စစ်တပ်ထောက်ခံပွဲ

November 3, 2021

DVB၊ VOA၊ BBC၊ RFA မီဒီယာများကို ဆန့်ကျင်ကြရန် ကျုံပျော်မြို့ စစ်တပ်ထောက်ခံပွဲတွင် လှုံ့ဆော်

DVB ၊ VOA ၊ BBC ၊ RFA စတဲ့ သတင်းမီဒီယာတွေကို  နားမယောင်ဘဲ   ဆန့်ကျင်ကြဖို့  နိုဝင်ဘာ ၃ ရက် ဒီနေ့မနက် ဧရာဝတီတိုင်း ကျုံပျော်မြို့မှာ ပြုလုပ်တဲ့ စစ်တပ်ထောက်ခံပွဲမှာ စည်းရုံးလှုံ့ဆော်  ပြောသွားပါတယ်။ 

စစ်တပ်ထောက်ခံအမျိုးသမီးတဦးက “ဒေါ်လာစားပြီး ပြည်ဖျက်နေတဲ့ မီဒီယာတွေ မရှိဘူးလား။ ဒေါ်လာစားပြီး ပြည်ဖျက်တယ်၊ သတင်းမှန်ကို သတင်းမှား ဖြစ်အောင်လုပ်တယ်။ ကျမတို့ ပြည်တွင်းရေးကို နိုင်ငံတကာ အရေးဖြစ်အောင်၊ ဒေါ်လာစားပြီး ပြည်ဖျက်နေတဲ့ မီဒီယာတွေကိုရော ဆန့်ကျင်ဖို့ မလိုဘူးလား။ VOA ၊ BBC ရန်တိုက်ပေးနေသည်။  RFA ၊ DVB သွေးထိုးနေသည်။ ခလောက်ဆန် အကောက်ကြံ လေလှိုင်းထဲက လူသတ်သမား နားမယောင်လေနဲ့ သတိထား”လို့ စင်မြင့်ပေါ်ကနေ မိန့်ခွန်းပြောရာမှာထည့်သွင်းပြောဆိုသွားပါတယ်။ 

ဒါ့အပြင် မြန်မာနိုင်ငံအတွင်းမှာ အကြမ်းဖက်၊ လူသတ်၊ ဗုံးခွဲမှုတွေကို  NLD က လုပ်ဆောင်နေတာ  ဖြစ်တယ်တယ်လို့လည်း  စစ်တပ်ထောက်ခံသူက စွပ်စွဲပြောကြားလိုက်ပါတယ်။

“PDFဟာ NUG က ပေါက်ဖွားတာ NUG ဆိုတာ CRPH ပေါက်ဖွားလာတယ်။ CRPH ဆိုတာ NLD ပါတီဖြစ်တယ်။ ဒီတော့ မြန်မာနိုင်ငံမှာ အကြမ်းဖက်နေတာ NLD ပါတီဖြစ်တယ်။ ဒီလို အကြမ်းဖက်၊ လူသတ်၊ ဗုံးခွဲနေတဲ့ပါတီကို ဖျက်သိမ်းပေးဖို့လိုတယ်” လို့ ကျုံပျော်မြို့ စစ်တပ်ထောက်ခံပွဲမှာ လှုံ့ဆော်ပြောဆိုခဲ့ပါတယ်။

ပြည်ပနိုင်ငံတွေက မြန်မာ့ပြည်တွင်းရေးကို ဝင်ရောက်စွက်ဖက်တာဟာ ဒီမိုကရေစီနဲ့ လူ့အခွင့်အရေးကို လိုလားလို့ မဟုတ်ဘဲ စစ်တပ်ကို အင်အားနည်းစေချင်လို့ ဖြစ်တယ်လို့ ဆိုပါတယ်။

