စစ်အာဏာရှင်ဆန့်ကျင်ဆန္ဒပြပွဲ

February 15, 2022

မလေးရှားတွင် စစ်အာဏာရှင်ဆန့်ကျင်ဆန္ဒပြခဲ့သဖြင့် အဖမ်းခံရသည့် မြန်မာနိုင်ငံသားများ ပြန်လွတ်

စစ်အာဏာသိမ်းနှစ်ပတ်လည် အထိမ်းအမှတ် မလေးရှားနိုင်ငံမှာ ဆန္ဒပြလို့ အဖမ်းခံထားရတဲ့ မြန်မာနိုင်ငံသားတွေထဲက ၂၆ ယောက် ဒီကနေ့ ဖေဖော်ဝါရီ ၁၅ ရက် နေ့လယ်ပိုင်းမှာ ပြန်လည်လွတ်မြောက်လာပါတယ်။

ပြီးခဲ့တဲ့ ဖေဖော်ဝါရီ ၃ ရက်နေ့က မလေးရှားနိုင်ငံ ကွာလာလမ်ပူမြို့ရှိ မြန်မာသံရုံးရှေ့မှာ  မြန်မာနိုင်ငံအမှောင်ကျတဲ့နေ့ဆိုပြီး စစ်တပ်အာဏာသိမ်းတာကို ကန့်ကွက်ရှုတ်ချ ဆန္ဒပြခဲ့တာကြောင့် မြန်မာနိုင်ငံသား ၃၁ ယောက်ကို မလေးရဲတပ်ဖွဲ့က ဖမ်းဆီးထိန်းသိမ်းထားခဲ့တာပါ။ 

ဒီနေ့မှာတော့  ၂၆ ယောက် ပြန်လည်လွတ်မြောက်လာခဲ့ပြီး၊ ၅ ယောက်ကတော့ ထောင်ထဲမှာ ကျန်နေသေးတယ်လို့ သူတို့နဲ့နီးစပ်တဲ့  မလေးရှားရောက်မြန်မာနိုင်ငံသားတွေထံက သိရပါတယ်။

အမျိုးသားဒီမိုကရေစီအဖွဲ့ချုပ် (လွတ်မြောက်နယ်မြေ- မလေးရှားနိုင်ငံ(ရုံးအဖွဲ့မှူး) ကိုစိုးထက်သိန်းက “သူတို့က ဆန္ဒပြပွဲမလုပ်ခင်ကတည်းက ရဲကို ကြိုတင်သတင်းပေးညှိနှိုင်းပြီး ခွင့်တောင်းပြီးလုပ်တာ။  အဲ့ဒီအချိန်တုန်းက မလေးရဲတပ်ဖွဲ့က အခုပွဲကိုလုပ်ဖို့ သဘောတူခဲ့ပြီးသား။ နောက်ပိုင်းကိုတော့ ခဏခဏ မလုပ်ဖို့အတွက် သဘောတူ ခဲ့ကြပြီး ခွင့်ပြုခဲ့ပါတယ်။ ဒါပေမဲ့ တကယ့်ဆန္ဒပြပွဲနေ့ကျတော့ ရဲတပ်ဖွဲ့ လာရောက်ပြီး ဖမ်းဆီးကာ ရဲစခန်းကို ခေါ်သွားခဲ့ပါတယ်။ သူတို့လိုက်ပါညှိနှိုင်းကြပေမဲ့ မြန်မာသံရုံးက ဖိအားပေးပြီး ဖမ်းခိုင်းတာကြောင့် အခုလိုဖမ်းရတာ”လို့ ပြောပါတယ်။ 

ဆန္ဒပြတဲ့ မြန်မာနိုင်ငံသား အမျိုးသား ၂၅ ယောက်နဲ့ အမျိုးသမီး ၆ ယောက်တို့ကို  ကိုဗစ်စည်းကမ်း ဖောက်ဖျက်မှု၊ တရားမတင်နေထိုင်မှု၊ ခွင့်ပြုမိန့်မကျပဲ ဆန္ဒပြမှုတို့နဲ့ အမှုဖွင့်အရေးယူထားခဲ့တာပါ။

အခု NUG အစိုးရ နိုင်ငံခြားရေးဌာန အာဆီယံကိုယ်စားလှယ် ဦးဘိုလှတင့်နဲ့ အဝေးရောက်မြန်မာနိုင်ငံသားတွေအကူအညီနဲ့ အခုလိုပြန်လွတ်လာတာလို့လည်း ကိုစိုးထက်သိန်းက ပြောပါတယ်။

ဒီနေ့ လွတ်မြောက်လာသူ ၂၆  ယောက်က တရား၀င်ပတ်စ်ပို့စ် ကိုင်ဆောင်ထားသူတွေဖြစ်ကြပြီး မလေးထောင်ထဲမှာ ကျန်နေခဲ့တဲ့  ၅ ယောက်ကတော့ ပတ်စတ်ပို့မရှိသူတွေဖြစ်တဲ့အတွက် တရားရုံးမှာ အမှုဆက်လက်ရင်ဆိုင်ရဖို့ ရှိနေပါတယ်။

1 year Ago

February 11, 2021

တောင်တွင်းကြီး ဆန္ဒပြပွဲ ဌာနဆိုင်ရာနှင့်ပြည်သူ သိန်းချီ ပါဝင်

တောင်တွင်းကြီးမြို့မှာ ဒီကနေ့ မနက်ပိုင်း စစ်အာဏာရှင်ဆန့်ကျင်ဆန္ဒပြပွဲ ၄ ရက်မြောက်နေ့မှာ ဌာနဆိုင်ရာဝန်ထမ်းတွေနဲ့ အလွှာအသီးသီးက ဒေသခံပြည်သူ သိန်းချီ ပါဝင်လာခဲ့ကြပါတယ်။

စစ်အာဏာရှင်စနစ်ဆန့်ကျင်ရေး၊ စစ်အာဏာရှင်အလိုမရှိ၊ အမေစုကျန်းမာပါစေ၊ မတရားဖမ်းဆီးထားသော အမေစုနှင့်သမ္မတကြီးအပါအဝင် ဖမ်းဆီးထားသူများ ချက်ချင်းလွှတ် စတဲ့ ကြွေးကြော်သံတွေနဲ့ တောင်တွင်းကြီးမြို့လမ်းမကြီးများပေါ် လှည့်လည်ဆန္ဒပြကြပါတယ်။

ဒီနေ့မှာတော့ တောင်တွင်းကြီးမြို့က ဌာနဆိုင်ရာဝန်ထမ်းအများစုဟာ ရုံးမတက်ကြတော့ဘဲ အာဏာဖီဆန်ရေးလှုပ်ရှားမှု (CDM) မှာ ပါဝင်လာကြပြီး မပါဝင်သေးတဲ့ ဌာနတွေနဲ့ ဝန်ထမ်းတွေလည်း ရှိနေသေးတယ်လို့ သိရပါတယ်။

2 years Ago
Up