စစ်အာဏာသိမ်းမှု

May 23, 2022

စစ်အာဏာသိမ်းပြီး ၁ နှစ်ကျော်ကြာသည်အထိ ပြည်တွင်းဘဏ်လုပ်ငန်းအခြေအနေ ဆက်လက်ဆိုးရွားနေ

ပြိုလဲခါနီး အခြေအနေနဲ့ ရင်ဆိုင်နေရတဲ့ ပုဂ္ဂိလက ဘဏ်ကြီးတချို့ကို ဆက်လက်ရပ်တည်နိုင်ဖို့ ကူညီပေးခဲ့ရတယ်လို့ စစ်ကောင်စီက ပြောနေပေမဲ့ မြန်မာနိုင်ငံမှာ စစ်တပ်အာဏာသိမ်းပြီးနောက် ဘဏ်တွေရဲ့အခြေအနေက ပိုဆိုးလာတာဖြစ်တယ်လို့ ဘဏ်နဲ့ ငွေကြေးဆိုင်ရာ ကျွမ်းကျင်သူ သုတေသီတွေက ပြောပါတယ်။ 

နေပြည်တော်မှာ ပြီးခဲ့တဲ့ရက်ပိုင်းက ပြုလုပ်ခဲ့တဲ့ သတင်းစာရှင်းလင်းပွဲမှာ စစ်ကောင်စီ ပြန်ကြားရေး ဒုဝန်ကြီးက ပြန်ကြားရေးဒုဝန်ကြီး ဗိုလ်ချုပ်ဇော်မင်းထွန်းက စစ်ကောင်စီအနေနဲ့ ဘဏ်ကြီးတချို့ကို ဆက်လက်ရပ်တည်နိုင်ရေး ကူညီပေးခဲ့ရကြောင်းနဲ့ ဘဏ်ကြီးတချို့က ပြိုလဲခါနီးအခြေအနေအထိ ဖြစ်ခဲ့တယ်လို့ ပြောဆိုခဲ့တာဖြစ်ပါတယ်။

ဒါနဲ့ပတ်သက်ပြီး ပြည်တွင်းဘဏ်တွေရဲ့ အခြေအနေက အာဏာမသိမ်းခင်ကတည်းက ကျပ်တည်းမှု ရှိနေတာ မှန်ပေမယ့် စစ်တပ်အာဏာသိမ်းပြီးနောက် ဘဏ်တွေရဲ့အခြေအနေက ပိုဆိုးလာတာလို့ စီးပွားရေးသုတေသီတွေက ထောက်ပြပြောပါတယ်။

ဘဏ်နဲ့ငွေကြေးဆိုင်ရာ စီးပွားရေးသုတေသီတဦးက “နဂိုကတည်းက အာဏာမသိမ်းခင်ကတည်းက ဘဏ်တွေက အခြေအနေ ဆိုးနေတာပါ။ အဲဒီလို အခြေအနေဆိုးရခြင်း အကြောင်းရင်းက အချက် ၂ ချက်ရှိတယ်။ အဲဒီ ၂ ချက်က သူတို့ ချေးရမယ့် ပမာဏထက် ပိုချေးထားတယ် (overdraft)ပေါ့။ နောက်တချက်က သူတို့ ချေးလိုက်တဲ့ ပိုက်ဆံတွေက  အကျိုးမရှိတဲ့ ဟာတွေ ဖြစ်နေတယ် (non performing loan)ပေါ့။ အဲဒါတွေက များနေတယ်။ ဒါကိုလည်း NLD အစိုးရလက်ထက်ကတည်းက ရှင်းပစ်ဖို့ပေါ့နော်။ ၂ နှစ်အတွင်းမှာ ရှင်းပစ်ပါဆိုပြီး လုပ်ခိုင်းထားတာကို မရှင်းနိုင်ဘူး ဖြစ်နေတယ်။ ဒီတော့ (ဘဏ်)သူတို့က ၃ နှစ် ခွင့်တောင်းတယ်လေ။ အဲဒါကလည်း ဘဏ်တွေမှာ ဗဟိုဘဏ်က သတ်မှတ်ထားတဲ့ စည်းမျဉ်းစည်းကမ်းတွေ ရှိတယ်။ အဲဒီ စည်းမျဉ်းစည်းကမ်းတွေနဲ့ မကိုက်လို့ NLD အစိုးရက ရှင်းခိုင်းတယ်။ အဲဒါတွေကလည်း များသောအားဖြင့် ဘဏ်ကြီးတွေက ကျူးလွန်ထားကြတာနော်။ ဒါပေမဲ့ အဲဒီအခြေအနေက NLD လက်ထက်မှာ ဘဏ်တွေ ယိုင်မလဲသွားသေးဘူး။ အာဏာသိမ်းလိုက်တဲ့နောက်မှာတော့ ဘဏ်တွေက ပိုပြီးတော့ ယိုင်လဲသွားတယ်။ နဂိုကတည်းက အခြေအနေ ဆိုးနေ တာမှန်ပေမယ့် (စကစ)သူတို့ လုပ်လိုက်တော့ ပိုဆိုးသွားတယ်” လို့ ဒီဗွီဘီကို ပြောပါတယ်။