အောက်တိုဘာလကုန်ပိုင်း  အာဆီယံထိပ်သီးအစည်းအဝေး စတင်ခါနီးအချိန်ကစလို့  မြန်မာပြည်တွင်းက မြို့ကြီးတချို့မှာ အာဏာသိမ်း အကြမ်းဖက်စစ်တပ် ထောက်ခံပွဲတွေကို စစ်ကောင်စီက စီစဉ်ပြုလုပ်နေတာ ဖြစ်ပါတယ်။

ဧရာဝတီတိုင်းက မြို့နယ်တွေမှာ လူ ၅ ဦးထက် ပိုမစုဖို့ အမိန့်ထုတ်ထားသလို၊ စစ်ကောင်စီ ကျန်းမာရေးဌာနက လူ ၁၀၀ ထက်ပိုစုဝေးပါက အရေးယူမယ်လို့  အမိန့်ထုတ်ထားပေမဲ့ အကြမ်းဖက်စစ်တပ် ထောက်ခံပွဲတွေကိုတော့ လူအင်အားအများအပြားနဲ့ ပြုလုပ်နေတာ ဖြစ်ပါတယ်။

3 months Ago

November 1, 2021

သာယာဝတီ စစ်တပ်ထောက်ခံပွဲ နေ့တွက်ခ ၁၅၀၀၀ ကျပ်ပေးခေါ်၊ လက်ပံတန်း၌ ဗုံးကွဲ

ပဲခူးတိုင်းအနောက်ခြမ်း၊ သာယာဝတီမြို့မှာ အောက်တိုဘာ ၃၁ ရက် နေ့၊ မနက်ပိုင်းကပြုလုပ်တဲ့ စစ်တပ်ထောက်ခံပွဲမှာ ပါဝင်သူတွေကို နေ့ထွက်ခ ငွေကျပ် ၁၅၀၀၀ ပေးပြီး ခေါ်ယူတယ်လို့ သိရပါတယ်။

အဆိုပါ ထောက်ခံပွဲမှာ ပါမယ့်သူတွေကို ပွဲစီစဉ်မယ့်ရက်ထက် ၂ ရက်လောက်စောကာ ငွေပေးခေါ်ဆောင်ထားတာလို့ ဒေသခံတွေဆီက သိရပါတယ်။

ထောက်ခံဆန္ဒပြပွဲမှာ ပါဝင်ခဲ့သူတဦးက “ပွဲထဲရောက်မှမေးကြည့်တော့ ၁၅၀၀၀ ရတဲ့သူရတယ်။ ၁၀၀၀၀ ရတဲ့သူရတယ်။ ပေးတာမညီလို့ ပွဲလည်းပြီးရော ပြဿနာတက်ကြသေးတယ်။ ပွဲကိုလာတဲ့သူတွေကလည်း မြို့ခံတွေနည်းတယ်” လို့ ပြောပါတယ်။

အဆိုပါစစ်တပ်ထောက်ခံပွဲမှာ လူအင်အား ၂၀၀ ကျော်လောက်သာရှိပြီး မြို့ခံပြည်သူ ပါဝင်မှုနည်းပါးကာ အခြားနေရာတွေက လာရောက်သူတွေ၊ အရပ်ဝတ် စစ်သားနဲ့ ရဲတွေ စတာတွေ များတယ်လို့ ဒေသခံတွေဆီက သိရပါတယ်။‌

“သူတို့က NUG ဘာဖြစ်တယ်။ PDF ဘာဖြစ်တယ်။ NLD ဘာဖြစ်တယ်လို့ လျှောက်အော်ပြီး သင်ထားတဲ့အတိုင်းအော်ပြီး လောကနန္ဒာဘုရား ရှေ့ကစထွက်တယ်။ သာယာဝတီခရိုင် ဘောလုံးကွင်းမှာ လက်ပံတန်း မဘသဘုန်းကြီးက စင်ပေါ်တက်ပြီး စစ်တပ်ကောင်းကြောင်း ပြောတယ်ပေါ့ဗျာ” လို့ မြို့ခံတဦးက ပြောပြပါတယ်။

