စစ်ဘေးရှောင်ပြည်သူများ

August 16, 2021

ကျောက်မဲတွင် စစ်ရှောင်ပြည်သူများ အစားအသောက်နှင့် ဆေးဝါး အကူအညီလိုအပ်နေ

ရှမ်းပြည်နယ်မြောက်ပိုင်း ကျောက်မဲမြို့နယ်မှာ တိုက်ပွဲပြင်းထန်လာတာကြောင့် တိမ်းရှောင်နေရတဲ့ ပြည်သူတွေ အစားအသောက်နဲ့ ကျန်းမာရေး ဆေးပစ္စည်းတွေ လိုအပ်နေတယ်လို့ အကူအညီပေးနေသူတွေဆီက သိရပါတယ်။

ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) နဲ့ SSPP/SSA ရှမ်းပြည်မြောက်ပိုင်းတပ်နဲ့ တအာင်းပလောင် (TNLA) ပူးပေါင်းတပ်တို့အကြား ဩဂုတ် ၁၁ ရက်နေ့ကတည်းက တိုက်ပွဲတွေ ပြင်းထန်နေတာကြောင့် ဒေသခံတွေ ထွက်ပြေးနေကြရတာပါ။

ပန်ကွမ်ကျေးရွာ၊ ရွာဟောင်းနဲ့ ပန်ဖြတ်ကျေးရွာ တွေဘက်မှာ ဩဂုတ် ၁၁ ရက်နေ့ လောက်ကတည်းက တိုက်ပွဲဖြစ်ပွားနေတာကြောင့် တိမ်းရှောင်သူတွေ တဖြည်းဖြည်း တိုးလာနေတယ်လို့ နမ့်ခုံးရှမ်းများ ပရဟိတအသင်းဝင်တဦးဖြစ်တဲ့ မနန်းမွေဆိုင်က ပြောပါတယ်။

“ကျောက်မဲကို ပြေးလာတဲ့လူတွေကတော့ တဖြည်းဖြည်း တိုးလာတာပေါ့။ စစချင်းကတော့ ဘုန်းကြီးကျောင်း တစ်ကျောင်းကို လေး၊ ငါး၊ ဆယ်ယောက်ပဲ ရှိတယ်။ နှစ်ရက်က။ အခုတော့ ၉၀ ကျော်လောက် ရှိပြီ။ အဲဘက်ကဆိုရင် နှစ်ရွာ၊ သုံးရွာလောက်ပေါ့နော်။”

စစ်ဘေးရှောင်တွေထဲမှာ သက်ကြီးရွယ်အိုတွေလည်း အများအပြားပါဝင်ပြီး ကျန်းမာရေးဆိုင်ရာ ဆေးပစ္စည်းတွေနဲ့ စားနပ်ရိက္ခာတွေ အဓိက လိုအပ်နေတယ်လို့ စစ်ရှောင်ပြည်သူတစ်ဦးက ပြောပါတယ်။

“အများလိုတာကတော့ စားနပ်ရိက္ခာပေါ့။ အခြေအနေကတော့ ဘယ်လောက်ထိနေရမှာလည်း မသိသေးဘူး။ ပစ်သံတော့ မကြားဘူး။ ဗုံးသံတော့ကြားတယ်။ အခုဆို ရွာထဲမှာ စစ်သားတွေ ရှိထားတယ်လေ။ အိမ်ပြန်လို့ မရဘူး။ လူတွေကလည်း ရောဂါက တစ်မျိုး၊ ဒီလိုမျိုးပြေးရတာက တစ်မျိုး။” 

လောလောဆယ် ကျောက်မဲမြို့နယ်အတွင်း ကျောက်မဲ ၉ တိလင်ရပ်ကွက်မှာ စစ်ဘေးရှောင် ၇၀ ကျော်၊ ၁ ရပ်ကွက်မှာ ၃၀ နီးပါး၊ ပိန္နဲကုန်းမှာ ၈၀ နီးပါး၊ ကောင်းအက်ရွာမှာ ၉ ဦး၊ ၂ ရပ်ကွက်မှာ ၁၀ ဦးကျော်၊ နမ့်စော့ စာသင်ကျောင်းမှာ ၁၀၀ ကျော်၊ မိုင်းတင်းမှာ ၃၀၊ ပြိန်းခါးမှာ ၉ ဦး၊ လွယ်ကုန်မှာ ၈၀ စုစုပေါင်း စစ်ဘေးရှောင် စုစုပေါင်း ၄၂၉ ဦး ရှိတယ်လို့ သိရပါတယ်။

