စစ်တွေမြို့

January 22, 2023

စစ်တွေမြို့ရှိ ကိုးရီးယား(BXT)ဆိပ်ကမ်းတွင် ဗုံးသီး ၁ လုံးတွေ့

ရခိုင်ပြည်နယ်၊ စစ်တွေမြို့ရှိ (BXT)ကိုရီးယားဆိပ်ကမ်းမှာ ဇန်နဝါရီ ၂၁ ရက် ညနေ ၄ ရီခန့်လောက်က မပေါက်ကွဲသေးတဲ့ ဗုံးသီး တစ်လုံးတွေ့ရှိခဲ့ကြောင်း ဒေသခံတွေထံက သိရပါတယ်။

စစ်တွေမြို့ မိဇံရပ်ကွက်ရှိ ကိုးရီးယားဆိပ်ကမ်းခြေမှာ လူငယ်တွေ ဂုံးလိုက်ရှာကြစဥ် ဗုံးသီးတွေ့လို့ ရန်ပြေ၊ မန်ပြေဘုရားကြီး ဂေါပကလူကြီးတွေထံ အသိပေးခဲ့တာဖြစ်ပါတယ်။

စစ်တွေဒေသခံအမျိုးသမီးတစ်ဦးက "လူငယ်တွေ ကမ်းခြေမှာ ဂုံးလိုက်ရှာကြတဲ့အခါတွေ့တာပါ။ သူတို့က ဘုရားလူကြီးတွေကို အကြောင်းကြားပြီး။ ကမ်းကိုတွန်းတင်ခဲ့ကြတာ။ ဘုရားလူကြီးတွေက စစ်တပ်ကိုအကြောင်းကြားခဲ့တာ"လို့ ပြောပါတယ်။

အဆိုပါ ဗုံးသီးမှာ စစ်လက်ကျန်ဗုံးသီးလားအဟောင်းလား၊ လက်ရှိ ဗုံးသီးလားဆိုတာကိုတော့ တာဝန်ရှိသူတွေက ထုတ်ပြန်ပြောကြားခြင်း မရှိသေးပါဘူး။

ဗုံးသီးတွေ့ရှိတဲ့နေရာကို စစ်ကောင်စီတပ်တွေလာရောက် စစ်ဆေးနေပြီး ယူဆောင်သွားရန်ပြင်ဆင်နေတယ်လို့ ဒေသခံတွေက ပြောပါတယ်။

စစ်တွေမြို့ပြ ဖွံ့ဖြိုးတိုးတက်ရေးနဲ့ စစ်တွေဆိပ်ကမ်း သာယာလှပရေးစီမံကိန်းချက်တွေ လုပ်ကိုင်ဖို့ BXT Construction & Development ကိုရီးယားနိုင်ငံကုမ္ပဏီဟာ ၂၀၁၅ ခုနှစ် ဇန်နဝါရီလကစတင်ပြီး ကိုးရီးယား BXT ဆိပ်ကမ်းမှာ လုပ်ကိုင်နေတာ ဖြစ်ပါတယ်။

1 week Ago

January 18, 2023

ပြည်ထဲရေးဝန်ကြီး ဒု-ဗိုလ်ချုပ်ကြီး စိုးထွဋ် စစ်တွေမြို့သို့ ရောက်ရှိနေ

ရခိုင်ပြည်နယ်၊ စစ်တွေမြို့ကို အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် မလာရောက်မီ တရက်အလို ဇန်နဝါရီ ၁၇ ရက် နေ့လယ်က ပြည်ထဲရေးဝန်ကြီး ဒု-ဗိုလ်ချုပ်ကြီး စိုးထွဋ် နဲ့ ပြည်ထဲရေးဒုဝန်ကြီးဟောင်းလည်းဖြစ် ရဲတပ်ဖွဲ့ချုပ် ရဲချုပ်ဟောင်းဖြစ်တဲ့ ဒု-ဗိုလ်ချုပ်ကြီး သန်းလှိုင်တို့ ကြိုရောက်နေတယ်လို့ ပြည်နယ်ကောင်စီ တာဝန်ရှိသူတဦးက အတည်ပြု ပြောပါတယ်။