အဆိုပါ ထောက်ခံပွဲအတွင်း ပါဝင်ကြတဲ့ အရပ်ဝတ်စစ်သားနဲ့ရဲသားတွေပါဝင်ကာ လက်နှက်တွေကိုဖွက်ပြီးယူဆောင်လာကြတာ တွေ့ရပြီး အရပ်ဝတ်၊ ယူနီဖောင်းဝတ် စစ်သား၊ ရဲနဲံ ပျူစောထီအဖွဲ့ဝင်တွေကလည်း မြို့ပေါ်ကလမ်းဆုံတွေမှာ လုံခြုံရေးယူထားတာတွေ့ရတယ်လို့ မြို့ခံတွေက ပြောပါတယ်။

လက်ပံတန်းမြို့မှာ အောက်တိုဘာ ၃၁ ရက်နေ့ည ၈ နာရီဝန်းကျင်က မြို့နယ်ပြည်ခိုင်ဖြိုးရုံး၊ မြို့နယ်ပညာရေးမှူးရုံး၊ ငါးမွေးမြူရေးရုံးတွေရှိတဲ့လမ်းထဲမှာ ဗုံး ၁ လုံး ပေါက်ကွဲခဲ့တယ်လို့ သိရပါတယ်။

ဗုံးပေါက်ကွဲမှုကြောင့် ထိခိုက်ပျက်စီးမှုအခြေအနေကို မသိရှိရသေးတဲ့အပြင် ဗုံးဖောက်ခွဲမှုကို မည်သည့်အဖွဲ့အစည်းက ပြုလုပ်ကြောင်း ထုတ်ပြန်ထားတာလည်းမရှိသေးပါဘူး။

3 months Ago

မအူပင်မြို့က စစ်တပ်​ထောက်ခံပွဲလုပ်မည့်​နေရာတွင် ဗုံး​ပေါက်ကွဲ

ဧရာဝတီတိုင်း မအူပင်မြို့မှာ နို၀င်ဘာ ၁ ရက်​​နေ့ အကြမ်းဖက်စစ်တပ် ​ထောက်ခံပွဲပြုလုပ်မယ့်နေရာမှာ ​အောက်တိုဘာ ၃၁ ရက်​ည ၆ နာရီ​ကျော်က ဗုံး​ပေါက်ကွဲ​တယ်လို့ သိရပါတယ်။

မအူပင်မြို့ဘက် တံတားအဆင်းမှာ မနေ့ည ၆:၃၅ မိနစ်လောက်က ဗုံးပေါက်ကွဲမှုဖြစ်ပွားခဲ့သလို ​မနက်ပိုင်းက အဲဒီ​နေရာမှာ ဗုံး၂ လုံး​ပေါက်ကွဲခဲ့​တယ်လို့ သိရပါတယ်။

ဒီဖောက်ခွဲမှုကို မအူပင် PDF  တပ်ဖွဲ့ခွဲတစ်ခု ဖြစ်တဲ့ ရေဝတီရဲ့စေတမန်အဖွဲ့က ဖောက်ခွဲခဲ့တာလို့ သိရပါတယ်။

စစ်တပ်ထောက်ခံပွဲပြုလုပ်မယ့်နေရာအနီး ပေါက်ကွဲခဲ့တာဖြစ်ပြီး စစ်ကောင်စီတပ်သားတွေ စစ်​ဆေးမှုတွေ ပြုလုပ်​နေ​တယ်လို့ သိရပါတယ်။ ဗုံးပေါက်ကွဲမှုကြောင့် ထိခိုက်ဒဏ်ရရမှု ရှိမရှိကိုတော့ မသိရသေးပါဘူး။

မအူပင်မြို့မှာ ​အောက်တိုဘာလ​နောက်ဆုံးအပတ်အတွင်း ဗုံး​ပေါက်ကွဲမှုတွေနဲ့ ဒလန်းရှင်းလင်းမှုတွေ ဆက်တိုက်ဖြစ်ပွားခဲ့ပါတယ်။

3 months Ago
Up