စစ်ယာဉ်တန်း

April 12, 2022

ရေး-မော်လမြိုင် ကားလမ်းတွင် စစ်ယာဉ်တန်း တိုက်ခိုက်ခံရပြီး စစ်သား ၃၀ ခန့် သေဆုံး

မွန်ပြည်နယ်၊ ရေးမြို့နယ်မြောက်ပိုင်း  ရေး-မော်လမြိုင်ကားလမ်းမှာ ဧပြီ ၁၁ ရက် မနက်က စစ်ယာဉ်တန်းတိုက်ခိုက်ခံရပြီး စစ်ကောင်စီတပ်ဖွဲ့ဝင်အယောက် ၃၀ လောက် သေဆုံးကာ  အများအပြား ထိခိုက်ဒဏ်ရာရခဲ့တယ်လို့ PDF မြောက်ပိုင်းမှ တာဝန်ရှိသူက ပြောပါတယ်။ 

မနေ့မနက် ၁၀ နာရီကျော်လောက်က ကနင်ကမော့နဲ့ မော့ကနင်ရွာကြား မိုင်တိုင် ၇၀ အနီး မော်လမြိုင်မှ ရေးသို့ စစ်ကား ၆ စီးနဲ့ လိုက်ပါလာတဲ့ စစ်ကောင်စီတပ်ဖွဲ့ဝင်တွေကို  KNLA၊ PDF ပူးပေါင်းတပ်တွေက  ပစ်ခတ်ခဲ့တာဖြစ်ပါတယ်။

မိနစ်အနည်းငယ်ကြာ အပြန်အလှန်ပစ်ခတ်ရာမှာ ခရီးသွားကားတွေကို စစ်ကောင်စီဘက်က ရမ်းသန်းပစ်ခတ်လို့ အမျိုးသမီးငယ်တယောက် ဦခေါင်းထိမှန်ပြီး အဒေါ်ဖြစ်သူမှာ ဝမ်းဗိုက်ထိမှန်ခဲ့သလို အနီးအနားက ရာဘာခြံအလုပ်သမားတယောက်လည်း ဒဏ်ရာရခဲ့ပါတယ်။

ပစ်ခတ်မှုအပြီးမှာ ကွာန်ကျိုက်တောင်ပေါ်မှာ အသင့်နေရာယူထားတဲ့ အမှတ်  ၁၄၇ စစ်ကောင်စီ အမြောက်တပ်ကနေလည်း လက်နက်ကြီးနဲ့ ပစ်ခတ်ခဲ့တယ်လို့ ဒေသခံတွေထံက သိရပါတယ်။  

အခုလို လက်နက်ကိုင်တိုက်ခိုက်မှုတွေ  ရွာတွေအနီးနား ဖြစ်ပွားခဲ့တာဖြစ်လို့ ဒေသခံရွာသားတွေမှာ စစ်ကောင်စီတပ်ရဲ့ ရန်ပြုလာမယ့်အန္တရာယ်တွေကို ကြောက်နေကြသလို  ထွက်ပြေးတိမ်းရှောင်ရင် နေအိမ်တွေကို မီးရှို့မယ်လို့ စစ်ကောင်စီဘက်က ခြိမ်းခြောက်ပြောဆိုထားတယ်လို့ ဒေသခံတဦးက ပြောပါတယ်။ 

KNU ၊ PDF ပူးပေါင်းအဖွဲ့တွေက ခရီးသည်ယာဥ်ကို စစ်ယာဥ်တန်းနဲ့ မှားယွင်းပစ်ခတ်လို့  ပြည်သူ ၃ ဦးထိခိုက်ဒဏ်ရာရခဲ့တာဖြစ်ပြီး တပ်မတော်ဘက်က ထိခိုက် အကျအဆုံး မရှိဘူးလို့ စစ်တပ်ဘက်ကတော့ ပြောဆိုပါတယ်။

KNU ၊ PDF ပူးပေါင်းအဖွဲ့တွေဟာ  အောင်သပြေရွာ၊ လိမ္မော်ခြုံရွာ၊ ကနင်ကမော့ရွာ၊ နှင်းစုံရွာ စတဲ့ ကျေးရွာတွေအနီးမှာ စစ်ယာဥ်တန်းတွေကို ချုံခိုတိုက်ခိုက်လေ့ရှိတယ်လို့လည်း  စစ်ကောင်စီတပ်ဘက်က ပြောပါတယ်။ 

