စစ်ယာဉ်တန်းမိုင်းဆွဲခံရ

December 9, 2021

ဆားလင်းကြီးတွင် စစ်ယာဉ်တန်းမိုင်းဆွဲခံရသဖြင့် ၁၅ ဦးခန့်သေဆုံး၊ အရာတော် ၃၆၉ တပ် တိုက်ခိုက်ခံရ

စစ်ကိုင်းတိုင်း၊ ဆားလင်းကြီးနယ်၊ ဒုန်းတောရွာက ပြည်သူ ၁၁ ဦးကို မီးရှို့သတ်ဖြတ်သွားတဲ့ စစ်ကောင်စီတပ်ဖွဲ့ဝင်တွေ လိုက်ပါလာတဲ့ မော်တော်ယာဉ် ဒီဇင်ဘာ ၉ ရက်နေ့ မနက် ၉ နာရီဝန်းကျင်က မိုင်းဆွဲတိုက်ခိုက်ခံရလို့ စစ်ကောင်စီတပ်သား ၁၅ ဦးထက်မနည်း သေဆုံးသွားတယ်လို့ သိရပါတယ်။

ယင်းမာပင်မြို့နယ် ပြည်သူ့ကာကွယ်ရေးတပ်ဖွဲ့တာဝန်ခံက ''ဒီကောင်တွေပြန်တဲ့လမ်း ယင်းမာပင်မြို့နယ်၊ တယ်ပင်ခန်ရွာနားမှာ မိုင်းအလုံး ၃၀ ကျော်ခွဲပြီး လက်စားချေလိုက်တာ၊ ၁၅ ကောင်အနည်းဆုံးသေတယ်။ ဒဏ်ရာရတဲ့သူတွေလည်းရှိသေးတယ်'' လို့ အတည်ပြုပြေ‌ေပါတယ်။

ဟစ်ကောင်စီတပ်ဖွဲ့ဝင်တွေဟာ ဆားလင်းကြီးမြို့နယ်၊ ဒုန်းတောရွာမှ ပြည်သူ ၁၁ ဦးကို မီးရှို့သတ်ဖြတ်ခဲ့ပြီးအပြန်မှာ TRIPLE TWO အဖွဲ့နဲ့ မဟာမိတ်ပြည်သူ့ကာကွယ်ရေးတပ်ဖွဲ့ဝင်တွေက မိုင်းဆွဲတိုက်ခိုက်ခဲ့တာလို့ သိရပါတယ်။

စစ်ကောင်စီတပ်ဖွဲ့ဝင်တွေမိုင်းဆွဲခံရလို့ သေဆုံးသူနဲ့ ထိခိုက်ဒဏ်ရာရရှိသူ များပြားတယ်လို့ သိရပေမယ့် သီးခြားအတည်ပြုနိုင်ဖို့ ဒီဗွီဘီက ဆက်လက်စုံစမ်းနေပါတယ်။

စစ်ကောင်စီတပ်ဖွဲ့ဝင်တွေဟာ ဒီဇင်ဘာ ၇ ရက်နေ့ မနက်ပိုင်းက ဒုန်းတောကျေးရွာဒေသခံပြည်သူ ၁၁ ဦးကို ကြိုးတုပ်ပြီး မီးရှို့သတ်ဖြတ်ခဲ့ကာ ဒီဇင်ဘာ ၈ ရက်နေ့မှာလည်း ဒေသခံ စိတ်မနံ့သူ အသက် ၆၅ နှစ်အရွယ် ဒေါ်ဝင်းရီကို သတ်ဖြတ်သွားခဲ့ကြတယ်လို့ ဒေသခံတွေဆီကသိရပါတယ်။

စစ်ကိုင်းတိုင်း၊ အရာတော်မြို့နယ်၊ ၃၆၉ တပ်(သစ်ကျင်းကြီးတပ်)အတွင်းကို ဒီဇင်ဘာ ၈ ရက် မွန်းလွဲ ၁ နာရီဝန်းကျင်က အဝေးပစ် ၃ လုံးနဲ့ ဒေသခံ PDF တွေက ပစ်ခတ်တိုက်ခိုက်ခဲ့တယ်လို့ သိရပါတယ်။

“အဝေးပစ် လက်နက်နဲ့တိုက်ခိုက်ခဲ့လို့ စစ်တပ်က ပြန်ပစ်ခတ်တာတွေတော့ရှိတယ်။ ကျနော်တို့ဘက်က အထိခိုက်မရှိ ပြန်လည်ဆုတ်ခွာနိုင်ခဲ့တယ်။ ရန်သူ့ဘက်က အထိခိုက်ကိုတော့ အတည်မပြုနိုင်သေးဘူး”လို့ သပြေညိုပြောက်ကျားအဖွဲ့ကပြောပါတယ်။

