စစ်တပ်က ဖမ်းဆီးသတ်ဖြတ်

November 19, 2021

စစ်တပ်က ဖမ်းဆီးသတ်ဖြတ်ခဲ့သည့် ကလေး PDF ရဲဘော် ၃ ဦး ရုပ်အလောင်း တွေ့ရှိ

စစ်ကိုင်းတိုင်း၊ ကလေးမြို့နယ်မှာ စစ်ကောင်စီတပ်က ဖမ်းဆီးသတ်ဖြတ်ခဲ့တဲ့  PDF ရဲဘော်အမျိုးသား ၂ ဦးနဲ့ အမျိုးသမီး ၁ ဦးတို့ရဲ့ ရုပ်အလောင်းကို နိုဝင်ဘာ ၁၈ ရက်နေ့ ပြန်လည်ရရှိခဲ့တယ်လို့ ကလေး PDF က ထုတ်ပြန် ပါတယ်။

ကလေးမြို့နယ်အနောက်တောင်ပိုင်းမှာ  တပ်ဖွဲ့ဝင်ဦးရေ ၂၀ ကျော် စခန်းချနေထိုင်တဲ့ PDF (Kalay) တပ်ရင်း ၃ အောက်က တပ်ခွဲတစ်ခုရဲ့ စခန်းတစ်ခုကို နိုဝင်ဘာ ၁၆ ရက် မနက် ၈ နာရီကျော်လောက်မှာ စစ်ကောင်စီတပ်က  လက်နက်ကြီး၊ လက်နက်ငယ်တွေနဲ့ ပစ်ခတ်ပြီး  ဝင်ရောက်စီးနင်း သိမ်းပိုက်သွားခဲ့တာလည်း ဖြစ်ပါတယ်။

သိမ်းပိုက်ခံခဲ့ရတဲ့ တပ်ခွဲငယ်စခန်းကို PDF (Kalay) က မနေ့ညနေပိုင်း သွားရောက်ရှင်းလင်းရာမှာ စစ်ကောင်စီတပ်ဖွဲ့က ညှဉ်းပန်းသတ်ဖြတ်ထားတဲ့ ရဲဘော် ၃ ဦး အလောင်းကို တွေ့ရှိခဲ့တာလို့ ဆိုပါတယ်။

ဒီလို စီးနင်းသိမ်းပိုက်ခံရတဲ့အတွက် စခန်းရှိ အမျိုးသား ၂ ဦး၊ အမျိုးသမီး ၁၀ ဦး စုစုပေါင်း တပ်ဖွဲ့ဝင် ၁၂ ဦးကို ဖမ်းဆီးသွားခဲ့ပြီး အဖမ်းဆီးခံရသူအများစုဟာ တပ်ရင်း ၃ Medical Team ဆေးတပ် အဖွဲ့ဝင်တွေဖြစ်တယ်လို့ သိရပါတယ်။

ဒါ့အပြင် နိုဝင်ဘာ ၁၈ ရက် မနက် ၁၀ နာရီမှ ၁၂  နာရီအထိ နဂါးပွက်ရွာမှာ တိုက်ပွဲဖြစ်ပွားခဲ့ပြီး မွန်းလွဲပိုင်းမှာတော့  PDF (Kalay) တပ်ဖွဲဝင်တွေအနေနဲ့ ဖမ်းဆီးခံဆေးတပ်ဖွဲဝင်တွေအပေါ် ထိခိုက်နိုင်တဲ့ အခြေအနေကြောင့် တပ်ဆုတ်ခွာခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

1 year Ago

September 16, 2021

တွံတေးမြို့နယ်တွင် ပြည်သူ ၂ ဦးကို စစ်တပ်က ဖမ်းဆီးသတ်ဖြတ်

ရန်ကုန်တိုင်း၊ တွံတေးမြို့နယ်မှာ ပြည်သူ ၂ ယောက်ကို စစ်တပ်က ဖမ်းဆီး ပစ်ခတ်သတ်ဖြတ်လိုက်တယ်လို့ ဒေသခံတွေက ပြောပါတယ်။

ဘီခိုရွာက ကိုသက်လွင်ဦးနဲ့ ကိုလူအေးတို့ကို စက်တင်ဘာ ၁၄ ရက် ညနေပိုင်းက စစ်တပ်နဲ့ ရဲတွေက လာရောက်ဖမ်းဆီးတာမှာ တယောက်ကို သေနတ်နဲ့ ပစ်သတ်ခဲ့တာပါ။

“ရွာက စစ်ကောင်စီခန့် အုပ်ကြီးက လူမှုရေးပြဿနာ အရင်က တက်ဖူးတာကို အခု အုပ်ကြီးဖြစ်တော့ PDF ဆိုပြီး စစ်တပ်ကို ခေါ်ဖမ်းခိုင်းတာ။ ကိုသက်လွင်ဦးက ပရဟိတလုပ်တယ်။ သူ့အိမ်ရှေ့ကနေ ဆဲဆိုပြီး အဖမ်းခံဖို့ပြောတော့ အိမ်ရဲ့နောက် ဝါးခြံထဲကို ထွက်ပြေးတာကို လိုက်ပစ်တာ။ ၃ ချက်ထက်မနည်းထိပြီး နေရာမှာပဲ သေဆုံးသွားပါတယ်” လို့ ဒေသခံတယောက်က ပြောပါတယ်။

နောက်ထပ် ပရဟိတလုပ်တဲ့ လူငယ် ကိုလူအေးကိုလည်း ဖမ်းသွားရင်း စက်လှေပေါ်မှာ သတ်လိုက်တယ်လို့ ဆိုပါတယ်။

“ဆေးရုံရင်ခွဲရုံမှာ အလောင်း နှစ်လောင်းရောက်နေတယ်။ ကိုလူအေးကိုတော့ အိမ်ကနေ ဖမ်းသွားတာ။ လမ်းမှာ သတ်ပစ်တာ” လို့ ဒေသခံတယောက်က ပြောပါတယ်။

တွံတေးမြို့ပေါ်ကနေ စက်လှေ ၅ စီးနဲ့ စစ်သား ၁၇ ယောက်၊ ရဲ ၅ ယောက်လာကြတာလို့လည်း ဒေသခံတယောက်က ပြောပါတယ်။ 

တွံတေးမြို့နယ်က သေဆုံးသွားသူတွေရဲ့ အလောင်းကိုလည်း ဒီနေ့အထိ ပြန်မရသေးဘူးလို့ ပြောပါတယ်။

1 year Ago
Up