စစ်သား

February 3, 2023

မောင်တော နခခ-၅ မှ ထွက်ပြေးသွားသည့် စစ်သား ၁ ဦး စစ်တွေတွင် ဖမ်းမိ

ရခိုင်ပြည်နယ်၊ မောင်တောမြို့အဝင်ရှိ နယ်ခြားစောင့်တပ်ဖွဲ့ခွဲ နခခ-၅ ကနေ ဇန်နဝါရီ ၃၁ ရက်က ထွက်ပြေးသွားခဲ့တဲ့ စစ်ကောင်စီတပ်သားတဦး ဖေဖော်ဝါရီ ၁ ရက် ညနေ ၅ နာရီကျော်လောက်က စစ်တွေမြို့ ပြည်တော်ရပ်ကွက် ခိုင်သဇင်ပန်းခြံအနီးရှိ ချောင်းထဲဆင်းပြေးစဥ် စစ်သားတွေနဲ့ ရဲတွေက ဝိုင်းဝန်းဖမ်းဆီးခဲ့တယ်လို့ ရဲအရာရှိတဦးက အတည်ပြုပြောပါတယ်။

“သူက မနေ့ကတည်းက နခခ-၅ ကနေ ထွက်ပြေးသွားတာ။ သူ့ဓာတ်ပုံကို မောင်တောနဲ့ စစ်တွေ ပြေးဆွဲနေတဲ့ ကားတွေကို အားလုံးလိုက်ဖြန့်ပြီးသား။ စစ်တွေ ရေချမ်းပြင်ရဲစခန်းက သူ စစ်တွေကိုတက်သွားတာကို တွေ့လိုက်ပြီး ခြေရာခံလိုက်နေကြတာ။ ခိုင်သဇင်ပန်းခြံနားက ချောင်းထဲကို ဆင်းပြီး ပုန်းနေတာကို ဝိုင်းဖမ်းခဲ့ကြတာ။”

နခခ-၅ မှ ထွက်ပြေးသွားသူမှာ တပ်သားငြိမ်းချမ်းဖြစ်ပြီး  ဖမ်းဆီးခံရပြီးနောက်သူ့ကို စစ်ကားပေါ်တင်ခေါ်သွားပြီး လက်ရှိ ဘယ်မှာရောက်နေတယ် ဘာလို အရေးယူခံရမယ်ဆိုတာကိုတော့ မသိရသေးပါဘူး။

“ရဲသားနဲ့ စစ်သား ၃၀ လောက်ရှိတယ်။ အနီးကပ်လည်း သွားမကြည့်ဝံ့ဘူး။ အဝေးက မြင်လိုက်တာ။ အသက် ၃၀ ဝန်းကျင် လူလတ်ပိုင်းဗျ။ အမျိုးသားတဦးပါ။ ဘောင်းဘီနဲ့ တီရှပ်ဝတ်ထားတယ်။ သူက ခိုင်သဇင်ပန်းခြံအနီးက တံတားအောက်နား ပုန်းနေတာကို စစ်ကောင်စီတပ်သားတွေ ရှာတွေ့သွားတာ။ စစ်ကားပေါ် ဖမ်းတင်ခေါ်သွားတယ်” လို့ အနီးရှိ မျက်မြင် စစ်တွေဒေသခံက ပြောပါတယ်။

ထွက်ပြေးသွားတဲ့ တပ်သား ငြိမ်းချမ်းလက်ထဲမှာ စစ်ကောင်စီအတွက် အလွန်အရေးကြီး စာရွက်စာတမ်းတခုခု ဒါမှမဟုတ် လက်နက်တခုခု ယူဆောင်သွားတဲ့အတွက် အခုလို အသဲအသန် လိုက်ရှာဖမ်းဆီးတာဖြစ်နိုင်ကြောင်း ရခိုင် စစ်ရေး နိုင်ငံရေး လေ့လာသူတဦးက ထင်မြင်ချက်ပေးပါတယ်။

“သူ့ဆီမှာ မောင်တောဒေသအတွက် အရေးကြီးတဲ့ စစ်ရေးအချက်အလက် စာရွက်စာတမ်း ဖြစ်ဖြစ်၊ မြေပုံတွေဖြစ်ဖြစ်၊ လက်နက်တခုခုဖြစ်ဖြစ် ပါသွားတာဖြစ်နိုင်တယ်။ ဒါကြောင့် သူ့ကို ပိတ်ဆို့ရှာဖွေကြတာပေါ့။”

ဇန်နဝါရီ ၁၆ ရက် ညကလည်း မြောက်ဦးမြို့အခြေစိုက် ၅၄၀ တပ်ရင်းမှ စစ်ကောင်စီတပ်သား ၃ ဦး လက်နက်တွေနဲ့ ထွက်ပြေးသွားခဲ့သလို မြောက်ဦးအခြေစိုက် ၃၇၈ တပ်ရင်းမှ တပ်ကြပ်ကျော်သန့်စင်ဟာ တပ်တွင်းမှာ အရာရှိစစ်ဗိုလ် ၃ ဦးနဲ့ စကားများ ရန်ဖြစ်ပြီး ထွက်ပြေးသွားခဲ့တာရှိတယ်လို့ ဒေသတွေဆီက သိရပါတယ်။