အခုစစ်ဆင်ရေးကို  သပြေညို ပြောက်ကျားတပ်ဖွဲ့၊ Ayadaw Falcon Force- (AF2)၊ Ayadaw Bone Naing PDF- (ABNPDF) ညီနောင်မဟာမိတ် ၃ ဖွဲ့ပူးပေါင်းဆောင်ရွက်ခဲ့တယ်လို့ သိရပါတယ်။

1 year Ago

October 4, 2021

ထီးချိုင့်နှင့် ပုလဲမြို့နယ်တို့တွင် စစ်ယာဉ်တန်းမိုင်းဆွဲခံရပြီး ရဲစခန်းတစ်ခု မီးရှို့ဖျက်ဆီးခံရ

စစ်ကိုင်းတိုင်း‌ ထီးချိုင့်မြို့နယ်နဲ့ ပုလဲမြို့နယ်တို့မှာ ကျေးရွာရဲစခန်း မီးရှို့ခံရပြီး စစ်ကောင်စီယာဉ်တန်း မိုင်းဆွဲတိုက်ခိုက်ခံခဲ့ရတယ်လို့ သိရပါတယ်။

ထီးချိုင့်မြို့နယ်မှာရှိတဲ့ အလယ်တောကျေးရွာရဲစခန်းကို ပြည်သူ့ကာကွယ်ရေး တပ်ဖွဲ့တွေက အောက်တိုဘာ ၃ ရက် ည ၈ နာရီလောက်မှာ ဝင်ရောက်မီးရှို့ ဖျက်ဆီးခဲ့တယ်လို့ ရွာခံတဦးက ပြောပါတယ်။ 

"မနေညအစောပိုင်းက လောင်တယ်ဗျ။ ရဲတွေကတော့ မနေတာကြာလှပြီ။ စခန်းပြောင်း ထားတယ်လို့တော့ သိရတယ်။ စခန်းအစောင့်လောက်ပဲ  ရှိတယ်။ ပထမတော့ ပစ်ခတ်သံတွေ ကြားရတယ်။ နောက်ပိုင်း မီးတောက်တွေထွက်လာမှ မီးလောင်နေပြီလို့ သိရတာ။”

အလယ်တောရဲစခန်း မီးရှို့ခံရပြီးနောက် စစ်ကောင်စီဘက်က  လုံခြုံရေး တိုးချထားတယ်လို့ သိရပါတယ်။

လတ်တလောမှာတော့ ဒေသခံတွေဟာ ဒေသခံပြည်သူ့ကာကွယ်ရေးတပ်မတော်နဲ့ စစ်ကောင်စီတပ်တို့ကြား တိုက်ပွဲဖြစ်လာမှာကို စိုးရိမ်တာကြောင့် ရွာကို စွန့်ခွာထွက်ပြေး တာတွေလည်း ရှိနေတယ်လို့ သိရပါတယ်။ 

ပုလဲမြို့နယ် ကန့်ဒေါင့်ကျေးရွာ အနောက် ပိတောက်ကုန်း လမ်းခွဲအလွန် ရွှေမင်းသမီးကွေ့ ခေါ် ကိုးလောင်းပြိုင်ကွေ့မှာလည်း စစ်ကောင်စီယာဉ်တန်းကို ပုလဲပြည်သူ့ကာကွယ်ရေးတပ်မတော် (PPDF) အဖွဲ့က အောက်တိုဘာ ၄ ရက်နေ့ မနက်ပိုင်းမှာ မိုင်းခွဲတိုက်ခိုက်ခဲ့တယ်လို့  သိရပါတယ်။

PPDF အဖွဲ့တာဝန်ရှိသူ ဗိုလ်နဂါးက “ကျနော်တို့ ပုလဲပြည်သူကာကွယ်ရေးတပ်မတော်က စစ်ကောင်စီဘက်က စစ်ကူထောက်ပို့ လာတဲ့ အမြောက်ကား  ၈ စီး၊ Truck ကား၊ တွဲကားတွေပါဝင်တဲ့ စစ်‌ကောင်စီရဲ့ ကားအစီး ၈၀ ကျော်ကို မိုင်း ၂၇လုံးနဲ့ ဖောက်ခွဲ တိုက်ခိုက်ခဲ့တယ်ဗျ။ စစ်ကောင်စီယာဉ် ကား ၅ စီး ပျက်စီးတယ်။ စစ်ခွေးအများအပြား သေဆုံး ဒဏ်ရာရရှိတာတွေလည်းရှိတယ်။”

လက်ရှိမှာ နှစ်ဖက်စစ်ရေးတင်းမာနေပြီး တိုက်ပွဲဖြစ်ပွားတာ မပြီးဆုံးသေးတာကြောင့် နှစ်ဖက်အကျအဆုံး အတည်ပြုမရသေးဘူးလို့ ပါတယ်။

1 year Ago
Up