“မင်းအောင်လှိုင်က ၁၉ ရက်နေ့ စစ်တွေကိုလာမယ်လို့ သိရတယ်။ သူမရောက်မီ ပြည်ထဲရေးဝန်ကြီးနဲ့ ရဲချုပ်တို့က ဒီနေ့ နေ့လယ်ပိုင်းမှာ ကြိုရောက်နေကြတာ” လို့ ပြောပါတယ်။

ဗိုလ်ချုပ်မှူးကြီး မင်းအောင်လှိုင်ဟာ ၂၀၂၀ ရွေးကောက်ပွဲ မတိုင်ခင်မှာပဲ ဒုတိယဗိုလ်ချုပ်ကြီးကျော်ဆွေကို ပြည်ထဲရေးဝန်ကြီးနေရာကနေ ဖယ်ရှားလိုက်ပြီး ဒုတိယဗိုလ်ချုပ်ကြီးစိုးထွဋ်နဲ့ အစားထိုးခဲ့တာပါ။

ဖေဖော်ဝါရီ ၁ ရက်မှာ အာဏာသိမ်းပြီး ဖေဖော်ဝါရီ ၂ ရက်နေ့မှာ ဒုတိယဗိုလ်ချုပ်ကြီး သန်းလှိုင်ကို ပြည်ထဲရေးဒုဝန်ကြီးနဲ့ ရဲချုပ်တာဝန်ကိုပါ ပူးတွဲထမ်းဆောင်စေခိုင်းထားခဲ့တဲ့ လူယုံတွေလည်း ဖြစ်ပါတယ်။ ၂၀၂၂ ခုနှစ် မေလ ၂ ရက်မှာတော့ ဒုဗိုလ်ချုပ်ကြီး သန်းလှိုင်ကို စစ်ဘက်မူလတာဝန်တွေ ပြန်လည်ထမ်းဆောင်စေခဲ့ကာသူ့နေရာမှာ ဗိုလ်ချုပ် ဇင်မင်းထက်နဲ့ အစားထိုးခဲ့ပါတယ်။

စစ်တွေမြို့ကို စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နဲ့ ထိုင်းစစ်ဦးစီးချုပ် ကိုယ်စားလှယ်အဖွဲ့တို့ ဇန်နဝါရီ ၁၉ ရက်နေ့ လာရောက်ကြမှာဖြစ်တဲ့အတွက် စစ်တွေမြို့ရှိ လမ်းဘေးစျေးဆိုင်တွေကို ဖြိုဖျက်ပြီး စစ်တွေလမ်းမကြီးကို အပူတပြင်း နိုင်လွန်ကတ္တရာ ခင်းနေကာ မြို့ပေါ်မှာ လုံခြုံရေးအပြည့် ချထားကြောင်း ဒေသခံတွေက ပြောပါတယ်။

“လောကနန္ဒာပုထိုးတော်ကြီးကို လာရောက်ဖူးမြော်မယ် ထင်တယ်ဗျ။ ဆေးရောင်တွေ အသစ်သုတ်ထားတယ်။ ဘုရားထဲက အဆောင်တွေမှာလည်း စစ်သားရာချီ ချထားတယ်။ လမ်းတွေကိုတော့ ကတ္တရာခင်းလိုခင်း၊ မျဥ်းကြားတွေ ဆွဲလိုဆွဲ အပူတပြင်း လုပ်ဆောင်နေကြတာ တွေ့နေရတယ်။”

စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နဲ့အဖွဲ့ဟာ စစ်တွေကတဆင့် သံတွဲ၊ ကျောက်ဖြူနဲ့ ထိုင်းနိုင်ငံရဲ့ နည်းပညာနဲ့ တည်ဆောက်မယ့် ဂွမြို့နယ်ရှိ လေအားလျှပ်စစ် ထုတ်လုပ်ရရှိနိုင်မှုကို သွားရောက်ကြမယ်လို့ အစိုးရအဖွဲ့နဲ့ နီးစပ်သူတွေဆီက သိရပါတယ်။

ဒါ့အပြင် ရက္ခိုင့်တပ်တော် (အေအေ) ခေါင်းဆောင်တွေနဲ့ စစ်ခေါင်းဆောင်တို့ ဆွေးနွေးဖို့ လာရောက်တာ ဖြစ်နိုင်ကြောင်း ဒေသတွင်း သတင်းတွေ ထွက်ပေါ်နေပါတယ်။

2 weeks Ago
More News
Up