၂၀၂၁ နိုဝင်ဘာလကစပြီး အခုအချိန်အထိ ရေးမြို့နယ်မြောက်ပိုင်းမှာ YPDF KNLA နဲ့ စစ်ကောင်စီတပ်ဖွဲ့ဝင်တွေအကြား တိုက်ခိုက်မှုမှာ စစ်ကောင်စီဘက်က အနည်းဆုံး အယောက် ၁၀၀ ကျော်လောက် သေဆုံးထားခဲ့ပါတယ်။

1 month Ago

ဘားအံမြို့နယ်တွင် စစ်ယာဉ်တန်း အသုံးပြုသွားလာနေသည့် တံတား ဗုံးခွဲခံရ

ကရင်ပြည်နယ်၊ ဘားအံမြို့နယ်၊ နောင်ကမြိုင်ကျေးရွာနဲ့ တဝန်ဖန်ကျေးရွာကြား (ဘားအံ-မြိုင်ကြီးငူ ကားလမ်း)မှာ  တံတား ၁ စင်း ဧပြီ ၁၁ ရက် ညနေ ၅ နာရီလောက် မိုင်းခွဲခံရတဲ့အတွက်  တံတားပြိုကျ ပျက်စီးသွားတယ်လို့ ဒေသခံတွေက ပြောပါတယ်။

စစ်ကောင်စီက ဘားအံ-မြိုင်ကြီးငူ ကားလမ်းကို အသုံးပြုပြီး စစ်ယာဉ်တန်း ၆ စီးဟာ ကရင်အမျိုးသားအစည်းအရုံး (ကေအန်ယူ)၊ တပ်မဟာ ၅  နယ်မြေအတွင်းက ရှေ့တန်းစခန်းတွေအတွက် လက်နက်ခဲယမ်းနဲ့ ရိက္ခာပို့ဆောင်ပြီး ဘားအံဘက်ကနေ  အမည်မသိလက်နက်ကိုင်အဖွဲ့က အခုလို ဖောက်ခွဲဖျက်ဆီးလိုက်တာပါ။

တဝန်ဖန်ကျေးရွာသားတဦးက “ဗုံးပေါက်သံက ရွာကနေ အကျယ်ကြီး ကြားရတယ်။  စစ်ယာဉ်တန်းတွေ ဖြတ်သန်းပြီးလောက်မှာ ဗုံးကွဲတော့ ကားတွေ ထိခိုက်တာမရှိဘူး။ အခုနောက်ပိုင်း ဒီလမ်းကြောင်းကို စစ်တပ်က အသုံးပြုလာတာ များတယ်။ တံတားကတော့ ရစရာမရှိအောင် ပျက်စီးသွားတယ်” လို့ ပြောပါတယ်။

အဆိုပါ ဗုံးကွဲမှုဖြစ်ပွားပြီးနောက် စစ်ယာဉ်တန်းပေါ်ကနေ စစ်ကောင်စီတပ်ဖွဲ့ဝင်တွေက သေနတ်ပစ်ဖောက်ခဲ့သလို စစ်ကောင်စီတပ်ဖွဲ့ဝင်တွေ ရောက်ရှိလာပြီး ဖမ်းဆီးစစ်ဆေးမှာကို ဒေသခံတွေဟာ စိုးရိမ်နေရတယ်လို့ ဆိုပါတယ်။

ပြီးခဲ့တဲ့လက ပေါ့ထော်ကျေးရွာမှာ မိုင်တဲဖုန်းတာဝါတိုင် မီးရှို့ဖျက်ဆီးခံရတဲ့အတွက် စစ်ကောင်စီတပ်နဲ့ရဲတွေက ဒေသခံတချို့ကို ဖမ်းဆီးခဲ့သလို နောင်ကမြိုင်ကျေးရွာလမ်းမှာ ဖြတ်သန်းသွားလာသူတွေနဲ့ ယာဉ်တွေကို တားဆီးစစ်ဆေးနေတာလို့ သိရပါတယ်။

စစ်ကောင်စီက သံလွင်အရှေ့ခြမ်း ဘားအံ-ဝါးဘိုးတော-ဖာပွန် လမ်းကြောင်းကို အသုံးပြုသွားလာရာမှာ တပ်မဟာ ၁၊ တပ်မဟာ ၅ KNLA ပူးပေါင်းတပ်ဖွဲ့တွေရဲ့ မကြာခဏ မိုင်းဆွဲတိုက်ခိုက်ခံရတဲ့အတွက် အခုနောက်ပိုင်း ဘားအံ-မြိုင်ကြီးငူလမ်းကြောင်းကို ပြောင်းလဲအသုံးပြုလာတာပါ။

