ်တွေအပြီးမှာ အရန်သင့် အသုံးပြုခွင့်ရဖို့အတွက် တာဝန်ရှိသူတွေဘက်က အဖြေတစ်ခုရှာ သင့်ပြီး စပါးအသင်းအတွက်သာမက တခြားသောအသင်းတွေက တောင်အမေရိက ကစားသမားတွေအတွက်လည်းဖြစ်တယ်လို့ ဆန်းတို့စ်က တိုက်တွန်းခဲ့တာပါ။ 

မန်ယူအသင်းရဲ့ ဥရုဂွေးတိုက်စစ်မှူး ကာဗာနီကတော့ လက်ရွေးစင်နဲ့ မပူးပေါင်းဖို့ သဘောတူညီချက်ရထားပါတယ်။ ဒါပေမဲ့ အက်စ်တန်ဗီလာအသင်းက အာဂျင်တီးနားဂိုးသမား မာတီနက်ဇ်နဲ့ ဘွန်ဒီယာတို့ကိုတော့ စေလွှတ်ပေး သွားမယ်လို့သိရပါတယ်။

ယူကေက သတ်မှတ်ထားတဲ့ အနီရောင်အဆင့်နိုင်ငံတွေမှာ အာဂျင်တီးနားနဲ့ ဘရာဇီးအပြင် အီဂျစ်နိုင်ငံလည်းပါဝင်နေပါတယ်။

4 weeks Ago
More News
Up