စီးပွားရေးပညာရှင်တဦးကလည်း “ကျနော်မြင်တာကတော့ သူတို့ ပေါ်လစီက ထုံးစံအတိုင်း ပိုပိုပြီးပြီးတော့ ဝင်ရောက်စွက်ဖက်လာတာ။ ဝင်ရောက်စွက်ဖက်တယ် ဆိုတဲ့နေရာမှာ အတိုင်းအတာ ရှိတယ်။ အတိုင်းအတာထက်ကျော် လွန်သွားပြီဆိုရင်တော့ လုံးဝပျက်စီးသွားပြီနော်။ နောက်တခါ အဲ့ဒါမျိုးက ကာလတိုပဲ ဖြစ်သင့်တာ။ ကာလရှည် မဖြစ်သင့်ဘူးနော်။ ဆိုတော့ ဒါက ကောင်းကျိုးထက် ဆိုးကျိုး  ပိုများနေတယ်။ နောက်တချက်က ဒီလို စီးပွားရေး ဘာသာရပ်တွေကို ကျွမ်းကျင်သူပညာရှင်တွေက ကိုင်တွယ် ဖြေရှင်းရင်တော့ ကောင်းတာပေါ့။ (စကစ)သူတို့ကတော့ ဒါတွေကို သိပ်နားလည်တာ မဟုတ်ဘူးနော်။ အမှန်တကယ် ဖြစ်သင့်တာက ပညာရှင်လိုင်းကနေ ဝင်ပြီးတော့ ကြပ်မတ် ထိန်းကျောင်း မယ်ဆိုရင် သင့်တော်တယ်လေ။ ဒါပေမဲ့ အဲ့ဒီဘာသာရပ်တွေကို မကျွမ်းကျင်ဘဲနဲ့ အုပ်ချုပ်ရေးနည်းလမ်းနဲ့ ကိုယ်ဖြစ်ချင်တဲ့ ဆန္ဒနဲ့ လျှောက်လုပ်နေမယ်ဆိုရင် တလွှဲစီ ဖြစ်ကုန်မှာပေါ့။ ပြီးတော့ ပညာရှင်တွေကလည်း ပြောအား မရှိတော့ဘူးလေ။ ပညာရှင်တွေက လွတ်လွတ်လပ်လပ် ပြောခွင့်ရရင်တော့ ဟုတ်တာပေါ့။ သူတို့လက်အောက်မှာ လုပ်နေတဲ့ ပညာရှင်တွေကလည်း သူတို့ မျက်နှာကြည့် နေရတာပေါ့။ ကြောက်နေရတယ်ဆိုတော့ ကိုယ်ပြောချင်တဲ့ အကြောင်းအရာကို ပြောလို့ ရတာမှ မဟုတ်တာ။ ယခင်တုန်း ကတော့ အစိုးရအဖွဲ့မှာရှိတဲ့ ပညာရှင်တွေရော ပြင်ပမှာရှိတဲ့ ပညာရှင်တွေရောက ပြဿနာ တခုဖြစ်လာလို့ရှိရင် လွတ်လွတ်လပ်လပ် ဝေဖန်သုံးသပ်ကြတာလေ။ အခုက အဲ့လို မရှိတော့ဘူး” လို့ ဒီဗွီဘီကို ပြောပါတယ်။

မြန်မာနိုင်ငံမှာ စစ်တပ်က အာဏာသိမ်းပြီးတဲ့နောက် ပြည်သူတွေဟာ ဘဏ်တွေအပေါ် အယုံအကြည် နည်းလာတဲ့ အကျိုးဆက်ကြောင့် ဘဏ်အကောင့်ထဲက မိမိတို့ရဲ့ ငွေတွေကို ထုတ်ယူဖို့ ကြိုးစားကြရာကနေ ဘဏ်တွေဟာ ငွေကြေး အကျပ်အတည်းနဲ့ ကြုံလာပါတော့တယ်။

ဒါကြောင့် ပြည်သူလူထုတွေဟာ ဘဏ်တွေမှာ ကိုယ်အပ်ထားတဲ့ငွေကို လိုသလောက် ပြန်လည်ထုတ်ယူလို့မရတာ  အချိန်တနှစ်ကျော်ရှိလာပြီဖြစ်ပြီး  စစ်ကောင်စီ အနေနဲ့ ဒီပြဿနာကို အခုအချိန်အထိ ကိုင်တွယ်ဖြေရှင်းပေးနိုင်တာမရှိသေးပါဘူး။ 