ရခိုင်ပြည်နယ်မှာ စစ်ကောင်စီနဲ့ ရက္ခိုင့်တပ်တော် (အေအေ) တို့ အလွတ်သဘော အပစ်အခတ် ရပ်စဲထားကြပေမဲ့ စစ်ကောင်စီတပ်အတွင်း ယုံကြည်မှုနဲ့ စိတ်ပိုင်းဆိုင်ရာ ထိခိုက်မှုတွေ ရှိလာနေသလို အထက်အရာရှိတွေရဲ့ ဖိနှိပ်မှုတွေကြောင့် အခုလို တပ်ပြေးတွေ တရက်တရက် များလာနေကြောင်း ရခိုင် စစ်ရေးနဲ့ နိုင်ငံရေးလေ့လာသူတွေက ထောက်ပြကြပါတယ်။

ရက္ခိုင့်တပ်တော် (အေအေ) ပြောခွင့်ရ ခိုင်သုခကတော့ ပဥ္စမအကြိမ်မြောက် သတင်းစာရှင်းလင်းပွဲမှာ စစ်ကောင်စီတပ်သားအရေအတွက် ရာနဲ့ချီပြီး အေအေဘက် ခိုလှုံလာနေတာရှိနေကြောင်း ပြောထားပါတယ်။

2 mins Ago

January 10, 2023

ကံပေါက်အခြေစိုက် ခလရ-၂၇၃ မှ ထွက်ပြေးသည့် စစ်သား ၅ ဦး ပြန်ဖမ်းမိ

တနင်္သာရီတိုင်း၊ ထားဝယ်ခရိုင်၊ ကံပေါက်ဒေသမှာ အခြေစိုက်တဲ့ ခလရ-၂၇၃ ကနေ ပြီးခဲ့တဲ့ ဇန်နဝါရီ ၃ ရက်ညက ထွက်ပြေးသွားတဲ့ စစ်သား ၅ ဦး ရက်သတ္တပတ်အကြာမှာ ပြန်ဖမ်းမိသွားတယ်လို့ ဒေသခံတွေဆီက သိရပါတယ်။

ကံပေါက်ဒေသ၊ အုန်းပင်ကွင်းကျေးရွာအုပ်စု၊ ပယရွာက ဘုန်းကြီးကျောင်းတကျောင်းမှာ ရှိနေတုန်း ပြန်ဖမ်းမိသွားတာ ဖြစ်ပါတယ်။

ဒေသခံတဦးက “ဘုန်းကြီးကျောင်းမှာရှိနေတုန်း ဘယ်သူတွေလဲ၊ ဘယ်ကလဲ ပြောရင်းနဲ့ စစ်သားတွေမှန်းသိပြီး သူတို့တပ်ရင်းကို အကြောင်းပြန်ကြားလိုက်တာ မိသွားတယ်” လို့ ပြောပါတယ်။

ပြန်ဖမ်းမိတဲ့ စစ်သား ၅ ဦးကိုတော့ တပ်ပြေးအမှုနဲ့ ထောင်ချဖို့ စီစဉ်နေတယ်လို့ တပ်နဲ့နီးစပ်သူတွေဆီက သိရပါတယ်။

ပြီးခဲ့တဲ့နှစ်ကုန်ပိုင်းကလည်း အဲဒီ ခလရ-၂၇၃ တပ်ရင်းက စစ်သား ၃ ဦး ထွက်ပြေးပြီး ကလိန်အောင်မြို့နယ်ထဲမှာပဲ ပြန်ဖမ်းမိခဲ့ပါတယ်။

အမှတ်-၂၇၃ ခြေလျင်တပ်ရင်းဟာ ကံပေါက်ဒေသမှာရှိတဲ့ သဘာဝဓာတ်ငွေ့စီမံကိန်းတွေရဲ့ လုံခြုံရေးအတွက် တာဝန်ယူရပြီး ရပ်ရွာနဲ့နီးစပ်တာကြောင့် ထွက်ပြေးဖို့လွယ်ကူတဲ့ တပ်ဖြစ်ပြီး ၂၀၂၁ ခုနှစ် စစ်အာဏာသိမ်းမှု မတိုင်ခင်ကလည်း ထွက်ပြေးမှုတွေ ရှိခဲ့တယ်လို့ ဒေသခံတွေက ဆိုပါတယ်။

ကံပေါက်ဒေသမှာ အဲဒီ စစ်ကောင်စီတပ်သား ၅ ဦး ထွက်ပြေးတယ်ဆိုတဲ့ သတင်းထွက်ပြီးတဲ့နောက် ဇန်နဝါရီ ၄ ရက်ကနေ ၈ ရက်အထိ တိုယ်နယ်အတွင်းက ကျေးရွာတွေမှာ မောရဝတီ ရေတပ်ဌာနချုပ်က စစ်ကောင်စီအဖွဲ့တွေ ဦးဆောင်ပြီး လှည့်ကင်း ပတ်ကင်းတွေနဲ့ ရှာဖွေခဲ့ပါတယ်။

ဒါ့အပြင် လမ်းဆုံလမ်းခွတွေမှာ လမ်းသွားလမ်းလာတွေရဲ့ ဆိုင်ကယ်နဲ့ လက်ကိုင်ဖုန်းတွေကိုပါ စစ်ဆေးတာတွေ လုပ်ခဲ့တယ်လို့ အစစ်ဆေးခံခဲ့ရတဲ့သူတွေဆီက သိရပါတယ်။

3 weeks Ago
More News
Up