Photo-CJ

1 month Ago

April 9, 2022

ဘုတလင်မြို့နယ်တွင် ရဲစခန်းတိုက်ခိုက်ခံရ၊ စစ်ယာဉ်တန်း မိုင်းဆွဲခံရ

စစ်ကိုင်းတိုင်း၊ ဘုတလင်မြို့နယ်၊ ကူတော်ကျေးရွာရဲစခန်းကို  ဧပြီ ၈ ရက် ညပိုင်းမှာ ဒေသခံပြည်သူ့ကာကွယ်ရေးတပ်ဖွဲ့က ဝင်ရောက်စီးနင်း မီးရှို့ဖျက်စီးလိုက်တဲ့အတွက် ရဲတပ်ဖွဲ့ဝင်တွေ ထွက်ပြေးတိမ်းရှောင်သွားတယ်လို့  ဒေသခံတွေထံက သိရပါတယ်။

"ည ၉ နာရီလောက်မှာ ပြည်သူ့ကာကွယ်ရေးတပ်က ကူတော်ရဲစခန်းကို မီးရှို့ဖျက်ဆီးတာ။ ရဲတွေကတော့ ထွက်ပြေးသွားလို့ ကာကွယ်ရေးတပ်က အနောက်က လိုက်ပစ်တယ်။ အထိအခိုက်အကျအဆုံးတော့ရှိနိုင်တယ် သေချာတော့မသိဘူး "လို့ ဒေသခံက ပြောပါတယ်။

ရဲစခန်းမီးရှို့ခံရပြီးနောက်  ည ၁၂ နာရီလောက်မှာ စစ်ကောင်စီက ရဟတ်ယာဉ်နဲ့ မိနစ် ၂၀ လောက် လာပစ်ခတ်တဲ့အတွက် ဒေသခံပြည်သူတွေ ထွက်ပြေးတိမ်းရှောင်နေရတယ်လို့ ဆက်လက်ပြောပါတယ်။

ကူတော်ရွာရဲစခန်းကို ဒေသခံပြည်သူ့ကာကွယ်ရေးတပ်တွေက ပြီးခဲ့တဲ့ ဇန်နဝါရီလ မှာ ပထမအကြိမ်ဝင်ရောက်ဆီးနင်းတိုက်ခိုက်ခဲ့ပါသေးတယ်။

အလားတူ စစ်ကိုင်းတိုင်း မုံရွာ နမခကနေ ဘုတလင်မြို့ဘက် စစ်ကူထွက်လာတဲ့ စစ်ကားတွေကိုလည်း မနေ့ညက တကြိမ် ဧပြီ ၉ ရက် ဒီမနက် အစောပိုင်းမှာ တကြိမ် မိုင်းဆွဲတိုက်ခိုက်ခဲ့လို့  စစ်ကား ၄ စီး ပျက်စီးသွားတယ်လို့  ဒေသခံပြည်သူ့ကာကွယ်ရေး စပရိုက်အဖွဲ့ တာဝန်ရှိသူက ပြောပါတယ်။

“ထနှောင်းကုန်းရွာရဲ့ မြောက်ဘက်နားမှာ ကျနော်တို့ မိုင်းဆွဲခဲ့တယ်ဗျ။ ကားနှစ်စီး အရင်မိုင်းဆွဲခဲ့တယ်။ နောက်အလောင်းလာကောက်တဲ့ အချိန်ကားနှစ်စီးကို ထပ်မံဆွဲခဲ့တယ်ဗျ။ မိုင်းကလေးလုံးသုံးခဲ့တယ်ဗျ”လို့ပြောပါတယ်။ 

မိုင်းဆွဲတိုက်ခိုက်ရာမှာ စစ်ကောင်စီဘက်က အကျဆုံးရှိနိုင်တယ်လို့ ဒေသခံတွေက ပြောပေမဲ့ အတည်ပြုနိုင်ခြင်းတော့ မရှိသေးပါဘူး။

မိုင်းဆွဲတိုက်ခိုက်မှုကို Anonymous Hero Guerrilla Force ပြောက်ကျားတပ်ဖွဲ့နဲ့ စပရိုက်ပြောက်ကျားတပ်တို့ ပူးပေါင်းလုပ်ဆောင်ခဲ့တာဖြစ်ပြီး ဘုတလင်မြို့နယ် ပြည်သူ့ကာကွယ်ရေးအဖွဲ့က  လက်နက်ငယ်နဲ့ ပစ်ကူပေးခဲ့တယ်လို့ သိရပါတယ်။

2 months Ago
More News
Up