အာဏာသိမ်း စစ်ကောင်စီက ဒီအခြေအနေကို ဖြေရှင်းပေးမယ်လို့ အကြိမ်ကြိမ် ကတိပေးနေပေမယ့် လက်ရှိအချိန်အထိ အများပြည်သူတွေဟာ ATM စက်တွေကနေတဆင့် ငွေထုတ်ယူလို့ မရသေးသလို ဘဏ်တွေမှာ လူကိုယ်တိုင်သွားရောက် ထုတ်ယူတဲ့နေရာမှာလည်း သတ်မှတ်ထားတဲ့ ငွေပမာဏကို တကြိမ် ထုတ်ယူနိုင်ဖို့အတွက် ကန့်သတ်ချက်က များစွာ ရှိနေပါသေးတယ်။

1 month Ago

March 18, 2022

စစ်အာဏာသိမ်းမှုကြောင့် မြန်မာပြည် ကမ္ဘာ့အဆင်းရဲဆုံးနိုင်ငံအဆင့်မှ လွတ်မြောက်ရေးကြိုးပမ်းမှု ရပ်တန့်ခဲ့ရဟု သံအမတ်ကြီးပြော

မြန်မာနိုင်ငံဟာ အရပ်သားအစိုးရလက်ထက်မှာ ဖွံ့ဖြိုးမှုအနည်းဆုံးနိုင်ငံ (LDCs) အဆင့်မှ လွတ်မြောက်ရေးဆိုင်ရာ စံနှုန်းသုံးခုစလုံးနဲ့ ပထမဦးဆုံးအကြိမ် ပြည့်မီခဲ့ပေမဲ့ စစ်အာဏာသိမ်းမှုကြောင့် အရပ်သားအစိုးရရဲ့ ဒီမိုကရေစီ အသွင်ကူးပြောင်းရေး ကြိုးပမ်းမှုတွေ ရပ်တန့်စေခဲ့တယ်လို့ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်  သံအမတ်ကြီး ဦးကျော်မိုးထွန်းက ပြောကြားလိုက်ပါတယ်။

မတ်လ ၁၇ ရက်က နယူးယောက်မြို့ ကုလသမဂ္ဂဌာနချုပ်မှာ ကျင်းပတဲ့ ပဉ္စမအကြိမ် ဖွံ့ဖြိုးမှုအနည်းဆုံးနိုင်ငံများဆိုင်ရာ ကုလသမဂ္ဂညီလာခံမှာ ပြောကြားခဲ့တာဖြစ်ပြီး  စစ်အာဏာရှင်စနစ်ချုပ်ငြိမ်းရေး၊ ဒီမိုကရေစီပြန်လည်ထူထောင်ရေးနဲ့ မြန်မာနိုင်ငံမှာ ဘက်စုံဖွံ့ဖြိုးတိုးတက်မှုတွေ ဖော်ဆောင်ရေး ကြိုးပမ်းရာမှာ နိုင်ငံတကာအသိုက်အဝန်းအနေနဲ့ ကူညီဆောင်ရွက်ပေးကြဖို့  သံအမတ်ကြီးက  မေတ္တာရပ်ခံလိုက်ပါတယ်။

၂၀၂၀ ပြည့်နှစ်မှာ မြန်မာ့စီးပွားရေးအပေါ် ကိုဗစ်-၁၉ ကပ်ရောဂါရဲ့ ဆိုးရွားတဲ့ သက်ရောက်မှုတွေရှိပေမဲ့ ရွေးကောက်ခံပြည်သူ့အစိုးရဟာ သင့်တော်တဲ့ လူမှုစီးပွားကယ်ဆယ်ရေးမူဝါဒတွေနဲ့ လူသားတွေရဲ့ အသက်အိုးအိမ်စည်းစိမ်ကိုကာကွယ်ရင်း စီးပွားရေးတိုးတက်မှုကို ဆက်လက်ထိန်းသိမ်းထားနိုင်ခဲ့ကြောင်း၊ ဒါကြောင့် မြန်မာနိုင်ငံဟာ ၂၀၂၁ ခုနှစ်၊ ဖေဖော်ဝါရီလ စစ်တပ်မတရားအာဏာသိမ်းမှု မတိုင်မီအထိ ဖွံ့ဖြိုးတိုးတက်မှု အနည်းဆုံးနိုင်ငံစာရင်းမှ လွတ်မြောက်ဖို့ အရည်အချင်းပြည့်မီနိုင်တဲ့ လမ်းကြောင်းမှန်ပေါ် ရှိနေခဲ့တယ်လို့ သံအမတ်ကြီးက ပြောပါတယ်။