ပြီးခဲ့တဲ့ ဇွန်လဆန်းပိုင်းတုန်းကလည်း RCSS/SSA နဲ့ SSPP/SSA၊ TNLA ပူးပေါင်းတပ်တို့ အကြား တိုက်ပွဲကြောင့် ကျောက်မဲမြို့ထဲက ၂၆၂ ဦးနဲ့ မိုင်းငေါ့က ၄၇၀၊ စုစုပေါင်း ၇၃၂ ဦး ယာယီ တိမ်းရှောင်နေရဆဲ ဖြစ်တယ်လို့ ဆိုပါတယ်။

Pra Jaw

2 months Ago

August 4, 2021

ဝန်ခြုံးကျေးရွာတွင် စစ်တပ်က တပ်စွဲထားသဖြင့် စစ်ရှောင်ပြည်သူများ ရွာမပြန်နိုင်ဘဲ အခက်အခဲ ဖြစ်နေ

မကွေးတိုင်း၊ ပေါက်မြို့နယ်၊ ဝန်ခြုံးကျေးရွာမှာ စစ်ကောင်စီတပ်ဖွဲ့တွေနဲ့ ပျူစောထီးတွေက တပ်စွဲနေထိုင်နေကြလို့ ဒေသခံပြည်သူတွေဟာ တောတောင်တွေထဲက စစ်ဘေးရှောင်စခန်းတွေမှာ နေထိုင်ရေးနဲ့ စားသောက်ရေးအတွက် အခက်အခဲဖြစ်နေကြကြောင်း ဒေသခံတွေဆီက သိရပါတယ်။

“အသက်ကြီးသူတွေ၊ ကလေးတွေပါ စစ်ဘေးရှောင်ကြရတာ။ ရွာမှာ သူတို့က တပ်စွဲထားလို့ ရွာလည်း မပြန်ရဲကြဘူး။ တောထဲမှာပဲ ဖြစ်သလို နေနေကြရတယ်။ မိုးတွင်းဆိုတော့ နေဖို့ကအစ အခက်အခဲရှိတယ်။ အဓိကကတော့ ရိက္ခာပေါ့။ ရိက္ခာကကုန်နေပြီ။ ရွာပြန်ပြီးတော့လည်း သွားမယူရဲကြဘူး။ ကူရာမဲ့နေကြတာပေါ့” လို့ စစ်ဘေးရှောင်ဒေသခံပြည်သူတစ်ဦးက ပြောပါတယ်။

ဝန်ခြုံးကျေးရွာအနီးက ပင်တောင်ကျေးရွာက ပျူစောထီးအဖွဲ့ဝင်တွေဟာ စစ်သား ၄ ယောက်ကို အခကြေးငွေနဲ့ ငှားရမ်းထားတယ်လို့လည်း သိရပါတယ်။

စစ်ဘေးရှောင်တွေအရေး ကူညီဆောင်ရွက်ပေးနေသူတစ်ဦးက “သူတို့ ပျူစောထီးတွေက စစ်သားရှိတယ်ဆိုပြီး မိုက်နေကြတာ။ ပင်တောင်ရွာမှာ အိမ်ခြေ ၂၀၀ လောက်က တစ်အိမ်ကို ၅၀၀၀ စီစုပြီး စစ်တပ်ဆီကနေ စစ်သား ၄ ယောက် ငှားထားတယ်။ အဲဒီစစ်သား ၄ ယောက်နဲ့ ပျူစောထီး ၂၀ လောက်နဲ့က ဝန်ခြုံးရွာကိုလာပြီး တပ်စွဲထားကြတာ။ ရွာထဲကနေလည်း စစ်ဘေးရှောင်တွေနေတဲ့ တောတောင်တွေဘက်ကို လက်နက်ကြီးတွေနဲ့ ပစ်တတ်လို့ ရွာနားကို မကပ်ရဲကြဘူး”လို့ ပြောပါတယ်။

ဇူလိုင်လ ၃၁ ရက်နေ့က စစ်ကောင်စီတပ်သားတွေနဲ့ ပျူစောထီးတွေက ဝန်ခြုံးကျေးရွာကို ဝင်ရောက်ပြီး နေအိမ် ၃ လုံး မီးရှို့ခဲ့ပြီး နေအိမ် ၅၀ နီးပါးကို ဝင်ရောက်ဖျက်ဆီးခဲ့တာကြောင့် ဒေသခံပြည်သူတွေဟာ တောတောင်တွေထဲကို ထွက်ပြေးပြီး စစ်ဘေးရှောင်နေရတဲ့ ဝန်ခြုံး ဒေသခံ ၁၀၀၀ ကျော်ရှိတယ်လို့ ဒေသခံတွေဆီက သိရပါတယ်။

2 months Ago
Up