တရားမ၀င် စစ်အာဏာသိမ်းမှုဟာ အရပ်သားအစိုးရရဲ့ ဒီမိုကရေစီအသွင်ကူးပြောင်းရေး ကြိုးပမ်းမှုတွေကို ရပ်တန့်စေခဲ့ပြီး မြန်မာနိုင်ငံမှာ မတည်ငြိမ်မှုတွေနဲ့ ကြေကွဲဖွယ်ရာ အခြေအနေတွေကို ဖန်တီးခဲ့တယ်၊ UNDP ရဲ့ အချက်အလက်တွေအရ ၂၀၂၂ ခုနှစ် အစောပိုင်းမှာ မြန်မာနိုင်ငံလူဦးရေရဲ့ ထက်ဝက်နီးပါးဖြစ်တဲ့ လူဦးရေ ၂၅ သန်းဟာ ဆင်းရဲနွမ်းပါးမှုမျဉ်းအောက်မှာ နေထိုင်နေရတဲ့ အခြေအနေရှိလာနိုင်တယ်လို့ ခန့်မှန်းထားတာကို ဝမ်းနည်းဖွယ် သိရှိရတယ်လို့ လည်းသံအမတ်ကြီးကပြောပါတယ်။

အာရှဒေသတွင်းနိုင်ငံတွေဖြစ်ကြတဲ့ မြန်မာ့အိမ်နီးချင်း ဘင်္ဂလားဒေ့ရှ်၊ လာအိုနဲ့ နီပေါနိုင်ငံတွေကတော့ ကမ္ဘာ့ဖွံ့ဖြိုးမှုအနည်းဆုံးနိုင်ငံတွေ(LDCs)အဆင့်က‌နေ လွတ်မြောက်သွားခဲ့ပြီလို့   ပြီးခဲ့တဲ့နှစ် နိုဝင်ဘာ ၂၄ ရက်မှာ   ကုလသမဂ္ဂ အထွေထွေညီလာခံက အတည်ပြု ကြေညာခဲ့ပါတယ်။

မြန်မာနိုင်ငံကတော့ ကိုဗစ်-၁၉ ရောဂါရဲ့ ဆိုးကျိုးသက်ရောက်မှုနဲ့ စစ်တပ်အာဏာသိမ်းမှုကြောင့်ဖြစ်လာတဲ့ နိုင်ငံရေးမတည်ငြိမ်မှုတွေကြောင့်  မြန်မာ့စီးပွားရေးဟာ ၁၈ ရာခိုင်နှုန်းခန့် ကျဆင်းမယ်လို့ကမ္ဘာ့ဘဏ်က ခန့်မှန်းထားပါတယ်။

လက်ရှိ မြန်မာနိုင်ငံမှာ စစ်တပ်ရဲ့ ရက်စက်ကြမ်းကြုတ်မှုတွေနဲ့ လူသားမျိုးနွယ်အပေါ်ကျူးလွန်တဲ့ ရာဇ၀တ်မှုတွေကြောင့် ဖြစ်ပေါ်လာတဲ့  ကြောက်မက်ဖွယ်ရာဒုက္ခတွေကို မြန်မာနိုင်ငံသားတွေ ကြုံတွေ့နေကြရပါကြောင်း၊ စစ်အာဏာသိမ်းပြီးကတည်းက စစ်တပ်က လူပေါင်း ၁၆၇၉ ဦး ကို ရက်ရက်စက်စက်သတ်ဖြတ်ခဲ့ပြီး၊ သောင်းနဲ့ချီတဲ့ ပြည်သူတွေ မတရားဖမ်းဆီးခံခဲ့ရသလို တချို့က သေဆုံးတဲ့အထိ နှိပ်စက်ညှဉ်းပန်းခံခဲ့ရတယ်လို့ သံအမတ်ကြီးက ကုလသမဂ္ဂညီလာခံမှာ ပြောသွားပါတယ်။

မြန်မာပြည်သူတွေဟာ စီးပွားရေးချွတ်ခြုံကျမှု၊ အလွန်အမင်းဆင်းရဲမွဲတေမှု၊ စားနပ်ရိက္ခာမလုံလောက်မှု၊ နေရပ်စွန့်ခွာရွှေ့ပြောင်းရမှုစတဲ့ အခက်အခဲတွေနဲ့ ကြုံတွေ့နေရတယ်လို့လည်း သံအမတ်ကြီး ဦးကျော်မိုးထွန်းက ပြောပါတယ်။

3 months Ago
More News
Up